مش عيب على دقنك يا عم الشيخ ؟؟ !!!

[proactive]

في البداية أحب أوضح إن الموضوع بعيد عن الشيوخ الحقيقين , إنما هو عن الملتزمين الشباب في الجامعات و غيرها .
و أنا مش مربي دقني و لا حاجة و لا حتى إخوان -إحنا ماشيين جوه الحيط يا باشا - .

تلاقي يا أخي الناس بتكلم الشاب اللي مربي دقنه ده أكنه ايه ؟ عالم ؟
يعني مسافة ما لحيته طولت بقى عالم ؟ تلاقيهم يسألوه عن كل حاجة , أكنه شيخ الإسلام ,
يا جماعة ده زيه زيكم يعني , يعني هو بس مربي لحيته استنانا بالرسول الكريم أو لأنه يدين لله بفرضيتها ,
و هذا لا يجعله بالضرورة مكلف إنه يبقى المفتي بتاعك ,
و لا أنه المفروض يعرف ,
و تلاقي لما يسأله في حاجة ما ما يعرفش , إيه ياشيخ , أمال مربي دقنك يعني و عامل فيها شيخ ؟؟
لا هو مش عامل فيها شيخ , و لا مربي دقنه علشان يبقى شيخ , ده مجرد فرض بيعمله , زي الصلاة و الصوم و غيرها ,

و ياسلام بقى لو حد من زمايلنا شاف واحد -من زمايلنا برضه- الملتحين بيعمل حاجة غلط !!!
تقوم الدنيا و ما تقعدش , و يتكلم على الدقون و أصحاب الدقون ,
عاملين فيها شيوخ و هما .... آه يا ما تحت السواهي دواهي ,
يا عم سواهي ايه و دواهي ايه ؟
ما هو زيه زيك !! يعني هو عليه تكاليف و واجبات أكتر منك ؟ لأ , هو مكلف بنفس الحاجات اللي انت مكلف بيها ,
مش علشان ربى دقنة يبقى اتفرضت عليه حاجات زيادة ,
ما هو شاب برضه , يعني ممكن تلاقيه بيعرف ممثلين , بيسمع تمثيليات و أغاني , يعني هو أيوة أكيد نفسه يبطلها , بس مش عارف ,
أعرف واحد مرة , مش فاكر كان بيتكلموا عن ايه , و راح قايل : آه , أيام و بنعيشها على رأي عمرو دياب ... و الدنيا قامت , أيوة ياعم الشيخ , عمرو دياب كمان ؟ ده انت عديت , قشطة يا مان , شيخ ايه بقى دي تايواني و ........ إلخ .

يا عم فيه ايه ؟ ما هو واحد زيه زيك , ممكن يكون سمعها عشرميت مرة و هو ماشي في الشارع أو في المواصلات أو حتى في التلفيزون أو الكمبيوتر , أيوة حرام , بس عملها و خلاص , يعني هو حرام عليه و انت لأ ؟
أمال اشمعنى لما بيعملها هو بتعمل فرح , و لما انت أو غيرك يعملوها تبقى عادي ؟
علشان مربي دقنة و لازم يبقى قدوة ؟ طيب ما هو بيحاول , و مجرد انه يربي دقنه دي خطوة للأمام , حتى و لو بيسمع أغاني , يعني بيعمل سنة -أو فرض- و معاها معصية -هو ناوي يبطلها و بيحاول يبطلها - , مش أحسن من اللي ما بيعملش السنة دي -أو الفرض , متهيأ لي انها فرض- و كمان بيسمع أغاني و مش بيحاول يبطلها ؟؟

يعني هو الواحد لو ما عرفش يعمل جميع الواجبات و يترك جميع المنهيات ما ينفعش يربي دقنه ؟
و لا يربيها و يحاول يبطل بالتدريج ؟

و لا انتوا شايفين ايه ؟؟؟؟
------------------
المصدر : واحد كانوا بيقولو له قبل كده : يا شيخ !!

[عتاب]

موضوعك مهم جدا يا ابراهيم
بيفكرني برده في نظرة المجتمع للمنتقبة
الكل بيظن انها لازم ماتغلطش
طيب ماهي انسانة زينا هي شايفه النقاب فرض او فضل عملته و ده شيء كويس
هل معنى كده انها لازم تكون صح على طول
لو المنتقبة سمعت اغاني هايتقالها امال لابسة نقاب ليه
لو جابت في سيرة حد هايتقال اكتر من كده
طبعا انا مش باحلل اللي بتعمله
بس هي بشر زينا وكلنا بنغلط وفينا اللي بيحاول يكون صح وده شيء كويس
ومحدش فينا معصوم ولا حد فينا ملاك عشان نستنى منه انه مايغلطش ابدا

[فراق84]

هو صحيح بشر
وهو بيحاول التقرب من الله
بس برضو لازم يحاول يكون الافضل
وانا يكون قدوة
لان الدين يتمثل فيهم ..
وهم القدوة
يعني لو الواحد حب يصير مدير
وغلط
ما نقولش هو بشر
لازم يكون قد مسؤولية الادرة ..والا لا داعي لتحمل المسؤولية من الاساس
ولا ايه؟
دا رايي
اختكم فراق

[BATISTA]

مش كل من ربى دقنة وأطلق لحيتة يطلق علية شيخ

بس الملاحظ انها الايام دى انتشرت بين ناس كتير وهم بعيدون عن الدين

وفى النهاية الواحد يتمنى انة يكون ملتحى لانها سنة وثانيا انا أكتر من أسبوع مابعرفش يعنى يادوب اسبوع واحلقها

وربنا يهدينيا جميعا

[proactive]

المشاركة الأصلية بواسطة عتاب

موضوعك مهم جدا يا ابراهيم
بيفكرني برده في نظرة المجتمع للمنتقبة
الكل بيظن انها لازم ماتغلطش
طيب ماهي انسانة زينا هي شايفه النقاب فرض او فضل عملته و ده شيء كويس
هل معنى كده انها لازم تكون صح على طول
لو المنتقبة سمعت اغاني هايتقالها امال لابسة نقاب ليه
لو جابت في سيرة حد هايتقال اكتر من كده
طبعا انا مش باحلل اللي بتعمله
بس هي بشر زينا وكلنا بنغلط وفينا اللي بيحاول يكون صح وده شيء كويس
ومحدش فينا معصوم ولا حد فينا ملاك عشان نستنى منه انه مايغلطش ابدا

شكرا جزيلا أختي عتاب ,
للأسف ده اللي بيحصل
و للأسف ده بيخلي كثير من المتدينين يسيبوا الالتزام علشان يتخلصوا من الضغط ده و يبقوا زي الناس العاديين ...

[proactive]

المشاركة الأصلية بواسطة فراق84

هو صحيح بشر
وهو بيحاول التقرب من الله
بس برضو لازم يحاول يكون الافضل
وانا يكون قدوة
لان الدين يتمثل فيهم ..
وهم القدوة
يعني لو الواحد حب يصير مدير
وغلط
ما نقولش هو بشر
لازم يكون قد مسؤولية الادرة ..والا لا داعي لتحمل المسؤولية من الاساس
ولا ايه؟
دا رايي
اختكم فراق

شكرا على مرورك فراق ,
بس بصراحة أنا مش معاكي ,
أنا كنت أبقى معاكي في حكاية مثال المدير دي لو كانت العملية اختيارية ...
يعني لو كان إصلاق اللحية أو الالتزام شيئا اختياريا , لو عاوز تاخده يبقى تلتزم بكل اللي فيه , لكن لأ , الالتزام ده حاجة إجبارية , فانت تاخد اللي تقدر عليه و ربنا يساعدك و تكمل باقي الجوانب ,
يعني مثلا لو واحد مسلم أخلاقة وحشة عايش في أوروبا مثلا , و كل ما الناس هناك تلاقيه بيعمل حاجة غلط يقعدوا يتكلموا على الاسلام و المسلمين ,. نقول له سيب الإسلام لحد ما تبقى كامل من مجاميعه ؟ و لا خليك مسلم بس حاول تصحح من نفسك على قد ما تقدر ؟
أو لو واحد بيصلي في المسجد دائما مثلا , و بيطلع يقعد على القهوة يشرب شيشة , نقول له سيب الصلاة لأن كدة الناس هتاخد فكرة وحشه عن اللي بيصلوا في الجوامع ؟
و لا صلي و حاول ؟؟؟

مجرد وجهة نظر ...

[proactive]

المشاركة الأصلية بواسطة BATISTA

مش كل من ربى دقنة وأطلق لحيتة يطلق علية شيخ

بس الملاحظ انها الايام دى انتشرت بين ناس كتير وهم بعيدون عن الدين

وفى النهاية الواحد يتمنى انة يكون ملتحى لانها سنة وثانيا انا أكتر من أسبوع مابعرفش يعنى يادوب اسبوع واحلقها

وربنا يهدينيا جميعا

شكرا جزيلا على المرور يا باتيستا ...

أنا معاك بس هو أصلا مش عاوز يتقال عليه شيخ , هو عاوز يتعامل زي أي واحد عادي ,
المشكلة في الناس اللي بتفكر كده ,
هو برضه عاملها سنة , أحسن من مافيش, بس ما بعرفش في الدين قد كدة و لا هو عاوز يبقى قدوة و لا غيره , إنما الناس هم اللي مفكرين اللحية دي "التشطيب" النهائي للتدين , و اللي يربيها يبقى المفروض يبقى ملاك أو رسول أو صحابي خلاص ,,,,

[نيهال]

انا معاك ان دى الصوره الظاهريه للجميع
لكن اعذرنى من الامثله اللى بشوفها انا كمان(حتكلم عن ناس شفتهم بجد واكيد مش كلهم كده)
المهم
تلاقيه دائم الموعظه وكانه يعلم بكل امور دينه فحينما اجد هذا الرجل وهوه يرقص على انغام الموسيقى........
اجدنى حائره لماذا يدعى انه شخص اخر غير بقيه البشر

لما الاقيه بيضحك مع فلانه ومش عارفه ايه
اللى اكتشفته ان كلنا بشر .........ومفيش حد كبير على الغلط
بس اللى يزعل بجد ان حد يدعى حاجه مش هوه نفسه ملتزم بيها........
وعلى العكس تماما هناك اقرب الناس لى ملتحيين وفى نفس الوقت عارفين حدودهم كويس.......اه عندهم من العلم الكثير ولكن لا يتباهوا مع من حولهم

[الورد الجوري]

اهلا م/ ابراهيم
موضوع جميل زي معودتنا
بالنسبه للموضوع ده انا هناقشه من ناحيتين

1- في ناس بتحب دائما تتصيد الاخطاء للاخرين
و تلاقيهم مبيصدقوا ان حد من اللي مربيين دقنهم اخطأ
و تبدأ سلسله التريقه عليه و الانتقاد و كانه مش زي باقي البشر و الناس الطبيعيين و ممكن يخطأ و ممكن يصيب
و ساعتها بنسمع الجمله المحفوظه
" عيب على دقنك يا شيخ "

2- من ناحيه تانيه .. في ناس مربيين دقنهم بيغلفوا
انفسهم بهالة وهميه .. فكل محد يرمش قدامهم و لا يعطس
تجد مجلدات من النصائح و شرائط محفوظه فقط و غير و مطبقه
الاية الكريمة بتقول :
" أتأمرون الناس بالبر و تنسون أنفسكم و أنتم تتلون الكتاب "
يعني معقوله يفضل اللي مربي دقنه يدي في مواعظ حتى في اوقات لا تستدعي المواعظ و هو لا يطبق منها شيء !!!!
اعتقد ساعتها صعب جدا نمسك لسان الناس
و نقولهم مينفعش يتقال عليهم كده
و انهم مجرد مربيين دقنهم استنانا برسول الله عليه الصلاه و السلام .. و من واقع تجربتي و انا في الكليه
كان معانا اسرة فيهم ناس مربيين دقونهم على حق و معاهم ناس اقسم بالله الصلاه و هي فرض ربنا مكانوش بيصلوها
و اذا حد غلط بس غلطه غير مقصوده كانوا بينصحوه
بشكل اقل ما يقال عليه انه اهانه في ثوب نصيحة
اعتقد ان ساعتها مفروض نقولهم احلقوها الدقن دي بس
تعالوا اقيموا الصلاه

في النهايه عايزه اقول ان الواحد لابد ان يراعي افعاله كلها
يعني لا اعطي لاحد حجما اكثر مما هو عليه
و اظل اتصيد له الاخطاء و اصفها بانها جسيمه
و كل ذلك بسبب مخيلتي و تحجيمي للشخص بشكل خاطئ
و كمان لا انصح احد بنصائح و اوصله للتنفير و ليس التبشير
و انا لا انفذ منها ادنى شيء
يقول الشاعر:
لا تنهى عن خلق و تأتي بمثله :. عار عليك اذا فعلت عظيم

اسال الله ان يهدينا جميعا لخير القول و العمل
شكرا للطرح المميز و اعتذر عن الاطالة

[eshoo4ever]

الايمان والتقوة مش بالدقون

يعنى ممكن يكون مش مربى دقنة وتقى

بس فى ناس بتعمل بالسنة وتلتزم بالدقون بس

مافيش انسان معصوم من الخطا

كلوا بيغلط الشيخ والشاب

والحاج والطفل

كلوا بيغلط

[eme]

المشاركة الأصلية بواسطة proactive

, شيخ ايه بقى دي تايواني و ........ إلخ .


و لا يربيها و يحاول يبطل بالتدريج ؟

عجبتني تايواني دي اوي

انا كمان من رايي انه طبعا يربيها ويحاول يبطل بالتدريج
لانها بجد هتلزمه اكتر انه يبطل حاجات كتير
احتراما لها

وكمان المنتقبه هي كمان بتتعرض لحاجات كتير زي دي
عشان مهي خلاص لبست النقاب ي
بقي لازم تبقي عرفه الدين زيها زي اكبر عالم

انا متهيألي ان فيه فقهاء وعلماء حاجات مش عرفينها وده مش عيب بس العيب انهم ميبحثوش عنها ويعرفوها

وكمان في شيوخ في الازهر ساعات حد يروح يسألأهم عن حاجه مش بيجاوبوه الا لما يستشيروا شيوخ اخرين



يارب اكون قدرت اوصل الـ عايزه اقوله وتكونوا فهمتوني

[رينجو المصراوي]

م/ ابراهيم بشكرك علي الطرح البناء والهادف - وده مش جديد عليك

بالنسبة للموضوع المثار فانا بتفق مع كتير من الكلام اللي اتقال سواء من جانبك او من جانب باقي الاعضاء الافاضل.

بس في نقطة انا نفسي اللي بيتصيدو الاخطاء - زي ما وصفتهم ورد - ان ينظرو لحالهم ولحال الشباب اجمع لو كل واحد فيهم بقي ملتزم او جاهد انه يلتزم زي الشاب اللي بيعيبوا عليه لانه ربي لحيته الحال يتغيير 100 % اه هتلاقي التعاملات اتغييرت والسلوكيات كمان بقت احسن . بس للاسف كله بيبص للملاذات وبس وبيبخل علي نفسه بالمحاولة حتي .

النقطة الثانية والمهمة وده لكل الناس ان في صديق لي ملتحي لما بساله سر اصراره انه يربي ذقنه رغم المشاكل اللي بتواجه علشانها قال : ربي ذقنك ذقنك تربيك.

شكرا ليك يا بشمهندس واتمني الا اكون اطلت .

[eme]

معلش انا نسيت بس اقول حاجه

تعقيبا علي كلام بعض الاعضاء

ان انا اقصد الـ يعرف دينه وملتحي عشان دي سنة نبيه
ومش عشان يقعد يتفزلك بقي ويعمل فيها انه عارف كل حاجه

الانسان السوي الـ بيطبق دينه صح لاغير ذلك

[نرجسية]

موضوع شائع جداً فى مجتمعنا
فكويس يا بشمهندس انك فتحته

أولاً بالنسبة لنقطة الافتاء :

هى الناس عندها اعتقاد أن اللى أطلق لحيته عنده اطلاع دينى
عشان كدة بيسألوه
أنا لا أعترض على السؤال
فالرسول صلى الله عليه و سلم بيقول ( بلغوا عنى و لو آية )
لكن الاعتراض هنا أن الاجابة تكون تأليف ليس لها سند أو مرجع صحيح من الكتاب أو السنة
فلازم الاخ اللى حيرد على الاستفسارات يراعى ربنا لأن التجرؤ على الافتاء بغير حق ذنب كبير

ثانياً : نقطة أن طليق اللحية دائماً فى موضع القدوة

و أن أى حركة تصدر منه يلام عليها

طبعاً
اذا واحد وصل لمرحلة أنه يتبع السنن المظهرية للرسول صل الله عليه و سلم
المتوقع أنه متبع للسنن التانية و اللى هى أكثر أهمية
هذا بالاضافة الى فرائض الدين كغض البصر مثلاً

هنا احنا مش بنقول أنه نبى من الأنبياء و لا ملاك
لكن فى نفس الوقت منتظر منه ألا يخطئ الأخطاء اللى بيرتكبها شخص غير متدين

ربنا يهدينا كلنا للصالح من الأعمال
و يبعدنا عن الرياء

[نرجسية]

المشاركة الأصلية بواسطة رينجو المصراوي

قال : ربي ذقنك ذقنك تربيك.

آهااااا
شايفين
معناه أن الذقن تلزم صاحبها بالالتزام على اعتبار أنها سنة
فكأنها بتفكره دايماً بالسنة

لكن الخوف أن الذقن فى الحالة دى تخليه ملتزم أمام الناس فقط
و هنا مكمن الخطورة