الامارات العربية المتحدة

[noureymo]

السلام عليكم
يا جماعة انا جالي عقد عمل النهاردة في بنك من بنوك الامارات في المركز الرئيسي في ابو ظبي
انا مضيت العقد واستلت صورة والمفروض اكون هناك في خلال شهر
بس بصراحة رجعت البنك الي انا بشتغل فيه وما قدرتش اكتب الاستقالة
بصراحة عاوز حد يكون عنده خبرة يفهمني المعيشة هناك شكلها ايه (انا وزوجتي وابنتي 4.5 سنة )
يعني بصراحة مش عارف اسافر ولا لأ
انا هنا الحمدلله كويس لكن المرتب المعروض حوالي 7 اضعاف مرتبي هنا بس برده العيشة هناك غالية جدا
ارجوكم انا محتارجدا حد يدلني
شكرا جزيلا

[فراق84]

صللي استخارة
وربنا يهديك لطريق الخير
ربنا يرزقك الخير دايما

[الامورة]

زى ما قالت فراق صلى استخارة
انا عايزة اقولك حاجة لانى عشت كتير في الامارات ودة اول سنة لى فى مصر
هى الحياة هناك حلوة اوى وبالنسبة لابوظبى فاغلب الى بيشتغلو فيها بيعيشو في الامارة البسيطة زى راس الخيمة وكل يوم يروحو ابو ظبى بالسيارة بس اصعب حاجة هناك ان ميكونش معك حد لان مش هتلاقى حد يقف معاك فى زنئتك
بس حاول انك تعمل صداقات مع مصريين لانهم هناك بيكونو قلبهم على بعض اوى
وربنا معاك
اتمنى انى اكون افتك

[carfor]

السلام عليكم
بص يا عم
اول حاجة انا قعدت 8 سنين في ابو ظبي
تانى حاجة
هى امارة جميلة جدا احسن ناس في الامارات اطيب مواطنين بيحبو المصريين
دا بالنسبة للمواطنين بانسبة للوافدين زى اى مجتمع فيه الكويس و فيه الوحش
بالنسبة للمصاريف
هى اغلى بلد في الامارات من ناحية السكن
لو شغلك بالسكن اتكل على الله و متفكرش
لو مش بالسكن فكر 1000 مرة سكنها و مصاريفها غالية جدا+ان انتى عندك مدارس السنة الجاية
و ربنا يوفقك و اهى تجربة
بس موضوع الاستقالة لا انصحك به لان لان جميع الوافدين بيبقو خايفين لان فى ثانية بتبقي برة بصرف النظر عن العقد او العلاقات الشخصية

[لاجئة]

انا ممكن اصورلك الوضع العام هناك... زي ما صوره لي شخص عزيز.. واعتقد انه ممكن يساهم في حاجة!



" السكن لايمكن تتوقعه أقل من سبعون ألفا كحد أدنى جدا جدا والمتوسط مائة ألف درهم سنويا .. إهتم بإختيار السكن وإحترس من سماسرة العقار ولا تتعجل فى الدفع ودقق فى وجود إمكانية التليفون والنت وهل الكهرباء شاملة الايجار والصيانة بالكامل .. خاصة بالفلل .. حاول تتجنب التجمعات الهندية حتى لاتشعر بأنك فى دلهى .. ورائحة توابلهم ستجدها طاغية على البلد كلها .. العربية أسهل حاجة ستحصل عليها سواء حديثة أو مستعملة .. الفرش المنزلى لامفر من الجديد تشترى وتفرش فى 4 أيام كل شئ الغلاء أمر بديهى لكن الدخل هناك مفروض إنه عالى وياريت بلاش المقارنة بين دخلك فى مصر ودخلك بالإمارات لأن هذا حتى فنيا خطأ كبير وسعادتك بانكير وأدرى .. مشكلة المشاكل الرخصة .. مهما كان معاك رخصتك لابد من الدخول لمدرسة التعليم .. حد أدنى شهران مدة إستخراجها بشكل مثالى جدا .. لكن فيه ست شهور .. وفلوسها غالية حوالى ثلاثة آلاف .. لاتنسى استخراج رخصة دولية من نادى السيارات المصرى بالقرب من جروبى لو بالقاهرة .. قد تحتاجها .. البنوته حسب نظام تعليمها قطعا حتشوف لها مدرسة وتوقع أرقام فلكية للمدرسة .. وفيه بنوك بتعطى إمتيازات تغطى هذه الأعباء .. البلد طقسها مؤلم فى الصيف ولكن لاشتاء بالشكل المتعارف عليه .. أبو ظبى بلد يقتلها الهدوء وتستفزك النظافة خاصة ولو كنت من سكان القاهرة .. نادرا جدا ما تجد عرب بما فيهم أهل البلد .. اللإمارات فرع أو ضاحية هندية .. ممكن تجد لزوجتك عمل بيسر ..الملل هناك قاتل .. آداب التعامل بين الناس واضحة ومميزة .. فلا عصبية ولا تعصب .. الحياة هناك بشكل عام أكثر من ممتازة .. قد يزعجك بعض الصدمات الإباحية .. فلا تلتفت و تعبأ .. هناك إنهيار عام بالمنطقة وحرب على قيم وأخلاق المسلمين .. فدع الخلق للخالق .. المتوسط الذى أعتبره مفيد فى الأجور بأبو ظبى سبعة آلاف دولار شهريا يقل ويزيد ألف .. التأمين الصحى ممتاز لك وللأسرة .. تذاكر الطيران يوفرها البنك أفضل لأسعارها العالية .. تحجز مبكرا جدا لندرة الأماكن على الرحلات لقلتها ولا أفضل من طيران الإتحاد .. توكل على الله وفى الأسفار سبع فوائد ولو وصلت وتحتاج أى شئ عد هنا لإبن مصر بس وشاور .. كلنا بأمرك ".


سلام.

[noureymo]

شكرا جزيلا على الردود يا جماعة وربنا يكرمكم