انا نفسي ادخل طب بس.......

[لايت أف نايت]

ازكم يا بنات مصر.انا مصريه بس مغتربه وكان نفسي ادخل طب بس الظاهر انه بقه مستحيل لأن الدراسه عندنا بقت صعبه وكمان سمعت ان الطب بقى من 103% ياترى الكلام ده صح ولا لأ
وانتوا رأيكم ايه؟ ممكن أعمل ايه؟ انا يدوبك بجيب 98% .في حل ولا لأ.والكليات الخاصة وضعها ايه نسبها برده عليه زي الحكومية؟ . متبخلوش عليا بمشورتكم انا برده اختكم مستنيه الرد وياريت لو أي حد في كلية الطب او في المرحلة الثانويه يتواصل معايه انا في انتظار أي معلومه او نصيحه.
مع السلامه

[مسوقه بس فراشه]

والله لو لقيتي حل ابقي ابعتيلي عشان عندي اختي نفس مشكلتك ياقمر

[justme]

السلام عليكم

اولا يا جماعه موضوع 103 % ده مش صح

انا في اولى طب دلوقتي وكان واخد ايامنا من 98.3

وبالنسبة بقى لموضوع طب اساسا.....بجد والله انا مندمتش على اي خطوة خدتها في حياتي اكتر من اني دخلت طب...اولا 8 سنين ونص مش سبعه دراسة

وبعدين الدراسة صعبة .....وولاد الاساتذة بيحطموا نفسيات الواحد اساسا

وفي الاخر هتخرج واخد 200 جنيه في الشهر....ووالدي مش دكتور يعني معندناش عيادة اشتغل فيها

وبالنسبة للبنات بالذات بيتبهدلوا في طب عالفاضي.....وفي الاخر مش هتاخد فرصة تثبت نفسها

وتحقق ذاتها زي ما هي عايزة

عايزين نصيحتي تدخلوا طب اسنان....فرصة شغل احسن و5 سنين ودراسة سهلة جدا جدا بالنسبة لطب

او صيدلة..بس صيدلة الصراحة رخمة شوية في دراستها وامنتحاناتها....

واي ولد بقى لسه عنده فرصة ياخد قرار دلوقتي...يدخل رياضة 2 ويروح هندسة بترول ويبقى احسن من 100 دكتور

يا رب يكون كلامي افادكم

[لايت أف نايت]

شكرا لردك ونصيحك المحبطه بس انا برده بفكرا في طب اسنان بس برده شكرا

[لاجئة]

صحيح انا مش مصرية ومعرفش في التفاصيل دي..
لكن عندنا في تضييقات شديدة على المنتسبين لكلية الطب... متل مقابلات شخصية وامتحانات نفسية و و.. ده غير الدرجات المطلوبة...
انا شخصيا لو كنت بحب الطب مكنتش هدخل كلية الطب ابدا لعدة اسباب:
1. المفهوم عندنا ان الطب للشطار والعباقرة.. وهو مش كده خالص.. ده ممكن يكون في مرحلة معينة زي التاريخ.. وفي مواضيع تانية اصعب منه.. وبقت الاحترامات اليوم حسب المناصب..يعني بعد ما اكون دكتورة الناس هتسلم على الدكتورة مش عليا انا شخصيا!! انا درست في الثانوية وجبت مجموع كبير جدا وعملت امتحان قبول للجامعات وكمان حصلت على نتيجة عالية جدا.. بس كل ده للاكتفاء الذاتي..
2. اعتقد ان تحديد المهنة لا يتوقف على مدى حبنا للموضوع.. لازم ناخد حاجات تانية في عين الاعتبار... متل مدى توفر الشغل ومكانه وتعبه والمقابل اللي رح اخده مقابل هالمجهود... معاش الطبيب هنا بيوصل احيانا 18 الف جنيه بس بعد 11 سنة دراسة وتخصص وتعب ع الفاضي والمليان في المستشفيات... بصراحةد بهدلة.. خاصة للانثى اللي رح تكون مسؤولة عن بيت واولاد في المستقبل ومش رح تكون فاضية 24 ساعة بس لشغلها!!!

لهيك اعتقد ان ما تخلي كل شي يندثر لمجرد انك مش قادرة تحصلي الـ 103% وصدقيني رح تكون هاي دفعة لالك خاصة وان معاكِ 98% ودي درجة مش بسيطة وحلوة جدا!!

عذرا على التدخل..
بس ده ابداء رأي مش اكتر...
تحيتي

[عبدالله نجيب]

اولا انا بارجح الطب للفتيات جداجداجدا
لاننا في حاجة ماسة للطبيبات بدلا من ان تذهب المراة الى طبيب فيطلع على ما يريد
وبعدين اللي يشوفك وانتي بتقولي بجيب 98% بس وكانها درجة قليلة
بصراحة انا شايف انك متشائمة بدون داعي
والحل انك تذاكري بجد اكثر سنة بسيطة انتي محتاجة بس 3. (ثلاث درجات من عشرة )
ونتمنى لك التوفيق

[لايت أف نايت]

لاجئه شكرا جدا جدا لردك ولاهتمامك بالموضوع وده شيئ يسرني
وشكرا لك يا عبدالله بس أنا مش متشائمه ولا حاجه انا مبسوطه بنسبتي بس الي مزعلني انها مش هتحققلي الي انا عيزاه

[no one]

لا انا بقى برجح رأى justme
كلامه صح ومقنع بلاش لحسن انا صحباتى البنات دخلو طب ومتبهدلين خالص وكلامه مش محبط ولا حاجه بس انتى فكرى كويس وربنا يقدم اللى فيه الخير طبعا
(تقدرون فتضحك الاقدار)
ربنا يوفقك

[pousi]

انا ف راىى فكري ف اى كلية تانية احسن ودى نصيحة مجرب اسوأ تجربة ف حياتى انا
صحيح مندمتش انى دخلتها لكن انا تعبت فيها جدا وكانت الكلية كل حياتى لغاية ما خلصت لقيت ان مفيش اى حاجه تانية ف الدنيا تسعدنى زى زمان ايام ما كانت كل سعادتى هى نجاحى دلوقتى لما خلصت اصطدمت بالواقع وهو انى مبعرفش اتعامل غير مع الكتب و حسيت انى بقيت كبيرة اوى وبعدين لو متعينتيش ف الجامعة مش هتلاقي شغل برة وده هيزود التعب عليكى وموضوع ان لازم يكون فى دكاتره بنات هو فعلا مهم بس مفيش نقص خالص فى الدكاترة البنات ولو هختارلك حاجة هيبقى اسنان انا شايفة انها كويسة جدا مفيهاش عيوب طب وربنا يوفقك

[asmaa mohamed]

........انا اسماء تالتة طب اسكندرية..
شوفى انا شايفة ان اللى عايز يدخل طب ده سواء كان ولد او بنت لازم يبقى فيه الشروط الاتية...بغض النظر عن المجموع والكلام الفاضى ده:
اولا: القدرة على تحمل الضغط العصبى لاقصى درجة......لان حيلاقى نفسه مضطر يذاكر 600 صفحة ف يومين!!!
ثانيا: لازم يكون غاوى طب....يعنى المادةالعلمية بتثير شغفه.....ودى الحاجة الوحيدة اللى هاتحفيزوا انه يكمل.....
ثالثا: وده للاسف...لازم يبقى عنده القدرة المادية عشان يقدر ياخد كورسات....ودى مش رفاهية ولا عشان ياخد الامتحان.. لا ده عشان يطلع دكتور فاهم..ويلاقى حد يسهل عليه صعوبة البلاوى اللى بياخودها...ؤ يعرف يجيب تقدير.....
الموضوع صعب بس مش مستحيل......وانتى اللى تقدرى تحددى......
بس لازم تفكرى بمنطق ومتغركيش المظاهر ؤالمجموع العالى........لان ده صدقينى مش حيبقى له اى قيمة لو حسيتى انك فى موقف انتى مش قده....وساعيتها هتفضلى امتياز فى تجارة عن مقبول فى طب........
فى قدامك اختيار تانى لو رجع بيا الزمن اكيد هاختاره....اسنان...
فيها كل مميزات طب وعيوب اقل بكتيييييييييييييييير: مدة الدراسة اقل واسهل وبرده هاتيبقى طبيبة وليكى مستقبل.........
انا مش قصدى احبطك .....لازم تبصى على الصورة كاملة والقرار فى ايديك اوحدك.......
وربنا يوفقك......

[صاحبة احلى ضحكة]

لو الكلام ده صح دنه كده احلام أحقق حلامي ودخل طب ده دلوقتي وكده اما لما يكون على أيامي حيكون إزاي استر يارب وفي الاخر ادعي ربنا يحقق امنيتنا وندخل الكلية الي احنا عيزينها

مع خالص حبي واحترامي: صاحبة احلى ضحكة(ميمي )

[وائل المصري]

سيدتي

كل كليات القمه اصبحت سواء الان

لا فرق بين طب او هندسه ولا حقوق ولا حتي اداب

اما فعن مجموع سيادتكي من الممكن ان يدخلكي طب

مع تحياتي

بالتوفيق والنجاح

وائل المصري