شاركني رأيك بصراحة

[مصريه والفخرليه]

السلام عليكم..
إزيكم يا أبناء مصرأتمنى تكونوا بألف خير
في كلمتين واقفين في زوري و عايزه حد يسمعني
بداية لما بتصحى الصبح بدري عشان تروح شغلك و تقعد عشان تفطر بتشوف الجبنة بكام؟ و العسل بكام؟ و...؟و...؟
طيب لما تمسك الجرنان و تقرا إن رجل الأعمال الفلاني نهب ملايين وهرب بيهم..
و تقرا كمان ان جماهير الأهلي و الزمالك بيضربوا و يحرقوا في بعض..
ولما تنزل الشارع و تشوف الزبالة و الزحمة و الدخان و التلوث والنصابين والحرامية..
ولما تروح شغلك ولا مدرستك وتسمع زملائك بيتكلموا عن العمارة اللي وقعت و العيش اللي مش لاقيينه و الشباب اللي بيدمن والبنات اللي بتتجوز عرفي....
ولما تفتح التلفزيون و تتفرج على الطبعة الأولى و تسمع أحمد المسلماني و أخباره اللي تغم النفس مع احترامي الشديد ليه..
هل بعد كل ده لسه بتفتخر انك مصري ولا عايز تهج بره البلد؟
جاوب بكل صراحة....

[ahmed643]

يشرفنى انى اكون اول واحد يرد على موضوعك الحساس ده

بالفعل وطنيتنا قلت وتكاد تكون انعدمت من الى بنشوفه

ولكن يبقى السؤال .... تعرف تكره مصر؟.؟؟؟؟؟؟؟؟؟؟


انا عن نفسى معرفش اكره مصر ..... انا اكره اشخاص بعينهم

ناس هما السبب فى الى احنا فيه انما البلد ككيان صعب انى اكرهها

او اتمنها اى مصيبه ..........

لاننا كشعب عاطفى جدا ويهمنا البلد والنيل والحضاره ولما بقلب فى الدش

وشوف قناه فرنسيه عامله فلم عن الحضاره المصريه بكون فى منتهى السعاده

وعلى النقيض لما بشوف فلم على قناه امريكيه مصور مصر على انها جمل وصحر

ابقى فى منتهى التعاسه الى فى الدنيا

هقول تانى المشكله مشكله افرااااااااااااااد وليس كيان بلد

[مصريه والفخرليه]

شكرا على ردك فعلا صعب انك تكره مصر بس الحب لوحده مش كفاية.
تقدر تقول لي عملت إيه عشان تخلصها من أزمتها؟
ولا حاجة عايشين حياتنا عادي..
و بعدين...

[True_Face]

الانتماء
التضحيه
العمل الجماعى

نقف كلنا وقفه وحده

نطالب بحقوقنا بس بدون همجيه عشان يعرفوا اننا منظمين

الوعى الثقافى لكل الناس حيساعد على التغير

ونشيل الخوف من جونا

[ahmed643]

المشاركة الأصلية بواسطة مصريه والفخرليه

شكرا على ردك فعلا صعب انك تكره مصر بس الحب لوحده مش كفاية.
تقدر تقول لي عملت إيه عشان تخلصها من أزمتها؟
ولا حاجة عايشين حياتنا عادي..
و بعدين...

العمايل مش بتنفع فى بلدنا

لازم تفهمى اننا فى بلد بوليسيه بحته

وشوفى اسراء عملت ايه واتبهدلت اد ايه

[مصريه والفخرليه]

أيوه ممكن أعرف مين إسراء وعملت إيه؟

[True_Face]

لما انتى اسمك مصريه وافتخر

ومش عارفه مين اسراء وعملت ايه

يبقى فيه ايه تانى
كان الله فى العون

[ahmed643]

المشاركة الأصلية بواسطة مصريه والفخرليه

أيوه ممكن أعرف مين إسراء وعملت إيه؟

اسراء عبد الفتاح دى بنت عنده 29 سنه

روجت للاضراب الى كان فى مصر يوم 6 ابريل

وعملت روم عالفيس بوك

يوم الاضراب خدوها السجن وبهدلوها

ولما المجتمع المدنى صوته على علشان اسراء محبوسه

النائب العام امر بالافراج عنها

وبعد ما امر بالافراج عنها امن الدوله لقطها

خطفها يعنى وفضلت هناك اسبوع

وياعالم عملوها ازاى لدرجه انى حالتها الصحيه ساءت وكانت هتوت

ودخلت المستشفى تعانى من ارتفاع ضغط الدم وانهيار عصبى

وافرجو عنها اول امبارح

وليها قضيه موجهه لبها واحتمال يتحكم عليها فيها

[مصريه والفخرليه]

المشاركة الأصلية بواسطة True_Face

لما انتى اسمك مصريه وافتخر

ومش عارفه مين اسراء وعملت ايه

يبقى فيه ايه تانى
كان الله فى العون

شكرا على ذوقك بس أنا بجد مسمعتش عنها وكنت عايزه أعرف إيه حكايتها..
وبعدين اسراء واحدة مش هتعمل حاجة غير انها تتبهدل لازم يكون فيه 75مليون اسراء عشان البلد تتغير ..ده رأيي

[ahmed643]

المشاركة الأصلية بواسطة True_Face

لما انتى اسمك مصريه وافتخر

ومش عارفه مين اسراء وعملت ايه

يبقى فيه ايه تانى
كان الله فى العون

اعتقد مش عيب ابدا انها تسأل

الاخت مصريه مقيمه بالخارج وسنها صغير وبتحب مصر

وبتجمع معلومات عايزه تستفيد يبقى لازم نحترم اسلوبها

ونرد عليها بطريقه لائقه

دا حضرتك دكتور وفاهم

[عاشقة تراب مصر]

انا اسفة بس عايزة ارد على حاجة مرة قريتها في منتدى وهي ان واحد عايش برا مصر وبيتمنى يرجع والناس كلها فضلت ترد عليه وتقلو تجي نبدل وانا مش هارجع تاني حرام والله ده كلام وكمان لازم تحبو بلدكو اكتر من كده دي مصر ام الدنيا "الفقر موجود في كل بلد في العالم وكمان الزحمة والدخان احنا الي عاملينه مش البلد مصر "
وعلى فكرة انا عايشة برة مصر و نفسي تحس الي انا حاساه
اسفة علشان طولت
السلاو عليكم

[مصريه والفخرليه]

المشاركة الأصلية بواسطة عاشقة تراب مصر

انا اسفة بس عايزة ارد على حاجة مرة قريتها في منتدى وهي ان واحد عايش برا مصر وبيتمنى يرجع والناس كلها فضلت ترد عليه وتقلو تجي نبدل وانا مش هارجع تاني حرام والله ده كلام وكمان لازم تحبو بلدكو اكتر من كده دي مصر ام الدنيا "الفقر موجود في كل بلد في العالم وكمان الزحمة والدخان احنا الي عاملينه مش البلد مصر "
وعلى فكرة انا عايشة برة مصر و نفسي تحس الي انا حاساه
اسفة علشان طولت
السلاو عليكم

شكرا على مشاركتك أخيرا لقيت حد عنده نفس احساسي..
أكيد كلنا متفقين على اننا بنحب مصر و ان احنا اللي صنعنا الفساد فيها بس ازاي نحل مشاكلها
عايزة منكم اقتراحات و حلول

[قيس]

((هل بعد كل ده لسه بتفتخر انك مصري ولا عايز تهج بره البلد؟
جاوب بكل صراحة....))
((لازم تفهمى اننا فى بلد بوليسيه بحته ))
((وبعدين اسراء واحدة مش هتعمل حاجة غير انها تتبهدل لازم يكون فيه 75مليون اسراء عشان البلد تتغير ..ده رأيي))
((كده دي مصر ام الدنيا "الفقر موجود في كل بلد في العالم وكمان الزحمة والدخان احنا الي عاملينه مش البلد مصر "))
عظيم .. تحياتي القلبية للأخت اللي قدمت الموضوع و ليالي شارك..
عظيم لأن الاهتمام بالشأن العام و التفكير بحال مصر الحبيبة بياخذ قدر كبير من جهدكو و تركيزكو ..
إحنا هنفضل نحب مصر و نعيش علشان مصر و شعب مصر..
الفساد و الخراب و البهدلة ما يقمش فيها أفراد، إنما طبقة حاكمة فاسدة لازم ال 75 مليون إسراء يقوموا مرة واحدة و بدون خوف أو تردد و يتخلصوا من الطبقة دي و حكمها و فسادها، بس لازم الأول يكون في إسراء علشان تقول لكل الناس الطيبين: ما تخافوش.. ما هو أنا و تحديت .. مالكو خايفين و ساكتين .. الذل ما يناسبناش و لا احناش هنفضل عبيد ..
كل التحايا و التقدير و الاحترام ليكي يا إسراء .. انتي أولى أبطال انتفاضة مصر!

[**ريفيرا**]

والله موضوعك هايل
انا عن نفسي مخنوقة من حاجة اسمها مواصلات
والا الدخان والمناظر الي بنشوفها علي طول في الشوارع
ربنا يرحمنا برحمته
بس بصراحة حب مصر قل من قلبي
لكن لو حد اتكلم عليها نصف كلمة بكون عاوزة ابهدله
بحس بكده اني بحبها بس في نفس الوقت مش مرتاحة فيها
شكرا ليكي اختي علي الموضوع
واهلا بيكي معانا عضوة جديدة واهلا بمواضيعك
ونتمني منك المزيد

[أدهم]

الحكاية إن لازم الحاضر يعلم الغايب واللى جوه يوصل للى بره والكبير يفهم الصغير واللى مش بيفتخر يتكلم مع اللى بيفتخر والخلاصة تبقى داخل كل واحد .. اللى عاوز أقوله لكم هنا إن كل اللى داير فى مصر داير بفعل فاعل .. يعنى لأمر يراد .. يعنى أنا تبع نظرية المؤامرة .. من أول ما يفتح عنيه المصرى بتتفتح عليه أبواب المؤامرات .. جرايد الصباح ومواصلاته للعمل وأخلاق الناس وظروفه فى الشغل وظروف عياله فى الدراسة والعلاج والصيانة للعمارة والهدوم والأكل ......... . مش قضية فقر .. أبدا الموضوع أكبر بكتير من الفقر .. فيه وطن بيتسرق .. فيه عصابة فككت المصريين .. المصريين فعلا تم تفكيكهم وتجزيئهم .. بقى عادى جدا نلاقى مليون وجهة نظر للموضوع الواحد .. وراحتنا فى الخلاف .. مابنمش غير ما نطمن إننا مختلفين مش متفقين .. وسوء النيه سابق كل إحتمال .. دى الصورة .