دارى على شمعتك تقيد

[نرجسية]

الســــــــــــــــــــلام عليــــــــــــــــــــــكم

ازيكم يا شباب ابن مصر

النهاردة خطر على بالى موضوع منتشر فى مجتمعنا
ألا و هو ان كل واحد بيدارى على شمعته
لأنه خايف أى حد ينفخ له فيها تقوم تنطفى

اذا واحد جاب مجموع كبير فى الثانوية العامة يخبى على الجيران لايقروا عليه

و اذا واحد اشترى عربية جديدة
ما يقولشى لحد نهائى و احتمال يخبيها فى جراش بعيد عن البيت عشان ماحدش يعرف !!

و اذا واحدة حملت ما تقولش لحد انها حملت الا يوم الولادة

و اذا واحد اتوظف فى وظيفة سقع ما يقولشى لزمايله
فاذا جات له فرصة سفر ماحدش يعرف الا بعد ما ينزل من الطيارة


و حاجات من دى و الأمثلة كتيرة

يا ترى مجتمعنا ليه بقى كدة
كله خايف من شر التانى


و يا ترى اجدادنا كانوا كدة
و للا النفوس اتغيرت عن زمان ؟!

و هل الخوف من الحسد ممكن يوصلنا لمرحلة الانغلاق على نفسنا للدرجة دى ؟!!

ليه بقينا مش بنستمتع بالحاجة الحلوة اللى عندنا و نتباهى بيها خوفاً من عين الآخرين

هل ده ممكن نسميه فوبيا الحسد ؟


الى أى مدى أنت أو انتِ بتدارى على شمعتك ؟
و للا على طبيعتك و بتقول كل حاجة من غير خوف و مسلم أمرك لله ؟

[omarr]

نرجسيه

موضوع الحسد من الغير , انا لا اعيره ادنى اهتمام ...و الحمد لله الأمور ماشيه كويس

[محمد كمال على]

السلام عليكم نرجسيه
يقول الله تعالى
بسم الله الرحمن الرحيم(وأما بنعمه ربك فحدث) صدق الله العظيم
الحسد موجود والنظره موجوده
لكن لن يصيب الانسان الا ما كتب عليه

[amr_miza1]

نرجسية

موضوع الشمعة اللى بندارى عليها علشان تقيد , شايف انه صحيح ومطلوب
" استعينوا على قضاء حوائجكم بالكتمان "
ولكن مش بالطريقة اللى انتى صورتيها فى الموضوع يمكن زيادة شوية ... يعنى مش معقول هجيب عربية واخاف حد يشوفها او مش هنحج فى الثانوية العامة بمجموع 100% ومش هقول

لكن انا شايف ان فيه فرق بين " الحسد " وبين " دارى على شمعتك "
ربما تكون المواقف السابقة خاصة بالحسد وانا لا اضعه دائما نصب عينى
أما " دارى على شمعتك " فأنا مقتنع بيها تماما


شكرا نرجسية للموضوع

[hend]

ياريت الوضع كان مجرد حسد كان الوضع بقى احسن من كده
الحكاية مش مجرد ما يسمى الكذب بالحذف (اى اننا لا نحكى عن اشياء معينه فى اطار السرد لاحداث ) ولكنه كذب فى كل شىء خوفا من القدرة الرهيبه للحسد
ولا يعلموا ان كل شىء بيد الله تبارك وتعالى
هل تعلمى انى اعرف امراة تخاف خوفا شديدا من الحسد لدرجه اختراع الاكاذيب الكثيره حتى لا يعرف احد اى شىء عن بيتها
نعم لم تصب بحسد ولكنها اصيبت بشىء اشد خطورة اصابت بالاحتقار
الخوف المرضى من الحسد اصاب المجتمع بالكثير من الافات الاخرى

[نيهال]

تصورى لسه كنت بنتناقش انى بخاف فعلا من الحسد

لا ولاحظتى يا نرجسيه فعلا انا مش بخبى حاجه فى حياتى.......
فبكون كتب مفتوح لكل الاصدقاء
لكن للاسف اتعلمت من فتره بسيطه بعد ما انجرحت اكتر من مره....ان فيه شخصيات ما تتكلمى امامه باى شئ يخص حياتك ولا يعنيهم باى شئ

بجد عينيهم وحشه......ومع ذلك لاتقينى اتكلمت ونسيت
وتحصل مشكله بعد ما اتكلم
بجد بكون زعلانه جدا


لكن بحاول بقالى كام يوم..ادعى لى
ربنا يبعد عيون الناس عننا

على فكره النفوس بتغير كتير.....وبتكون عامل اساى
فمثلا اللى عنده مال مش زى اللى مش عنده
ومش شرط.......لكن فيه ناس زى ما بيقولوا كده عينيهم مليانه
فهمانى؟؟

تسلم ايديكى..موضوع جميل للنقاش

[الورد الجوري]

اهلا دكتورتنا
الموضوع مهم جدا جدا
طبعا زي متفضل الاخوة و قالو ان الحسد مذكور في القران
و انه نستعين على قضاء حوائجنا بالكتمان
و ان طبعا العين فلقت الحجر نقلا عن قصه واقعيه
و مذكوره في كتب السيره
ولكن
العيب فين ؟؟
العيب في النفوس البشريه بجد
و ده اللي مغاير فينا عن زمان اجدادنا
لان في ناس بتكون نفوسها مش صافيه بالمره
و لازم تتعاملي معاها بالمنطق ده
بس يعني نمسك العصايه من النص
يعني لا نكذب و لا نقول اللي عندنا كله

و من ناحيه تانيه لازم نكون واثقين من شيء مهم
و على يقين فعلا منه
انه ما اصابك لم يكن ليخطئك و ما اخطأك لم يكن يصيبك
لولا مشيئة الرحمن
لو حطينا الجمله دي في بالنا كويس هنعرف نعيش الحياه بدون
منلجأ للكذب الدائم مثلا بحجه الحسد او النفوس السيئه

و بالنسبه للامثله اللي ذكرتيها
خليني اقولك شيء طريف
واحده حملت و دارت على اغلب الناس
و دي كانت بمشوره من مامتها
و اعتمدت انها شابه و مش هيبان عليها تعب كتير و حتى ملابسها فضفاضه و خمار و نقاب
عايزة اقولك انها لما الناس عرفت انها ولدت
اتبهدلت صحيا هي و الطفل جدا
و ده لان الناس حسدتها
و نقلا عن كلام اتقالها في وشها
" يالهوي قعدتي 9 شهور لا يوم غبتي من الشغل و لا يوم استأذنتي و انتي حامل ده ايه العافيه دي"

و من ناحيه تعاملي انا و بداري و لا لأ
لو الشيء نعمه زي الملابس او شيء اشتريته
بسمي الله على حاجتي و بتوكل على الله و بستعملها
ربنا مديني نعمه و يحب ان يراها عليا فمش هداريها
لكن لو شيء زي النتائج و الكلام ده
فانا عاده مش بذكر اللي عندي الا لو اتسالت
سؤال مباشر فبضطر ارد في حدود الصدق و نوع الشخص
اللي قدامي خاصه ان في اشخاص ليهم سابقه في الحسد
مع الواحد و تلقائي بتلاقي غصب عنك نفسك قفلت من الشخص
برغم ما نحمله من ايمان و يقين

واخيرا عايزة اقول انه ساعات كتيره
الصدفه البحته بتخلينا نصدق ان فلان ده بيحسد بجد
يعني مثلا ايام فرح اختي بالظبط قبل الفرح باسبوع
كنا ايام تظبيط الشقه بتاعتها
كان فيه واحده بيعلق التابلوهات و الستاير و الحجات دي
الشخص ده اول مكان يقول السلام عليكم
اقسملك بالله كان في شيء زجاجي بتشق نصفين بشكل عجيب
و لوحده و نضطر نغيره نهائيا و الموقف تكرر 4 ايام متتاليه
لدرجة اني بجد اصيبت برعب منه

شكرا نرجسيه للموضوع الطيب
و اعتذر حبيبتي عن الاطاله

[م ــلح هالدنيا]

صح صح صح ياقلبي كلاامك صح
صرنا حتى بالزواج والخطوبه والولااده وكل شئ بنخبي عن بعض!!
ممكن معانا حق
لانو في نااس حسوده ماتعطي خير
وبعض الاحيان نكوون موسوسين ونخاف زياده عن اللزوم
تعرفين
انا صاحبتي قبل زواجها بكم يوم خبرتني
انا مره انصدمت طيب ليش ماقلتي لي من الاول

على بالها ابحسدها مثلاا!!!
جد بعض النااس صار عندهم هالشئ هووس
خبي لاينظلونك
خبي لاينحسوونك
خبي لايضروونك
خبي وخبي وخبي وخبي
وماتسمع الا اخبار مووت وطلاااق وحزن وكل شئ يجيب الاكتئاااب
الله يعنا بس!!
مشكوره حبوبه جبتيها بالصميم!!!

[duha]

اهلا نرجسيه
هو الموضوع فيه شقين
داري على شمعتك تقيد
انا افسرها بالحديث واستعينوا على قضاء حوائجكم بالكتمان
يعني لو واحد ناوي يعمل حاجة يبقى يتكتم لانه يمكن تحصل ويمكن لا

اما اني يكون عندي خير واخبيه دا يبقى صعب
واما بنعمه ربك فحدث
الشق الثاني الحسد
الحسد موجود طبعا
بس ما من شئ يحصل الا بامر الله
استعين دائما بقراءة المعوذات كل صباح وكل مساء
وما يحصل فبامر الله
شكرا نرجسيه

[وائل المصري]

و للا النفوس اتغيرت عن زمان ؟!
لا النفوس اتغيرت والناس اتبدلت والناس اتنيلت
و هل الخوف من الحسد ممكن يوصلنا لمرحلة الانغلاق على نفسنا للدرجة دى ؟!!
سيدتي الحسد مذكور بالقرأن بس بجد مش بالدرجه ديه.
ليه بقينا مش بنستمتع بالحاجة الحلوة اللى عندنا و نتباهى بيها خوفاً من عين الآخرين
اكيد لان مفهوم الذكاه مبقاش بيتنفذ كما انزل بالقران لان من الاساس مفهوم الذكاه هو مساواه الفقير بعض الشيئ بالغني اي لو كلا المقدرين اخرج الذكاه والصدقات بشكل سليم لن تجدي مثل هذا الحقد والحسد.
هل ده ممكن نسميه فوبيا الحسد ؟

لا ممكن نطلق عليها مرض واثار البعد عن الدين والعادات والتقاليد.
الى أى مدى أنت أو انتِ بتدارى على شمعتك ؟
نعم انا بخاف من الحسد بس مش للدرجه الي تتحول معي الي مرض.
و للا على طبيعتك و بتقول كل حاجة من غير خوف و مسلم أمرك لله ؟
اكيد الكل مسلم امره لله بس بجد انا والحمد لله بطبق الايه الكريمه الي بتقول.
**بسم الله الرحمن الرحيم
واما بنعمة ربك فحدث
صدق الله العظيم**
وعلي فكره المثل الي انتي ذكرتيه في بدايه الكلام علميا خطأ
لان علميا لو داريتي علي شمعتيك الاكسوجين هيخلص منها وتنطفي.
هههههههههههههههه
تحياتي وائل المصري قاضي المنتدي.

[نرجسية]

المشاركة الأصلية بواسطة omarr

نرجسيه

موضوع الحسد من الغير , انا لا اعيره ادنى اهتمام ...و الحمد لله الأمور ماشيه كويس

ماشاء الله
الحمد لله ان الأمور ماشية كويسة يا عمر
أحسن حاجة انك عايش فى سلام داخلى
أو يمكن عشان البحر الأحمر ما بيحسدشى

المشاركة الأصلية بواسطة محمد كمال على

السلام عليكم نرجسيه
يقول الله تعالى
بسم الله الرحمن الرحيم(وأما بنعمه ربك فحدث) صدق الله العظيم
الحسد موجود والنظره موجوده
لكن لن يصيب الانسان الا ما كتب عليه

و عليكم السلام و رحمة الله

و نعم الايمان يا ابو رقية
و ما هم بضارين به من أحد الا باذن الله

لكن برضو ما تقدرشى تتجاهل النظرة
أهم حاجة المداومة على الأذكار و بعدين نسلمها لله

لكن يا أخى سبحان الله مع اننا مؤمنين ان كل شئ بأمر الله
لكن برضو حكاية المداراة و الخوف من الآخر مسيطرة علينا

المشاركة الأصلية بواسطة amr_miza1

نرجسية

موضوع الشمعة اللى بندارى عليها علشان تقيد , شايف انه صحيح ومطلوب
" استعينوا على قضاء حوائجكم بالكتمان "
ولكن مش بالطريقة اللى انتى صورتيها فى الموضوع يمكن زيادة شوية ... يعنى مش معقول هجيب عربية واخاف حد يشوفها او مش هنحج فى الثانوية العامة بمجموع 100% ومش هقول

لكن انا شايف ان فيه فرق بين " الحسد " وبين " دارى على شمعتك "
ربما تكون المواقف السابقة خاصة بالحسد وانا لا اضعه دائما نصب عينى
أما " دارى على شمعتك " فأنا مقتنع بيها تماما

شكرا نرجسية للموضوع

أهلاً يا أخ عمرو
أنا قلت أمثلة و لا يخلو الموضوع من السخرية
لكن تتصور أن الواقع ممكن يكون أكثر سخرية و أكثر مبالغة

يمكن عشان الرجال أخف شوية فى الموضوع ده
أما فى عالم النساء بتكون واضحة جداً و مبالغ فيها أكثر مما تتصور

بس انت ما وضحتش ايه الفرق بين دارى على شمعتك و الحسد
هل الناس بتدارى على شمعتها لسبب آخر غير الخوف من الحسد ؟!!
ياريت تعرفنا و أهو الواحد بيتعرف على أشياء جديدة

المشاركة الأصلية بواسطة hend

ياريت الوضع كان مجرد حسد كان الوضع بقى احسن من كده

الحكاية مش مجرد ما يسمى الكذب بالحذف (اى اننا لا نحكى عن اشياء معينه فى اطار السرد لاحداث ) ولكنه كذب فى كل شىء خوفا من القدرة الرهيبه للحسد

ولا يعلموا ان كل شىء بيد الله تبارك وتعالى
هل تعلمى انى اعرف امراة تخاف خوفا شديدا من الحسد لدرجه اختراع الاكاذيب الكثيره حتى لا يعرف احد اى شىء عن بيتها
نعم لم تصب بحسد ولكنها اصيبت بشىء اشد خطورة اصابت بالاحتقار

الخوف المرضى من الحسد اصاب المجتمع بالكثير من الافات الاخرى

أنا قلت أن عالم النساء ده كل الهم من وراه

حتى ان الست هى اللى بتدفع زوجها أو ابنها لاخفاء أى شئ و كل شئ
عن معارفه أو زمايله أو قرايبهم

بس يا هند انت لفتى نظرنا لنقطة مهمة
أن الوضع مش متوقف عند حد الاخفاء و المداراة
لأ ده كمان وصل للكذب لتأمن شر الآخرين !!!

شوفى بقى لو الناس اكتشفوا كذبها
بتوصل لهم شعور أنهم حساد و شر هى بتخاف منه

النتيجة الحتمية أنهم بيكرهوا التعامل معها و يفضّلوا الابتعاد عنها
و مش كدة و بس
لأ دى بتثير فيهم غريزة الحسد
حتى لو كانوا قبل كدة مش بيحسدوها
أسلوبها حيخليهم يحقدوا عليها لا ارادياً

و يبقى المجتمع كله عنده غل من التانى

و دى النقطة اللى أنا عايزة أوصل لها
خليكى معانا يا هند يمكن يكون ليكى تعليق تانى

[eshoo4ever]

نرجسية موضوع مهم جدا انا بقى مبعتقدش فى الحاجات دى خالص

تحياتى ليكة

[proactive]

هههههههه
موضوع حلو يا دكتورة نرجسية ,,,

فكرتيني بنفسي أيام الثانوية العامة ,, برضه نفس التفكير ده عندنا في البيت ,, أول ما النتيجة طلعت في 2 ثانوي , الحمد لله , بس بصوا بقى , أي حد يسألكم , ما حدش يقول 97 دي خالص , انت جايب 94 ماشي ؟؟ و انت داخل رياضة اتنين و دول هيكفوك قوي -و أجيب بالباقي جزمة - و طبعا ما قدرتش أفتح بقي كالعادة , انت عاوز يتقر عليك و ما تجيبش مجموع في تالته ؟؟ فاكر فلان ابن فلان , و فلانة بنت علانه ,, كانوا جايبين كام في تانية و عملوا ايه في تالته لما اتقر عليهم ؟؟

و العبد لله كان حظه نار يعني , لقيت نفسي من ال10 الأوائل على المدرسة -لأن في سنتنا كانت المجاميع كلها تحت- و اسمي "منور" في لوحة الشرف ,
و عينك ما تشوف الا النور من زمايلي اللي خاصموني و اللي بقوا يرموا بالكلام , ايه يا عم , خايف من الحسد ؟ ما تخافش يا عم , ابقى "خمس" في وشنا ...
كان شعور معفن ,, سا عتها اتمنيت لو كنت جايب 94 بجد و لا أني أحس اني منبوذ كدة بين زمايلي ,,
و طبعا موقفهم في البيت زي ما هو , اللي يقولك , قول له لأ , مش اسمي اللي في لوحة الشرف -أكن المدرسة فيها عشرميت واحد اسمهم إبراهيم ......... باقي الاسم الثلاثي- ,
و رحت للأخصائي الاجتماعي , و قلت له شيل اسمي !!!
الراجل استغرب بجد , متهيأ لي أول مرة يشوف واحد عاوز يشيل اسمه من لوحة الشرف !!!


المهم لسه العادة دي فيهم , مع ان الواحد بيقرأ الأذكار الحمد لله -لكن من غير تدبر طبعا- , و بيخبوا عن قرايبنا التقدير الحقيقي اللي بجيبه في الكلية ,, بس الحمد لله ان النتيجة بتتعلق في الكلية , علشان ما أضطرش أخبي حاجة عن زمايلي ,,,

احم ... أن امتهيأ لي قعدت أحكي قصة حياتي و بعدت عن الموضوع

باختصار بقى علشان طولت , هو فيه ناس فعلا لازم الواحد يخبي عنها , لأن الحسد موجود ,
و أنا مع الكتمان لحد ما النتيجة النهائية تبان و بعد كدة نُري أثر نعمة الله علينا لغيرنا ,,

يعني ما أقعدش أنشر كل سنة أنا بجيب كام ,, لكن أبقى أقول التقدير النهائي التراكمي إن شاء الله , و أذكر نعمة الله علي في آخر سنة خالص ...
بس خلاص ...

[مجرد شعووور]

انا عاوزة اققولك نرجسية
ان فوبيا الحسد حاجة بقت موجودة بشكل غير عادي
انا شايفة ان الناس فعلا بقت قلوبها سوداء
والله انا اعرف واحدة كل ماتقابل امي تقعد تقر على اخوها
بسبب انه غني ودايما تقول ايه دا معاه دولارات على قلبه قد كدة

يعني اذا كانو الاخوات بيقرو على بعض
وبيحسدو بعض اومال الاغراب يعملو ايه ؟

بس هو الواحد فعلا زي ماقال ابراهيم يقرا الاذكار ويتوكل على الله
وربنا هو الحافظ زبردو ياخد حذره مش يامن للناس كلها
الناس الي يحس ان عينيهم وحشة يداري عليهم
لكن حبايبه لازم يقولهم علشان يشاركوه فرحته