نظرية المؤامرة

[AGIBA]

السلام عليكم ورحمة الله وبركاته
شوفتوا اللى حصل امبارح اكيد منكم تابع لقاء السيد الرئيس بعمال مصر فى عيدهم السنوى انا عن نفسى بحب جدا اتفرج على اللقاء دة لغرض فى نفس يعقوب المهم كنت قاعد انا وصحبى بتاع القهوة بنضرب 2 حلبة بلبن فاسالته الريس هيعمل اية النهاردة قالى ان شاء الله هيجيب جون ناخد بية الدورى قولتله دورى اية ياض واجوان اية اللى بتتكلم عنهم قالى انت مش قصدك ابوتريكة بصتله بغيظ وقولتله بقولك الريس يابيهم تقولى ابوتريكة وغصب عنى صوتى عيلى شوية طبعا القهوة كلها اتلمت علينا وكل واحد طلعله بكلمة مالو ابوتريكة ياعم واللى يقولى دة احسن لاعب فى بلدك واللى يقولى انت شكلك زملكاوى وانا هنفجر من الغيظ واحلفلهم متين امين انى معرفش مرفت يامين ولا هما هنا المهم خلص الموضوع على خير ورجعنا تانى انا وصحبى بعد ما فهم انى قصدى على الريس مبارك هيقول اية للعمال النهاردة رد علية وقالى اكيد هيتكلم عن تحديد النسل وربط الحزام وسلام سلام خلص الكلام قولتله اة بس اكيد هيطلع واحد من اخر الصف ويقولة العلاوة ياريس قالى ممكن يزودها 5% قولتلة وانت رايك اية قالى والله زى الفل الناس هتموت على جنية واحد وابتدينا نعمل استطلاع راى فى القهوة عن توقع زيادة العلاوة كل الاراء اتفوتت مابين 5 : 10% وان دة يبقى فضل وعدل من عند ربنا بس هو يعمل كدة وطلع الريس علينا بالمفاجأة وقال انه هيزود العلاوة 30% واتوقعت ان القهوة هتنفجر من الفرحة وان الناس هيرجعو زى زمان يهتفوا للريس ويغنوله بس ولا حاجة من دى حصلت كل اللى قالوه شوفت ياعم اهو مأجر كام واحد يهيص ويهلل والله الراجل دة بيضحك علينا 30% يعملوا اية يعنى لو واحد مرتبة 500 جنية ياخد زيادة كام 150 جنية ودول يعملوا اية فى الزمن الاغبر اللى احنا فية دة بسطلهم باستغراب اوى دة احنا كنا من شوية بنقول 15% دة عدل وفضل من ربنا بس هو يعمل كدة ولما يعمل 30 % يبقى نصب وضحك على الدقون مش فاهمها دى ولا هيا خلاص بقت نظرية المؤامرة متأصلة فى شعب مصر انا مش مع الحكومة ولا عمرى كنت معاها بس بجد وقفت عند الموقف دة لية بقت حياتنا كلها مبنية على نظرية المؤامرة ومين السبب فى دة ومين اللى وصلنا لكدة ياريت حد يجاوبنى

[نيهال]

نظريه التريقه على ابسط خلق الله
لما يكون المرتب الاصلى عباره عن 150 جنيه
حتبقى الزياده اد ايه؟؟
45 جنيه.......يااااااااااه بحالهم
على مين يا ريس
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟

من اصل المرتب
بجد حاجه تنقط

[دقه قلب]

العلاوة للعاملين بالقطاع العام وهى 30% من المرتب الاساسى
اولا العاملين فى القطاع العام كام واحد والخصخصة خلتهم كام
طيب والقطاع الخاص ؟ولاد البطة السودة ؟؟
طيب اذا كان الاساسى بتاع مدير ادارة لا يتجاوز باى حال من الاحوال 300 جنيه يبقى علاوة بحد اقصى 90 جنيه
ياحلاوة