كل 80 سنه وانت طيب يا ريس ..

[bo7or]

احم
دة توبيك منقول من مدونة (متكاظى) وحد اسمه اسامه اللى معلق كدا
هنقله زى ما هو بس العنوان كان مختلف حبتين
كوميدى ممكن ينسيك الهم و عامة هم يهأهأ وهم يهئ هئ

__________________________________

ده مقال الصفحه الأولي في جريدة الأخبار لمنافق الرئيس حاليا رئيس تحرير أخبار اليوم سابقا ممتاز القط بعنوان ليه بنحبك يا ريس؟

الاجزاء المكتوبه بالأسمر هى مقال السيد القط ومش هحلف طبعا ان الكلام ده مكتوب فعلا فى جريده عريقه زى اخبار اليوم ولا هحلف انى عمرى ما شفت نفاق للدرجه دي0

_________________


(ياريس كل سنه وأنت طيب وربنا يخليك لينا)


كل سنه ومصر تعيش معك أغلى واعز أيامها هههههههه ..سنوات مرت وكأنها حلم جميل فازوع كوبسه داعبنا, وجعلنا نبتسم لكل أيامنا0


في عيد ميلادك ياريس ندعو الله لك بالعمر المديد هو 80 مش كفاية برضه ولا إيه لكي تحقق لنا المزيد والمزيد..فنحن سيدي الرئيس قدرك وأنت قدرناعايز حد يعترض على القدر بقى إيه هتكفروا. لمن غيرك نشكو هنشكى لربنا يا محترم...خاف الله خاف من مين غيرك نطلب يا جمال إسلوبك لمن غيرك نروى أحلامنا و آمالنا في مستقبل نملك فيه القدرة على أن نحقق طموحاتنا فعلا الواحد مش عارف يحقق انهوا طموح فيهم يااااااه كتير كتير صراحة ونترك لأولادنا وأحفادا وطنا عزيزا وقادرا على أن يحقق كل ما يتمناه0بصراحة ..إحنا بنحبك لانك إنسان أصيل ...بتعرف تحافظ على كرامة وكبرياء بلدك وشعبك فعلا ده حتى البنت اللى ماتت على الحدود مع إسرائيل قلب الدنيا عشانها ولا البمبوطي اللي أتقتل في قناة السويس اتحمق وانتفخت أوداجه عشانه بتعرف تقرأ المستقبل صح ياريس والكف والطالع والفنجان وبيفتح المندل كمان لو حد ضاعت منه حاجه وفى كل حاجه بره وجوه زى الاهلى بالظبط0

بنحبك أتكلم عن نفسك يا كابتن لانك ما بتعملش حاجه إلا بعد ما تحسبها صح ويكون قرارك في الصميم...بنحبك لان تاريخك كله نظيف ابيض فعلا عشان مفيش تاريخ أصلا0
دايما ياريس القرار الغلط في أي مجال يكون له تأثيرات سلبيه بتختلف من مكان لمكان ولكن في الطيران القرار الغلط يعني الموت بخ ومن هنا بيكون فيه تقدير وحسابات كاملة لأي قرار0
طول ما إحنا معاك ياريس حسينا بالحكاية دى أنا حاسس فعلا بس بحاجات تانيه مفيش انفعال ولا غضب ..أى حاجه دايما تسبقها دراسة كاملة..كتير قوى ياريس مواقف مرت علينا ولا بلدنا..تحديات كتيره لا لها أول من آخر..لكنك ياريس عدتها بسلام وريحت دماغك بحنكه ومهارة وتفكير قول يا ستامونى قول كانت دايما ياريس مصر معاك للأسف فى قلبك و عقلك والعدو والحبيب دايما بيحسب لبلدنا معاك الف حساب يا سبع0

بنحبك ياريس لان سمعة مصر أصبحت معاك زى البرلنت لا وانت الصادق دى بقت زى سمعة سونه على ما تفرج فى كباريه النجوم وبيحسدونا عليك خدووووووووه لانك مننا دايما ياريس كنت معانا0

ساعا ت كتير كنا بنكلم نفسنا بنقول يا ترى الريس حاسس بينا هذا هو الموجز واليكم التفاصيل يا ترى الريس حاسس بمشاكلنا وهمومنا تيرارارارااااااااا وفى كل مره ياريس نكتشف الحقيقه دن دن تش إنك معانا هيييييييه أنك جزء مننا وإحنا جزء منك انهو جزء وأنا أتاويه ..بتتكلم زينا ايه ده ..بيدعى على نفسه؟ وحاسس بالظروف الصعبه اللى إحنا بنعيشها حتى الريس بيطلع عينه فى طابور العيش لا اله الا الله هما مش فصلو الانتاج عن التوزيع فى مصر الجديده ولا ايه؟0بصراحه ياريس ..إحنا نسينا أيام زمان ..أحنا ادلعنا فى عهدك ياريس- ادلعنا والله انت راجل مسخره- ونسينا زمن الاشتراكيه – فقرا ايه بقى خلينا نغتنى ونحتكر-اللى ضحكوا بيه علينا لاننا اكتشفنا إننا بنعيش فى وهم جميل صحينا منه يوم 5 يونيه.

نسينا زمن تليفون العمده وبقينا دلوقتى محتارين نركب 012 ولا 010 ولا 011 ولا أرضى يا لفظاعة الانجازات ههههههه نسيت مفتاح الزيرو ليه بس يا راجل..الاقيش عندك كارت بعشره نسينا القطارات ماركة اللى يحب النبى يزق دلوقتى بقى فيه قطارات ماركة اللى يحب ـــــ يولع نسيت قطر الصعيد ولا ايه نسينا زمن كل حاجه بالبطاقه من قطن العرايس لحد قماش التيل والبفته والدبلان دلوقتى مش هتجيب حاجه لا ببطاقه ولا بغيرها نسينا زمن المجارى اللى طافحة وطلمبات الميه البحارى ووضع النوايه جوه الزير هو كمان شرب الميه الملوثه وتصريف البي بى بقى شىء خارق نسينا اللهو الخفى دلوقتى اللهو على عينك يا تاجر والناس بتعتقل فى وضح النهارنسينا نشوف النجوم فى عز الظهر0

دلوقتى كله بيتكلم مفيش حد خايف شلت الخوف من قلوبنا ياريس انا لسه واحد معدى عليه اول امبارح شايله منى يا جدعان كلمة حق برضه ودى نعمه مكناش حاسين بيها دلوقتى ممكن أى واحد ينتقد رئيس الجمهوريه والحكومه وكل حاجه ساعات بنزودها حبتين لكن جوانا شعور اننا مش خايفين عارفين ان فيه كبير فى البلد بيحبنا وبنحبه عايش فى قلوبنا وقريب منا دايما عندك حق يا شيخ ده لا فيه انسه اسمها اسراء اعتقلت ولا بتوع كفايه بيتضربوا ولا بيتسجنوا ولا ايمن نور بتتلفقلوا قضيه ولا الاخوان بيتحكم عليهم عسكريا ولا ابراهيم عيسى اتحكم عليه ولا اى حاجه خالص خالص 0
بنحبك ياريس لأنك مننا انت الرئيس الذى لايتحدث لغتين اللى بتقله فى الغرف المغلقه هو اللى بتقوله فى العلن ودايما افكارك سباقه والعالم كله يا ريس قد ايه بيحترمك ويقدر زامبيا زيمبابوى وموزمبيق وزنزيبار على رأى واحد أعرفه طولة بالك وسعة صدرك ياريس وحبك لينا يا نهار ــــــ هو اللى بيحصل فينا ده كله وهو بيحبنا امال لو كان بيكرهنا كان ايه اللى حصل......محدش يستفزه يا جدعان ده مقطع بطاقته خلانا نطمع اكتر واكتر ياريس؟

فى عيد ميلادك الناس ..اهلك ..وشعبك ..كل اللى بيحبوك المفروض يقدمولك ورود الدنيا كلها فى حالة انى ما أضربتش هجيبلك حزمة جرجير ياريس كنت سباق بالخير محدش جابله ورد ولا ايه طول عمرك سباق بالخير صادق والله العلاوه ياريس كانت مفاجاه كانت عبور بالموظفين الغلابه من الدوامه اللى عايشينها ليل نهار ايه ده هما ال45 جنيه بتعمل كل ده.؟؟؟ عبور ودوامات وعبارات ولا بلاش السيره دى0


الناس كلها ياريس بتقولك فى عيد ميلادك كتر خيرك وربنا يديك الصحه والسنه الجايه لاهو فى سنه جايه برضه هنقولك علاوه ياريس ..ريس له فى قلب كل مصرى حب ما يتقدرش باموال الدنيا كلها اهىء اهىء اهىء سنييييييف كل سنه ومصر معاك بخير ياريس ونفضل دايما نقولك عايزين وعايزين ده على اساس انه بيدينا من جيبه هو فى ايه؟ والسنه الجايه مش مهم العلاوه تبقى 30% خليها 25%بس اه عشان ما نتعودش على العز إحنا مش طماعين!! كل سنه وانت بكل خير ياريس0

[محمد كمال على]

علي المنافق رفع يده

منافقه

[hany_rmm]

ايه ده ه الريس بجد عنده 80 سنه

[hend]

هى دى المقالات ولا بلاش
علشان كده بقى امراض الضغط والسكر متفشيه فى مصر

[iwan]

بجد النفاق بقي هو حال البلد الايام دي والي مش ينافق يبقي خاين وعميل
ربنا ياخد كل منافق
ويريحنا بقي منهم
مرسيه علي الموضوع

[بنت الصعايده]

طويل العمر يطول عمره ويزهزه عصره وينصره على من يعاديه هاى هئ هئ هئ هئ هئ اهلا وازغزغ واموت من الضحك فى هذا العهد .......المبارك.......النظيف.....الشريف.....الغالى. .....السرور.....العز........شفتوا اكتر من كده جماااااااااااااااااااااااااااااااااااااااااااااااا ااااااااااااااااااااااااااااااااال ادعوا معايا مانشوفش

[amr_miza1]

مش عارف بصراحة اللى كاتب المقال متجنى على الراجل بشكل غير طبيعى ..
مش معايا والا ايه ؟؟؟

الرئيس الحكيم عمل انجازات مهولة محدش واخد باله منها ...

البهدلة اللى احنا فيها مقصودة .. اااه والله مقصودة ومش لازم نزعل ولا نتضايق ولا نشيل فى نفسنا .. الباشا بيعمل كدا علشان الحسد ..

وبعدين انتو ناسيين الانجاز التاريخى اللى سيادته بيصمم فيه من 27 سنة .. ألا وهو الطريق الدائرى .. طبعا لازم نتكلم ونفخر كلنا بالانجاز العظيم دا ..
علم ايه وجامعات ايه ونظافة وثقافة ايه .. الحاجات دى مالهاش اى قيمة غير فى الشعوب التعبانة
والا الشرطة والامن والأمان ..

الأمن والأمان وكل المعانى الجميلة دى موجودة فى الطريق الدائرى هناك عن الكيلو 27 وانت رايح العين السخنة ,, اينعم مش عارف ايه علاقة العين السخنة بالدائرى بس اهى كلها انجازات

وبعدين لما الشعب يجوع وميلاقيش رغيف العيش دى بردة مقصودة .. الريس بيعملنا ريجيم بس مش عاوز يقول بس علشان ميحرجناش ..

رووووكا .. ليه طيب حرقة الدم ما كنا كويسين

[Dr.Hammood]

جاته شلل في ايديه ورجليه وودانه وقفاه

اشوف فيك يوم يا قط

يوعدك ربنا بكلب اخنف كل ما يشوفك يطلع مصارينك وكل ما تطلع من المستشفى يقابلك يطلع مصارينك تاني

لحد ما الكلب يزهق وانت تزهق وال يزهق

شكرا يا انسه روكيه وما نجلكيش في حاجه حلشه

[bo7or]

المشاركة الأصلية بواسطة محمد كمال على

علي المنافق رفع يده

منافقه

رفعت الجلسة

[bo7or]

المشاركة الأصلية بواسطة hany_rmm

ايه ده هو الريس بجد عنده 80 سنه

ايه ده ..
الزعيم مات ؟
هو الزعيم بيموت زينا كدا يا جدعان ؟

[bo7or]

المشاركة الأصلية بواسطة hend

هى دى المقالات ولا بلاش
علشان كده بقى امراض الضغط والسكر متفشيه فى مصر

عجبنى اوى الحد اللى معلق عالمقال وهو بيقول

_ يا جمال اسلوبك _

رااائع الراجل ده ..
حارق للدم

ثانك يو هند
عاملة ايه دلوقتى ؟

[bo7or]

المشاركة الأصلية بواسطة iwan

بجد النفاق بقي هو حال البلد الايام دي والي مش ينافق يبقي خاين وعميل
ربنا ياخد كل منافق
ويريحنا بقي منهم
مرسيه علي الموضوع

ايه ده العفو .. فى حرق دم اكتر من كدا بكتييير متقلقش
ابتسم انت اكييد فى مصر _الجديدة_

ثانك يووو

[bo7or]

المشاركة الأصلية بواسطة بنت الصعايده

طويل العمر يطول عمره ويزهزه عصره وينصره على من يعاديه هاى هئ هئ هئ هئ هئ اهلا وازغزغ واموت من الضحك فى هذا العهد .......المبارك.......النظيف.....الشريف.....الغالى. .....السرور.....العز........شفتوا اكتر من كده جماااااااااااااااااااااااااااااااااااااااااااااااا ااااااااااااااااااااااااااااااااال ادعوا معايا مانشوفش

نحوووو الترويييث

هو عالم ابن مصر متراقب ؟

[bo7or]

المشاركة الأصلية بواسطة amr_miza1

مش عارف بصراحة اللى كاتب المقال متجنى على الراجل بشكل غير طبيعى ..
مش معايا والا ايه ؟؟؟

دة اللى عامل البلوج بقى

الرئيس الحكيم عمل انجازات مهولة محدش واخد باله منها ...

البهدلة اللى احنا فيها مقصودة .. اااه والله مقصودة ومش لازم نزعل ولا نتضايق ولا نشيل فى نفسنا .. الباشا بيعمل كدا علشان الحسد ..

وبعدين انتو ناسيين الانجاز التاريخى اللى سيادته بيصمم فيه من 27 سنة .. ألا وهو الطريق الدائرى .. طبعا لازم نتكلم ونفخر كلنا بالانجاز العظيم دا ..
علم ايه وجامعات ايه ونظافة وثقافة ايه .. الحاجات دى مالهاش اى قيمة غير فى الشعوب التعبانة
والا الشرطة والامن والأمان ..

دة كلام
الشعب فى خدمة الشرطة
والشرطة مش فاضية

الأمن والأمان وكل المعانى الجميلة دى موجودة فى الطريق الدائرى هناك عن الكيلو 27 وانت رايح العين السخنة ,,

لا انا بنزل العريش ..

اينعم مش عارف ايه علاقة العين السخنة بالدائرى بس اهى كلها انجازات

اهه اكبر من انجاز ال 010 .. بس مجبش سيرة ال 016 و ال 018

وبعدين لما الشعب يجوع وميلاقيش رغيف العيش دى بردة مقصودة .. الريس بيعملنا ريجيم بس مش عاوز يقول بس علشان ميحرجناش ..

رووووكا .. ليه طيب حرقة الدم ما كنا كويسين

زميييل الكفاح
احنا كلنا فل و قشدة
والرغيييييف كبييييير و المواصلاااات فاضيةةة و عمالين يقولوا فكوا الحزاام فكوووا الحزام

عارف بقى حوار البنزين والمواصلاات وكدا
دة ريااااااضه بس احنا اللى مش عارفين اللى فيها
بلاش تركبوا مواصلااات دى حتة تلوث ودخان وملهاش اى لازمة

يا رب اديله جرجير


ثانك يو تو عمرو
انت كويس ؟

[bo7or]

المشاركة الأصلية بواسطة Dr.Hammood

جاته شلل في ايديه ورجليه وودانه وقفاه

اشوف فيك يوم يا قط

يوعدك ربنا بكلب اخنف كل ما يشوفك يطلع مصارينك وكل ما تطلع من المستشفى يقابلك يطلع مصارينك تاني

لحد ما الكلب يزهق وانت تزهق وال يزهق

شكرا يا انسه روكيه وما نجلكيش في حاجه حلشه

ربنا يوعده باللى يحطله السيخ المحمى فى صرصور ودنه يطلعه من ودنه التانيه يلف و يدبه فى عينه يخذأهاله .. يضفره فى مناخيره يطلعه من نافوخه ملوى يعلقه على باب جزار
و ييجى كناس غبى معاه مقشه حديد مبرية يقوم خارم بيها نفوخه .. معاه اربعة
اتنين يشدوا من هنا واتنين يشدوا من هنا وكل واحد معلق فى رجليه اربع انابيب بوتاجاز
وبعدين يقوم زلزال و بركان الدنيا تولع
كل الناس تنجى ما عدا هو ..يفضل مدفون تحت الارض ستين يووم .. يفحتوا يلاقوه لسه صاحية
يمدوا اديهم يجيبوه .. يقول هيييييييه .. يعدى اتوبيس سياحى يقطعه حتت

دة لمين بالظبط ؟
العفو يا انكل