هي بتتمسك إزاي ؟؟؟

[proactive]

بسم الله الرحمن الرحيم

بما إننا كلنا عايشين في مجتمع واحد ,
يبقى أكيد كلنا بنشوف نفس الحاجات و بنحسها ,,,,,

علشان كدة أنا عاوز آخد رأيكم في موضوع ما ...

ألا و هو .... التدين و الانحلال !!!

ناس كتيرة بتمشي في أقصى اليمين و ناس كتيرة برضه بتاخد أقصى الشمال

و ناس كتيرة بين الاتنين ...

لكن خلينا ناخد الموضوع من وجهة نظر تانية , وجهة نظر كل فريق و مش وجهة نظرنا احنا ...

الي في اليمين خالص , مش هنتكلم عن التطرف العقدي بتاع بعض الطوائف و الغلو في العبادة مع تحجير الفهم ,لكن هنتكلم عن الالتزام ....

الناس الملتزمة بلك تعاليم الدين , الظاهرة و الباطنة , طبعا التزام فيما يستطيعونه , يعني كل واحد بيعمل اللي يقدر عليه ,
بس فيه ناس بتتعب قوي , جدا , خالص لو مشت في الطريق ده , بتتمسك بكل حاجة -و دي مش حاجة وحشه - لكن بتتعب قوي لدرجة انها تزهق و ما تقدرش تكمل و تروح "قالبة شمال" !!!

أو الناس اللي هم شمال من الأول , و بيحاولوا يقنعوا نفسهم انهم صح , و ان ده آخرهم و أقصى جهدهم , لكن هم في الحقيقة مقصرين جدا , و بيستهبلوا و مش حاطين في دماغهم أصلا , يعني عايشين حياتهم بالطول و العرض و "مقضيينها" و خلاص ,

برضه هنسيبنا من بتوع الشمال دول و هنركز على فئة واحدة ... "المتحولون" -بش بتوع الفضاء و لا أفلام الرعب - الناس اللي كانت يمين و قلبت شمال علشان تعبت ...

دول ... غلط و لا صح ؟ ؟؟

هم أكيد مش غلط و لا صح ؟

أنا أعرف واحد كان كدة , كان يمين خالص , و فضل متمسك و بشدة , و يقاوم لحد ما تعب خالص , و انهار , و راح قالب شمال خالص -طبعا غلط- و بقى آخر ***** , و في الآخر , بقى بين البينين .
مش عارف ليه لما افتكرته , تذكرت حديث رسول الله -صلى الله عليه و سلم- : " يأتي على أمتي زمان الصابر فيهم على دينه كالقابض على الجمر ."

مش عارف كده , فكرت في الحديث ده بطريقة مختلفة شوية
قلت هو اللي هيقبض على الجمر , هيقبض عليها إزاي ؟؟
هيحطها في كفه و يقفل قوي و يفضل يلوى من الألم و الشدة ؟
و لا هيمسكها بالراحة و يقعد يحدفها من ايد للتانية و ينفخ في ايده -هف هف - و ممكن تقع منه و هو بيحدفها و يرجع يمسكما تاني و يحدفها بين يديه ؟؟؟

حد فاهم حاجة ؟؟!!

المشكلة إني مش عارف هو ايه الصح بالضبط , و إذا كان تشبيهي ده أصلا صح و لا غلط , و حتى لو كان صح , ازاي نطبقه ؟؟

يعني أكيد انت لو لقيت واحد مجتهد في العبادة و أعمال الخير , و بيتعب نفسه فيها , مش هاقول له براحة شوية علشان نفسك , و حتى لو قلت له , مش هيسمع كلامك علشان هو متحمس للعبادة , لكن للأسف مش هيحس بفايدة كلامك إلا بعد ما ينتكس لا قدر الله و يعرف انه كان داخل شديد قوي .. و بعدين يعني براحة دي يعني ايه بالضبط ؟ ما هي مش محدده برضه ...

أنا مش عارف أشرح قوي ... بس متهيا لي يعني أنا أقصد أقول , هو ايه الحد الأدنى من الاعمال اللي الواحد لازم يعمله علشان يبقى في السليم , و ايه برضه الحد الأقصى اللي الواحد مفروض ما يزودش عنه , حتى لو يقدر , علشان ما يعملش نتائج عكسية ... ؟؟؟

و حاجة تانية برضه معلش ,
ازاي الواحد يتأكد أصلا إنه في اليمين ؟؟
طيب ما احنا بنشوف ناس بيفجروا نفسهم في مسلمين زيهم و مقتنعين انهم على حق , و بيتكلموا بآيات من القرآن و مفكرين انهم داخلين الجنة ...
يعني ساعات الواحد بيفكر انه ممكن يكون زيهم على الباطل , ليه لأ ؟؟ و احنا مفكرين اننا صح , لكن ممكن نكون كلنا غلط , و نخش النار في الآخر !!!
معلش تعبتكم معايا .. بس الموضوع ده شاغلني قوي ..

يعني من الآخر , ازاي نمسك الجمرة الصح و ما نمسك واحدة غلط و نتعب نفسنا بيها و في الآخر تعبنا يروح "فشنك" , و إزاي نمسكها بطريقة صحيحة علشان ما نرجعش نرميها خالص بعد ما تحرقنا !!!! ؟؟؟؟

مستني آراءكم و مقترحاتكم .. على SMS

[duha]

اهلا ابراهيم
عاوز تعرف ازاي تقدر تمسك بالجمرة
بسيطه
قلب المؤمن دليله
شوف يا ابراهيم
الموضوع فيه كلام كتير
وانا اليوم لسه تعبانه وحاسه ان كميه الشر جوايا كبيرة
فافضل اني ارجع مرة ثانيه للحديث
انتظرني
وادعو لي ابقى كويسه

[amr_miza1]

ابراهيم

فهمتك اوى فى موضوع الجمرة .. كيف يكون الحفاظ على الدين كالجمر .. ومنذ متى والانسان فى استطاعته ان يقبض على الجمر ..
يعنى عندك اشارة بصعوبة وربما استحالة القبض على الجمر ..

بصراحة من وجهة نظرى المتواضعة جدا .. - يعنى انا مش بحب اتكلم كتير فى الدين - الحلال بيّن والحرام بيّن وبينهما متشابهات .. وعليك أن تتقى الشبهات .
الموضوع فى الظاهر سهل جدا ... ولكن فى التطبيق تكمن الصعوبة
والمهم فى النهاية الصبر والمثابرة
ومحاولة انى امسك الجمر ..


ملحوظة هامة .. ان تقبض على الجمر هو أن تحاول الابتعاد عن المعاصى .. وليس ان تحاول التقرب الى الله . وهناك فرق بيّن

شكرا ابراهيم

[حنين مصر]

موضوع حلو يا ابراهيم
خير الامور الوسط

[الورد الجوري]

اهلا م / ابراهيم
الموضوع ده جميل قوي
بالنسبه للمتحولين من اليمين الى الشمال
اعتقد ان ده بسبب غلط عندهم هم
في طريقة اتخاذ الجهه اليمين من الاساس
في قاعده بتقول
( قليل متصل خير من كثير منفصل )
بمعنى اني مش ملتزمه نهائيا و في الشمال
ابدأ بالصلاه .. صحيح غيري بيصلي النوافل بس انا ابدا بالفرائض و احط نقطه و اقف .. اتقن الامر كويس
و احبه و احس بغلطي اني كنت سايباها و بعدين اصلي نافله
مثلا مع الصبح و استمر و بعدين ابدا اضيف الظهر
و هكذا
الحكايه تعويد للنفس .. اما اني اكون في الشمال جدا و فجأه
آخد كل الدين بالاوامر و النواهي و الفرائض و السنن
ده هو الخطأ .. لا بد من التدرج
و طبعا لله المثل الاعلى في الحث على التدرج اللي بتكلم عليه
و ده باين جدا في تدرج تحريم الخمر بالرغم من انهم كانوا صحابه الرسول و كانوا على اتم استعداد للطاعه التامه
و لكن الله هو العالم بطبيعه النفس البشريه
و مدى فاعليه التدرج و التعود لذلك حرم الخمر بالتدريج
و الترغيب و الترهيب

الخلاصه بقى انه اجابة على سؤالك ازاي نمسكها
فده اعتقد علاجه التدرج و سواء كان تفسيرك او تفسير عمرو هو الصحيح .. فانا حابه اقول ان في كلا الحالتين
الحل في مسايسه النفس و اخذها مره بشده و مره بلين
و اني اعرف ان
الالتزام الشديد - الالتزام - التوسط - عدم الالتزام - عدم الالتزام نهائيا
دول كلهم عباره عن درجات سلم
و مينفعش ابدا اني انتقل من الدرجه الاولى الى الدرجه العاشره
في خطوة واحده لابد اني هقع في النص او اني هحب
اني امكث في الاسفل و العياذ بالله

ياترى حد فاهمني ؟؟

[سها soha]

اهلا .. اربراهيم
موضوعك مهم قوى
ما بين الشمال ــــــــــــــــــ واليمين

اليمين : انك ماتعملش اى حاجة حرام ولا غلط انك تبقى ملتزم دينيآ واخلاقيآ ومثال جيد للناس الى حواليك

طب لو انت كدة فعلا بتحب الخبر وبتصلى وبتحفظ قرأن وبتسعى للخير دايما .. بس جنب دة كلة
ممكن تسمع اغانى .. طب ما الاغانى حرام يبقى انا كدة من اهل الشمال واليعاذ بالله !!!!

طب ازاى اعرف انى من اليمين ؟



صعب انى امسك الجمرة بكف ايدى واقفل ايدى عليها
بس فى نفس الوقت سهل انى ابعد نفسى عن المعاصى
واعتق نفسى من الخطأ ... (لا تستوعى الحسنة بالسيئة )

المتحولون بقة من اليمين للشمال عشان تعبوا ... دى مصيبة ياابراهيم
انا دايما اسمع ان المتلهف عن العبادة زى العطشان الى بقالة زمن ما شربش
لما بيشوف الماء بينهال عليها ويبقى عايز يروى عطشة بقدر الممكن

زية زى الانسان البعيد عن الدين فجاة تدين وبشدة .. وفجاة ارتد

العلاج حجات كتير اوى لازم تتغير .. مفاهيم ومعتقدات لازم نرجع لها
لازم يبقى فى نوع مع الحوار الايجابى .. والتطبيق
الجمعيات والمدارس والجامعات ..



مش عارفة بقة يابراهيم .. ...... .....

[proactive]

المشاركة الأصلية بواسطة duha

اهلا ابراهيم
عاوز تعرف ازاي تقدر تمسك بالجمرة
بسيطه
قلب المؤمن دليله
شوف يا ابراهيم
الموضوع فيه كلام كتير
وانا اليوم لسه تعبانه وحاسه ان كميه الشر جوايا كبيرة
فافضل اني ارجع مرة ثانيه للحديث
انتظرني
وادعو لي ابقى كويسه

ضحى ..
نورتي الموضوع بجد
و بقى لنا كتير مش بنشوفك
ألف سلامة عليكي ..

قلب المؤمن دليله ؟؟؟
متهيأ لي لو كانت فطرته سليمة ,
أما في زماننا هذا , حيث يرى حسنا ما ليس بالحسن ,
و بين أفراد مثلنا ,,,-أو على الأقل مثلي, انتم إن شاء الله تكونوا حلوين -لا أظن أن الأمر سيفلح ..
عموما , مستنيينك , و مش هانسى انك هترجعي تكملي تعليق على الموضوع ..

و ربنا يوفق الجميع لما يحب و يرضى ...
-

[proactive]

المشاركة الأصلية بواسطة amr_miza1

ابراهيم

فهمتك اوى فى موضوع الجمرة .. كيف يكون الحفاظ على الدين كالجمر .. ومنذ متى والانسان فى استطاعته ان يقبض على الجمر ..
يعنى عندك اشارة بصعوبة وربما استحالة القبض على الجمر ..

بصراحة من وجهة نظرى المتواضعة جدا .. - يعنى انا مش بحب اتكلم كتير فى الدين - الحلال بيّن والحرام بيّن وبينهما متشابهات .. وعليك أن تتقى الشبهات .
الموضوع فى الظاهر سهل جدا ... ولكن فى التطبيق تكمن الصعوبة
والمهم فى النهاية الصبر والمثابرة
ومحاولة انى امسك الجمر ..


ملحوظة هامة .. ان تقبض على الجمر هو أن تحاول الابتعاد عن المعاصى .. وليس ان تحاول التقرب الى الله . وهناك فرق بيّن

شكرا ابراهيم

عمرو ...
إضافتك أضافت الكثير ...

معاك ان الحلال بين و الحرام بين ...
لكن المشتبهات كثرت جدا دلوقتي ..

يعني فيه حاجات كتيرة ما بقاش الواحد عارف إذا كانت حلال و لا حرا , صح و لا غلط ,

و عندك من ده أمثلة كتيرة : إطلاق اللحيو و سماع الأغاني , و تقصير الثياب , و الاختلاط , و كشف الوجه للنساء و سفرهن من غير محرم , و ............. حاجات كتيرة قوي تلاقي فيها أكتر من رأي
و ما تعرفش تخرج من الخلاف , لأن الحاجات دي متغلغلة بشدة داخل حياتنا اليومية ...

أما أن يكون القبض على الجمر في الابتعاد عن المعاصي فقط ؟؟؟ فأنا أسألك , اشمعنى ؟؟ ما التمسك بالطاعات برضه صعب ,
صعب ان الواحد مثلا يطلق لحيته , أو يصلي كل الفروض في المسجد , أو كل الفروض في أوقاتها علشان الشغل و الكليات و الحاجات دي , و ان الواحد يعرف ما ينبغي معرفته من العلوم الشرعية التي هي فرض عين كفقه الطهارة و الصلاة و غيرها ....
فيه طاعات كتيرة برضه صعب نحافظ عليها ...

و لا انت شايف ايه ؟؟
-

[proactive]

المشاركة الأصلية بواسطة حنين مصر

موضوع حلو يا ابراهيم
خير الامور الوسط

شكرا على مرورك يا حنين مصر

بس المشكلة اننا نعرف هو ايه الوسط ده بالضبط ؟؟

[hend]

حائر بين ........
هو دا مش انت بس
دا الكل
احيانا الفرد بيكون منطلق مع طريق الصلاح وزى ما بتقول انت كده بيعمل كل حاجه حتى لو وصل للمغالاة التامه واحيانا بيكتفى بصلاة الفروض بس
يعنى من الاخر الايمان دا زى الزرعه احيانا بتتساقط اوراقها واحيانا بتجف واحيانا تكون مزدهره
وطبعا مش ممكن تفضل طول الوقت على شكل واحد بتتغير ودا لان الانسان بطبعه كائن متغير والتغيير شىء طبيعى ومطلوب
وطبعا المغالاة فى الدين مش مطلوبه فى اكثر الاحوال عملا بحديث الرسول صلى الله عليه وسلم
"ان هذا الدين يسر ,ولن يشاد الدين احدا الا غلبه"
اعتقد ان الجمرة يمكن الاحساس بها اذا كننا على الاقل مواظبين بشكل ثابت على العبادات الرئيسيه مهما تغيرت امور حياتنا

[proactive]

المشاركة الأصلية بواسطة الورد الجوري

اهلا م / ابراهيم
الموضوع ده جميل قوي
بالنسبه للمتحولين من اليمين الى الشمال
اعتقد ان ده بسبب غلط عندهم هم
في طريقة اتخاذ الجهه اليمين من الاساس
في قاعده بتقول
( قليل متصل خير من كثير منفصل )
بمعنى اني مش ملتزمه نهائيا و في الشمال
ابدأ بالصلاه .. صحيح غيري بيصلي النوافل بس انا ابدا بالفرائض و احط نقطه و اقف .. اتقن الامر كويس
و احبه و احس بغلطي اني كنت سايباها و بعدين اصلي نافله
مثلا مع الصبح و استمر و بعدين ابدا اضيف الظهر
و هكذا
الحكايه تعويد للنفس .. اما اني اكون في الشمال جدا و فجأه
آخد كل الدين بالاوامر و النواهي و الفرائض و السنن
ده هو الخطأ .. لا بد من التدرج
و طبعا لله المثل الاعلى في الحث على التدرج اللي بتكلم عليه
و ده باين جدا في تدرج تحريم الخمر بالرغم من انهم كانوا صحابه الرسول و كانوا على اتم استعداد للطاعه التامه
و لكن الله هو العالم بطبيعه النفس البشريه
و مدى فاعليه التدرج و التعود لذلك حرم الخمر بالتدريج
و الترغيب و الترهيب

الخلاصه بقى انه اجابة على سؤالك ازاي نمسكها
فده اعتقد علاجه التدرج و سواء كان تفسيرك او تفسير عمرو هو الصحيح .. فانا حابه اقول ان في كلا الحالتين
الحل في مسايسه النفس و اخذها مره بشده و مره بلين
و اني اعرف ان
الالتزام الشديد - الالتزام - التوسط - عدم الالتزام - عدم الالتزام نهائيا
دول كلهم عباره عن درجات سلم
و مينفعش ابدا اني انتقل من الدرجه الاولى الى الدرجه العاشره
في خطوة واحده لابد اني هقع في النص او اني هحب
اني امكث في الاسفل و العياذ بالله

ياترى حد فاهمني ؟؟

الورد الجوري
شكرا جزيلا على رايك المنظم دائما ..

بالنسبة للمسألة الأولى , التدرج أو الايغال في الدين برفق ,,, فكثير من الناس أصلا لما يكون داخل بيكون متحمس , و عاوز يعمل كل حاجة , و بيبقى عنده فعلا طاقة لكدة ,
و لو حد شاعتها قال له بلاش , يبقى أكنه بينهاه عن طاعة ستطيع فعلها ,,,

و بعدين التدرج أنا فيه نقطة مش فاعمها فيه , لو حد كافر جه يدخل الاسلام دلوقتي , هنديلة "فترة سماح" يشرب فيها الخمر في غير وقت الصلاة و بعد كده بكام شهر نقول له بطلها ؟ و لا هنقول له انها حرام على طول ؟؟
و لو فرضا انه ينفع نديله فترة سماح , لو مات ساعتها , يبقى على معصية و لا لأ ؟؟
المسألة دي محيراني فعلا ..

و قد خلصت من كلامك أن الحل لتلافي هذه المشكلة من الأساس هو التدرج منذ البداية ,, و هذا يعني كبت الحماس الناشيء في البداية , و هذا في نظري خطر كبير ,

و بعدين موضوع انه يعرف اليمين من الشمال اصلا فرع عن معرفته فن التدرج في العبادات ,
يعني الشق التاني من السؤال , اننا مش عارفين أصلا نعرف الإفراط و التفريط من الوسطية !!

يعني ازاي أصلا الواحد يعرف انه على الحق ابتداءا -يتأكد- ثم بعدها يتدرج في هذا الحق ,
لأن ناس كتير بتبقى متشددة و مش واخدة بالها و مفكرين نفسهم وسطيين , و على النقيض , ناس بيبقوا مفرطين و بيقولوا انهم وسطيين برضه .. !!!
-

[proactive]

المشاركة الأصلية بواسطة سها soha

اهلا .. اربراهيم
موضوعك مهم قوى
ما بين الشمال ــــــــــــــــــ واليمين

اليمين : انك ماتعملش اى حاجة حرام ولا غلط انك تبقى ملتزم دينيآ واخلاقيآ ومثال جيد للناس الى حواليك

طب لو انت كدة فعلا بتحب الخبر وبتصلى وبتحفظ قرأن وبتسعى للخير دايما .. بس جنب دة كلة
ممكن تسمع اغانى .. طب ما الاغانى حرام يبقى انا كدة من اهل الشمال واليعاذ بالله !!!!

طب ازاى اعرف انى من اليمين ؟



صعب انى امسك الجمرة بكف ايدى واقفل ايدى عليها
بس فى نفس الوقت سهل انى ابعد نفسى عن المعاصى
واعتق نفسى من الخطأ ... (لا تستوعى الحسنة بالسيئة )

المتحولون بقة من اليمين للشمال عشان تعبوا ... دى مصيبة ياابراهيم
انا دايما اسمع ان المتلهف عن العبادة زى العطشان الى بقالة زمن ما شربش
لما بيشوف الماء بينهال عليها ويبقى عايز يروى عطشة بقدر الممكن

زية زى الانسان البعيد عن الدين فجاة تدين وبشدة .. وفجاة ارتد

العلاج حجات كتير اوى لازم تتغير .. مفاهيم ومعتقدات لازم نرجع لها
لازم يبقى فى نوع مع الحوار الايجابى .. والتطبيق
الجمعيات والمدارس والجامعات ..



مش عارفة بقة يابراهيم .. ...... .....

سها
شكرا جزيلا على تواصلك ...
بس لي تعقيب على كلامك : "صعب انى امسك الجمرة بكف ايدى واقفل ايدى عليها
بس فى نفس الوقت سهل انى ابعد نفسى عن المعاصى
واعتق نفسى من الخطأ ... (لا تستوعى الحسنة بالسيئة )"

ازاي يعني ؟؟ , ما هو لو القبض على الجمرة صعب , يبقى الابتعاد عن المعصية صعب برضه !!

و برضه خلينا نتكلم في اللي بيصلي و يتعبد و بيسمع أغاني مثلا ؟؟؟
ده يبقى مع أي فريق ؟؟
هو فيه من اليمين , و فيه من الشمال ,
لكنه لا يعد من الوسط لأن الوسك هو الالتزام بدون لإراط و لا تفريط , و ليس الالتزام مع بعض التفريط .. هناك فرق ,
فأنا بصراحة مش عارف دول يبقوا تبع مين بالضبط ؟؟؟

و الجزء التاني من كلامك :
"المتحولون بقة من اليمين للشمال عشان تعبوا ... دى مصيبة ياابراهيم
انا دايما اسمع ان المتلهف عن العبادة زى العطشان الى بقالة زمن ما شربش
لما بيشوف الماء بينهال عليها ويبقى عايز يروى عطشة بقدر الممكن

زية زى الانسان البعيد عن الدين فجاة تدين وبشدة .. وفجاة ارتد "
ما هو ده السبب , يا سها , انه بيبقى أصلا متعطش في الأول , و جوعان فيقبل على الدين كله , فيصاب بالتخمة و الزهد فيه ,
و هي دي المشكلة ,

و ردك الدبلوماسي اللي في الآخر ده , ما دام دخلنا في المفاهيم و المدارس و الجامعات , يعني انه ما فيش حل .. صح ؟؟

[ابن شحطوطة]

شوف بقا يا هيما ..
إسمحلي أشمَّر و آخد غطس في الموضوع ده عشان أصله جه على الجرح ..
ماشي ..
أنا شمِّرت و الله أهه ..
أولا ...
عايزين نتفق على حاجه ..
مين أكتر واحد يعرف تركيبة البني آدم ؟؟
أكيد اللي خلقه .
طيب ، و اللي خلقه سابه كده سايب ، و لا أرشده و بعتله اللي يعرفه ؟؟
أكيد أرشده (( و هديناه النجدين )) بس في نفس الوقت سابه على راحته ، و ما أجبرهوش على حاجه ، بس برضه جعله مسؤول عن كل اللي بيعمله .
ليه مسؤول ؟؟
عشان العدل ، و عشان اللي خلقه إداله أدوات الاختيار (( ألم نجعل له عينين و لسانًا و شفتين )) .
خلاص يبقى لحد كده حلو معاك أدواتك ، و قدامك طريقين ما فيش طريق تالت يا هيما ، نجدين اتنين بس.
أوكي .
أكمل و لا بلاش ؟؟
لو عايز تزيع قول زيع .. لو مش عايز مش هنزيع

[الورد الجوري]

المشاركة الأصلية بواسطة proactive

الورد الجوري
شكرا جزيلا على رايك المنظم دائما ..

اهلا بيك
ربنا يخليك ده من ذوقك

بالنسبة للمسألة الأولى , التدرج أو الايغال في الدين برفق ,,, فكثير من الناس أصلا لما يكون داخل بيكون متحمس , و عاوز يعمل كل حاجة , و بيبقى عنده فعلا طاقة لكدة ,
و لو حد شاعتها قال له بلاش , يبقى أكنه بينهاه عن طاعة ستطيع فعلها ,,,

و بعدين التدرج أنا فيه نقطة مش فاعمها فيه , لو حد كافر جه يدخل الاسلام دلوقتي , هنديلة "فترة سماح" يشرب فيها الخمر في غير وقت الصلاة و بعد كده بكام شهر نقول له بطلها ؟ و لا هنقول له انها حرام على طول ؟؟
و لو فرضا انه ينفع نديله فترة سماح , لو مات ساعتها , يبقى على معصية و لا لأ ؟؟
المسألة دي محيراني فعلا ..

بالسبه للنقطه دي انا هقول رايي فيها
لكن طبعا مع العلم اننا لسنا مشرعيين و لا مؤهلين للافتاء
لكن تعالى نحتكم الى المنطق و الجهود الفرديه و القياس
نفترض ان الكافر ده و اللي داخل الاسلام اهو حالا
بيشرب اصلا الخمر كل اسبوع
هل يصح اني اقوله اشربها بس في الصلاه تكون فايق ؟؟؟
لا طبعا ده ممكن يتمنع مباشره منها
التدرج نزل لقريش بناء على ايه ؟؟
انهم اعتادو على تجرع الخمور كل يوم صباحا و مساء
فكان لازم يكون فيه تدرج زي بالظبط المدمن اللي بيتعالج
مش بنمنع عنه المخدرات مره واحده
لأ بنديله جرعات اخف و اخف الى ان يقوى الجسم على
التعايش بدون الجرعات الكبيره يعني بنسحب السموم من جسمه بالتدريج
يبقى في حالة الكافر اللي هيدخل الاسلام و هو معتاد على الخمر كل يوم نقدر نصنفه كمدمن فعليا و يتم علاجه
و لو مات هيبقى نيته السليمه كفيله لاسدال رحمة ربنا عليه

ده طبعا يا هندسه من وجهة نظري الشخصيه
و اتمنى اكون وصلتلك شيء

و قد خلصت من كلامك أن الحل لتلافي هذه المشكلة من الأساس هو التدرج منذ البداية ,, و هذا يعني كبت الحماس الناشيء في البداية , و هذا في نظري خطر كبير ,

لا معلش لازم نفرق بين شيئين
التدرج و الاستسهال
بمعنى انه الواحد يسخر طاقته و حماسه في البدايه
الى جهه معينه مش افرقها في كل الجهات
يعني ادخل بكل حماسي و قوتي بدون تثبيط لعزائمي
بس ادخل في الفرائض اولا
و بعدين بنفس العزيمه و الشوق للتجديد و الاقبال الى الله
ادخل في السنن
و هكذا
يعني اوجه طاقتي الى طريق واحد امشيه و اظبط نفسي فيه و بعدين اتجه الى باقي الاتجاهات بعد مكون اتقنت الطريق الاول
والا هضيع كل المجالات و هنتحول من اليمين الى الشمال

و بعدين موضوع انه يعرف اليمين من الشمال اصلا فرع عن معرفته فن التدرج في العبادات ,
يعني الشق التاني من السؤال , اننا مش عارفين أصلا نعرف الإفراط و التفريط من الوسطية !!

يعني ازاي أصلا الواحد يعرف انه على الحق ابتداءا -يتأكد- ثم بعدها يتدرج في هذا الحق ,
لأن ناس كتير بتبقى متشددة و مش واخدة بالها و مفكرين نفسهم وسطيين , و على النقيض , ناس بيبقوا مفرطين و بيقولوا انهم وسطيين برضه .. !!!
-

عشان نعرف احنا على حق و لا على باطل
او نتأكد احنا في اليمين و لا الشمال
امسك الثوابت اللي مفيش فيها نقاش
و ابني عليها و على اساسها تصرفاتي و كل اموري
اما الاتجاه الى الشبهات ده بقى اللي بيجيب لخبطه
طبعا كلنا عارفين الحديث الشريف اللي فيه الحلال بين و الحرام بين .. بس تعالى نشوف باقي كلام الحبيب المصطفى
الحلال بين والحرام بين وبينهما مشتبهات لا يعلمها كثير من الناس فمن اتقى الشبهات استبرأ لدينه وعرضه ومن وقع في الشبهات وقع في الحرام كالراعي حول الحمى يوشك أن يرتع فيه ألا وإن لكل ملك حمى ألا وإن حمى الله محارمه ألا وإن في الجسد مضغة إذا صلحت صلح الجسد كله وإذا فسدت فسد الجسد كله ألا وهي القلب
من الحديث باين انه مفيش شيء بيلخبط الانسان
و يتوهه و يخليه مش عارف هو ماشي في اليمين و لا الشمال
الا الشبهات .. و الحل اتقاءها
و ده طبعا للناس اللي بيكونو مفرطين و حاسبين انهم وسطيين او ماشيين صح

اما بالنسبه للاخوة المتشددين
فكفايه جدا اني ارجع لسنه الرسول و اطبق منها
في حياتي و اقارن مواقفي بكل ما ورد في السنه لاعلم هل انا متشدده ام لا
و اذا وجدت اضافه ليا او تفوق عما ورد في السنه
فيجب ان اعلم اني اخطأت و خالفت الرسول لانه لو كان ما افعله هو الصواب لفعله سيد الخلق عليه الصلاه و السلام

شكرا م / ابراهيم
و اعتذر عن اطالتي الدائمه