هل أرسل الرسول رسالة إلى حسني مبارك؟؟

[عتاب]

حد شاف القاهرة اليوم؟؟

حد شاف الرجل الذي يقول انه رأى الرسول صلى الله عليه وسلم في المنام

وان الرسول عليه الصلاة والسلام اخبره ان يبلغ الرئيس حسني مبارك رسالة بتغيير نظام الحكم

وان نظام الحكم يكون بالتوريث

وان اسم الرئيس القادم اتقال في المنام

والراجل رافض يفصح عن اي شيء الا امام الريس ويطالب برؤيته والجلوس معه

ولما عمرو اديب سأله هل الرئيس الجديد من اقارب حسني مبارك

قاله : كلنا من قرايب الريس ومارضيش يقول هو مين

كده انا قريبته ومصر كلها قرايبه

[Dr.Hammood]

بعد الشر علينا

[النينجا المصري]

انا قرأت الخبر ده وكمان هو اتنشر في جريدة المصري اليوم واحنا منقدرش نكذب الراجل لكن الرؤيا لها اصولها ه وهي ان الرؤيا لا يترتب عليها احكام شرعيه في الدنيا وان الرؤيا فقط تخص صاحبها ولا يستطيع انه يلزم غيره بما رآه في الرؤيا وبالتالي فوصية النبي صلى الله عليه وسلم لهذا الرجل تلزمه هو فقط ولا تلزم غيره بتنفيذ ما جاء فيها والا لو فتحنا الباب فكل يوم هيطلع واحد يقول انا رأيت الرسول وامرني ان ابلغكم ان تفعلوا كذا وكذا و نصبح نلاقي ناس بيشرعوا دين جديد بحجة انهم رأوا النبي .
وبعدين كون الراجل اللي بيدعي انه شاف الرؤيا صادق او كاذب محدش في العالم كله يقدر يتأكد منها فازاي هو عايز يلزم بيها الناس وينفذوها ؟؟!!!!!

[بنت بلدي]

السلام عليكم

بصراحة أول مرة أعرف عن الحكاية دي بس لو

كانت مصر كلها قرايب حسني مبارك يبقي من

دلوقتي هقدم علي طلب الجنسية المريخية

بس ما أظنش أن الراجل ده صادق يمكن عنده طلب وعاوز يقابل الريس وده طبعاً في المشمش

[جناب العمدة]

الرجل أزهرى يعنى رجل دين
يقسم بالله انه صادق فى ذلك وأنه راى الرسول صلى الله عليه وسلم
وأوصاة برسالة لحسنى مبارك .. منها أن يغير بطانته وقال الرجل انها تكررت
تلك الرؤيا خمس مرات .. وقال حاشاى أن أكذب على رسول الله .. وذكر الحديث

طيب ... فى ايه لو حسنى جلس واستمع له
لو صدق فهى رسالة من النبى الكريم وأراد الرجل ابلاغها
الرجل لم يأتى بدين جديد انما جاء برسالة منها تغيير البطانة
بلاش نتهم الرجل لمجرد انه اراد ابلاغ ما رآه فى منامه
والرسول الكريم يقول من رآنى فى منامه فقد رآنى حقا .

[hend]

عموما امن الدوله بيحقق مع الراجل وياهيطلع صادق ياكذاب
بس فى الاول والاخر
الريس مش هيسمعه

[Ebn elbalad]

الريس هيسمع رؤية الراجل اللى بيقول إنه عارف الريس اللى جاى والنبى ـ صلى الله عليه وسلم ـ بلغه بإنه يغير نظام الحكم ؟؟؟ صباح الخير يا دمياط

[نرجسية]

ده حاجة ظريفة قوى

أمن الدولة بيحققوا مع صاحب الرؤيا على أساس ان الرؤيا فيها أمر بتغيير الحاكم

و الرئيس طبعاً مش فاضى يقابل واحد مواطن شاف رؤيا و معاه رسالة
و المفروض ان أمن الدولة يمسكوا الراجل يعصروه لغاية ما يعرفوا نص الرسالة

أنا لو من الرئيس أفضى نفس عشر دقايق و أسمع الرسالة على انفراد

الستر حلو برضو !!!

[**ريفيرا**]

اول مرة اسمع الخبر ده
والله امن الدولة دول فاضيين معندهمش غير الناس الملتزمة ويحققوا معاهم وسيبين البلاوي التانية تخرب ولا بيكلموهم
لو صحيح ان الريس الجاي هيكون احسن من ده يبقي
ربنا استجاب لدعائنا

[فارس اصيل]

سبحان الحى اللذى لا يموت

[عتاب]

المشاركة الأصلية بواسطة Dr.Hammood

بعد الشر علينا

معاك حق
بس لو احنا قرايبه وبيحصلنا كده
امال لو مش قرايبه كان هايحصلنا ايه

[منتصرحجازي]

يا إخواني هل عندكم شك في أن الرئيس يحتاج لمثل هذه الرؤية ( لا وكلا ) !!!!!!!!!!!!!!!!!!

[amr_miza1]

استبعد ان الريس هيقابله ..

لكن عى أى حال الحديث النبوى بيقول " ‏من كذب علي متعمدا فليتبوأ مقعده من النار‏ " صدرق رسول الله ( ص ) والرجل مش هيوصل بيه الدرجة لانه يكذب فى حاجة زى كدا
وهو مش مجبر على كدا ..
المهم ..

احسن حاجة اننا طلعنا قرايب الريس .. يعنى بلدياتى وقريبى

[eme]

قال رسول الله - صلي الله عليه وسلم -" ‏من كذب علي متعمدا فليتبوأ مقعده من النار‏ "

ربنا يظهر الحق

[عتاب]

على فكرة الراجل ده طلع من عندنا
من بلد جنب المنصورة
وزميلتي في الشغل طلعت تعرفه
وهي بتقول انه فعلا رجل صالح
وانه بالفعل مش راضي يحكي المنام لأي حد الا لما يشوف الريس