انا والعائلة يوم السبت

[AGIBA]

السلام عليكم ورحمة الله وبركاتة
ادينا رجعنا تانى وحشتونى اخبار الاجازة اية كله تمام تصدقو ان انا نفسى ارجع تلميذ تانى اة والله واستمتع باجزتى الطويلة زيكم بس اعمل اية بقى خلاص كبرنا على الحاجات دى انا بالعافية باخد اجازة يوم الجمعة و السبت ودة موضوعنا النهاردة اجازة يوم السبت انا هعيشكم معايا فى البيت يوم السبت دة بيعدى ازاى علية تعالو معايا
انتى ياست هانم صحى البية اللى نايم جوة دة هو مش عارف انه عنده شغل النهاردة (محدش يقلق دة بابا بيصحينى والهانم طبعا تبقى ماما اصلة بيحب يدلعها) تدخل ماما علية تلقينى طريح الفراش تصحينى بكل رقة وحنان (قلب الام بقى)
ـ قوم يا على يا حبيبى انت كدة هتتاخر على الشغل
ـ ارد عليها وانا اساسا مش عارف مين اللى بيكلمنى سيبونى انام بقى حرام عليكم
ـ تنام اية نامت عليك حيطة الساعة بقت 8 يا موكوس (منتهى الحنية)
اقوم انا من النوم مش شايف قصادى بس عارف اتجاهى اقوم خابط فى عمك الحاج
ـ صباح الخير يابابا
ـ بابا يا اخى كاك بو لما يلغبط كيانك انت لسة نايم لحد دلوقتى لية يا بية هيا التكية اللى انت عايش فيها دى مش هتحل عنها بقى ولا انا هفضل اعلف فيك كدة لحد لما تعجل يالة اتزفت اغسل وشك وتعالى اطفح علشان تلحق تغور على شغلك
ـ اييييية فى ايييية زعيق كدة على الصبح حرام عليكم ارحمونىىىى (كل دة فى سرى طبعا)
اخد بعضى وادخل على الحمام اطس وشى بشوية ماية واغسل سنانى ادور على معجون السنان مش لقية يا نهار اسود دة انا جايب واحد جديد امبارح
ـ ياااااااااا ماااااااا ماااااااااااا
ـ عايز اية ياسى زفت
ـ فين معجون السنان بتاعى
ـ اختك صبعها اتلسع امبارح وحطته على صبعها علشان تهدى الحرق
ـ ياسلالالالالالالالالالالالالالالالام واية علاقة الحرق بمعجون السنان الاهى تولع فى نار جهنم وميكفهاش شركة سجنل تو بحالها
ـ بتقول اية ياض (دة بابا)
ـ لا ولا حاجة بقول الف سلامة عليها يا حاج
وادخل علشان البس زى بقيت خلق الله ملقيش ولا غيار مكوى وكل الهدوم مكعمشة كانها خراجة من بوأ كلب
ـ ياماماااااااااااااا انتو مودتوش الهدوم عند المكوجى لية
ـ علشان احنا مش الخدمين اللى جبهملك ابوك بعد كدة تنزل انت هدومك للمكوجى وتقف على ايدة لحد ما يخلصها
ـ يعنى انا البس اية دلوقتى انا كدة هتاخر على الشغل
ـ البس اى هباب يعنى انت رايح تتجوز
ـ هباب هيا وصلت لكدة ماااااااااااااااااااشى
ـ بتقول اية ياض (دة بابا طبعا خلاص انتو عرفتو بقى)
ـ لا يا حاج بقول هلبس اى هباب
ـ اة بحسب اخلص والحق انزل النهاردة يوم السبت اول الاسبوع ماتروحش متاخر
ـ اة حاضر هر.... انت قولت النهاردة اية
ـ النهاردة السبت يا اطرش
ـ حرااااااااام عليكو النهاردة السبت منا اجازة السبت انتو لية بتعملو فيا كدة حرااااااااااااااااااااااااااام
ـ اجازة طب انزل بقى اوقف فى طابور العيش واعمل بلقمتك (طبعا عرفتو مين صاحب الكلام)
وعلى دة الحال كل يوم سبت

[نيهال]

يوم سبت اكتر من رائع
ربنا يحميك يا فندم


اسلوبك فى الحوار والقاء الموضوع عاجبنى جدا


منتظرين الحلقات الجديده دائما

[AGIBA]

متشكر ينهال على متبعتك الدائمة لمواضيعى لانك اصبحتى من الناس اللى انا بهتم برايهم فى اى موضوع بكتبه

[Dr.Hammood]

جميييييييل اوي

صباح الخير

انا حاسس ان الاصوات مش غريبه عليا

لتطلع اخويا

مع انه في السعوديه ومفيش في السعوديه الطوابير دي

[new1]

هههههههههههههههههههههه

دا نهارك مش فايت يوم السبت
ههههههههههههه

بالنسبة لي ما حدش بيصحيني وبتنيني نايمه لحد ما اشبع

بس ماما بتلمح بالكلام مش كويس البنت تنام كده عيب

وبابا بيلمح بجملته المشهوره " لو كان في كتر النوم فايده كانت استفادت الكلالالاب "

طبعا المفروض الواحد يعيش حياته وحاجه جميله يعمل نفسه اطرش احيانا وكأنه ما سمعش حاجة

بالتوفيق يا Agiba بالفعل امتعتنا بالحوار ده

[AGIBA]

هههههههههههههههههه عجبنى اوى موضوع الكلاب دة باباكى عنده حق فعلا اما موضوع اخوك دة فا انا يشرفنى يا دكتور وبكرة الصبح الم هدومى واطلع على السعودية لو عايز