كيف تكتب روايه... تكسر الدنيا

[The Caesar]

كيف تكتب روايه تكسر الدنيا

بناءاً علي خبره ليست بالقصيره في قراءه الروايات والقصص ..وجدت ان هناك عده عوامل مشتركه او اسس يتبعها المؤلفين لكتابه قصه او روايه تكسر الدنيا
الموضوع أجتهاد شخصي...لكن بالتاكيد مفيد لمن يخطو خطواته الاولي في عالم الشهره والادب..وربما المسرح و السينما..ربنا كريم
اهو عايزين نساعد الاجيال الجيه تكتب شيء ليه معني
الادوات
رزمتين ورق فلوكساب من عند سمير وعلي ..او من الموسكي ..مع قلم اسود للكتابه واخر احمر لتصحيح الاخطاء
ولو ربنا كارمك وعندك كمبيوتر ..مش هاتحتاج الغرامه دي..هوه ملف وورد وعيش يا معلم
الروايه حاجه سهله خالص..شويه افكار وشخصيات تجسدها في عده فصول وشكرا
بس كده

ده بقي ملخص النصائح اللابد توافرها في قصتك لتكون قصه تكسر الدنيا
1- احرص علي وجود شخصيات شريره علي اد ما تقدر ..لان احدث الشر اكثر اثاره من احداث الخير..يعني لازم القصه يكون فيها ظلم ومعاناه وناس ظالمه
ويا سلام بقي لو اغنياء بيدوسوا علي الفقراء دي ماده خصبه وغيرها
2- علي اد ما تقدر خبط في الحكومه الناس بتحب التخبيط في الحكومه ..لان الحكومه هي المسئوله عن كل البلاوي اللي في الارض والمريخ وزحل ..فايه بقي..
شويه شخصيات حكوميه ويا مزاجك لو وزير بقي او رئيس وزراء ولو مش بيهمك حد خبط في الراس الكبيره ولا يهمك ..فيه ديمقراطيه..خبط يا معلم وما تخافش
الكلام مش بيعمل حاجه ..و الناس بتحب الكلام..والناس اصلا طول عمرها بتتكلم ومفيش حاجه بتحصل اركب الموجه وارغي ...
3- المناظر الجنسيه ..دي بقي سر نجاح الروايات الان..كتر منها علي اد ما تقدر..دي الموضه..اتكلم في حاجات تخدش الحياء...حياء ايه هوه بقي فيه حياء..
خلي الناس الجهله دي تفهم اللي انت فاهمه وهما مش عارفينه ..
بس خلي بالك ..ابتعد عن الابتذال..يعني مفيش مواقف جنسيه مباشره..ولا خليها
الادب معلهوش رقابه
ويا سلام بقي لو تجيب شخصيات متيدينه وعندها عقد او امراض جنسيه او تعاني من كبت مزمن ..بحيث يكون مثلا بالنهار ملتحي وبجلباب ابيض وفي المساء شيطان
وكل ما يشوف ست عنيه توسع و يستغفر الله وهوه يتمناها .كده يعني
او بنت تقيه عفيفه ..وهيه من جوه مش كده وايه مكبوته علي الاخر ..مستنيه فرصه انحراف ..وتنطلق في الحياه ...اديها انطلاق ..خلي الناس تفك
الخلطه دي بقت موضه..اليومين دول يمكن لان... لو انت كمؤلف طلعت شخصيات منحله في مواقف فاجره وداعره ..يبقي فين الاثاره ..مهما اصلا فاسيدين وولاد ستين في سابعين
اما لما تطلع شخصيات بقي طيبه وعامله نفسها كلها خير .. بس جواها شر وكده ..دي الاثاره كلها
وكمان هاتخليك الكاتب الملهم المبدع الفاهم ببواطن الامور ربنا يحرسه علي ذكائه ومفهميته اللي يعرف حاجات .. ما يعرفهاش غير الناس الفاهمه قوي لنفوس البشر.. ومذاكر علم نفس من كتب فرويد ....عيش و ادعيلي ..
مزيج الدين بالجنس ...موضه مش تنسي الكلام ده ...اياك تنسي
3- الشخصيات
لازم تكون مش تقليديه..بمعني دور علي الغير معروفه ومش ظاهره
او شخصيات معروفه وواضحه في المجتمع لدرجه ان محدش واخد باله منهم
طبعا الفقراء ليهم نصيب الاسد ..وماده خصبه للروايات لان الفقراء يعانون من الظلم و القهر دائما حد قرياو شاف فيلم فيه الفقير مبسوط وسعيد لازم يكون متبهدل وطالع عين اهله ..لانه كده فعلا ..وغالبا بقيالفقراء وطنين ومش واخدين حقهم
طبعا لازم يبقي فيه توازن ...الاغنياء بقي..االي مش حاسين بحد وكل حياتهم فلوس و فواحش وخمر وميسر ..وضايعين..ومشاكلهم مالهاش اخر..ووطنين برضه ..الوطنيه دي جوا كل الناس مفيش فيها شك ..حتي الحرامي لازم يكون وطني
4- العامل النسائي
الروايه لازم علي الاقل يكون فيها بنت او 2ستات ..وكتر علي اد ما تقدر
البنات بقي عندها اسرار ما تخلصش وهما اصلا اس الفساد دايماً
فايه بقي اتوصي.وخليهم يفضفضوا في القصه علي اد ما تقدر
مين ما يحبش يسمع اسرارا البنات وبيفكروا ازاي..بدع يا معلم قول كل اللي نفسك فيه..القاريء ..مش هاينام قبل ما يوصل لحد جلده الروايه ..
5- صراع الديانات
الي جانب خلط الدين بالجنس اللي قلنا عنه ...لازم تتعرض للدين في الروايه بشكل او باخر.
لازم ..مفيش مفر..انت عايز تقول رايك في الدين ومش عارف ..وحاسس ان الدين ارقي من تلك المخلوقات المسماه اتباع الديانات ..وانت بقي الفكيك اللي فاهم اللي همه مش فاهمينه ..فايه بقي.. مثلا مثلا طلع المسلم ومسيحي ويهودي مثلا..الاول بيحب مسيحيه
والتاني بيتعرض لاضهاد المسلمين وحاسس انه مظلوم و التالت اليهودي..لا اليهودي التقليدي البخيل الخبيث اللي بياكل حق الناس.... الناس زهقت منه
طلع واحد يهودي او واحده يهوديه ...اخلاق وولاد ناس ويمكن يكونوا بيحبوا العرب
ويا سلام كمان لو بيدافعوا عن القضيه الفسطينيه...هوه ده
انت كده بتكسر حاجز التقليدي...كسر يا مبدع ...خلي الناس تتحرر بقي من الافكارالتقليديه الرخمه ..هوه انت هاتدفع حاجه من جيبك ...
الافكار في الموضوع ده خصبه ..الناس بتخاف تتكلم في الدين بجراءه ..اتكلم ولا يهمك وزودها محدش هايكلمك ...
ما تنساش كام واحد ملتحي علي كام جلباب ابيض ..علي كام حديث...لو حسيت ان الشكل ده مستهلك..خلاص..طلعهم متخافيين وعاملين شعرهم سبايسي والبوكسر فوق البنطلون ..وبيتجمعوا في ملهي راقصه شهيره منضمه ليهم..ايه رايك تغيير اهوه القاريء..هايتجنن ..اهوه فكرا بلا حدود...

6- الشباب
لازم تطلع في الروايه شباب ..بكافه اشكاله..اللي ضايع واللي صايع واللي بيضرب مخدرات واللي مقضيها نت واللي مقضيها بنات الخ
والبنات اللي مالهش حد يلمها وبتعمل اللي نفسها فيه
ودايما لازم يكون الشباب ده مظلوم وضحيه الام والاب ومدرس التاريخ الخ
وعنده المبرر لكل الضياع اللي هوه فيه
ويا سلام بقي لو تطلع بشاب او شابه يقولوا حكمه ولا اتنين عن معاناه الجيل
في الجون...هاتكسب قلوب الشباب طبعا..ومبيعاتك دي هاتتفوق علي مبيعات رجل المستحيل
ما تنساس طبعا الجنس للشباب المحروم ده... كام قصه حب ..ودول مالهمش اخر علي كام عقد عرفي في القصه علي كام حكايه من حكايات اخبار الحوادث...وبدع ..هوه الابداع هاييجي منين الواقع اللي كله ابداع
7- لغه القصه
بص يا سيدي زي المقال ده..مكتوب بالعربي صح..بس عربي عامي..لغه سهله ومحدش يتعقد منها....بس كده انت هاتخسر الناس المثقفه
الحل يا معلم الاحداث بالعربيه ..الفصحي..بس مش قوي ..فصحي خفيفه
والحوار بالعاميه ...مزيج سهل وظريف وما يزعلش حد...ويحقق مبيعات اكتر

دي كانت ملاحظات كده سريعه عن تاليف روايه
شوفتوا الموضوع سهل ازاي..ويا سلام بقي لو الروايه تضرب والمبيعات تكسر الدنيا
يا سلام بقي لو اتحولت سينما او مسلسل وبقي ليك يا معلم حوارات علي الفضائيات ...واليوتيوب يغرق معجبين يسمعوا منك بوقين حلوين عن الالهام والابداع وتطور الروايه والقصه القصيره و القصه الميكرو ..والقصه اللي ت الاقل من المايكرو
كلامك هايدرس زهاتبقي استاذ الاساتذه..طالما مبيعاتك فوق
ارزاق بقي ..اهم شيء انك تجتهد وتذاكر كويس وتركز في اللي بتقوله
لان ده هايغير افكار اجيال
الادب لازم يتطور فساهم فيه علي اد ما تقدر

The Caesar
5-2008

[نيهال]

خير اللهم اجعله خير
لالالالالالالالالالالالا

بجد مبدع


المهم مش تطالبنا بنسبه من الارباح بعد كده


وانت بتحكى ازاى نقدر نكون مبدعين او يمعنى اصح تكون فيه شعبيه للكتب اللى حكتبها
كانى شفت منهج ليوسف شاهين
جايب من كل فيلم اغنيه ...........وبالفعل بحقق التميز اللى مش بتلاقيه فى معظم الافلام

تشوفه مره واتنين وتلاته
وكل مره بتخرج بفكر معين غير اللى قبله

مرسيه كتير يا قيصر

[حنين مصر]

مرسي ع الكلام الجاااااااااااااااااامد دا
تحياتي واحترامي

[The Caesar]

المشاركة الأصلية بواسطة نيهال

خير اللهم اجعله خير
لالالالالالالالالالالالا

بجد مبدع


المهم مش تطالبنا بنسبه من الارباح بعد كده


وانت بتحكى ازاى نقدر نكون مبدعين او يمعنى اصح تكون فيه شعبيه للكتب اللى حكتبها
كانى شفت منهج ليوسف شاهين
جايب من كل فيلم اغنيه ...........وبالفعل بحقق التميز اللى مش بتلاقيه فى معظم الافلام

تشوفه مره واتنين وتلاته
وكل مره بتخرج بفكر معين غير اللى قبله

مرسيه كتير يا قيصر

نيهال
شكرا لكي
لا خالص اول روايه ليكي نسخه مجانا

هوه بس مش منهج شاهين ..ده بقي منهج لناس كتير قوي
تقدري تقولي العوامل دي تقريبا بقت اساس كتابه اي روايه او سيناريو يثير الجدل ويلفت الانتباه
بس مقارنه بشاهين مره واحده.كتير قوي بجد
بجد هوه مخرج عبقري وانا كان لي تحفظات علي افكاره
عارفه فيه فيلم اسمه الاخر..بتاع ادم وحنان ده.حنان ترك وهاني سلامه
لو طبقتي عليه الافكار دي هتلاقيها ايه مظبوطه تمانم انا افتكرته دلوقاي بمناسبه سيره شاهين الجميله دي زي ما يكون انا كاتب المفال ده عليه بس مش كده خالص

عموما ده مجرد اجتهاد
ولسه ياما نقراء ونشوف

[The Caesar]

المشاركة الأصلية بواسطة حنين مصر

مرسي ع الكلام الجاااااااااااااااااامد دا
تحياتي واحترامي

اهلا حنين مصر
نورتي الموضوع بمرورك الكريم

[aamin]

معلومات حلوة ومفيدة

تحياتي

[duha]

اهلا قيصر
يمكن المنهج اصبح هكذا فعلا
بس كل ما تحدثت عنه هو بالفعل مظاهر اجتماعيه واضحه ونعيشها ونشوفها كل يوم
لا تستطيع ان تنفي ان ظاهرة الاسلام المتطرف اصبحت من القضايا الممهمة التي تشغل الراي العام
ولا تنسى ان الانفتاح على الغرب بصورته السلبيه جلب لنا مظاهر الانحلال والتشتت
وكل ما ذكرته في مقالتك من مظاهر اجتماعيه هي بالفعل مظاهر حقيقيه وموجودة
والكاتب لما يكتب قصه او مقاله يحاول نقل الواقع الذي يراه
الوصفه التي قدمتها لكتابه القصه هي فعلا وصفه سحريه
لانك لمست اغلب مشاكل المجتمع
صراع الطبقات
وصراع الاديان
وصراع المبادئ
صراع الخير والشر
ومن هذه الصراعات تنتج حياتنا
ومن حياتنا تكتب القصص والروايات
شكرا قيصر على هذا المقال الرائع
شكرا

[جناب العمدة]

خلاص بقيت مؤلف وهبقى مشهور
واقول للفقر امشى هوينا ياللا غور
واييييييييييييييه

انت كنت فين من زمان يا قيصر . يا تجلياتك الجامدة .

بجد بقه ...
صورت الحالة الفنية بصورة ساخرة لطيفة محببة
أحييك يا قيصر وأتمنى زوال تلك الصورة السلبية
من الاعمال الفنية ووجود أعمال تحمل رسالة وابداع فنى
حقيقى مفيد بعيد عن الابتذال والاستخفاف بالعقول
حاجة تفور الدم لما تيجى شخصية فى عمل فنى لابسة
ميكرو وثلثين صدرها مكشوف وحاطة نصف كيلو ميك أب ( لأ كيلو الاربع)
وتتكلم عن الارهاب والتشدد فى الدين وتقول ربنا مقالش كده دينا دين التسامح .
يا سلااااام يا ننوس عين ماما .
أحييك قيصر باشا .. اسلوبك غاية فى التشويق .

[The Caesar]

المشاركة الأصلية بواسطة aamin

معلومات حلوة ومفيدة

تحياتي

اهلا aamin
اسعدني مرومك الكريم

[The Caesar]

المشاركة الأصلية بواسطة duha

اهلا قيصر
يمكن المنهج اصبح هكذا فعلا
بس كل ما تحدثت عنه هو بالفعل مظاهر اجتماعيه واضحه ونعيشها ونشوفها كل يوم
لا تستطيع ان تنفي ان ظاهرة الاسلام المتطرف اصبحت من القضايا الممهمة التي تشغل الراي العام
ولا تنسى ان الانفتاح على الغرب بصورته السلبيه جلب لنا مظاهر الانحلال والتشتت
وكل ما ذكرته في مقالتك من مظاهر اجتماعيه هي بالفعل مظاهر حقيقيه وموجودة
والكاتب لما يكتب قصه او مقاله يحاول نقل الواقع الذي يراه
الوصفه التي قدمتها لكتابه القصه هي فعلا وصفه سحريه
لانك لمست اغلب مشاكل المجتمع
صراع الطبقات
وصراع الاديان
وصراع المبادئ
صراع الخير والشر
ومن هذه الصراعات تنتج حياتنا
ومن حياتنا تكتب القصص والروايات
شكرا قيصر على هذا المقال الرائع
شكرا

مع احترامي وتقديري ضحي
لا يوجد اسلام متطرف
التطرف في الاتباع اللذين تفرقوا مذاهب وجماعات الخ
انا الاسلام كدين فلا يوجد به تطرف او مغالاه
تعالميه مباشره وصريحه ولا يوجد بها مغالاه او تعقيد
المشكله في الاتباع كما قلت
وهم هكذا في كل الديانات ..لابد من وجود متطرفين
لكن الاسلام يحظي بالشهره الوسوع والاكبر بسبب ما تصوره وسائل الاعلام الغربيه والعربيه ايضا
من صوره المتدينن المتعصبين الجهله حتي بقواعد الدين
وعدم العمل علي محاوله تغيير هذه الصوره
بل تاكيدها
ماذا تتوقعين من انظمه فاسده ترضي الذل والهوان...الخ
ما علينا ليس موضوعنا تحديدا

نعم الكاتب مراه مجتمعه والفساد يملاء العالم كله
والكاتب او الراوي ليس مصلحا اجتماعيا او واعظ او حتي مرشد لجماعه الاطفال المسلمين
الراوي ينقل الصوره كما يرها

فهذا المقال كان انتقاد مباشر
لاصرار اكبر الكتاب او انجحهم علي تناول نفس المواضيع بنفس الاسلوب ونفس الطريقه
كما لو كان هناك ثالوث ادبي موحد
الدين والجنس والفقر..لا خروج عن نطاقه
لا يوجد تغيير واصرار غريب علي مفاجاه القاريء بافكار غير تقليديه وغريبه واحيانا شاذه ومريضه
اعرف انها مهمه الاديب التعبير عن مجتمعه ...لكن بامانه واخلاص
والا كل ما يكتبه لنا كاتب نصفق له ونقول ..امين
لقد صارت ظاهره ممله حقا ..واحيانا لا داعي لها ومستفزه لعقل القاريء
اليس كذلك ؟
تحياتي ضحي

[محمد كمال على]

أنا نفذت كل التعليمات
وأنتظروا قريبا الأنتاج الأول الروايه القنبله
وهى بعنوان الوعى يحطم نفسه فى توهان الوجود
دعواتكم
علشان تكسر الدنيا
بأفكر فى حاله نجاح الروايه أن احولها للسينما والمسرح والتليفزيون
والأزاعه
وكمان تترجم لخمس سته سبعه لغات حيه
وزيهم لغات ميته
أما فى حاله الفشل لا قدر الله المصاريف كلها عند القيصر
وممكن بتوع اللب والطعميه يشبلوا معايا الخسائر

[The Caesar]

المشاركة الأصلية بواسطة جناب العمدة

خلاص بقيت مؤلف وهبقى مشهور
واقول للفقر امشى هوينا ياللا غور
واييييييييييييييه

انت كنت فين من زمان يا قيصر . يا تجلياتك الجامدة .

بجد بقه ...
صورت الحالة الفنية بصورة ساخرة لطيفة محببة
أحييك يا قيصر وأتمنى زوال تلك الصورة السلبية
من الاعمال الفنية ووجود أعمال تحمل رسالة وابداع فنى
حقيقى مفيد بعيد عن الابتذال والاستخفاف بالعقول
حاجة تفور الدم لما تيجى شخصية فى عمل فنى لابسة
ميكرو وثلثين صدرها مكشوف وحاطة نصف كيلو ميك أب ( لأ كيلو الاربع)
وتتكلم عن الارهاب والتشدد فى الدين وتقول ربنا مقالش كده دينا دين التسامح .
يا سلااااام يا ننوس عين ماما .
أحييك قيصر باشا .. اسلوبك غاية فى التشويق .

جناب العمده يا مراحب يا مراحب
اصل ايه يا عمده
كل واحد مفكر نفسه مؤالف وجايب رزمتين ورق وكام قلب حبر
او جايبله كمبيوتر تقسيط وعايز ايه يشتهر بقي ويبق مؤلف مشهور
قوم ايه
بقعد بقي يالف روايه
كلها حاجات مش ولا بد ...ويخبطلك في دماغك ويعملك فيها بقي الواد المثقف النبيه اللي مالوش زي
ويركب موجه التاليف
قال ايه بيكتب ادب ؟
تبص للمكتوب يا عمده تلاقيه
الادب بريء منه ..قول قله ادب وو...ولا بلاش
حاجه بقت ممله
وايه يا عمده
منظره وعالم تحسسك يعني ..ده الادب ..هوه ده الادب...اتعلموا يا ......ولا بلاش
وهوه المووضع بسيط زي ما قلت
يالا يا عمده اديني دليتك علي الطريق
ولا اتحب ازود نصايح

يالا شويه نصايح تانيه جت علي بالي دلوقتي
* بص يا عمده لازم تحط في القصه رقاصه ا" غازيه يعني " بس مودرن ..او بنت ليل
وتخليها تقول احلي كلام ..مواعظ مواعظ ..ليه بقي لان الناس دول بيبقوا عارفين الحقيقه العاريه ...
ومش عندهم حياء..حد هايتعب علي رقاصه او بنت ليل

* يا سلام بقي لو عندك واد خريج كله محترمه وتذله في القصه ..اسلوب برضه متبع علشان نحسر الشباب المرمي علي القهاوي علي نفسه وتحسسه انه مش لوحده اللي بيعاني

* تطلع كام طفل من اطفال الشوارع ..ما تحاولش تعرض هما ليه بقوا اطفال شوارع
اعرض مثلا الحياه البهيميه اللي عايشنها او مثلا اعر ض ا ساليبهم في النصب والسرقه الخ
ما تركبش الموجه وتتعاطف معاهم دول اصلا ولاد .....

*
دخل في القصه دوله عظمي زي امريكا او روسيا واتبني نظريه الموامره النظريه دي بتعمل شغل حلو قوي


يعني شويه نصايح كده طالما قررت تالف يا عمده
ابقي ابعتلي نسخه مجانا ً

[The Caesar]

المشاركة الأصلية بواسطة محمد كمال على

أنا نفذت كل التعليمات
وأنتظروا قريبا الأنتاج الأول الروايه القنبله
وهى بعنوان الوعى يحطم نفسه فى توهان الوجود
دعواتكم
علشان تكسر الدنيا
بأفكر فى حاله نجاح الروايه أن احولها للسينما والمسرح والتليفزيون
والأزاعه
وكمان تترجم لخمس سته سبعه لغات حيه
وزيهم لغات ميته
أما فى حاله الفشل لا قدر الله المصاريف كلها عند القيصر
وممكن بتوع اللب والطعميه يشبلوا معايا الخسائر

محمد كمال على
لا
من الاسم القصه دي مش هاتشوف النور اصلا
قال
الوعى يحطم نفسه فى توهان الوجود

ده اسم ده
انا لو لاقيت القصه ببلاش مش هاشتريها
دور علي اسم كده مثير ومغري او مش مفهوم
اسم يشد الزبون
وباذن الله مفيش خساره
مفيش اديب بيخسر
ده المؤلفات لو اتباعت بالكيلو هاتكسبك اد كده