4- الدولاب و نقله :
النهاردة بقى إن شاء الله ... هنبعد عن الطبيخ شويتين
و نفرض ان جنابك وقعت منك حلة الطبيخ في الأرض ... و شوية دخلوا تحت طربيزة المطبخ –بيقولوا عليها النملية باين ؟؟ و لا النملية دي اللي بتبقى متعلقة فوق بس ؟؟ - ...
المهم .. انت عاوز تحرك "الكتلة" اللي اسمها طربيزة المطبخ دي علشان تنظف تحتها ... و هي مش محطوطة على عجل ؟؟؟
تعمل ايه ؟؟؟ أو تعملي ايه ؟؟
الموضوع ده ممكن تقابلة خارج المطبخ مثلا لو الدولاب في الغرفة و انت عاوز تنقله جنب الحائط الآخر لأي سبب من الأسباب لكن المشكلة انه مليان حاجات و "تقيل رجمة" 
الحل ببساطة ... انت صعب انك تحرك الدولاب .... تزقه -تدفعه- على الأرض , لكن ممكن تميله "سنة صغيرة" على جنبة ... و تروح حضرتك حاطط كسر سيراميك -فسيفساء- تحت كل ركن من أركانه الأربعة , بحيث تكون الحتة الناعمة من السيراميك مواجهة للأرض ,
تميل الدولاب سنة لقدام و تحط حتتين سيراميك في الركنين اللي ارتفعوا عن الأرض, و بعدين تميله لورا -للخلف- بعد ما تشده قدام سنة علشان ينفع يميل للخلف و تحط حتتين تانيين في الركنين الباقيين ,
كده بقى عندك الدولاب تحت كل ركن من أركانه حته سيراميك وجهها الناعم مواجه للأرض ...
دلوقتي ... ادفع يا زعيم –مش فلوس ما تخافش 
– زق يعني ... هتلاقيه يمشي معاك بسهولة ... أي خدعة ايه اللي حصل بقى يا هندسة ؟؟
جنابك أي سطحين متلامسين فيه بينهم قوة احتكاك ... قيمتها = وزن الجسم * معامل الاحتكاك
-دي في حالة الجسم الساكن , و المستوى الأفقي ... علشان لو حد عاوز يتوسع - ... يعني انت لما بتزق الدولاب على الارض ... القوة اللي بتقاومك هي حاصل ضرب وزن الدولاب ده في معامل الاحتكاك بينه و بين الأرض,
و علشان تتغلب على القوة دي قدامك تلات طرق : إنا انك تبقى أقوى منها و تروح تشيل حديد مع شعبولا 
أو إنك تقلل وزن الدولاب بإنك تشيل شوية حاجات من جواه
أو الطريقة اللي عملناها هنا و إننا قللنا معامل الاحتكاك ..... تا تا تا تا تااااااااااااااا يعني انت لو حاسس انك بتزق 100 كيلو مثلا , و قللت الاحتكاك بالطريقة دي مثلا و بقى معامل الاحتكاك 0.5 هتحس انك بتزق حاجة كتلتها 50 كيلو بس ..
شفت سهلت على نفسك قد ايه ؟؟
ممكن طريقة تانية بس أصعب و مش هتدي نفس النتائج , إنك تبل الأرض حوالين الرجول بتاعة الدولاب علشان تقلل الاحتكاك ... بس الطريقة دي عاوزة قوة أكبر في الزق لأنها مش بتقلل معامل الاحتكاك قوي زي طريقة السيراميك ....
يؤخذ على طريقة السيرامك إن السيراميك ممكن "يتدشدش" لو الدولاب تقيل قوي , أو لو الأرض , البلام مثلا فيه حتت طالعة و نازلة , أو ممكن يتزحلق من تحت رجل الدولاب و تحتاج تميل الدولاب تاني و تحطه , أو تحط قطعة جديدة بدل اللي اتدشدشت دي ...
و شاكر للجميع التفاعل اللي أسعدني جدا ... الحياة حلـ .... قصدي الفيزياء حلوة بس نفهمها ... بجد الفيزياء دي لو ربنا كرمك بدكتور محترم بيفهم و يفهمها لك ... هتحبها مووووووووت
أخيرا ... أطلب منكم بس طلب صغير .... ادعولي ربنا يوفقني , أحسن امتحاناتي الأسبوعين الجايين ادعوا لي ربنا يوفقني في الامتحانات و يوفقني لما يحب و يرضى ...
باقي المواضيع المطبخية .... تتبع إن شاء الله ,,,, بس ممكن تتأخرأسبوعين و لا حاجة لفترة ما بعد الامتحانات
بس أنا متابع الموضوع و التعليقات و النقاش ...
تحيتي لكم 
عشان كده اعتزلت المطبخ دا خالص وسبتوا للست الوالدة تبرطع فيه براحتها من غير نظريات
و من (حسن) 
-
