الأغانى المشئومة

[hend]

يخلط الناس غالباً بين الأحداث السيئة أو الأحداث الجميلة وبين أشياء تحدث فى نفس الوقت ... فهذا دخل الى بيتنا وف نفس الحظة فرقعت لمبات النجف كلها ... بالتأكيد هو ليس ذنب وانما طبعا يتهامس الحاضرون ياساتر .. ده كعبه محنى !!! دخلته نحس !!! وآخر يدخل علينا فيأتى لنا خبر سار كنا ننتظره من فترة طويلة .. فيهتف بنا فى تفاخر أناأصلى وشى حلو ...مرزق مطرح مأروح تلاقى الخير جه .. فين نسبتى بأه ؟!

و فى الوسط الفنى تتنشر هذه الفكرة وصار المنتجون والنجوم يتعاملون مع العمل الفنى بطريقة ده مرزق . ده وشه حلو . ده نفسه هادى !!

ودخلت المسألة فى التعاويذ والنجوم والدجل " اللهم احفظنا "

لكن بعض الأشياء التى تحدث تجعلك أحياناً تفقد عقلك ياأخى فهذا مطرب صديق كان يسمعنى مطلع غنوة فى جلسة ودية ...وفجأة لم تعد ودية أبداً .. حيث تلقينا نبأ وفاة والد أحد الجالسين ... وتحركنا جميعاً والباقى معروف طبعا تصاريح واجراءات حتى الفجر وفى مره ثانية ماكاد يبدأ الغناء حتى حدث الزلزال الأخير وانفض المجلس فى ثانية وجرينا فى رعب خارج المنزل وهكذا انفجرت بعد ذلك انبوية بوتجاز .. واصطدمت سيارتنا صدمة هائلة حين بدأ يغنىلنا فى السيارة



الغريب انه هناك اغانى لها سمعة عالمية أنها مشؤومة فهناك أغنبة ( يوم الأحد الكئيب ) وهى اغنية مجربة كانت تغنى فى بودابست فى العشرينات .. وهى اغنية عادية نغماتها حزينة بعض الشيىء .. وقد أذيعت لأول مرة فى مقهى ..ولم يلبث المغنى وكان شاباً يافعاً أن انتحر بعد أن غناها مباشرة واشتهرت الاغنية التى انتحر بعدها ذلك الشاب البائس ... إلى أن غنتها المغنية الشهيرة ( أولجاكيركس ) فى أحد المسارح الكبيرة .. فأسالت دموع الناس .. ثم دخلت الى مقصورتها بالمسرح استعدادا للوصلة الثانية .ولكن لم يكن هناك وصلة ثانية فقد وجدوها ميتة فى مقصورتها وقد انتحرت بالسم .ز ولم يستطع أحد حتى الآن أن يعرف السبب الذى يؤدى بمن يغنى هذه الأغنية للانتحار بعد غنائها مباشرة .. والتى مات على أثرها عشرون واحد كلهم يغنون وينتحرون

وقد تندر البعض وقالوا ان اللحن مسموم وآخر قال ان الكلمات مركبة بطريقة تدمر الجهاز العصبى ..وقد ثبت خطأ هذه الاستنتاجات بعد أن سمعنا بعض الاغانى الحديثة وماحصلناش اى حاجة شوية تخلف كده على خفيف قوى

ويقال ان البوليس قد تدخل ومنع ترديد الأغنية وكم تمنيت ان يجرب بوش صوته العذب ويشجينا بتلك الاغنية الرائعة ( يوم الأحد المكتئب ) .

وفى أمريكا رفض أحدهم أن تُعزف السيمفونية السادسة لتشايكوفسكى فى مدينة ديترويت محتجا بأن القطعة مشئومة وقال لقد عزفت هذه المقطوعة 15 مرة وفى كل مرة كنت أسمع بوفاةأحد أصدقائى ولقد مات تشايكوفسكى نفسه بالكوليرا بعد أن عزفها لأول مره أمام الجمهور

وأوبرا شارال السادس .مُنعت من العرض أيضاً لنفس السبب ..ويقال أن المغنى كان يقول فى أحد مقاطع الأوبرا اقتله يارب . فسقط أحد المتفرجين فى مقصورته .. وفى الليلة الثانية نفس المغنى يصرخ بصوت اوبرالى جبار اقتله يارب فمات أحد العازفين عل الفور وبدا الضحايا يتساقطون قائد الاوركسترا المتفرجون المغنيون هكذا مثل التنويم المغناطيسى او التمويت المغناطيسى وأُوقفت الأوبرا تماماً وصار ذكرها مثل الجحيم .. فهذه تدعو على زوجها ( أشوفك فى أوبرا شارل السادس قادر ياكريم ) وهو يقول لنفسه كأنه يدندن اقتلها يارب وبعد تسع سنين تحرى نابليون الثالث عن هذه الشائعة وقال مثلما قلت ايه الكلام الفارغ ده تشاؤم ايه ونيلة ايه ..وأمر بعرض الأوبراوأقر بانه سيحضرها شخصياً ولكن وقبل رفع الستار ألغيت الأوبرا لأن احد الفوضويين اعتدى على موكب الامبراطور وهو فى طريقه الىالاوبرا وكان عدد ضحايا الحادث 56 قتيلا !!!!!

وعليه فنحن نعرض على بوش خيار جديد نوفى ومختلفاً عن جميع الخيارات السابقة أن يغنى لنا اغنية يوم الأحد المكتئب أو يقبل دعوتى لحضور أوبرا شارل السادس حيث يغنى الكورس فى صوت اوبرالى مهيب اقتله يارب

يوسف معاطى (كتاب ماتشيلش فى نفسك)
من ايميلى

[mostafa10]

" اقتله يارب" يا بوش
ربنا قارد عليه ياخده ويورينا فيه يوم

شكرا يا هند على النقل الموفق

سلامي

[عتاب]

انا مستعدة اضحي بنفسي واخد بوش رحلة للاوبرا
المهم اننا نسمع اغنية اقتله يارب
لحد ماييجي عليه الدور ههههههه

موضوع ظريف يا نودة
يوسف معاطي مالوش حل

[رؤيه]

مش قادره ابطل ضحك بصراحه
ياه لو ناخد الناس اياها حفله جماعيه للاوبرا دى ونقفل عليهم ونسيبهم
عارفه ممكن احنا اللى نموت مش هما
شكرا على النقل اللطيف بجد ضحكتينا
دمتى بكل ود

[Ebn elbalad]

شوفوا الفكرة دى كانت غايبة عننا إزاى

أكيد مش كل الكلام ده صحيح .. مش للدرجة يعنى .. وبوش وغيره ممكن نلاقيهم بيولعوا دلوقتى وأنا بكتب الرد ده .. ياااااارب

[محمدحسين]

ياريت تتذاع الاغنيه دى فى مصر علشان نخلص من سبب كل اللى الناس فيه من هم ونكد وفقر

[hend]

المشاركة الأصلية بواسطة mostafa10

" اقتله يارب" يا بوش
ربنا قارد عليه ياخده ويورينا فيه يوم

شكرا يا هند على النقل الموفق

سلامي

العفو اخى
هى فكرة مش بطاله وبالمرة يتفرق دمه بين القبائل
ماهو مش معقول واحد زى دا حد يتحاكم انه ريح العالم منه

نورت الموضوع

المشاركة الأصلية بواسطة عتاب

انا مستعدة اضحي بنفسي واخد بوش رحلة للاوبرا
المهم اننا نسمع اغنية اقتله يارب
لحد ماييجي عليه الدور ههههههه

موضوع ظريف يا نودة
يوسف معاطي مالوش حل

فعلا يوسف ملو ش حل ومقالاته بجد روعه
احنا ناخد بوش والمرت وكوندى وحسنى وجمال علشان الاوبرا اهو يغيروا جو واحنا نغير حالنا
العفو حبيبتى
منوره الموضوع

[hend]

المشاركة الأصلية بواسطة رؤيه

مش قادره ابطل ضحك بصراحه
ياه لو ناخد الناس اياها حفله جماعيه للاوبرا دى ونقفل عليهم ونسيبهم
عارفه ممكن احنا اللى نموت مش هما
شكرا على النقل اللطيف بجد ضحكتينا
دمتى بكل ود

تدوم الضحكه حبيبتى
صحيح
دى تبقى ليله ياعمدة
بيتهيالى يبقى يوم عيد بجد
انا برضه بقول كده
اخرتها احنا اللى هنموت لانه متحجبين
تحسى انهم ماسكين فى الدنيا بايديهم وسنانهم
العفو حبيبتى
نورتى الموضوع والحمدلله ان الموضوع نال اعجابك

المشاركة الأصلية بواسطة Ebn elbalad

شوفوا الفكرة دى كانت غايبة عننا إزاى

أكيد مش كل الكلام ده صحيح .. مش للدرجة يعنى .. وبوش وغيره ممكن نلاقيهم بيولعوا دلوقتى وأنا بكتب الرد ده .. ياااااارب

طب ياريت
حد يكره
كلنا هنتبرع ونقطع لهم تذاكر وعلى اول اوبرا وربنا يسترها معانا
الف شكر على تشريفك وردك

[hend]

المشاركة الأصلية بواسطة محمدحسين

ياريت تتذاع الاغنيه دى فى مصر علشان نخلص من سبب كل اللى الناس فيه من هم ونكد وفقر

قول يارب
والشعب هيتبرع بثمن التذاكر وبعد ما ربنا يسهل هنتبرع بثمن الاكفان وغيره من ملتزمات الخرجه

[نيهال]

مين اللى يقنعه بس......المشكله انه عارف