السلام عليكم ورحمة الله
انا مكتبتش الموضوع ده عشان يكون مجال للحوار والمناقشة
وانما كتبته لاني مخنووووووقة ومضايقة
كل الحكاية بتدور حول مشكلة وهي
ان شاب روسي عايز يتجوز مصرية
شاب روسي مسلم عايز يتجوز مصرية مسلمة
بس مش مسلم بالاسم فيالبطاقة زي شباب كتير عندنا
لا ده مسلم على حق ... مؤمن ايمان قوي ...بيحب الاسلام
ونفسه يتجوز ببنت متدينة وصالحه تعينه على طاعة ربنا وتقف جمبه ويبدأو رحلتهم سوا في الحياة
اخلاق جميلة وادب رائع
قال الرسول صلى الله عليه وسلم من اتاكم على خلق ودين فزوجوه
ده فيما معنى الحديث انا مش فكراه بالضبط
طيب ليه الاهل بيرفض ويقول لا
مع انهم معجبين بالدين والاخلاق دي
بس المشكلة انه روسي
هو ده ذنبه ...انه اتخلق في بطن ام اسلمت ودخلت الاسلام بكل ارادتها وانفصلت عن زوجها عشان مرضاش يدخل دينها وعشان تحافظ على دينها انفصلت عنه
وربت وتعبت وسهرت على ولادها في روسيا لحد ما كبرتهم
وبعد كده وصلتهم لبر الامان وقالت تدخلهم جامعة في السعودية عشان يدرسوا الشريعة
الاسلامية ..ويرجعوا يكملوا حياتهم في روسيا
الاخيين او الولدين ولادها دول بالفعل اتعلموا الشريعة الاول لما خلص رجع روسيا لكن التاني
مقدرش يرجع روسيا ...قالهم لا مش عايز ارجع تاني لبلاد الكفر مش عايز ارجع تاني للفساد الاخلاقي والديني اللي هناك
امه وافقت انه يعيش بعيد عنها مدام انه في بلد اسلامي فهي مطمنه عليه
وهو قرر انه يتجوز واحده مش مهم ايه جنسيتها ؟ولا المهم شهادتها ايه؟ ولا عمرها كام سنه؟
ولا اي شيء؟ غير انها تكون متدينة صالحة بتحب ربنا
ومرت الايام وقابل البنت دي في العمرة عرف اهلها وحبهم واتقرب منهم
وبعد كده طلبها للجواز
ليه الرفض ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
عشان روسي ؟ والله لو كل اب وام رفضوه للسبب ده يبقى الشخص مش هيتجوز خالص
وبعدين مش هو اللي خلق نفسه روسي ..امال الاسلام جه ليه مش عشان يخلصنا من الجاهلية اللي كنا فيها ...عشان يوحدنا ..عشان يخلي المسلمين امة واحدة
مفيش فرق بين عربي واعجمي الا بالتقوى
عشان حياته مش هتكون مستقرة ربما في اي وقت البلد الاسلامية المقيم فيها ترجعه روسيا تاني؟؟؟؟؟؟؟؟؟؟
وهو شباب اليومين دول المستقرين قوي ماهي بردوا ظروفهم صعبه ومش مستقرين في بلادهم
وكل واحد منهم عايز يهج لامريكا ولا اليونان
الاهالي ممكن يكونوا خايفين لحسن بعد الزواج ياخد ولاده ويرجع بلده ويهرب بيهم ويسيب مراته زي ما بيحصل لما الراجل بيتجوز بواحده اجنبية ؟
طب ده انا اليومين دول بذات بسمع ان مصريين هما كمان بيعملوا كده
لا ومن ناس نعرفهم شخصيا .....زوج خد ولاده وسافر بيهم الامارات مع انه مصري ومراته مصرية
يعني الحوادث اللي بتحصل دي ملهاش دعوة بالجنسيات
ثم الاشياء دي في علم الغيب لو قعدنا قلنا وفرضنا لحسن يحصل كذا ويحصل معرفش ايه
محدش هيتجوز
الاب والام ممكن يكونوا خايفين من ايه
ليه دايما بنلاقي الاهل يا اما بيكونوا عايزين يتخلصوا من ولادهم ويجوزوهم غصب عنهم
يا اما مش عايزين يجوزوهم عشان خايفين من المستقبل ومن كلام الناس ومن ومن ومن
ده احنا ربنا جعلنا امة متوسطة في كل شيء الاسلام دين وسطيه
ليه احنا مش بنطبق الاسلام في حياتنا
هو احنا مش مسلمين ولا ايه ؟؟؟؟؟
يا جماعة فهموني ليه شاب زي ده يترفض
مفيش سبب مقنع
كل ما في الموضوع ان الاهالي على طوووووووووول خايفين
والخوف لايصدر الا من قلوب ايمانها مش قوي
المؤمن مش بيخاف مدام انه مش بيعمل حاجة تغضب ربنا
لو جه مصري يتقدم يقولوله الشبكة والمهر والشقه وبتشتغل ايه وبتقبض كام وينتفوا في ريشه
ولو جه روسي يختلقوا خمسين مشكلة ويعقدوا الموضوع
لو جه القريب ابن العم او ابن الخال يتقدم يقولوا البنت لسه صغيرة وبتدرس
ولو جه االغريب يتقدم يقولوا مينفعش البنت تتجوز وهي لسه بتدرس
وبعدين دي لسه صغيرة بردوا
بالله عليكم انتم شفتم تحكمات وبرتوكولات خنيقة من الاهالي وطريقة اسلوب معقدة زي اللي عند المصريين
اشمعنا احنا اللي كده
كل الشعوب عندها الجواز مع الدراسه شيء طبيعي وعادي
عندهم الزواج في سن صغير شيء محمود جدا
واحنا العكس
لا ينفع جواز مع دراسه ولا جواز في سن صغير
لا وكمان لما البنت توصل 28 او 30 تبقى عنست
ولو اقل من عشرين تبقى لسه صغيرة اوي على الجواز
ده اسمه استهبال .........وتخلف وجهل بالدين
لو سألتم السوري او اللبناني او الفلسطيني او اليمني او السعودي او الايراني
هتلاقوا عندهم الجواز سهل وبسيط ومفيش فيه العقبات اللي احنا بنحطها بحجة اننا خايفين على بناتنا
ومع ذلك الجواز عندهم بعيش وبيستمر ....واحنا نسبه الطلاق والعنوسة عندنا في ازدياد
واحد قريبنا عنده اربع بنات اول بنت كانت دكتورة
بباها قالها لازم تتجوزي واحد يكون دكتور زيك ومعاه فلوس عشان تعيشي كويس
لكن اللي معهوش ميلزموش ...وعشان تكوني سعيدة لازم تعيشي في مستوى مادي كويس
وللاسف البنت دي سمعت الكلام وعملت بنصيحة ابوها الغالية واتجوزت دكتور غني
لكن تتخيلوا ايه اللي حصلها ....عاشت حياة تعيسة جدا لحد ما جالها مرض مميت وماتت وهي عمرها 32 سنه ملحقتش تفرح لا بزواج ولا بأمومه
البنت التانيه قررت بعد ما بقى عمرها 30 سنه انها تقبل العريس اللي هيجبلها شقة صغيرة
وحالته المادية صعبه
مع انها جميلة ومتعلمة وجالها عرسان كتير
فيهم الغني ومتدين واترفض عشان هي لسه بتدرس
فيهم زميلها اللي في الجامعه اللي اترفض عشان بيدرس
فيهم اللي اترفض عشان معهوش عربيه
اسباب سخيفه جدا
قليل الواحد يسمع ان شاب اترفض عشان اخلاقه زفت او عشان مش بيصلي
بقينا بنسمع ان اسباب الرفض بسبب الامكانيات المادية
يااااااااااااااااااااااه الموضوع ده كبير
ولازم ألاقيله حل
دوروا معايا على حل
بس لازم يا جماعه و احنا بنفكر في الموضوع ده نفكر فيه بعقل
انا نفسي نبطل نخاف ..نفسي نبطل نتحجج بحجج فارغه
احنا وضعنا كلنا كعرب من الناحية السياسية والاقتصادية صعب جدا
انا دخلت في عده مواضيع
بس ارجع تاني واقول ان موضوعي الاساسي
ليه شاب روسي مسلم مؤمن جدا وخلوق ومؤدب يترفض لاسباب دنيوية سخيفه ؟
ولو قلتولي ما هو فعلا يا بنتي مش هيكون مستقر ممكن يرجع روسيا في اي وقت
سعتها هتوافقي ترجعي معاه روسيا ؟؟؟؟؟
هرد واقول اه ايه المشكلة لو راحت معاه روسيا
لما يكون هو استاذ في الشريعة وهي ممكن تكون داعيه اسلاميه هناك
ايه المشكلة ؟؟
الجهاد في سبيل الله دلوقتي مبقاش بالسيوف زي زمان
محاربة الكفر والفساد كانوا زمان بيحربوهم بالسيوف والمعاك والموت والشهادة في سبيل الله
لكن دلوقتي اصبح نشر الاسلام بالدعوة هو ده الجهاد .....اننا ندعو الى الاسلام في كل مكان
ونتحمل كل اذى في سبيل نشر الرسالة
النمط الخطي
