لقاء مع السيد المسئول

[AGIBA]

السلام عليكم ورحمة الله وبركاتة
النهارة هكتب موضوع ممكن يكون كبير شوية فى حجمه انما انا واثق ان مضمونة هيعجبكم ان شاء الله الموضوع دة انا تعبت فية جامد عقبال ما كتبتة ويحمل لية زكريات كبيرة وجميلة ويارب يعجبكم انتو كمان
فى الأول نحب ننوه للسادة اللى بيسمعونا واللى بيقرولنا إن دة هيبقى برنامج كل أسبوع إن شاء الله بعد مسلسل السابعة مساءاً على القناه التانية وفى كل اسبوع هنستضيف مسئول مهم جدا فى الدولة مسئول مهم خالص مسئول لية تقله فى البلد وهنتحاور معاه فى كل حاجة وفى اى حاجة وكمان ممكن نستقبل منكم اتصالاتكم ونستقبل ارائكم على البريد الالكترونى بتاعنا ونوعدكم اننا نسئلها للسيد المسئول
النهاردة معانا مسئول فى منصب كبير من موقعه ممكن يغير حاجات كتير وهنسالة ونقوله
المذيعة : اول سؤال معانا النهاردة هو بصراحة سؤال بيشغل بال الكثير من المواطنين الناس كلها بتسال عم امين بيسال عم احمد الخضرى كل ما يشوفنى يسالنى هو مين اللى هيمسك الحكم بعد اللى ربنا يطولنا فى عمرة ما يتكل ؟
المسئول : والله انا احب اطمن عم امين وعم احمد الخضرى واطمن الشعب كله وقولهم ان فى خطة مدروسة ومعمول حسابها خطة اسمها اللى نعرفوة احسن من اللى مانعرفوش
المذيعة : معلش يا فندم اسمها اية تانى الخطة ؟
المسئول : اسمها اللى نعرفوة احسن من اللى مانعرفوش يعنى انتى هتلاقى فين حد ينفع للحكم غير واحد اكل شارب نايم مع رئيس البلد بيشوفة بيعمل اية بيتكلم ازاى بياكل ازاى لا مؤخذة بيدخل الحمام ازاى ودة طبعا متمثل فى ابن الرئيس الحالى شخصيا وبعدين الناس معترضة لية على ان ابن الرئيس يبقى هو الرئيس ما انتى عندك كل ممثل بيحس انه خلاص بيشطب يروح مطلع ابنه ويمثل والناس تقعد تسقف واى لعيب كورة ربنا بيكرمة وبيعتزل بتلقية وهو ماسك شنطة الفلوس بتاعة الاعتزال فى ايد وفانلة فى ايد تانية بيلبسها لابنة ودة اللى بنسمية توارث الاجيال
المذيعة : يا رب نكون ادرنا نرد على تساؤلات كل الناس وبالذات عم احمد الخضرى اللى خاوتنى فى الريحة والجاية
فاصل مع الاعلان ونرجعلكم تانى

المذيعة : بعد الفاصل رجعنلكم ويارب الاعلانات تكون عجبتكم والله الشامبو اللى فى الاعلان دة رائع انا بستعملة ولا مسحوق الغسيل ما قولكمش علية المهم نرجع لضيفنا العزيز وبنحية مرة تانية وبنقولة
سؤال مهم اخر بيدور فى تفكير كل مواطن اية اخر ما توصلت لية التحقيقات فى موضوع حريق قطار الصعيد ؟
المسئول : والله احنا شكلنا لجنة لتقسى الحقائق من خيرة ظباط البلد وهما وصلو لنتائج مبهرة واكتشفو ان حريق قطار الصعيد جية غلط ومش مقصود واحنا بناء على التقرير دة قولنا خلاص مدام الموضوع مش مقصود يبقى المسامح كريم واحنا فى ايام مفترجه وملهوش لزوم ننكد على حد
المذيعة : احنا ممكن نطلع السادة المشاهدين على نتائج التحقيق ولا دى اسرار عليا
المسئول : والله هيا اسرار عليا جدا بس علشان خاطر عيونك الحلوين دول انا هقولهم هو الموضوع بكل بساطة ان فى ست اسمها ام عماد
المذيعة بفضول : اسمها اية يا فندم
المسئول : اسمها ام عماد واسمها دة دليل على المجهود اللى بذلوة الظباط فى التحقيق لدرجة انهم قدرو يعرفو اسمها واسم ابنها كمان
المذيعة بفرحة : لا والله العظيم لازم يترقو على اللى عملوة دة
المسئول : الناس دى بيشتغلو فى صمت من اجل مصر وشعب مصر المهم ام عماد دى بقى كانت رايحة تزور ابنها فى الجيش وكانت واخده معاها فضلت خيرك حلتين محشى وفرختين وشوية خضار للواد علشان يخدهم فى الزيارة بس الوقت كبس عليها مقدرتش تخلص كل الاكل فا اخدت معاها بجور علشان تكمل سوى الاكل فى القطر وهيا قاعدة بتسوى الاكل ومع الزحمة النار مسكت فى جلبيت الواد حميدة اللى كان قاعد جمبها والواد الغبى ابن الغبى فضل يجرى فى القطر وهو مولع لحد مولع فى القطر كلة الغبى مش ولع خلاص بقى يقعد فى مكانة لا فرحان انه ولع وعمال يجرى فى القطر لحد مولع فى القطر كله واحنا الحمد لله صادرنا الباجور والموضوع اتلم وكل حى بياخد نصيبة
المذيعة : والله يا فندم مجهود كبير جدا تشكرو علية وربنا يخليكو للبلد .
فاصل مع الاعلان ثم نواصل

بعد الاعلان رجعنلكم بجد وحشتونا ونتوجة بالشكر مرة اخرى للسيد المسئول اللى شرفنا فى برنمجنا النهاردة حضرتك شوفة الاعلان بتاع الزبادى شوفت البت اللى نازلة لهط فى الزبادى دى البت نوسة اختى عفريتة بنت الاية
وبمناسبة الزبادى واللبن عيزين نسال حضرتك سؤال مهم جدا عن موضوع اللبن اللى فى جبس دة ؟
المسئول : والله دة موضوع مهم جدا طبعا انا سمعت عن الموضوع ده وبطمن كل المواطنين ان اللبن اللى فى جبس واسمنت وخرسانة مسلحة دة هو اللبن السايب اللى عند البقالين وبعض الشركات اللى معندهاش ضمير ودة طبعا انا بحزر السادة المواطنين من شربه لكن اللبن اللى عاملة الاعلان الفنان الشهير سعد الصغير لبن زى الفل وانا بشرب اولادى منه
المذيعة : طب والبيعين والشركات اللى بتبيع اللبن المغشوش دول هتعملو فيهم اية
المسئول : والله احنا خدنا أجراءتنا بالفعل
المذيعة بفضول غير عادى: ازاى
المسئول : قفلنا كل محلات الجبس والاسمنت اللى قريبة من البائعين دول ومن شركات اللبن المغشوش وكمان علينا سعرالجبس والأسمنت والحديد المسلح علشان ميقدروش يحطوة فى اللبن ودى خطة مدروسة .
المذيعة : والله العظيم والله العظيم دة الحل المثالى ربنا يارب يقويكم على فعل الخير

المذيعة : احنا ممكن نستقبل اتصالات دلوقتى يا فاندم حضرتك مستعد تفتح صدرك للمواطنين وتسمعهم
المسئول : طبعا طبعا انا تحت امر المواطنين
المذيعة : نقول الو
المواطن : الو سلامو عليكم
المذيعة : وعليكم السلام اتفضل يا استاذ
المواطن : انا بس كنت عايز اقول للسيد المسئول ان انا ابنى فى المعتقل بقالو 12 سنة ومعرفش عنه حاجة انا بس عايز اعرف هيخــ .......
المذيعة : ألو ألو واضح ان الخط اتقطع
المسئول : فعلا واضح ان الخط اتقطع حضرتك شديدة الملاحظة
المذيعة بكسوف شديد : ميرسى جدا يا فندم دة بس من ذوقك بس هو كان بيسال عن ابنه اللى فى المعتقل بقالة 12 سنة
المسئول : هو كان بيقول معتقل ولا اتنقل
المذيعة : لا انا سمعتها معتقل
المسئول وانا سمعتها اتنقل هو انتو هتسمعو احسن من الحكومة
المذيعة وشها اصفر وهيا خلاص هيغمى عليها : لا يا فندم وهيا دى تيجى هو فعلا قال اتنقل اتنقل من شغلة لشغل تانية وبعد ما حالة اتظبط ساب العيلة اللى كان عايش فيها
المسئول : اة انا سمعت كدة برده
المذيعة : فاصل مع الاعلان ونعود ليكم على طول


عودة للمسئول العظيم الى يقدر يعمل كل حاجة فى البلد وهو قاعد على كرسيه هنا معانا عشان بس عايزيين نعرف الناس ان الحكومة دى مظلومة وانهم مفتريين وبيستهبلوا
نرجع ونكلم حضرتك عن موضوع شاغل الراى العام فترة طويلة خالص وهو موضوع العبارة الى غرقت
المسئول : غرقت ايه وهو انتى بتصدقى الكلام ده
المذيعة : هما بيقولوا كده
المسئول : هفهمك انا الموضوع كله ، حضرتك عارفة فيلم تايتنك ؟
المذيعة : اه ليوناردو دى كابريو كان اموور اوى فى الفيلم بصراحة
المسئول :اهو الموضوع كله ان ممدوح سليمان ...
المذيعة : ممدوح اسماعيل يا فندم
المسئول : اه معلش حضرتك الفيلم ده كسر الدنيا وجاب عائد مادى ضخم جداااا فممدوح اسماعيل حب يعمل فيلم مصرى خالص عشان يجيب عائد مادى لمصر فخرب العبارة بتاعته الراجل الحق عليه عشان اما تغرق يصورها ونعمل فيلم مصرى عالمى بس ده كل الموضوع
المذيعة : طب يا فندم فى ناس بيقولوا ان فى ناس ماتت بجد
المسئول : يا ستى الاعمار بيد الله
المذيعة : بس المفروض ان ممدوح اسماعيل يعوضهم
المسئول : وهو فى بعد تعويض ربنا
المذيعة : طب هو فين الفيلم ده يا فندم ؟
المسئول : للاسف الشديد المصور وهو بيصور الفيلم غرق فبتالى مفيش فيلم من اصله
المذيعة : يعنى ممدوح اسماعيل كان عايز يعمل فيلم عالمى زى تايتنك
المسئول : زى ما بقولك كده
المذيعة :وبالتالى اعزائى المشاهديين احنا كده عرفنا قد ايه احنا ظلمنا الراجل ........
فاصل ونعود اكيد بعد الفاصل فى برنمجنا حوار مع السيد المسئول
ودلوقتى هنكلم عن موضوع خطير اوى اوى حضرتك ويادوب كل ما بيهدى بيولع تانى.. دلوقتى انا جارتى الست ام جرجس مقطعانى وكل ما اجى اقولها عايزة لمونة ولا شوية ملح مبترضاش ابداااا وتقولى لا انا مقاطعة المسلمين وانا بصراحة مش عارفة اطبخ .... احم اصدى انا اما جيت اشوف فى ايه وايه الموضوع اكتشف ان فى فتن طائفية فى البلد بين المسلميين والمسيحيين ايه راى حضرتك فى الكلام ده ؟؟
المسئول : كلام فارغ .. مفيش فتن ولا حاجة من دى خالص الموضوع كله بيتضح ان الحج حسين كان بيلاعب الحج كرولوس طاولة فى القهوة فعم كرولوس حب يقرص الزهر فالحج حسين قفشه وقامت خناقة بين الطرفيين فى القهوة وخلت عم كرولوس يخرج ويحلف بالصليب ما هيسيب عم حسين وخرج وقعد يشتم فيه فعم حسين مسكتش فقعدوا يتخانقوا والموضوع وصل انه صراع دينى والناس عملت منهم ابطال دينية وطبعا ده كلام فارغ...
المذيعة : طب وبعدين ؟
المسئول : بس تم اعتقال عم حسين وعم كرولوس ومصادرة الطاولة وقفل القهوة وتشميعها بالشمع الاحمر والموضوع عدى على خير ومفيش مشاكل بين المسلميين والمسيحيين فى البلد خالص
المذيعة : يعنى الموضوع كله بسبب الطاولة يا فندم ؟
المسئول : زى ما بقولك كده
المذيعة : طب والحكومة هتعمل ايه عشان الموضوع ده ميتكررش تانى ؟
المسئول : احنا بنصادر كل طاولة فى البلد ومنعنا استيرادها تانى وكل واحد بنشوفه بيلعب طاولة بيتم اعتقاله
المذيعة : حتى لو مسلم ومسلم او مسيحى ومسيحى
المسئول : اه عشان احنا بنادى بالمساواه..
المذيعة - بتستظرف -: طب لو مسلمة ومسلمة
وترتسم ابتسامة خفيفة على وش المسئول الكبير

::بعد الفاصل عدنا اليكم من جديد ومعانا ضيفنا المسئول المهم فى الحكومة المظلومة وبنسئلة ونقوله اية راى حضرتك فى الكليبات اللى بتتعرض على القنوات الفضائية المصرية اليومين دول
المسئول : والله حاجة جميلة ونقلة فى ثقافة البلد وثقافة ابناء وبنات البلد
المذيعة : بس فى اعتراضات من بعض المشاهدين على ملابس بعض الفنانات وعلى راسهم الفنانه هيفاء بالذات بعد اغنية بوس الواوة
المسئول : انا مش شايف اى حاجة فى كليب الاغنية دى وبعدين دى بتغنى لابنها الصغير يعنى دة عيل صغير اولا وبعدين الناس حرة فى بيوتها تعمل اللى هيا عيزاة
المذيعة : طب والمغنية التانية اللى فضلت تخلع فى هدومها من اول الكليب لاخرة
المسئول : على فكرة دى من اجمل الكليبات اللى اتعملت مش دى الاغنية اللى بتقول
لية تجرحنى ولية تخدعنى .... لية يا حبيبى بتسطلطخنى
لية يا انانى يا كذاب .... هو انا راكنة الفيل على الباب
المذيعة بفرحة شديدة : الله دة حضرتك حافظ الاغنية كلها
المسئول : طبعا دى اغنية جميلة اوى
المذيعة : ايوة بس دى على اخر الاغنية كانت خلعت كل هدومها
المسئول : واضح ان حضرتك ما سمعتيش الاغنية كويس لانها فى اخر الاغنية قالتلة
وادى هدومك مش عيزاها .... علية النعمة منا لبساها
يعنى الكليب بيحكى واقع كلمات الاغنية انا مش عارف معترضين على اية
المذيعة : والله يا فاندم انا مش عارفة اقول اية انت وضحت كل الامور بكل بساطة وهدوء
المسئول : دة واجبنا تجاه وطنا
المذيعة : السادة المشاهدين فى نهاية الحلقة بنحب نوجه الشكر لكل رجال الدولة القائمين على حماية البلد والساهرين على امنها والى اللقاء فى حلقة جديدة من برنامجكم المفضل لقاء مع السيد المسئول .

[THEGOODWOLF]

من المذيع المشهور

صراحة دي أجمل حاجة قريتهالك و الي بصراحة تستحق الرد بجد بجد بجد

متشكر جدا

[نيهال]

حوار صادق للغايه

ومنتظرين جديدك دائما

مرسيه

[AGIBA]

متشكر على المرور وقراءة الموضوع لكم جميعا