محاوره زجليه بين زجالين لبنانيين وفلسطينين

[سمبل212]

المحاورة الأولى: جرت عام 1944، وهي من نوع (المعنّى) وتتبعها طلعة قرّادي وقد شارك فيها الشاعر اللبناني (محمد الزين) والشعراء الفلسطينيون: أبو السعود الأسدي وأبو سعيد الحطيني

أبو السعود:

يا زين يلّلي بالقوافي معتمَدْ
ومين غيرك في نظم فنّو نَفَدْ
زرت عكا قلعة الشرق العظيم
وْزورْنا مشوار عادير الأسدْ

محمد الزين:

بديني بإيماني بشريعتي بمذهبي
قلبي بِحِبَّك زيّْ ما حَبّ النبي
عزمتني تزورك في دير الأسد
بركض ركض بمشي مشي بحبي حّبي

أبو السعود:

راعي الزكا يا زين يا محبوبنا
دروبك بنظم الشعر مثل دروبنا
وقدّامكو مثل الرياح هبوبنا
وعالمكرمة نحنا نفضنا جيوبنا
وبيوتنا لو ضاقت بكثر الضيوف
معاها فتحنا للضيافة قلوبنا

محمد الزين:

ببلادكو يا أبو السعود قلبي انغرمْ
وبيتَك بعزّو معزّتي لْبيت الحَرَمْ
ونحنا بجبل لبنان نِرْفعلك عَلَمْ
وأنت منارة بالشعر فوق العلم
وحاتم الطائي شهرتو بعصر المضي
وأنت بعصرنا نلت شهرة بالكرم

أبو السعود:

يا زين في حبك وضح منهاجنا
إنشالله منحتاجك وما بتحتاجنا
وِحْنا إنِ فْرضنا بلبنان علاجنا
ولبنان باقي في الشمال سياجنا
يا ريتك يا زين تظل تزورنا
تانظل نضوي بالفراح سْراجنا

وهنا دخل أبو سعيد الحطيني على الخط، فقال:

أفراحنا يا بو السعود مباركة
وأنت زكي والزين من شكلك زكي
والشعر يا بو سعود مثل المملكة
وعالطاولة خلي الحديث مشاركه
ومش جاي يا بو سعود حتى أنا غشك
جايي أنا بالشعر أفتح معركه

فقال أبو السعود:

يا بو السعيد بالضيف لازم نحتفي
وضيفنا ببسمة لطيفة بيكتفي
وأنت طلعت طلعة قليل المعرفة
ومن الضروري من قبالي تختفي
وعاكل حال أنت مثل نار الفُقُع
بتهب في لحظهْ وبلحظة بتنطفي

فقال الحطيني:

من هناك من حطين أول ألمعي
غنى الشعر، والمجد عا صوتو وعي
ولو كنت يا بو سعود مثل الأصمعي
ما بتغدرش بالمعمعة تثبت معي
استنجد بزين وكل شعّار الزجل
تاتشوف مين العنتري والمدّعي

هنا فتح الزين بردة قرادي:

يا حطيني، عنتر عبس
ونحنا من ذات الطينة
بيقولوا في عكا حبس
وطالع منّو الحطيني
يا حطيني قبل تصول
من الواجب تسأل عني
وأنت تا تعرف بأصول
الشعر بتتعلم مني
وكل ما يحصل هزّ نصول
بعركة بتخيّب ظنّي
ولا تقطع حبل الموصول
بتوطى وما بتوطيني

فقال الحطيني:

نحنا للسيف وللضيف
وما في حدّ بينكرنا
وقهوتنا السمرا للكيف
وخمر العز بيسكرنا
والشعّار الجابو الحيف
ما بتقدرش تعكرنا
ولو بقطعهن ع النظيف
نفسي ما بتخطيني

فقال أبو السعود:

يا حطيني لا تغتر
بقوة عزم وباس شديد
وخلّي العركة كرّ وفرّ
وسيف بإيد وترس بإيد
ومنك أصبح طقس الحرّ
مثل البوظة بالتأكيد
ومن عكا رح تطلع جرّ
هيك بلبش اليقطيني

فقال الزين:

في عين المولد موعود
والحطيني توعّدنا
وعالحطيني يا بو سعود
نحنا الليلة عيّدنا
وأهلاً بالحفل الموجود
يلّلي وجوده بيسعدنا
وعكا المخلوقة للجود
شو ما طلبت بتعطيني

وهنا زغردت إحدى السيدات من على أحد السطوح، فقال أبو السعود:

بلادي يا مرعى الغزلان
محميه بأسود الغاب
منهل صافي للظمآن
بشرط يكون من الأحباب
وفيكي زغاريد النسوان
العريان بيلبسها ثياب
ولو مرة بيبقى بردان
بموجة عطف تغطيني

فقال الزين:

يا فلسطين الفيكي الدهر
لابس أحلى كوفيه
مثل الزهر بجنب النهر
وكل أيامك كيفيه
جيناك تاننسى القهر
بتالي شهور الصيفية
وفيكي لو بقعد شهر
بصدر البيت تحطيني

فقال الحطيني:

يا لبناني أهلاً بيك
يا حامي مجد الأرزة
وعاشعرك الله يعافيك
وفيك الحفلة معتزة
النصراني بتفاخر فيك
ومثله المسلم والدرزي
وبُوجَب علينا نكافيك
بوسام السَّلاطيني

فقال الزين:

يا حطيني الشعر جناس
وشعرك خلّى الشعر يلين
والصخر بعكا بينباس
مسجل تاريخ لحطين
وعكا سور وقوة باس
خلّت نابليون يلين
وفيها الزين بيرفع راس
أبو سعود والحطيني

فقال أبو السعود:

حيّي عكا شيخ وشب
وكل الحفل كبار زغار
ومنها غيم الجود انصب
طلّع ع الصخرة أشجار
وأرض بلادي بتنبت حُبّ
بظلّ المجد وظل الغار
وتراب بلادي بينحبّ
لانّو تراب فلسطيني