قصيدة (بلاد دينجا ) للشاعر اكرم حسن احمد

[اكرم حسن احمد]

كان يا ما كان
ف توته و بيت..
و ضلايا
و قصه حاسسها جوايا
بلاد واسعة على الأخر
ونهر طويل ما له نهايه
بلاد دينجا..
أميرها كان ديموقراطي
حاكم شعبه..
و شعبه عشان..
ما هوش لاقي
في جيبه ما فيش..
يا دوب هدمه..
و لقمه تكفي..
ما تكفيش
و كان راضي
بناتها حلمها ف طرحه
بنات..
الدبله ف ايديها..
بقالها سنين..
علي يمنها
بنات..
الدمعة في عنيها
سنين الوحده تقتلها
بنات..
تبص ف يمنها و ف شمالها
ما فيش حاجه
و ناس بتموت و محتاجه..
و نهر..
بيجري ع الفاضي
و خيرها كتير..
و مش لينا
لابن البيه..
و لــــلــباشــــــــا
و أنا و أنت ف كماشه
في كفر ف حي و ف حاره
غلابه كتير و منداسه
و لسه قلوبنا ..
حساسه !!
أمير دينجا..
طلب منا..
نقول أحلامنا قدامه
كتير قاموا..
كتير قالوا..
و معرفشي لفين راحوا
اخويا و قام
يقول حلمه
خادوه على فين
مانيش عارف
ومش حلمه
ده حلم كتير
ده حلم الجيل
ماهوش بايع
لكن ضايع
عشان
كوسه
و مش حلمه
ف لمسة ايد
وتسبيله وكام بوسه
لكن ماسروق
ومين سارق
لكن منهوب
ومين ناهب
وقالوا بلدن محروسه
وجي دورى اقول حلمى
اقول حلمى ؟؟!!
ودينجا بحلها محبوسه
حلمنا كتير..
لكن كوابيس بتتحقق
كتمنا الحلم جوانا
رسمنا البسمه ع الخدين
نشوفها ف بعض فنصدق
اقول حلمى ؟!
انا خايف
ولازم اقول
فقلت انا حلمى اشوف ضلمه
وناس حلوه وناس ظلمه
وفيجا كتيره و فياجرا
شببنا معادش فيه قدره
و رقاصه و واد طايش
ف قالوا عبيط .
ف قولت عبيط
و بيرياله لكن عايش
ده ناس حلمت
يكون ليها
و طلعة هي مدانه
و ناس حلمة بحبة عدل
ف صبحت جوه زنزانه
وناس حلمت ..
بدبله وطرحه زغروته
فاصبحت جوه دوامه
كتير شوفنا كتير تهنا
و تاه الحلم جوانا
أمير دينجا
فتح دينجا بشكل عجيب
عشان دينجا..
تكون دينجا..
لكل غريب
و خد من قوتنا ..
و اداهم
ف وقت ما جوعنا.. هناهم
وقت ما موتنا .. علاهم
انا و انت..
نجوع نعطش و نتعرى
و خير دينجا يروح بره
متين مره
ب اموت ف اليوم
و نفسي ف يوم
أعيش مره
و اشوف القبض بيكفي
و بات ف بلادي متدفي
و اقول الحق..
الاقي الحق ..من صفي
عملنا كتير وبادينا
و طلع الحل مش كفي
و شوفت كتير شجر مانجا
ما هوش طارح
وشوفت حنان كتير جارح
وغصن زاتون..
طارح خنجر
و قصر كبير ف جبّانه
و غول طايح
وعدنا كتير يجيب لينا
لقينا الجي مش لينا
اتاري الجاي كان رايح
بلاد دينجا ماهيش بلدى
وبحمد ان انا ف بلدى
وخير بلدى
عشان للفرد ..
كام شقه
و بزر اسود ف بطيخه
بلاد دينجا..
ما فيش بطيخ و تعبانه !
مؤلف دينجا.. كنت انا
عبيط وأهبل وبرياله
عابيط وأهبل
وبرياله




خاص بالمسابقه الادبيه ( شعر عاميه)
بقلم / اكرم حسن

[الورد الجوري]

اهلا اكرم
منورنا في المنتدى
شكرا لطرحك
و لكن
عذرا سيتم النقل الى القسم الادبي
لتنال الردود و المشاهدات المرجوه
تحياتي

[نقطة عطر]

اللهم ثبت قلوبنا

على ما تحبه وترضاه

حتى

الحلم مسلوب

عجبي

اخى

اكرم

اهلاً بك

رائع ما كتب هنا

بل اكثر

جميل ان نعبر بالحرف

حدود القهر فينا

دمت بجمال هذا الحرف

وننتظر جديدك

نقطة العطر

[جناب العمدة]

الله عليك .. ان لم تكن هذه روعة فماذا تكون الروعة اذا .
لها وقع موسيقى خلاب .
احسنت احسنت احسنت .. لا تحرمنا من ابداعاتك
فى الانتظار .