ممكن مساعدة ؟؟

[demeter]

السلام عليكم ورحمة الله وبركاتة
انا عضو جديد وعلى أمل انى استريح وتتحل مشكلتى لانها واخدة معظم تفكيرى ووقتى
انا شاب كنت بحب زميلتى فى الكلية كنا 6 سنين مع بعض وطبعا اثناء السنين كانت فى مشاكل بتحصل عادى بين اى اتنين بس حبييتى كان فيها مشكلة ممكن تعمل حاجات من وراى من غير ماتقولى لمجرد انها عارفة انها لو قالتى اننا مش حوافق عليها مع انى كنت معظم الوقت بوافق علشان مش عايزها تعمل حاجة من وراى وانا كنت بعرف كنت بزعل معاها ونتخاصم وارجع اسامحها واقولها دى اخر مرة المهم خلصنا الكلية وخلصت الجيش ورحت اتقدمت لاهلها وكنت خلاص فى خلال شهرين حنعمل خطوبة وافاجئ انها لسة بتكدب على وانا عندى مشكلة انى مش بثق بحد بسهولة وطبعا انا اتصدمت مع انى اخر مرة قولتها انك لو كدبتى على تانى ممكن يقضى على اللى بينا
وطالما هى بتكدب على يبقى مش بتحترمنى .
طبعا كلمتنى وكانت بتحاول تعتذر لى بس انا ماكنتش عايز اعتذار انا كنت عايزها تحس باللى هى عاملته وطبعا انا كنت بقولها انى مش عايز اكلمك ولا اشوفك واللى بينا انتهى كان كل دة كلام وقت نرفزة وزعل وطبعا فى اخر مكالمة قالتى انها مش حتكلمنى تانى وفضلنا مش بنكلم بعض 7 اشهر .
طبعا واحنا متخاصمين جه عيد حبنا انا كلمتها وقالت لها اننا بطمن عليكى وسلمت عليها وكانت بتكلم معاى عادى وجى عيد ميلادها بعت ليها رسالة على الموبيل .
انا دلوقتى مش عارف اذا كنت ظلمتها باللى انا عملته
انا اسف انى طولت عليكوا .

[دعاء الجندى]

الاول عايزه اقولك اهلا بيك فى المنتدى نورتنا
ثانيا اخى العزيز عايزه اعرف ايه نوع الكدب ؟؟ فى كدب ممكن تسامح عليه وكدب استحاله انك تسامح فيه وعلى العموم فى كلتا الحلات انت ما ظلمتهاش
انت عاملت الصح
فى ماقوله بتقول اللى يحب بيسامح وانت لو بتحبها سامحها ده لو كان الكدب اللى ممكن يغتفر ليه وحاول تعودها على الصراحه
تحياتى ليك

[نرجسية]

كويس قوى انك طلعت راجل و اتقدمت لها
مش مجرد تسالى و خلاص

انت بتقول بقالنا 7 سنين
يعنى دى فترة كافية جدا انك تعرف كل عيوبها و مميزاتها

فاذا كان الكدب داء عندها دور على صفات كويسة تغفر الصفة السيئة دى

الكدب فعلا من اسوأ الصفات

لكن هل الكدب ده صفة عندها و للا ليها أسباب
يعنى مثلاً هل انت بتتحكم فيها و هى بتضطر تكدب عشان ما تزعلكش وخلاص


فيه واحد بيطلب من خطيبته ما تتكلمشى مع صديقتها الفلانية من دون أسباب جوهرية

هو بس مش مرتاح لصاحبتها دى
فى حين أنها بتحب صاحبتها

فتضطر تكدب عليه و تقول له أنه قطعت صلتها بيها عشان تريحه

طبعاً الكدب غير مبرر فى جميع أشكاله سواء فى الأمور الهينة أو الكبيرة

لكن بطبيعة البشر ممكن نغفر الكدب الهين للناس اللى بنحبهم

لكن فى أمور تانية بيكون الكدب لا يمكن مسامحته فى حالة الخيانة مثلاً


استخير ربنا فى الزيجة و اللى فيه الخير ربنا حيقدمه

[محمد العجمى00]

اهلا بيك

[الورد الجوري]

اهلا بيك
الكذب درجات
صحيح كله كذب بس بردو هو درجات
في درجات منه بسيطه و يستطيع الانسان غفرانها
و في كذب لا يغفر مع ناس و يغفره اخرون
و طبعا الله يغفر الذنوب جميعا

بالنسبه لكذبها اللي انت عرفته و بتقول عنه ده
ياريت تقعد مع نفسك
و تحدد هل كذبتها دي تستحق الفراق ام لا !!!
هل هي من النوع الذي تغفره نفسك ام ان الغفران فيه لا يجدي
و لما تلاقي اجابه لنوع الكذبه هتعرف تحل المشكله
بس ياريت نكون مرنين جدا جدا
و نفتكر دائما ان مقابل العيب اللي بننتقده ده
هناك ميزة جميله في من امامنا قد يصعب علينا
العثور عليها في آخرين
لنتريث لكي لا نعض اصابع الندم حيث لا ينفع الندم
اتمنى ان اكون اضفت لك بعض الفائده
لك تحياتي