بجد محتاجه المساعده حاسه ان الموضوع صعب

[emmyyy82]

انا من القاهره و كليتى كانت فى بلد فى الصعيد و كنت بروح هناك علشان ازاكر و امتحن و انا فى سنه تالته شوفته كان صاحب مشروع و حاولت اعرف عنه حاجات كتير و عرفت انه متخرج من الجامعه و اهله ناس كويسين اوى بس هو بيعتمد على نفسه و بيشتغل و بيكون نفسه بعيد عن اهله و شوفت منه انه متدين جدا و محترم جدا مع انه فى مكان و شغله بيخليه يتعامل مع بنات مغتربين كتير جدا و طبعا كلهم كانوا بيحاولوا يخلوه يعجب بيهم و مع ذلك عمره ما بص لواحده منهم طبعا الاول ماكانش فى بالى خالص لانه شكله اكيد كويس بس مش اللى ممكن يخلينى اعجب بيه و بعدين لفت نظرى انه سألنى لما روحت مره بعد ما كنت مسافره و قالى انتى كنتى فين كل الفتره دى و قولتله انى مش من هنا و انى بدرس مع ان البلد دى فيها اهل بابا و انا قاعده هناك مع اهلى يعنى اعتبر مش مغتربه اوى يعنى و بعد كده عدت سنه تالته و جت سنه رابعه و لما روحت اعجابي بيه كبر و لاحظته اكتر و معاملته الجافه مع البنات خلتنى اعجب بيه اكتر و دينه و محافظته على الصلاه فى الجامع و انا كنت بحس انه بياخد باله منى و متأكده من نظراته اللى فوق الطبيعى ليا كل ما اعدى عليه من بعيد او حتى اروحله بس هو ولا مره حاول يكلمنى و انا متأكده انى مش بيتهيألى انه بيبصلى لانها حصلت اكتر من مره و انا فى رابعه لقيت تليفون جالى من واحد و قالى انه معجب بيا و بعد كده عرفت انه صاحبه و انه اخد النمره منه و طبعا مارضتش اكلمه لان ده الطبيعى لاى معاكسه فى التليفون و طلعته من دماغى خالص و قولت مستحيل يكون بيحبنى و يدى نمرتى لحد بس اخر مره و اخر تيرم ليا فى بلده حسيت نظراته زادت اوى من بعيد و لما كنت بروحله اتعامل معاه كان بيتعمد يتجنبنى زى و مش عارفه ليه مع انه لما كنت بعدى قدامه كان بيطلع مخصوص علشان يشوفنى كويس كل ده كان بيخلينى هتجن من التفكير و ليه بيعمل كده و خصوصا انه عارف انى مش هروح البلد دى تانى لانى خلصت تعليم و فى اخر يوم قبل ما اسافر جالى تليفون و كان معاكسه و كنت متاكده انه هو بس بردو ماقالش انه هو و لا حاول يكلمنى تانى و انا دلوقتى رجعت بلدى و هتجن و مش قادره انساه ياريت حد يساعندى ووالله انا مش صغيره بالعكس انا كبيره و ده مش مراهقه و بجد مش عارفه اعمل ايه

[فارس اصيل]

طبيعى جدا عندما يتعلق الانسان باى امر يكون شغوف فى الوصول الى ما يفكر به
هو اذا كان ملتزم مثلما قلتى فهو اكيد بيغض بصره واساسى هو مش حايعاكسك فى التليفون
موضوعك علاجه الوحيد هو الانتظار وهدوؤ الاعصاب والتوجه الى الله فى مشورته بالصلاه( الاستخاره) مهمه جدا فى هذه الحاله فان كان فيها الخير قربه الله اليك
ولكى تحياتى وانتظرى ابن الحلال اللى يدخل البيت افضل

[lion of egypt]

انصحك انسى الموضوع لانه لو كانت عنده النيه كان قالك استنينى او اعطاكى اشارة انه بيحبك لكن كده لو استنيتى ممكن تستنى كتير ومش هينطق ولا هيسعى وراءكِ سيدتى الفاضلة ان جاءك من ترضينه فلا تتأخرى عن الزواج فى انتظار ما لا يجىء............lion of egypt

[carfor]

و انا كنت بحس انه بياخد باله منى و متأكده من نظراته اللى فوق الطبيعى ليا كل ما اعدى عليه
'طيب هو بيبصلك و انتى حاسة انة عايزك طيب ليه معملش خطوة ايجابية
اعتقد ان انتى تنسي الموضوع و تحاولى تشغلىنفسك بشئ مفيد ليكى
و صدقينى لو لقيتى شئ مفيد اكيد هاتنسيه
ليه
اقولك
ببساطة لان ما فيش حاجة اساسا تفتكريها!!!!!!!!!
دى حاجة طبيعية لان انتى لم تريه كيف يتعامل او ينظر للاخرين

[emmyyy82]

انا عارفه طبعا كل الكلام ده و بقوله لنفسي بس ياريت تعزرونى على فكره انا مش مراهقه خالص بالعكس انا عندى 24 سنه بس انا من كتر منا عارفه ان البنى ادمين المتدينين و المحترمين قلوا فى الدنيا غصب عنى اول ما لقيت بنى ادم كده لقيت نفسي بفكر فيه زى ما اكون ما صدقت لقيته انا عارفه ان خلاص الموضوع انتهى من يوم ما رجعت بلدى و عارفه انه اصلا احتمال كبير مايكونش فى موضوع بدأ من الاول بس انا كان نفسي يكون فى موضوع و يكون فعلا حبنى عموما انا اسفه جدا انى وجعت دماغكوا و ميرسي اوى على اهتمامكم و ردكم عليا

[نرجسية]

لو كان ليكى نصيب من الزواج به
حتما سيبحث عنك و يتقدم لخطبتك

اللى عايز حد بيدور عليه

لكن كما قال الأخوة ما تربطيش نفسك بيه
يعنى اذا اتقدم لك انسان كويس ما ترفضيش عشان علاقة ليس لها ملامح

ربنا يصلح لك الحال و لكل البنات

[سارقة القلوب]

يا اختي في الله اذا كان بيحبك بجد كان حاول جاهدا الوصول اليك وكمان اللي بيحب واصلا ما في حاجة اسمها حب بيسوي المستحيل علشان محبوبة والله واعلم به بس نصيحة لا تثقي في احد ابدا وحاولي ان تكوني اقرب الى الله اكثر واجعلي حب الله ورسوله صلى الله عليه وسلم فوق حب اي احد دونهما واكثري من قول ((يا رؤوف يا رحيم ))وقولي لا اله الا الله العظيم الحليم لا اله الا الله رب العرش العظيم لا اله الا الله رب السماوات ورب العرش الكريم ...وتذكري دائما القبر وعذابه والصلاة على النبي المصطفى صلى الله عليه وسلم ...هداك الله الى ما يحب ويرضا

[أدهم]

مفيش مانع مطلقا إنك تبادرى وتتكلمى او توسطى أحد يفاتحه أو تطلبى تليفونه وتكلميه وترسمى له خريطة الدخول من باب بيتكم .. ماتفتكريش إن ده بيقلل من كرامتك أبدا .. فيه شباب كتير بيحتاجوا الخطوة دى من البنت .. اللى قلته دلوقتى مافهوش ذرة خطأ بل .. ولا يعيبك شئ فيه .. والموضوع مش رايح يكون غير كلمتين وبس .. صدقينى لو حصل نصيب هتكونى فى منتهى السعادة .. ولو غير كده هيتبخر لأنك هتكونى قطعتى الشك باليقين .. لو كنت فاضى كنت رحتله وهى قاعدة أخلص لك الموضوع كله .. بتكلم بجد .. الواحد بيحزن للحالات الهادية دى تضيع من اصحابها .. وماحصلش شئ مشين أبدا وأنا بحيى شجاعتك الأدبية جدا وإنك تتعودى تاخدى أراء من حولك والقرار لك بما تشعرى أنه يصب فى مصلحتك .. وأدعو الله أن يحفظك من كل سو .

[سوسه المفروسه]

اسمعي ياختي في الله
نصحتي الوحيده ليكي انك تنسي الموضوع وتشغلي نفسك بذكر الله وان تلجئ الي الله وحده
لانه هو الي هينفعك دنيا واخره ماتعلقيش نفسك بيه عشان ماتنصدميش بعد كده وتلومي نفسك
صدقيني لو هو بيحبك هيجي ويتقدملك
واوعى تعملي حاجه تانبي ضميرك عليها بعد كله
واكثري من ذكر الله وان شاء الله تتحل مشكلتك

[اي حد]

بصي يا ايمي حطي في دماغك ان اي واحد لما بيلاقي حد معجب بيه بيفرح وبيتنفخ وانتي بتقولي ان في بنات كتيره معجبه بيه وهو بينفض لهم مش يمكن ان البنات دول كمان بيتهيا لهن انه هو كمان معجب بيهم وبيعاكسهم زي ما انتي بيتهيا لك وبعدين لو هو متدين زي ما بتقولي ليه خد رقم تليفونك ولو هو عارف ربنا بجد مستحيل يخش من الشباك ويعاكسك بالتليفون اكيد هاييجي يطلبك من باباكي احفظي مشاعرك للي يستحقها وما توزعيهاش على اي حد مش قصدي انا علشان اسمي اي حد قصدي اي شخص بلش ححج فارغة وتقولي انا ماادتكيش حاجة مع السلامة ياجميل

[abnmoussa]

اختنا ايمى..حكايتك بتتكرر كل يوم والظاهر ان بعض شبابنا عرفوا وفطنوا لتكتيك جديد وهو انه يدخل للبنات من باب الإلتزام ومن غير ماتقولى انت محجبة وملتزمة وشخصية زيك فى عنفوان شبابها تحتاج ان تحب وتتحب وطبعا تقاليد مجتمعنا لاتجعلكى تنطلقى لأنك انت زى ماقلتى من بلد يعنى مش بندرية ورغم انى بندرى إلا اننى ارى ان اكثرية بنات البلاد لم يطولهن التلوث كما فى البندر..وهذا لايعنى اننى اوجهه اى اهانات لبنات البندر ولكنها طبيعة المكان فالغالبية ربنا يستر عليهن وعلى اسرهن والله يخرب بيتك المسلسلات العربية التى تبسط تلك الأمور والتى لاتمثل الحقيقة ..إيمى اننى عندما اكلمك فأننى اكلمك لا كأخ ولكن كأب صحيح ان ابنتى صغيرة لم تبلغ بعد سن الزواج ولكن كلكن بناتى ..المهم بما انى استاذ سابق فى بعض دور العلم لمثل سنك فقد قابلت كثيرا مثل حالاتك بل واسوء ولذا اقولها لكى انك صحيح لازم تعيشى سنك وده مش عيب ولكن العيب انك تضحكى على نفسك وتتوهمى اشياء مش موجودة..يعنى الأخ اياه انتى قلتى انه ملتزم وهذا يعنى انه ملتزم امامك وفى غيبتك اقصد ان يكون تدينه قلبا وليس قالبا اى مظهر يخفى ورائه شيطان لايراعى الله ويبدأ بتليفون او يقولك على النت ورينى حته من الدبوس زى الأخت إياها وينتهى الأمر بشقة وورقة عرفى وصفيحة زبالة ..وبصراحة اللى انتى قولتيه عنه لايبشر بأى خير ..الحب الحقيقى ليس له إلا وجة واحدة هو باب عائلتك ليطلب يدك اما التكتيك الذى استخدمه فأقول لكى انه تكتيك واحد محترف.. زير نساء عقر يعرف متى ينظر ومتى يعبر بعينه ومتى يتجاهل ليزيدك لهفة وتسلمى ..فأذا سلمتى فلا تلومى إلا نفسك والحمد لله انكى لم تسلمى وسوف تتألمى شويه زى كل العاشقين علشان تتعلمى المرة القادمة وبعدين مع الأيام ستنسى وتعيدى الكرة مرة اخرى حتى يأذن الله بالرجل الذى يستحقك فلا تتعجلى فأنا اعرف ان عندكم فى البلاد بيقول لك ان سنك كبر وان اللى زيك معاه 4 عيال وانك اصبحتى بايرة والكلام الفارغ ده واراكى متأثرة بذلك .. الكلام ده كلام قديم قوى فسن الزواج ارتفع نتيجة عوامل كثيرة فأنتى لازلت صغيرة رغم انك وكله من عمرك سنتين كعادة الفتيات ..فبلاش كلام انا عقلى كبير وعارفه انا بأعمل إيه فالعشاق فى اى سن لاعقل لهم فهم كالفراش الذى يحوم حول النار ثم يرمى نفسه بداخلها ..فأكثر حاجة تخيفنى ان تظل الفتاة تقول انها عاقلة ومش مراهقة فهى تماما مثل من يموت فى جلده ورغم ذلك يظل يردد فى الضلمة انا مش خايف انا مش خايف وفى الحقيقة تلاقيه عاملها على روحه.
مرحلة سنك مرحلة خطيرة جدا فى حياة كل البنات والشباب ولهذا اعذرك واحترمك لأنكى طلبتى المشورة بس الأهم ان تعملى بها ..ففى النهاية انتى من ستجنين ثمرة افعالك طيلة حياتك..لك تحياتى.
ابن موسى