بيع قلبك.. بيع كبدك شوف الشاري مين؟!

[hend]

كتبت – آية رفعت:

قانون بيع الاعضاء الجديد.. لو كنت ماتعرفهوش هو قانون بيناقش في مصر.. ويعطي الحق لأي مواطن أنه يمضي تعهد و عقد يسجل في الشهر العقاري أنه موافق يبيع اعضائه بعد وفاته و تستلم عائلته الفلوس اللي ح يبيع بيها.. ده غير انه ممكن يتفق مع حد محتاج لعضو ممكن يستغنى عنه في حياته أنه يبيعه له مقابل مبلغ من المال..
و بالرغم من أن الموضوع ده قائم من زمان سرا.. القانون ده عايز يحفظ حق اللي باع و اللي اشترى. و لازال القانون ده مسبب أزمة مابين الناس و الحكومة والشيوخ.. حيث أنه موضوع خلافي و اختلف فيه رأي الكثير من العلماء والشيوخ.
و السؤال هنا هل تقبل أنك تبيع أعضائك حيا أو ميتا تبعا للقانون الجديد؟
قالت سارة نور الدين _ طالبة بكلية اعلام:" ابيعها؟ لا طبعا اتبرع بيها اه برضايا ومعرفتي و اختياري.. انما بيع لا. أولا لاني مش مالكة هذا الجسد وكوني استغله للتربح ده في نظري هاعاقب عليه يوم الحساب.. وثانيا لاني المفروض اساعد المحتاج مش هاروح كمان اسعر الكبد و الكلى واحط سعر لقلبي لما اموت".

و قال لنا اسلام عبد المجيد_ 17 سنة:" لو أنا حي أرفض أننا أبيع اعضائي لو حصل ايه.. لكن ح أوافق أننا لو مت أهلي يبيعوا أعضائي و أهي منها أن حد غيري يستفيد و منها أن أهلي يأخدوا فلوس و يستنفعوا."

أما سارة غنيم _ 21 سنة:" أنا ممكن أبيعها على حسب حاجة الانسان اللي قدامي.. بس برده بعد ما اموت مش لما اكون حية .."

و كان من الرافضين لهذا الموضوع داليا فاخر_21 سنة_ التي قالت:" انا ممكن اتبرع بيها حية او ميته لكن مش أبيعها خالص."

و وافقتها الرأي ياسمين محمد_20 سنة:" لا مش ح ابيعها طبعا لا حية ولا ميتة.. لأن الاعضاء دي مش ملكي دي ملك اللي خلقها."
و قال مصطفى محمود_26 سنة:" ممكن ابيعها لو ح تحقق لي الربح المادي اللي أنا محتاجه.. بس ده طبعا لو كانت أعضاء ممكن استغنى عنها زي الكلية مثلا.. لكن بعد ما اموت ممكن أخلي أهلي يتبرعوا بيها كصدقة جارية على روحي."
و تعترض سالي محمود_20سنة قائلة:" مش هقبل خالص ابيع .. ممكن اتبرع ولو اتبرعت هتبرع وانا حية لكن لو مت خلاص مينفعش الجسد فى التراب والروح عند ربنا ازاى اتصرف فى شىء مش بتاعى بعد موتى."

وتضيف أميرة عاطف_20 سنة:" أنا ممكن أتبرع بعد موتي.. لكن أبيع أعضائي لا.. ده غير اني ح اتبرع بالاعضاء اللي جوا جسمي مش من بره. يعني ممكن قلبي أو الكبد.. لكن مش العين مثلا."
ويقول مروان حاتم_ طالب بكلية العلوم:" أنا مش فاهم انتم ليه معقدين الدنيا كدة.. و لو مثلا أنا العيان و عايز عضو ممكن ادفع كل ما أملك عشان العضو ده.. فيها إيه لو أنا أعطيت للمريض ده جزء مني و أمل تاني في الحياة .. و في مقابل ده هو كمان ح يديني امل تاني في الحياة بفلوسه. لكن بعد موتي أنا أرفض أن اهلي يتصرفوا في جسدي و يستفيدوا منه.. الأحسن أننا أدفن كامل."
أما منة مصطفى_ 20 سنة فترى استحالة القيام بعملية البيع:"مش ممكن ابيعها طبعا.. لأنها مش ملكي ملك اللي خلقها.. ده غير انه رأي خلافي أختلف عليه الشيوخ ففي منهم بيقول انه حرام و فيه منهم بيقول أنه حلال.. و الله أعلم".
مينا منير_ 23 سنة:" و الناس الغلبانة تموت؟ يعني انا كدة بادي الأعضاء و الدم والعلاج و الأجهزة الطبية و الدكاترة الممتازين للأغنياء.. حتى لما ييجي حد يموت أو حتى و هو عايش يديهم كمان.. مافيش حاجة من غير مقابل أبدا للناس الغلابة.. ثم ده اتجار بالجسد و في نظري زيه زي البنت اللي بتبيع شرفها و جسدها.. بل وألعن

ياترى
انتم رايكم ايه
هتبيعوا ولا لألألألألألألألألألألألألأ
يهمنى اعرف ارائكم

[هوبة]

لا طبعا هو ممكن للشخص يبيع حاجة مش ملكة اعضاء الانسان ليست ملكةدى ملك الخالق وحدة ولا يستطيع الشخص التصرف فيما لا يملكة ولكن ممكن اتبرع ماشى لكن ابيع لا

[amr_miza1]

هو انا شايف ان الموضوع بسيط .. طول ما انا عايش وبتنفس .. فأكيد العضو اللى عندى انا محتاجه .. مش هبيعه ومش هتبرع بيه ....

اما بعد مماتى .. فلو حد محتاج لاى حاجة .. مش هتأخر وقتها .. هكون مُت اساسا ..

شكرا يا هند للموضوع الجميل

[مجرد شعووور]

العلماء في السعودية
حرمو بيع الاعضاء او التبرع بيها
لانها مش ملك الانسان
دي امانة ربنا اعطاها لك
انت واجبك تحافظ عليها
لكن ربنا هو وحده الي ياخدها في اي وقت

هو ممكن يكون فيها بعض الانانية
لكن بصراحة انا مش هبيع ولااتبرع طول مانا عايشة
يمكن لو مت علشان ممكن تبقى صدقة جارية تكفر ذنوبي

شكرا على الموضوع

[دقه قلب]

اعتقد ان التبرع بالاعضاء الانقاذ حياة اخرين عادى
انما البيع لا طبعا حرام اعتقد كده يعنى

[سها soha]

مفكرتش فى الموضوع دة قبل كدة خالص !!!

بس لا مش هبيع ولا وانا حية ولا وانا ميتة كمان

وانا حية حاجة طبيعية ان انا مستغناش عن عضو انا محتجاة

وانا ميتة مش محتجاة .. بس هيبقى صعب على ناسى انهم بعد ما اموت ابقى حقل تجارب

او انجرح وانا ميتة .... صعب اوى ياهند

الموضوع صعب ياهند

[eme]

اكيد لو ربنا يعلم ان ممكن ميبقاش في جزء من جسمنا مش موجود

ده يبقي كويس لينا

اكيد مكنش اعطاه لينا من الاول

وحتي بعد الموت لا

دي المفروض امانه عطهالي ربي ولازم احافظ عليها

لاني هسأل عنها

[rehab89]

طبعا موضوع انى ابيع عضو من اعضائى ده مرفوض تماما لانه حرام وازاى ابيع حاجة مش ملكى دى حاجة ملك ربنا اداهلنا امانة نعيش بيها لكن هترجعله فى الاخر .. لكن موضوع التبرع ده كنت مقتنعه بيه فى الاول بس سمعت احد الشيخو بيقول انه حرام برضه لان الانسان مثلا لو هيتبرع بفلوس يتبرع من فلوسه مش يروح ياخد فلوس غيره ويتبرع بيها وهكذا فى الاعضاء ازاى اتبرع بحاجة اصلا مش بتاعتى دى مجرد امانه ربنا اداهالى مش من حقى بقا اقول محتاجها ولالا ولا اتبرع بيها ولالا فعشان كده انا من راى ( مجرد شعور) انا لا هاتبرع ولا هابيع عضو من اعضائى ، لكن لو اجة زى الدم لو اتبرعنا بيه هيتجدد كده كده تانى ده ممكن لانه مش حرام .. وادعو الله ان يوجهنا الى الخير .. وجزاك الله خيرا ياهند على موضوعك الرائع

[نيهال]

لالالالالالالالالالالا
مش ابيع ابدا

ممكن لو فعلا فى حد محتاج ساعتها لو اتاكدو بجد ومش اى كلام
ساعتها ممكن اكون موافقه
بس بردو مش مطمئنه لان ممكن يسرقوا

[BATISTA]

موضوع جديد ورائع كالعادة ياهند

انا راى طبعا انى ضد البيع نهائيا

لكن بعد الموت ممكن التبرع بأى أجزاء لإنقاذ الأخريين


تحياتى لطرحك ياهند

وتم التصويت

[hend]

المشاركة الأصلية بواسطة هوبة

لا طبعا هو ممكن للشخص يبيع حاجة مش ملكة اعضاء الانسان ليست ملكةدى ملك الخالق وحدة ولا يستطيع الشخص التصرف فيما لا يملكة ولكن ممكن اتبرع ماشى لكن ابيع لا

يعنى المشكله فى الفوس
لكن مبدا انك تعطى موجود
صح كده ؟ ولا انا فهمت غلط

[hend]

المشاركة الأصلية بواسطة amr_miza1

هو انا شايف ان الموضوع بسيط .. طول ما انا عايش وبتنفس .. فأكيد العضو اللى عندى انا محتاجه .. مش هبيعه ومش هتبرع بيه ....

اما بعد مماتى .. فلو حد محتاج لاى حاجة .. مش هتأخر وقتها .. هكون مُت اساسا ..

شكرا يا هند للموضوع الجميل

يعنى الفكرة حاليا مرفوضه لكن بعد عمر طويل ممكن ؟
يعنى قرشين للعيال ينفعوا

[hend]

المشاركة الأصلية بواسطة مجرد شعووور

العلماء في السعودية
حرمو بيع الاعضاء او التبرع بيها
لانها مش ملك الانسان
دي امانة ربنا اعطاها لك
انت واجبك تحافظ عليها
لكن ربنا هو وحده الي ياخدها في اي وقت

هو ممكن يكون فيها بعض الانانية
لكن بصراحة انا مش هبيع ولااتبرع طول مانا عايشة
يمكن لو مت علشان ممكن تبقى صدقة جارية تكفر ذنوبي

شكرا على الموضوع

نقطة الحلال والحرام حتى الان مازالت شائكه
حتى العلماء اختلفوا فيها
لكن برضه حضرتك مع راى عمر
صح؟

[hend]

المشاركة الأصلية بواسطة سها soha

مفكرتش فى الموضوع دة قبل كدة خالص !!!

بس لا مش هبيع ولا وانا حية ولا وانا ميتة كمان

وانا حية حاجة طبيعية ان انا مستغناش عن عضو انا محتجاة

وانا ميتة مش محتجاة .. بس هيبقى صعب على ناسى انهم بعد ما اموت ابقى حقل تجارب

او انجرح وانا ميتة .... صعب اوى ياهند

الموضوع صعب ياهند

بس وانتى ميته ممكن تكونى السبب فى حياة بنى ادام تانى؟

[hend]

المشاركة الأصلية بواسطة دقه قلب

اعتقد ان التبرع بالاعضاء الانقاذ حياة اخرين عادى
انما البيع لا طبعا حرام اعتقد كده يعنى

يعنى برضه المشكله فى الفلوس فقط
انما مبدأ العطاء موجود
صح ؟