The Moment of Truth لحظة الحقيقة

[أحمدكمال]

كاميرات..
جمهور..
استوديو فخم..
مذيع ناجح ومشهور..
قناة بيشوفها كل الناس..
اقرب الناس ليك حواليك...
حلم الشهرة جه عندك بكل بساطة..
مش بس كده ...ده كمان ممكن تكسب نص مليون دولار..حوالي 3 مليون جنيه مصري..
طيب ايه المطلوب؟
ببساطة ...ومن غير لف ولا دوران ...الحقيقة!!
***

وانا قاعد بعد يوم عصيب من ايام الامتحانات..
وماسك في ايدي الاختراع الجهنمي اللي اسمه الريموت كنترول..
وبقلب في التلفزيون لقيت برنامج اجنبي اسمهThe Moment of Truth..مخفيش عليكم اني كنت سمعت عنه قبل كده ..بس دي اول مرة اشوفه بجد..
طيب وايه المانع..الواحد في لحظات احباط ومحتاج يشوف حاجي لذيذة روشة وكوووول..علشان يخرج من المود ده..
قعدت اتفرج ..مكنتش اتوقع اني لما اتفرج على البرنامج ده اني هقعد افكر كتير قوي..والدنيا مبقتش لا لذيذة ولا روشة ولا كووول...
بالعكس انا ممكن اكون عملت مجهود عصبي اكتر من اللي عملته في الامتحان اصلا..

فكرة البرنامج ببساطة علشان اللي ميعرفعوش انك هتقعد مع زي محلل نفسي هيسألك 60 سؤال..عن ادق التفاصيل في حياتك..
وانت مش هتجاوب كده ببساطة..لا انت هتبقى قاعد على جهاز كشف الكدب .. وطبعا مش هتعرف النتيجة في ساعتها..
بعد كده بتطلع في البرنامج..بيختاروا حوالي 21 سؤال على تقريبا خمس مستويات ..كل مستوى بتحقق ربح مالي معين ..وبعدها ممكن تنسحب ...
لكن يا ويلك يا سواد ليلك..لو طلبت تكمل وكدبت ولو كدبه واحدة هتخسر كل حاجة..
اهلك واقرب الناس ليك بيبقوا معاك وحواليك..ومن حقهم انهم يمنعوا احد الاسئلة ويغيروه "سؤال واحد بس"..
طيب يا عم ايه المشكلة بقى؟؟؟

المشكلة في الاسئلة..
المشكلة في المبدأ نفسه..

انا عايز ابص للموضوع من كذا زاوية..
في البداية..فكرة انك تسمح انك تكون مادة اعلامية مباحة للناس..من حقهم يسؤلك اي سؤال وانك تجاوب عليه ومطلوب منك الصدق فكرة خطيرة جدا..
فكرة ان الشخص اللي جواك بكل اسراره وبكل تجاربه يطلع بره للناس صعب اني اتصورها..
سيبكم من انواع الاسئلة اللي اتسألت..طبعا برنامج غربي واكيد الحدود الاخلاقية مختلفة عننا..بس المبدأ في حد ذاته بيطرح اول تساؤل..
هل الشخص اللي جوانا من حق حد غيرنا؟

النقطة التانية اللي فكرت فيها طيب انت خايف من ايه..ممكن اي حد يطلع يسأل السؤال ده؟ هو انت مش عندك مبادئ واخلاق وماشي عليها..
خايف مين ايه بقى..اللي يسألك على حاجة قوله عليها ولا يهمك؟ ويجي حد يقؤلك اصلا وجود شخص تاني جواك ده شئ مش مقبول..
الكلام ده نظريا..اعتقد انه صح..
بس هل احنا فعلا ماشيين على طريق المبادئ من غير انعواج..؟ هل مغلطناش؟ هل فعلا الشخص اللي جوانا هو الشخص اللي ظاهر قدام الناس؟
ولا الشخص اللي ظاهر للناس ده صورة منقحة من الشخص اللي جوانا؟
هل فعلا لو اتحطيت تحت ضغط برنامج زي ده مش هتعرف انت انهي شخص؟ وانت اللي جوه ولا اللي بره؟
هل لو اتحطيت تحت الظرف ده هترتبك؟
هل هتعرف اصلا هي ايه الحقيقة؟

النقطة الثالثة ..هو احنا اصلا عارفين نفسنا؟ هل في لحظة حاولنا ندخل جوه الشخص اللي بداخلنا؟ ونعرفه اكتر؟
طيب هل حاولنا نفض الاشتباك الموجود في بعض النقط ما بين الشخص اللي جوانا والشخص اللي ظاهر بره؟
هل حطينا نفسنا جوه اختبار وضغط زي البرنامج ده؟علشان الامور تبقى واضحة؟
هل احنا محتاجين جهاز كشف الكذب علشان نعرف نفسنا؟

النقطة الرابعة.. لنفترض اننا نعاني من مشاكل بين الشخصين..هل من مصلحتي اني افضح شخصي الداخلي اللي ممكن اكون مضايق منه مثلا..
فبالتالي ده يبقى علاج ليا؟

اللذيذ في الموضوع انه مع سير البرنامج "الضيفة" انا مش عارف احسدها ولا اشفق عليها..
كانت في قمة الصراحة"يعني عمالة تكسب"..لدرجة انها تقريبا البرنامج ده ممكن يتسبب في انهاء علاقتها الزوجية؟
هنا بردوا في سؤال تاني...هل الصراحة في الحالة دي مفيدة؟ يعني لو انا وصلت لمرحلة من الاستقرار حتى لو الاستقرار ده مبني على اجتهادات خاطئة؟
هل علشان اكون انسان مثالي؟ لازم اكون صريح مع نفسي وصريح مع الاخرين حتى لو هدم حالة الاستقرار دي؟


اخر سؤال هل الفلوس تستحق ان الواحد يحط نفسه قدام الناس في موقف زي ده ..حتى لو كان واثق في كل تصرفاته؟


ملحوظة: طبعا انا معترض على الاسئلة في البرنامج..والحمدلله ان اخلاقنا وقيمنا ودينا حطيت حدود للصراحة ..فلعن الله المجاهرون بالمعصية..
بس هذا لا يمنع ان البرنامج "بعيدا عن الاسئلة الللي ليها علاقة بالمعصية ؟" خلاني افكر كتير وخصوصا ان "الضيفة" خسرت في سؤال كان من اسهل الاسئلة..او بالادق كان
من اقل الاسئلة فضائح..واقصرها طولا ..خسرت بعد ما كانت قربت تخسر جوزها من سؤال "هل انت شايف نفسك انسان صالح؟"...وخسرت لما قالت "اه.."...


تقبل تكون ضيف على The Moment of Truth؟

[Dr.Hammood]

اهلا م. احمد

والله انا فكرت كتير

لدرجه اني عشت الموقف

وتخيلت الاسئله

حقيقي موقف مرعب

احيانا الواحد بيكون في حاجات في حياته بخفيها على نفسه

المشكله ان الامريكان بيحبوا يحطوا المال قصاد الاخلاق والمبادئ


لا ما اشتركش

[الورد الجوري]

اهلا احمد
الموضوع بجد عميق جدا و يخلينا نفكر

مبدئيا انا عشان اجاوب على اسئلتك دي
او حتى عشان اجاوب على سؤال اشترك و لا لأ
فكرت في عدة اتجاهات و في عده اشياء
و دول شويه من افكاري

اولا انا من الناس اللي مش بيحبوا يبقوا فتره
طويله مسلط عليهم الاضواء و الانظار
و لا بحب اشعر بان اجاباتي يتم التربص لها

ثانيا : من طبيعة شخصيتي اني مش بقول كل اسراري
الا ما رحم ربي و لافراد معيينين و يتعدوا على الاصابع

ثالثا : البرنامج هيكون معتمد على اسئله محرجه و دقيقه جدا
طيب ليه انا احط نفسي في موقف من ده ؟
يعني لو جالي سؤال عن خطيئه مثلا انا عملتها
و جاوبت غلط مهو هيكون كذب و الجهاز هيكشفني
و لو جاوبت بالحقيقه هكون فضحت نفسي
بقى ربنا يسترني و انا اكشف الستر ده !!

رابعا : من وجهة نظري المال وسيله لحياه كريمه
فين الحياه الكريمه اللي هتعيشها الضيفه مثلا اللي في البرنامج
لما تجاوب عن اسئله فيها فضائح !!

خامسا : مفيش حد مش بيغلط و لا في حد خالي من المساوئ
لان زمن الانبياء بعصمهم من الخطأ انتهى .. يبقى كل واحد ليه خبايا و ممكن جدا يكون تاب عنها و مش هيضيره الاعتراف بيها ولكن .. المستمع ؟؟!!
مهو لو مستمع انتهج نهج خطيئتي و مات قبل ميتوب مثلا
زي منا تبت .. يبقى انا هاخد الاثم بردو

سادسا : مفيش حد محتاج جهاز لكشف الكذب كل واحد عارف نفسه داخليا كويس جدا صحيح في ناس بتعيش دور المثاليه و عدم الخطأ و بتحيط نفسها بهالات متتاليه من الوقار و العظمه الا ان تلك الشخصيات تعلم حقيقتها فعليا و تعلم المساوئ قبل المحاسن الموجوده داخلها

سابعا : لو فكرت اني لما افضح نفسي و اقول ع الملأ
هكون بعالج نفسي ، ده هيكون خطأ
لان لو ده صح مكنش الطب النفسي اول مبدا فيه
انه اسرار المرضى لا تكون مشاعا للاخرين و لا لاهلهم و اقرباءهم .. بالعكس انا اعتقد ان كل اللي هيطلع من البرنامج ده و يكون في مراحل متقدمه .. هيكون بردو في مراحل متقدمه من المرض النفسي

ثامنا : من الجميل مصارحه النفس و الوقوف لها
وقفه الند للند في بعض الاحيان و ذلك للتهذيب و لغرس المبادئ
وتلجيم المساوئ و العيوب و لكن من الخطر جرح انفسنا
جراحات لا تلتئم

في النهايه بقى
و بعد شويه الافكار دول
و بعد باقي الافكار اللي لسه في عقلي
انا هرفض اني اشترك في البرنامج ده

انا اول مره اسمع عن البرنامج ده
ميرسي ليك يا احمد على الموضوع اللي اعتقد
انه بجد مفيد لاقصى حد فيكفينا ان كل من قرا
مر بباله اخطر سؤال لا يرغب في الاجابه عليه
و ده لوحده تحديد لنقطه خوف في شخصياتنا

لك تحيتي

[زهره مصر]

انا فعلا شوفت حلقتين من البرنامج ده
وخلاني افكر كتير
ان انا ممكن اكون مكان الناس ديه
والاجابه طبعا لا
مستحيل اني احط نفسي في موقف زي ده
كل شخص ليه حياتي اللي مش لزم تتعرف علي الملا
ليه حياتي الخاصه اللي بيحتفظ بيها حتي من نفسه
البرنامج ده هيعمله منه نسخه عربي بس مش فهمه ازاي
لان البرنامج كمبده بيتعارض مع دينه

[نيهال]

المشاركة الأصلية بواسطة أحمدكمال

ى هلا ى هلا بالزعيم
قعدت اتفرج ..مكنتش اتوقع اني لما اتفرج على البرنامج ده اني هقعد افكر كتير قوي..والدنيا مبقتش لا لذيذة ولا روشة ولا كووول...

خير اللهم اجعله خير
انا بدات اتوتر شويه
بالعكس انا ممكن اكون عملت مجهود عصبي اكتر من اللي عملته في الامتحان اصلا..
ربنا ييسر لنا الحال جميعا
............
...............

طيب يا عم ايه المشكلة بقى؟؟؟
هه
.............


هل الشخص اللي جوانا من حق حد غيرنا؟
لا
اطلاقا
لانه من اضعف ما يكون .....لا يستحق منى معاملته كماده يتداولها الناس
لانه مرهف الحس.....وائتمنى على ما يحب ويكره بنفس الوقت.فلا يستحق منى انى انشر ما يخفيه عن الناس


النقطة التانية ...............
بس هل احنا فعلا ماشيين على طريق المبادئ من غير انعواج..؟
مش فيه حد كامل
لاننا بشر
هل مغلطناش؟
يا ريت
ولولا خطانا ما كنا عرفنا الصح
هل فعلا الشخص اللي جوانا هو الشخص اللي ظاهر قدام الناس؟
الاتنين مكملين لبعض
ولا الشخص اللي ظاهر للناس ده صورة منقحة من الشخص اللي جوانا؟
بيكون قريب منه ولكن يخفى بعض الامور بداخله لا يعرفها سواه
هل فعلا لو اتحطيت تحت ضغط برنامج زي ده مش هتعرف انت انهي شخص؟
حكون عارفه
لانهم مش بيفرقوا اختلاف جوهرى
هل لو اتحطيت تحت الظرف ده هترتبك؟
ليه؟؟
هل هتعرف اصلا هي ايه الحقيقة؟
بعرف حقيقه شخصيتى لانى اتعودت اواجهها قبل ما انام



النقطة الثالثة .........
هل في لحظة حاولنا ندخل جوه الشخص اللي بداخلنا؟ ونعرفه اكتر؟
يااااااااااااااااه
كتير
مهو علشان كده بقولك بجد بيصعب عليا جدا
لانه غلبان وضعيف ولا بايده ولا باى شئ اخر
لا يملك سوى قلبى بعض الوقت فلا يستطيع مواجهه العالم بما يدور به

ولكنه بنفس الوقت مش جبان او خاف من المواجهه..لكن بيفضل السكوت على ان يقول بحريه ما يشاء
طيب هل حاولنا نفض الاشتباك الموجود في بعض النقط ما بين الشخص اللي جوانا والشخص اللي ظاهر بره؟
بعض الوقت فاحيانا يتغلب على تفكيرى و,,.......

ولكن الاحيان الاخرى يتغلب علينا القدر نحن الاثنان


هل احنا محتاجين جهاز كشف الكذب علشان نعرف نفسنا؟
تؤ
احنا محتاجين بس نواجه نفسنا دائما
على الاقل كل فتره
علشان مش ننخدع بصوره قد تكون مش احنا اصلا

النقطة الرابعة.. لنفترض اننا نعاني من مشاكل بين الشخصين..هل من مصلحتي اني افضح شخصي الداخلي اللي ممكن اكون مضايق منه مثلا..
فبالتالي ده يبقى علاج ليا؟
لا طبعا
النصيحه بالعلن فضيحه والا ايه

...........

يعني لو انا وصلت لمرحلة من الاستقرار حتى لو الاستقرار ده مبني على اجتهادات خاطئة؟
هل علشان اكون انسان مثالي؟ لازم اكون صريح مع نفسي وصريح مع الاخرين حتى لو هدم حالة الاستقرار دي؟
دى نقطه مهمه جدا........
ايه هوه معلوماتنا عن الصراحه...
الصراحه انك تكون صادق مع نفسك قبل الاخرين
كن صادق وجرئ مع نفسك وواجهه دائما باخطائها ولكن اذا كانت ممكن تجرح اللى قدامك.فالافضل انى ما اقولها وما ادخل بمناقشه حتى اعرف انها قد تجرح من معى وتؤدى لخلق هوه بيننا

ولكن مش معنى كده انى انافق....
بالعكس....بيكفينى انى واجهت نفسى بالحقيقه وبعرف اد ايه انها استوعبت الموقف كويس
ومش كلام وخلاص




اخر سؤال هل الفلوس تستحق ان الواحد يحط نفسه قدام الناس في موقف زي ده ..حتى لو كان واثق في كل تصرفاته؟
لا
مش من حق اى انسان انه يعرف اى شئ بيخص حياتى مقابل المال




تقبل تكون ضيف على The Moment of Truth؟
بين اصدقائى ممكن
احنا منين ما بنكون فاضيين .بنلعب لعبه الزجاجه
بتعرفوها
بتلف الزجاجه ونسال بعض

دمت بكل الود

[أحمدكمال]

شكرا لكل من رد..
الموضوع مش سهل فعلا..
ياريتني ما اتفرجت على البرنامج

[نرجسية]

برامج كتير أجنبية و بيشتروها العرب ليعيدوا بثها بنسخة عربية

لكن برنامج زى ده استحالة يتعمل منه نسخة عربية
لأن الانسان العربى بطبعه يكره الفضائح و يميل للستر
لأن الستر جزء من عقيدتنا

و ان كان عندنا برامج الواقع زى ستار أكاديمى و ماأعرفشى ايه
برضو بتعرض تفاصيل فى حياة للمشتركين



و انت بتحكى عن البرنامج
تذكرت الرئيس السابق بيل كلينتون
لما عملوا له جلسة محاكمة فاضحة على مسمع و مرأى العالم كله

و كانت فضيحته بجلاجل لأن ردوده كانت صريحة بدون جهاز لكشف الكذب


الغرب عندهم طبائع غيرنا
الشفافية عندهم عالية لأنهم متحررين
و بيعتبروا أى اثم أو ذنب من وجهة نظرنا احنا - حرية شخصية من وجهة نظرهم


نيجى بقى لنقطة الصراحة مع النفس

أعتقد ان الانسان ممكن يكذب على الناس
لكن لو كذب على نفسه مش حيتعلم من أخطاؤه و حيفضل طول عمره يقع فى نفس الأخطاء

أنا شخصياً أتحدث مع نفسى كتير جداً
و باعمل لها محاكمة اذا أخطئت
و باكافئها اذا أحسنت


أتعامل مع غيرى بصراحة فى بعض الاحيان تغضب الكثيرين منى
لكن يظل عندى تفاصيل شخصية لا أُطلع عليها أحد
مش بالضرورة تكون ذنوب
لكن مواقف شخصية لا يمكن أن تكون مشاعاً للآخرين

لذلك استحالة أشترك فى البرامج دى

[Dr.Hammood]

المشاركة الأصلية بواسطة أحمدكمال

شكرا لكل من رد..
الموضوع مش سهل فعلا..
ياريتني ما اتفرجت على البرنامج

ولا انا نرفزتني الحلقه اللي فاتت

[عتاب]

اول مرة اسمع عن البرنامج ده
بس زي ما اللي قبلي وضحوا بالنسبة لينا المبدأ مرفوض
فالخطأ يجب ستره وعدم البوح به مادام الله سترنا
كمان ماينفعش تبقى حياتي وادق تفاصيلها علنية
فيه مواقف تانية بيعرفوها اقرب الناس ليا بس
لكن فيه مواقف باحتفظ بيها لنفسي ومفيش اي مخلوق يعرفها
ازاي هاجاوب صح على اسئلة انا نفسيا رافضة ان حد يعرفها عني
مش لازم تكون اخطاء او ذنوب وانما حاجات تخصني ومش من حق حد يعرفها عني
بالنسبة لتطابق الشخصيتين الداخلية والخارجية
اعتقد هما متطابقتين الى حد كبير جدا وان كانت الداخلية اضعف من الخارجية
انا بارفض اني اشارك في برنامج زي ده ولو من اجل المال

تخيلوا معايا كده واحدة بيسألوها بتحبي جوزك والا لا
وكانت اجابتها اه واتضح انها كذبت او كانت اجابتها صريحة وقالت لا
في الحالتين هاتخسر حياتها مع زوجها ونفس الشيء بالنسبة للزوج
ده اسلامنا من رحمته خلى الكذب على الزوجة في الامور العاطفية مش ذنب نحاسب عليه
الحمد لله على نعمة الاسلام ونعمة العقل وعدم الجشع والسعي وراء المال بشتى الطرق

[duha]

اهلا احمد
لم اشاهد البرنامج
لكن من خلال قرائتي للموضوع
انا شايفه الموضوع من زاويه مختلفه
بغض النظر عن كون البرنامج مخالف لطبيعتنا وتقالدينا وديننا
لكن الفكرة بحد اتها مجازفه كبيرة
وبنفس الوقت فرصه كبيرة
فرصه انك تقعد مع نفسك وتفكر في نفسك
فرصه انك تتعرف على نفسك
حتى توصل الى حاله من الراحه والطمأنينه لابد ان تتعرف الى نفسك
الشخصيه العربيه شخصيه انفصاميه تتستر وراء قناع
وهذا التستر يفرضه عليه التناقض بين واقع الحال وبين موروثات نحاول الحفاظ عليها
النفس البشريه مكونه من مكونات عديدة ترسم بجميعها ملامح الشخصية
هذه المكونات هي (الانا ,الموروثات والعقائد ,المشاعرالمكبوته في اللاوعي ,الصدق ,الكذب , التسامح ,التنافس,وغيرها الكثير من مكونات الشخصيه )
لكن لما يحصل اختلال في هذه المكونات اي يطغى مكون على الاخرين ينتج عنها شخصيه متوترة مهزوزة ويمكن يصل الحال الى شخصيه غير سويه
مثلا
الانا من اهم مكونات الشخصيه
لما نزيد من الانا ينتج عنه نقصان في مكون اخر من شخصيه الفرد مثل التسامح او الايثار او غيرها
وهذا الاختلال يؤدي الى عدم اتزان الشخصيه وتظهر بمظهر المغرور
ونفس الشئ لو العكس
لو احنا فرطنا في الانا وغلبنا عليها مكونات اخرى من الشخصيه
ايضا سيظهر هذا الاختلال في الشخصيه وتظهر بمظهر الشخصيه الضعيفه
وهكذا
باختصار فكرة البرنامج هو دعوة لاستحضار جميع مكونات النفس البشريه واجراء تعارف او مقابله مع نفسك من اجل الكشف عن المكون الضعيف او المكون القوي المؤثر ومحاوله اصلاح الوضع لتصل الى حاله الاتزان

طبعا عن نفسي لا اشترك بمثل هذا البرنامج لاني لم اصل الى حالة الاتزان في الشخصيه
اكيد لازلت اعاني من غلبه عنصر على اخر في شخصيتي
لكن احاول دائما استحضار نفسي مع نفسي واسئلها الاسئله التي ليس لها جواب
عندما اجيب على الاسئله اكون وقتها مهيئه لمثل هذا الاختبار
شكرا احمد

[فراق84]

المشاركة الأصلية بواسطة duha

باختصار فكرة البرنامج هو دعوة لاستحضار جميع مكونات النفس البشريه واجراء تعارف او مقابله مع نفسك من اجل الكشف عن المكون الضعيف او المكون القوي المؤثر ومحاوله اصلاح الوضع لتصل الى حاله الاتزان

وجهة نظر معقولة
لم انظر اليها بهذا المنظور ابدا

[بنت فلسطين]

مسا الخير أحمد .. وأنا اول مرة اشوف هالموضوع مش عارفة ليه

أنا بعرف البرنامج دة من زمان , يعني من ايام مكان يعرض على الشوتايم
عموما ..
انا معك في كل الي قلته , بس مرة كنا قاعدين نشفه في بيت اخويا هيثم وسألنا سؤال
قال مين فيكم ترضى تقعد عالكرسي دة ؟
طبعا احنا كلنا قلنا لأ , حتى لو بدون فلوس مقعدش , وحتى لو احنا معندناش اسرار زي فضايحهم دي بحياتنا .
الفكرة بالبرنامج هي (الفضيحة) و الهدف الفلوس و الثمن تخريب العلاقات الأسرية غالبا
أذكر الحلقة الي قبل الماضية كانت لواحدة أتطلقت من زوجها الضابط الذي يحبها و معيشها حياة كويسة بعد الحلقة مباشرة ... طيب على ايه كل دة ؟ علشان 300 ألف دولار ؟
بس .. نبقى نحن المسلمين ولله الحمد معندناش فضياح زيهم , و القليل منا الي عنده مصائب بالشكل دة .. لذلك , هم البرنامج عندهم اخذ شهرة كبيرة وواسعة.

اللهم لك الحمد على ديننا الإسلامي , الي هو دين ستر مش دين فضيحة
اللهم ثبتنا ليه .

[سعابيل نحله]

لو سمحتواااا ممكن تقولولي متى يجي البرنااااامج في اي الأوقاااات واهم شي الإعـــاده متى اوقـــات الإعــــاده ... الله يخليكووووووا