كن "عبيطا" ... ترى الوجود جميلا !!!

[proactive]

بسم الله الرحمن الرحيم
-------------

بص يا سيدي ,
انت عاوز تبقى مبسوط لا لأ ؟
-- طبعا أيوة ,بس ازاي , مش شايف الدنيا اللي حواليك ؟ و لا انت عايش في كوكب تاني ؟

على مهلك يا عمي , أنا معاك حتى مش اسمه كوكب الأرض بالأمارة ؟
طب سمعت المقولة اللي بتقول "كلما زادت ثقافة -أو علم- المرء زاد بؤسه" ؟؟
أو سمعت المتنبي و هو بيقول :
ذو العقل يشقلا في النعيم بعقله **** و أخو الجهالة في الشقاوة ينعم !!!

-- أيوة ما أنا قصدي كده , ما احنا لو كنا أغبية أو ما بنحسش كان زماننا عايشين مبسوطين , إنما المشكلة اننا بنحس و بنتأثر و بنعرف كل المصايب و المآسي اللي بتحصل حوالينا , ده احنا لو ما اتأثرناش ما يبقاش عندنا دم , و لا نكون بشر من أصله ,

طب ما نفسكش تكون زي "و أخو الجهالة في الشقاوة ينعم" اللي المتنبي بيقول عليه ده ؟؟؟

-- مممم , بصراحة ساعات باتمنى اني كنت ما بحسش أو جاهل مالوش في الطور و لا الطحين , أي نعم هكون جاهل , بس كنت هبقى مبسوط و مش حاسس اني جاهل أصلا !! بس ما ينفعش أكون جاهل خلاص , احنا في الواقع , و أنا مش جاهل , يعني ما ينفعش أبقى سعيد و أنا شايف و حاسس كل اللي بيحصل حواليا.

طيب اللي يخليهالك "و أخو المفهومية في الشقاوة ينعم" ؟ يعني تيجي نخليك تحس باللي بيحصل حواليك و تعرفه كله , لكن ما تتأثرش بيه و لا يجيلك إحباط و قرف و زهق ..... إلخ , بل على العكس , هيخليك أحسن و يدفعك للأمام ؟؟

-- مممم , طب قول مع اني شاكك في كلامك , بس نسمع , مش هنخسر حاجة , اطربنا يا سيدي ...

أقول لك يا سيدي , مادام احنا بادئينها شعر من الأول , يبقى نبدأها شعر هنا,
سمعت عن بيت الشعر اللي بيقول :
ليس الغبي بسيدٍ في قومهِ *** لكن سيد قومه يتغابى !!!
بصراحة البيت ده عجبني جدا ,
فعلا , مش من الذكاء انك تبقى "حِمَقِي" و كل حاجة تعلق عليها و تدخلها جوه "نافوخك" , فيه حاجات سيبها تعدي "بمزاجك" لأنه ما فيش فايده من انك تعلق عليها أو تلتفت ليها أصلا , هتنرفزك و تعصبك و خلاص , و انت راجل صاحب مرض و الانفعال مش كويس علشانك ؛)
على فكرة أنا كنت قرأت قبل كده مقال عن الstresses و كان بيقول فيه ان حوالي 50% من مشاكلنا و انفعالاتنا و التعصب اللي بيجيلنا كل يوم ,ممكن نتجنبة بـ "التجاهل" just let things go
يعني مثلا انت ماشي و حسيت ان الراجل ده بيتكلم عليك أو جارتكم دي بتبصلك بصه مش تمام , أو حتى واحد بيرمي بالكلام عليك , ساعتها انت أكيد هتتصرف بأحد الاحتمالين , اما انك تشبك في خناقه زي الأهبل , و هيقول لك ايه الراجل العبيط ده , حد عملك حاجة و لا حد وجه لك كلام ؟؟
أو انك "تكز" على سنانك طول ما انت ماشي و تقعد تشتم فيهم و تلعن الجيرة "السو" اللي في شارعكم دي , أو الناس و لاد ال*** اللي ماسكين الرايح و الجاي لبانة في بقهم ,
أو حتى ممكن مواقف زي الزحمة في المواصلات أو رخامة سواقين الميكروباص أو أي حاجة "عابرة" من اللي بتحصل كتير لينا كل يوم , كل الحاجات دي بتنرفزك و "بتعككنن" عليك يومك , صح ؟
بص يا عمي , لو حرقة دمك دي هتخليهم يسكتوا أو هتخفف عنك الزحمة أو القرف اللي حواليك , أنا معاك يا سيدي ... ولع في دمك و في نفسك كمان ,
إنما المشكلة انها ما بتحلش أو بتفيد أي حاجة , بالعكس , هي يتزيد قرفك و زهقك كمان و كمان ,
يبقى انت تخلي ناس زي دول أو مواقف زي دي يعملوا فيك كده ليه ؟

-- ممممم , يعني أسكت لهم ؟ يعني ؟

ما هو انت لو ما سكتش هتبقى زي الاهبل اللي بيخانق دبان وشه و مش هتخلص من المواقف اللي زي دي لأن " انت أكيد في مصر" , يبقى هتسكت , و ما تحرقش دمك , بل بالعكس , تذكر قول الشاعر :
اصبر على كيد الحسود فإن كيدك قاتله
فالنار تأكل نفسها إن لم تجد ما تأكله

يبقى انت ما تحرقش دمك , و حاول تستمتع بعظمة تحكمك في نفسك و تغلبك على الضغوط و عدم اكتراثك بيها ,

-- ممم , طيب دي علشان أنا ما ليش يد فيها و مش هاستفيد حاجة من النرفزة , طيب فيه حاجات تانية زي المسلمين اللي بيذبحوا في جميع أنحاء العالم , و الشتيمة اللي في حق الاسلام و الرسوم المسيئة للرسول -صلى الله عليه و سلم- , ده غير الفساد المحلي و الواسطة و المحسوبية و القرف اللي انت أكيد عارفه !!!

بص يا معلم , سأرد عليك زي الأول ان نرفزتك و غضبك مش هيفيدوك بحاجة , بل بالعكس , هيضروك
إنما حاجات زي دي , ما ينفعش تتجاهلها زي اللي قبلها , يبقى تعمل ايه ؟
ستيفن كوفي في كتابه الرائع "العادات السبع للأشخاص الأكثر فاعليه" رسم لسيادتك دايرة كبيييييرة و سوده , و رسم في وسطها دايره صغنونه بيضه ,
سعادتك بقى الدايرة السودة دي هي المشكلات و الواقع و القرف اللي احنا بنشوفه كل يوم
أما البيضه بقى , فتبقى انت ؛) , قصدي قدراتك و الحاجات اللي انت تقدر تعملها , و طبعا لأن قدراتك بالنسبة للواقع الأسود صغيرة جدا زي الدايرة البيضه دي ,
عمو ستيفن قال لك لو قعدت تبص على الدايرة السوده هتكبر أكتر و أكتر
إنما انت تحاول تبص على البيضه و تتجاهل السودة لأنك ما تقدرش تعمل فيها حاجة , خليك مع البيضه و حاول تكبرها أكتر و أكتر لحد ما تقضي الى السودة -في المشمش طبعا , انت بس هتكبرها , إنما الشر و الفساد لازم يبقوا موجودين , احنا مش في الجنة يا زعيم-

-- كلام نظري برضه , يعني ايه سوده أكنسلها و بيضه أوسعاها و الكلام البايظ ده ؟؟

بسيطة يا سيدي , بدل ما هتسأل نفسل "ليه" هتسأل نفسك "ازاي" ؟؟
يعني ,
بدل ما تقول هم الناس وحشين ليه و الاسلام ضعيف ليه , و كل الناس علينا ليه , و الفساد ماله جامد قوي ليه ؟؟
هتسأل بـ"إزاي" , هتقول , إزاي أغير الناس الوحشين , إزاي أتجنب الناس "الرخمه" , إزاي أخلي الاسلام قوي ؟ إزاي أحاول أحارب الفساد أو أو حتى أتجنبه ؟

شوف , في الحالتين المشاكل موجودة , بس الحالة الأولى انت سألت نفسك و كلمتها بطريقة سلبية محبطه ,
أما الحالة التانية فانت سألت نفسك بطريقة مشجعة تدفعك للعمل ,
يعني بدل ما تقعد "تبكي على الاطلال " جنب التلفزيون و انت بتسمع الأخبار , هتسأل نفسك , أنا لوحدي كده أقدر أعمل ايه ؟ أنا ممكن أتفوق , ممكن أتبرع بفلوس , ممكن أوعي الناس , ممكن أخاطب "الآخر" و أشرح له الحقيقة , ممكن أعمل حاجات كتيرة هي بسيطة آي نعم , لكني عملت و ما قعدتش و حطيت ايدي على خدي و خلاص ,

زي كل مرة , مع اني ما كنتش ناوي أطول , بس طولت برضه ,
حاجة أخيرة عاوز أقولها
كنت قرأت كتاب عن مهارات التعامل مع الضغوط -تمت إضافته في موضوع سابق- بيوصف عده طرق لتعامل الناس مع الضغوط و ردود أفعالهم , منها :
- التصدي للمشكلة.
- طلب الإسناد الاجتماعي.
- طلب الإسناد الانفعالي.
- ضبط النفس.
- الخيال والتمني.
- التجنب والهروب.
- العدوان.
- الإبدال.
أما آليات الدفاع أو (الحيل) أو ميكانيزمات الدفاع فهي:
- الكبت.
- التعويض.
- التبرير.
- التحويل.
- التكوين العكسي.
- النكوص.
- التوحد (التقمص).
- ""التسامي. ""
- الخيال.
- الإسقاط.

اللي يهمنا فيهم هو "التسامي" : إن هذه الآلية الدفاعية تخفف من شدة الصراعات والتوتر الداخلي لدى الإنسان من خلال تحويل تلك الأفكار والصراعات إلى مجالات مفيدة وسليمة ومقبولة اجتماعياً، كما أنها تمكن الفرد من الإبقاء على هذه الصراعات مكبوتة وبعيدة عن الوعي .
يعني تخلي الظروف اللي حواليك دافع ليك للنجاح و التفوق , سواء في المذاكرة -علشان أنفع بلدي- أو الابتكار -علشان يبقى عندنا منتجات و صناعات و ما نحتاجش لحد- , أو أدبيا -أكتب شعر أعبر فيه عن ما في نفسي, أو أي مقالات- , أو اجتماعيا -تتكلم مع الناس اللي تعرفهم و تحاول تطورهم و تنفع مجتمعك علشان تزيل الانهزامية اللي في النفوس دي - , و في مجالات كتيرة , انت و حسب شغلك و تفكيرك ممكن تلاقي أكتر من طريق و وسيلة لتحويل الضغوط و المشاكل اللي حواليك لأفعال مفيدة لك و "لأسرتك " و للمجتمع كله ...

خلالالالالالاص بقى أنا تعبت ,

و أرجوكم كالعادة , ما حدش يكسل ,
لو حد استفاد أي حاجة يدعيلي "اللهم تب عليه و وفقه لما تحب و ترضى و أدخله الجنة و أجره من النار"
و جزاكم الله خيرا ...و آسف على الإطالة .

[فراق84]

لو حد استفاد أي حاجة يدعيلي "اللهم تب عليه و وفقه لما تحب و ترضى و أدخله الجنة و أجره من النار"


اللهم امين

بش مهندس ابراهيم
اسلوبك في طرح المواضيع جميل
واسلوب الحوار دا اجمل شيء بيشد القارئ
فعلا كلامك صحيح جدا ..مية بالمية
وكان الموضوع دا مأزمني فترة ..لانو في حاجات كتير بتتعب ..والحاجات الصغيرة بتتعب اكتر من حاجة كبيرة
وانا دلوقتي فهمت احلها زاي
شكرا لك
وانت ما طولتش ولا حاجة خود راحتك ..وجيب دايما مواضيع حلوة زي كدة
اختك فراق

[fathy007]

بدل ما هتسأل نفسل "ليه" هتسأل نفسك "ازاي" ؟؟
من الآخر

[hend]

موضوع جميل وبصراحه مهما كان النعيم فى الجهل فشقاء العلم اجمل
الف شكر اخى على اسلوب الموضوع وفكرته
يسلموا

[روميساء]

موضوع جميل وأستفدت منه جدا والله
شكرا ابراهيم وطريقتك في الكلام جميله اوي ومتزهأش خالص
انا تغيبت عن المنتدي سافرت اسبوعين وجيت لقيت المنتدي
كسب انسان فعلا جميل وكل مواضيعك بجد مفيده وعجبتني
شكرا مره تانيه الموضوع الجميل وتقبل مروري

[مجرد شعووور]

يارب يحميك لشبابك اولا
تانيا بقى انا دا اسلوبي في الحياة
طنش تعيش تنتعش
واول مرة الاقي حد بيمدح في الاسلوب ده
انا الي حوالي بيحقدو علي بسب الامبالة الي عندي
وشايفين اني متبلدة بس انا والله بس مش بحب اوجع دماغي
وطبعا في حاجات مش ينفع اطنشها
لدرجة اني فكرت اتغير
بس بقى الموضوع الجميل ده
هيخليني افضل كدة
وطبعا الي حوالي هيدعو على الي كان السبب
بس ولا يهمك انا هدعيلك

[مجرد شعووور]

عاوزة اسال سؤال
الكتب الي بتقراها بتجيبها من فين ؟؟؟؟؟؟
ولا بتلاقيها على النت فين ؟؟؟؟؟؟؟؟
لو مافيش مانع تقولي

[proactive]

المشاركة الأصلية بواسطة فراق84

لو حد استفاد أي حاجة يدعيلي "اللهم تب عليه و وفقه لما تحب و ترضى و أدخله الجنة و أجره من النار"


اللهم امين

بش مهندس ابراهيم
اسلوبك في طرح المواضيع جميل
واسلوب الحوار دا اجمل شيء بيشد القارئ
فعلا كلامك صحيح جدا ..مية بالمية
وكان الموضوع دا مأزمني فترة ..لانو في حاجات كتير بتتعب ..والحاجات الصغيرة بتتعب اكتر من حاجة كبيرة
وانا دلوقتي فهمت احلها زاي
شكرا لك
وانت ما طولتش ولا حاجة خود راحتك ..وجيب دايما مواضيع حلوة زي كدة
اختك فراق

الحمد لله يا فراق انه أفادك
و فعلا أكتر الحاجات اللي عاملة مشاكل هي الحاجات الصغيرة دي

[proactive]

المشاركة الأصلية بواسطة fathy007

بدل ما هتسأل نفسل "ليه" هتسأل نفسك "ازاي" ؟؟
من الآخر

عليك نووووور
نورتنا يا عم فتحي

[proactive]

المشاركة الأصلية بواسطة hend

موضوع جميل وبصراحه مهما كان النعيم فى الجهل فشقاء العلم اجمل
الف شكر اخى على اسلوب الموضوع وفكرته
يسلموا

ألف شكر أختي هند على تشريفك للموضوع
و أنا معاكي إن شقاء العلم أجمل , بس المهم ما يقلبش على إحباط

[proactive]

المشاركة الأصلية بواسطة روميساء

موضوع جميل وأستفدت منه جدا والله
شكرا ابراهيم وطريقتك في الكلام جميله اوي ومتزهأش خالص
انا تغيبت عن المنتدي سافرت اسبوعين وجيت لقيت المنتدي
كسب انسان فعلا جميل وكل مواضيعك بجد مفيده وعجبتني
شكرا مره تانيه الموضوع الجميل وتقبل مروري

ربنا يرفع من روحك المعنوية يا روميساء
المهم بس الناس ما تزهأقش من طول المواضيع
لأني أنا عن نفسي , ما كنش هقرأ أي موضوع بالطول ده !!!

[proactive]

المشاركة الأصلية بواسطة مجرد شعووور

يارب يحميك لشبابك اولا
تانيا بقى انا دا اسلوبي في الحياة
طنش تعيش تنتعش
واول مرة الاقي حد بيمدح في الاسلوب ده
انا الي حوالي بيحقدو علي بسب الامبالة الي عندي
وشايفين اني متبلدة بس انا والله بس مش بحب اوجع دماغي
وطبعا في حاجات مش ينفع اطنشها
لدرجة اني فكرت اتغير
بس بقى الموضوع الجميل ده
هيخليني افضل كدة
وطبعا الي حوالي هيدعو على الي كان السبب
بس ولا يهمك انا هدعيلك

لا لا لا لا لا
مش قصدي كدة خالص

طنش تعش ايه ؟ كده هتبقي زي أخو الجهالة اللي في الشقاوة ينعم
و اللامبالاة دي مذمومة جدا
لازم فيه تفريق بين الحاجات اللي نكنسلها و لا نبالي بها
و الحاجات اللي ما ينفعش ننفض لها
مفهوم ؟؟

[proactive]

آه ..
بمناسبة الكتب ,

أكثر ما قرأت قد حملته من الموقعين دول :
www.maharty.com
ط£ظ‡ظ„ط§ظ‹ ظˆط³ظ‡ظ„ط§ظ‹ ط¨ظƒظ… ظپظٹ ظ…ظˆظ‚ط¹ ظ†ط¨ط¹ ط§ظ„ظˆ

و أي خدمة , عرفناكي سر المهنة ؛)

[مجرد شعووور]

على فكرة انت كمان فهمت كلامي غلط
انا بطنش مثلا لما يكون في خناقة وانا ماليش دعوة بيها
مش لازم احشر نفسي
عصام الحضري هرب
وانا مالي ده موضوع هيفيدني بايه

لكن تمثال رمسيس التاني يتنقل المنصورة
ب35 مليون والناس مش لاقية تاكل طبعا لازم دمي يتحرق
غزة تروح من الفلسطينين طبعا لازم اتكلم
كدة يعني
اتمنى تكون فهمتني صح

[maysam]

اهلا ابراهيم

ما قرأت كل الموضوع

وصلت جملة:"كلما زادت ثقافة -أو علم- المرء زاد بؤسه"

ووقفت ...دي حقيقة... ودي جملتي الشهيرة!!

وبالنسبة للعنوان ، في فرق بين انك تكون اصلا عبيط وعايش على السبهللة
وبين انك تحاول تستعبط

الأول عايش حياته طبعا بالطول والعرض !! انا متأكدة
عشان لا فاهم ولا عايز يفهم ومريح نفسه على الآخر

التاني بقى.. مش كل واحد بيعرف يستعبط او يعمل مش شايف!!
كتير بنقول حنعمل زي غيرنا ونطنش.. بس تفتكر كل واحد عنده القدرة!!!