هي مش كلمه صايع كانت شتيمة زمان ؟

[hend]

هى مش كلمة صايع كانت شتيمة زمان؟؟!






حذرنا الكبار – واحنا لسة عيال – من خطورة أن نصبح ((عيال صايعة )) فعندما تتأخر فى العودة إلى المنزل بعد المدرسة يتم أستقبالك بسؤال ((كنت فين يا صايع لحد دلوقتى ؟)) وعندما يكون الزرار العلوى للقميص مفتوحاً ((ماتفتحش صدرك زى العيال الصايعة )) وكان هناك ارتباطاً وثيقاً بين الصياعة والتدخين والوقوف على النواصى ومعاكسة البنات ووضع الايدى فى الجيوب أثناء الكلام مع الاب وشرب القهوة ومتابعة المشاهد الساخنة فى الافلام والكلام فى التليفون بالساعات والرد على الكبار بأسلوب غير مهذب والتزويغ من المدرسة والرسوب فى نهاية العام .



وكأن لقب ((صايع)) لقباً مخيفاً نهرب منه (( وهو الواحد اية غير سمعة وشوية حاجات فوق بعض )) وكنا نحرص على الابتعاد عن أى شخص يحمل لقب ((صايع)) علشان الواحد ما ((يتشبهش)) .ولكن بمرور الوقت حدثت طفرة لم تعد كلمة صايع شتيمة بل اصبحت وساماً يضعه الاخرون على صدر كل من يحوز إعجابهم ولم يعد الصايع هو الشخص ((اللى مش متربى قليل الادب اللى بيسقط دايماً وقاعد طول النهار على النت وبيعلى صوتة على أهلة وبيسرق فلوس من ورا أهله علشان يجيب سجاير )) هذا الشخص مابقاش أسمة صايع بقى اسمة ((مغفل)).وأصبح الشخص الصايع هو الشخص الناجح القادر على أثارة إعجاب الناس من حوله الشخص القادر على أنتزاع تصفيقهم وأصبح ((الصايع)) هو النموذج والقدوة والمثل الاعلى أحيانا .ولقب ((صايع )) لم يعد أيضاً مقصوراً على الاشخاص فقط فهناك أشياء كثيرة ممكن تقول عليها صايعة جهاز الموبايل اللى فية كل الامكانيات اللى محتاجها واللى بتحلم بيها .. يبقى موبايل صايع .


ممكن تلاقى جون ((صايع)) عبارة عن جمله بين 3 لاعبين سريعة ورشيقة وغير متوقعة .




ممكن تشوف فيلم نهايته غير متوقعة ولما تمر فى خيالك تبقى نهاية صايعة والسيناريست اللى كتب الفيلم سيناريست صايع.


وممكن تلاقى بلد يتقال عليها ((بلد صايعة)) زى الصين اللى قدرت إنها تخترق مصر بمنتجاتها ويبقالها فى كل بيت مصرى 20 منتجاً على الاقل وبالتالى يمكنك أن تقول إن

((الصين دول صايعيين قوى )).


لم يعد لقب صايع مزعجاً مثل لقب ((عنده إيدز )) ولكن صايع أصبح وسام شرف مساو فى قوتة لوسام ال "iso 9001 "



ولا اعرف ماذا حدث بالضبط وغير سمعة الكلمة 180 درجة .. غالباً هى دى الصياعة !

أستطيع الان وأنا ضميرى مستريح أن أشجعك على أن تكون ((صايع )) بالمعنى الجديد للكلمة .. للصياعة بمفهومها الجديد

أداب يجب الالتزام بها حتى تستحق اللقب





1 . الصايع عمره مايقول على نفسة أنا صايع عمرك شفت واحد ذكى ماشى يقول للناس ((أنا ذكى يا جماعة )) ؟2 . الصايع يكرة الفهلوة لان الفهلوة سرقة ومجرد أستغفال للناس , الصايع يحترم ذكاء الاخرين .




3 . الصياعة تعتمد على الثقافة العامة فى كل المجالات يكفيك أن تعرف

((حاجة عن كل حاجة )).




4 . الحظ قد يقودك إلى القمة والصياعة أن تحافظ عليها .




5 . الصياعة أن بالك يبقى طويل وماتبدأش بالغلط وماتردش على اللى بيستفزك إنك تسامح الشخص اللى تقدر تنتقم منه بسهولة .




6 . الصياعة إنك ماتكررش نفس الغلطة مرتين .

7 . الصياعة إنك تدى كل واحد حقة وتعرف قيمة اللى قدامك بالضبط .





8 . الصياعة أنك تبقى فاهم كويس إنه - مش مهم إنك تغير الكون .. المهم إنك تخلى الكون ما يغيركش .




- الحب اللى بيجى بسرعة لازم يروح بسرعة .




- الاحمق هو الشخص اللى لسانة أسرع من عقلة .




- أستمتع بالحاجات الصغيرة بكرة هتعرف إنها كانت كبيرة .




- اتعلم تضحك على مشاكلك وأنت عمرك ما هتبطل ضحك .




- الخط المستقيم أقصر طريق بين نقطتين والابتسامة أقصر طريق بين شخصيين .


- الصبر .. هو الحاجة الوحيدة اللى لازم تستعجل وأنت بتتعلمها .




- وجودك فى الحياة هدية ماحدش يقدر يقدمهالك غير ربنا وفية ناس كتير بتيجى لهم هدايا قيمة الشاطر هو اللى يعرف يستفيد من الهدية اللى جت له .




- كل حاجة فى الدنيا فيها شئ جميل بس مش أى حد يقدر يشوفة .




- مش كل مرة تتعب فيها هتوصل للى أنت عايزة بس عمرك ماهتوصل للى انت عايزة من غير ما تتعب .




- الفهلوة سرقة .. خد بالك مفيش طريق مختصر للمكان اللى يستحق إن الواحد يروحه .




- حياتك فيلم واللى حواليك بيلعبوا أدوار الأب والأم والجار والصديق بس أنت بطل الفيلم .. حاول دايماً تتصرف زى الابطال.




- أخطر عيب فى البنى أدم إنه ما يشوفش فى الناس غير عيوبهم .




- الصديق الجيد هو الهدية الوحيدة اللى الواحد بيقدمها لنفسه بنفسه .




- الصديق الكويس هو اللى يبقى عارف كل عيوبك ومع ذلك بيحبك .




- أول خطوة فى النجاح إنك تعرف إنت عايز إية .



- ابتسامتك فى وش أى حد هتخليه صعب إنه يكرهك .




- مش مهم أن الناس بتحبك المهم أنك تحب كل الناس .




- عمرك ما هتعرف قيمة الميه من غير ما تعطش وعمرك ما هتعرف الصح من غير ما تغلط .




- مش أى هدية ينفع تقبلها .




- ماتسيبش الريموت كنترول فى إيد حد إلا لو كنت بتثق فيه.




- ماتصدقش اللى يقولك ((هى كده)) أو ((هى ما تتعملش غير كده )) كل الحاجات ينفع تفكر فيها من أول وجديد حتى لو قالوا لك دى ثوابت .. وخليك فاكر أن السباحة لو كانت بتخسس – زى ما بيقولوا – كان الحوت بقى سمكة زينة من زمااااان.




- مافيش حاجة اسمها حظ والمحظوظ هو مجرد شخص عارف هو عايز إيه وبيقدر يستغل كل الحاجات اللى بتقابله فى السكة لمصلحة الحاجة اللى هو عايزها .




- أوحش حاجة إنك تكون مابتعملش حاجة لأنة هيبقى صعب تعرف هتخلص أمتى .




- الوقت اللى هتضيعة فى التفكير فى الحاجات اللى نقصاك المفروض تديه للتفكير فى الحاجات اللى عندك .




- الخبرة هى الحاجة الوحيدة المفيدة فى الفشل .




- العقل زى الباراشوت .. مابيشتغلشى غير لما يتفتح

منقول

[وائل المصري]

بالفعل كل الكلام ده مظبوط وعودا احمد للسيده هند وعقبال ما تعود للكتابه في قسمها الاصلي السياسه.
مع تحياتي وائل المصري.

[نيهال]

معاكى ان فيه حاجات كتير اتغيرت
بس المبادئ ما بتتجزء
ولسه الكلمه وقعها كيف ما اتربينا عليها
حتى ما بعرف انطقها
صعبه قوى.....

ما باك باللقب ككل مش النطق فقط
كيف يكون الانسان كده او يتطبع بالاخلاق دى..........ربنا يهدى الجميع

[amr_miza1]

هههههههههههههههههههه والله عندك حق يا هند .. الصياعة بقى ليها مدلولات كتيرة اوى
ربما تكون مدلولات تدل على الذكاء والحكمة ..
لما حد يجيب التايهة ويحل مشكلة عويصة كثيرا ما يقال له " يا صااايع " وكأنها وسام على صدره

ولكن دعينى اقول ان المسميات باتت تختلف باختلاف الوقت والزمن
والمجتمع له اليد العيا فى تغيير مدلولات المصطلحات دى ..

شكرا هند للموضوع الجميل

[فارس اصيل]

احتمال
اما انا حتى الان لا احب هذه الكلمه
ولا احب ان يصفنى بها احد

[مستر كاراتيه]

بجد جمييييييييييييييل جدا موضوعك يا فندم
حضرتك والله عرفتى تنقى موضوع لامس المجتمع
انا فاكر اول مره حد قالى الكلمه دى كانت والدتى كنت صغير فى اعداداى تقريبا
بجد بكيت كتير اوى ان امى قالت عليا كده علشان قصه شعر كنت انا عاملها
كانت قد ايه الكلمه صعبه وقتها ... بس للأسف وقتها
دلوقتى بقى الكلام ده عادى جدا جدا جدا وللاسف من البنات زى الولاد بالضبط
من خلال شغلى بيضطرنى كتير انى اتعامل مع بنات كتيره جدا ..بلاحظ على تصرفاتهم ان سنه بعد سنه اسلوب الكلام بيكون ادنى من المستوى الأدبى والمشكله ان لاكل شيفين ان ده عادى
وخليك كول يا مان وعيش الحياه وكده فاهمانى انتى اكيد واكيد عارفه ايه اللى بيتقال انتى بس اتكلمتى عن كلمه واحده... لسه عاوزين نفتح قاموس جديد ونعمل معجم جديد للغه الجديده
العربيه العاميه ولا مش عارف اسميها ايه

اما بالنسبه للنصايح اللى كاتباها دى بجد غايه فى الروعه بجد
انا واحده واحده كده معاها بحاول اطبقها على نفسى

دمتى لى بطيبه وود واحترام

[توتى3000]

معاكى حق ياهند والله ده الوقتى الصايع ده دلوقتى هو اللى بيكون الشاب الروش اللى محصلش ويفرح اوى لو الناس قالتله ياصايع لانها عنده بتعنى حاجات كتير اوى ولازم يثبت للناس انه صايع كانها نعمه ربنا يهدى

[hend]

المشاركة الأصلية بواسطة وائل المصري

بالفعل كل الكلام ده مظبوط وعودا احمد للسيده هند وعقبال ما تعود للكتابه في قسمها الاصلي السياسه.
مع تحياتي وائل المصري.

اشكرك اخى على تشريفك وتعليقك

[hend]

المشاركة الأصلية بواسطة نيهال

معاكى ان فيه حاجات كتير اتغيرت
بس المبادئ ما بتتجزء
ولسه الكلمه وقعها كيف ما اتربينا عليها
حتى ما بعرف انطقها
صعبه قوى.....

ما باك باللقب ككل مش النطق فقط
كيف يكون الانسان كده او يتطبع بالاخلاق دى..........ربنا يهدى الجميع

اكيد صعبه الكلمه بس واضح انها مش صعبه على الجميع
الف شكر على تفاعلك وتشريفك

[hend]

المشاركة الأصلية بواسطة amr_miza1

هههههههههههههههههههه والله عندك حق يا هند .. الصياعة بقى ليها مدلولات كتيرة اوى
ربما تكون مدلولات تدل على الذكاء والحكمة ..
لما حد يجيب التايهة ويحل مشكلة عويصة كثيرا ما يقال له " يا صااايع " وكأنها وسام على صدره

ولكن دعينى اقول ان المسميات باتت تختلف باختلاف الوقت والزمن
والمجتمع له اليد العيا فى تغيير مدلولات المصطلحات دى ..

شكرا هند للموضوع الجميل

اكيد احنا السبب فى هذا التغيير
يعنى مش مفروض علينا
بس ياترى هنعرف نتصدى ولا هنمشى مع التيار
الف شكر على تشريفك موضوعى
دمتى بودّ

[hend]

المشاركة الأصلية بواسطة فارس اصيل

احتمال
اما انا حتى الان لا احب هذه الكلمه
ولا احب ان يصفنى بها احد

ولا اعتقد انه يوجد انسان طبيعى يقبلها او يقبل ان يوصم بها من قبيل الهزار

الف شكر اخى على تشريفك وتفاعلك فى الموضوع دمت بودّ

[hend]

المشاركة الأصلية بواسطة مستر كاراتيه

بجد جمييييييييييييييل جدا موضوعك يا فندم
حضرتك والله عرفتى تنقى موضوع لامس المجتمع
انا فاكر اول مره حد قالى الكلمه دى كانت والدتى كنت صغير فى اعداداى تقريبا
بجد بكيت كتير اوى ان امى قالت عليا كده علشان قصه شعر كنت انا عاملها
كانت قد ايه الكلمه صعبه وقتها ... بس للأسف وقتها
دلوقتى بقى الكلام ده عادى جدا جدا جدا وللاسف من البنات زى الولاد بالضبط
من خلال شغلى بيضطرنى كتير انى اتعامل مع بنات كتيره جدا ..بلاحظ على تصرفاتهم ان سنه بعد سنه اسلوب الكلام بيكون ادنى من المستوى الأدبى والمشكله ان لاكل شيفين ان ده عادى
وخليك كول يا مان وعيش الحياه وكده فاهمانى انتى اكيد واكيد عارفه ايه اللى بيتقال انتى بس اتكلمتى عن كلمه واحده... لسه عاوزين نفتح قاموس جديد ونعمل معجم جديد للغه الجديده
العربيه العاميه ولا مش عارف اسميها ايه

اما بالنسبه للنصايح اللى كاتباها دى بجد غايه فى الروعه بجد
انا واحده واحده كده معاها بحاول اطبقها على نفسى

دمتى لى بطيبه وود واحترام

هههههه
الحمدلله انى افدت حد
بجد انا شايفه ان النصايح كويسه جدا للكل مش لشخص بعينه
الف شكريااخى على تشريفك موضوعى
والف شكر على ردك وتفاعلك مع الموضوع وجميل انه عجبك

[hend]

المشاركة الأصلية بواسطة توتى3000

معاكى حق ياهند والله ده الوقتى الصايع ده دلوقتى هو اللى بيكون الشاب الروش اللى محصلش ويفرح اوى لو الناس قالتله ياصايع لانها عنده بتعنى حاجات كتير اوى ولازم يثبت للناس انه صايع كانها نعمه ربنا يهدى

انا الحمدلله لسه ما حصلتش على هذه النعمه
بس الموضوع هنا فعلا بيثير تساؤلات عن اعطاء اشياء غير مسمياتها
وهل فعلا هذه التغييرات تمثل خطورة على الشعب المصرى ام لا
الف شكر اختى على تفاعلك وردك
شرفتى موضوعى
دمتى بود|ّ اختى فى الله