ألمقهى السياسى ..كلام حر جدا

[hassan omran]

هذا المقهى أدارة المعلم ( فحمه )
وعشان تتعرفوا ليه المعلم أسمه فحمه
يعنى بيفحم أى حد
م الحكومه م السلطه يعنى المعلم ما يهموش
حتى بوش أو كازوش أو حسنوش أو بشاروش

ممنوع التدخين أو سب المله أو الدين
أتكلم الكلام حر ومعلهوش جمرك
كلمتين وبس
قفشة حلوة
نكته
بيتين من الشعر
خاطرة هفت فى دماغك
بوزن من غير وزن
لو أختلافنا نوزن بره
وآخر شرط اللى حيقعد راح يطلب
واللى مش عاجبة يبعد
للعلم بالشىء

هذا المقهى أفتتحته لمدة أربع سنوات
على أحدى المنتدايات عندى أسمه
ولما أستظرف بعض الأعضاء وتطاولوا
على المصريين أغلقته وراسلتنى أدارة
المنتدى أكثر من مرة لآفتتاحه ولكنى رفضت
وجميع المراسلات موجوده عندى مع الأعتذار
وشطب بعض الأعضاء
وبعد مرور سنه قررت أفتتاحه على هذا المنتدى الرائع
وبأمكان أى عضوين أن يتناقشوا فى موضوع واحد
مع تحياتى أخو الجميع
.....................................حسن عمران



أول الأستفتاح

والله يا خويا كل شى بييجى مكتوب عليه
أنتهاء الصلاحية إلا الريس صلاحيته للأبد
* أمال طلعونا معاش لية
علشان آخر صلاحيتنا 60
* طب وطى صوتك لا المدام تسمع
ليه
* بعدين ننام فى الشارع
ما هو لو كل الرجاله تنتهى صلاحيتهم
* ياه دا كان زمان الشارع أتملا رجالة
أقفل يا عم لحد يسمع
* أشرب الشاى أشرب
..................................حسن عمران

[بنت فلسطين]

ههههه مبروك افتتاح القهوة

ان شاء الله تكون خير عليك ... مش توديك لمكان تاني يعني

لي عودة ان شاء الله

[hassan omran]

المشاركة الأصلية بواسطة بنت فلسطين

ههههه مبروك افتتاح القهوة

ان شاء الله تكون خير عليك ... مش توديك لمكان تاني يعني

لي عودة ان شاء الله

مادام أنتى أول واحده تهنى يا بنت فلسطين

كل طلباتك مجانا على حساب المعلم

ومنتظرينك تدردشى

المقهى عائلات ( حريم ورجال )

تحياتى

....................حسن عمران

[hassan omran]

المعلم بيكلم نفسه

ماأظنش أن الريس راكب دماغة وواكل فحلين بصل وضارب له طبق فول
بالزيت الحار قفلت معاه وبطل يسمع وكل ده جاى على دماغ المصريين
يا ريس عايزين نيو لوك للدستور...واللهى ما أنا مغير عاجبنى شكله كده
يا ريس عايزين أنتخابات... أنتوا خبتو على كبر والسبب اللى بينوركــم
ياريس البلد ضاعت و جاعت...أستحملوا مفيش أحسن من الرجيم حد لاقى
يا ريس البلد مرضت وتعبت...يعنى حاتموتوا ناقصين عمرلكل أجلا كتاب
يا ريس البلد أتملت بطاله...شعب فقرى حد يكره الراحه والنوم
يا ريس التعليم نايم فى الحضيض...محدش يصحيه هو أنا ناقص
ياريس مصر متنفعش تتورث...أبنى معاه أعلان وراثه رسمى
يا ريس أنت مش عارف تسوق البلد...لكن تعرف تسوق الهبل على الشيطنه
هأهأهأهأهأهــــــــاى
كده يبقى مفيش فايده

آيه ده أنا بكلم نفسى
كويس ما حدش شافنى كان قال
المعلم أتجنن

.......................حسن عمران

[BATISTA]

مبارك افتتاح القهوة

لالالالا نقول اية غير مبارك

نايس توبك وان شاء الله يكون فى مناقشات جادة بين الاعضاء بدون التدخل فى الديانات والتعصب الطائفى


لى عودة ان شاء الله

كاس الامم شاغلنى اليوم دول


بس اوعدك لى زيارة قريبة

[hassan omran]

المشاركة الأصلية بواسطة BATISTA

مبارك افتتاح القهوة

لالالالا نقول اية غير مبارك

نايس توبك وان شاء الله يكون فى مناقشات جادة بين الاعضاء بدون التدخل فى الديانات والتعصب الطائفى


لى عودة ان شاء الله

كاس الامم شاغلنى اليوم دول


بس اوعدك لى زيارة قريبة

يا أعز الرجال
أنت شريكى فى المقهى
هذا للعلم
وبعدين لازم تزيع ملخص أخبار البطولة
أنت عايز الزباين تهرب
ويتخرب بيتى
مع تحيات المعلم باتيستا والمعلم فحمة
المعلمة مفتوحة يا رجاله للتناوب على أدارة المقهى
ومطلوب معلمة للمقهى مش معلمة تدى دروس
المعلم كبر ولسة كان بيكلم نفسه من شو ية
تحياتى
........................حسن عمران

[koko15]

مبروك على افتاح القهوة بس قولى عندكو كابتشينو ولا لاء سورى دا مشروبى المفضل ولنا عودة لما نشوف اخرتها معاك نتقابل فى المعتقل مع بعض هههههههههههههههه فكرة جميلة جدا وهشارك قريب اوى

[hassan omran]

المشاركة الأصلية بواسطة koko15

مبروك على افتاح القهوة بس قولى عندكو كابتشينو ولا لاء سورى دا مشروبى المفضل ولنا عودة لما نشوف اخرتها معاك نتقابل فى المعتقل مع بعض هههههههههههههههه فكرة جميلة جدا وهشارك قريب اوى

حبيبتى كوكو

عندنا كبتشينوا علشان خاطر عيونك

وبعدين دا سهل خالص

نجيب الكاب ونحط عليه شينوا

ونعد نقلب نقلب الكلام فى راسنا

لحد ما يتلخبط على بعضه ويبقى كابتشينوا

منتظرينك وعندنا مشروب جديد أسمه حلابسه

وعينابسه وقهابسه وقصا بسه

مستنين دردشتك

أنشا الله عن الكوسة فى الوظائف الحكومية

تحيات المعلم فحمه

.................حسن عمران

[koko15]

اة جيت على الوجع وحياتك الكوسة بقت فى كل حاجة مجتش على الوظايف الحكومية اى حاجة دلوقتى فيها كوسة حتى فى الشارع فى كوسة وياترى حصلك موقف للكوسة دى فى حياتك يا معلم فحمة يعنى مثلا وانت بتفتح القهوة محدش طلب منك حلوة القهوة وانت فاهمنى بقا مش لازم نوضح علشان البكس على اول الشارع

[فراق84]

السلام عليكم ورحمة الله وبركاته
مبروك اخ حسن على افتتاح القهوة ..
وياريت تقبلوني ضيفة خفيفة عليكو..
هو انتو حتشربوني ايه..اصلو انا بخاف من المشروبات السياسية كتير ..لانه الدكتور قللي بتوجع الدماغ ..فما تشربيهاش الا مرة بالعمر ..لما تقرري تنهي على روحك
تقبل تحياتي اخ حسن..
ومبروك تاني
وتحياتي للمعمل فحمة ..
اختكم فراق..فلسطين

[فارس اصيل]

مبروك للمعلم فحمه
افتتاح مقهاه الجديد
واحب ان انقل له هذه القصيده
ليعلقها على جدار المفهى



كتبها احد المقهورين المصريين
طاطي دماغك دايما طاطي

وافضل دايما هادي وعادي

معدي ورايح تهادي قرايبك

امين شرطه شايفك

جالك في وشك

عايز فلوسك

تيجي تعارض!!!

شكلك حرامي

هاخدك طواريء

تقعد في حجزك

ياخدوا اللي عندك

وللصبح تلالي

عايز تروح!!

امين تاني عايزك

ياخد المهيه وتبوس الايادي

طاطي دماغك دايما طاطي

وافضل دايما هادي وعادي

تخرج مطوح

واحد زميلك يشوفك مروح

قميصك مقطع!!!

انا شايفوا عادي

بس زميلك يطلع مواتي

يبلغ رئيسك :

دا راجل خامورجي..دا راجل معفن..دا راجل باراتي

تضيع ليه وظيفتك وتصبح مواتي؟؟!!

ترجع بردو هادي وراسي

تدخل بيتك تقعد (عادي)

يخبط بابك واحد عادي

بيقول كلام واحد غير عادي:

اشي كهربه واشي اتصالات

انترنت واشتراكات!!

وزباله ماليه الطرقات

انت هاتدفع؟؟

اه صحيح..جيبك فاضي

خليك عاااااااااااادي وافضل هادي

زي ماقال الحزب القاضي

طاطي دماغك دايما طاطي

وافضل دايما هادي وعادي

اي..باين ضغطي علي يا حماتي

هاتيلي والله بسرعه علاجي

ايه؟!علاجك؟اصبح غالي اقوللك :

اشرب مايه دي فيها كلور وانت بسرعه تموت علي طول

او اخرج في مظاهره وقول :

بلادي بلادي بلادي

تموت شهيد احسن من عادي

طاطي دماغك دايما طاطي

وافضل دايما هادي وعادي

كتبها احمد الجبالي...مصر

[فارس اصيل]

معلش بقى علق دى كمان جنب اختها علشان عندى مشوار لمده يومين



عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟

[حنين مصر]

احلى سلام مربع لاحلى ناس على قهوة

[شمهورش يحب مصر]

ولا يا حنكش هات واحد نكسافيه واتنين شيبفه علي حساب المعلم عشان عاوزه في كلمه سر بس شيفه بدون فحم عشان متفحمش ههههههههههه

منور يا معنمي ( معلمي) وبجد قهو جميله بس معاك ترخيص من الحكومه

دفعت الضرايب وياتري السكر والشاي تاريخه ساري ولا منتهي عشان تموت الشعب


شويه وتجي شرطه المخدارات تقفل القهوه لييييييييه ( اصل كان بيبوظ شباب البلد وبيبع مخدرات)

وكمان اسبوع تطب امن الدوله اصلك بتساعد الناس علي انقلاب الحكم ودي القهوه قهوه تجمع لاخوان والمنقلبين ضد الحكم

وفي الاخر طتلع تاجر مخدرات وكمان مطلوب امن دوله وخد من دا كتييييييييير

ربنا يبارك في القهوه ويبعد عنها ولا د الحرام ( عارفين نفسهم كويس)

واحلي سلام لبابا حسني وماما سوزان واخواتي علاء وجمال

[amr_miza1]

مبرووووك افتتاح القهوة أخى حسن عمران

كان نفسى اكون موجود فى الافتتاح واجيبلك الطبل البلدى ..
لالا دول حبيبى يعنى
لا مش جايبهم من الشارع دول من الحزب الوطنى ..

ببارك .. ولى عودة مرة اخرى بإذن الله