قول لإبنك عيب..مصر هتخلى من العيب

[hend]

السلام عليكم


كل واحد فى مصر الأيام دي تلاقيه ماشى عمال يسب ويلعن في الأيام واللي عاملاه الأيام والغلا والكوا زى ما بيقولوا


منين ما تروح تلاقى الناس تقول الأسعار ولعت والناس بقت وحشة والدنيا مابقيتش دنيا.شوفت الزحمة؟ شوفت الزبالة في الأرض؟شوفت عسكري المرور سابب الإشارة؟شوفت الموظف الفلانى لازم تديله حاجة فى ايده عشان يمشي لك ورقك ومصلحتك؟وشوفت ؟وشوفت؟؟؟؟؟؟؟؟


الناس برة مابتعملش كده.والدنيا سهلة ومفيش رشاوى.. مفيش زحمة.. ومفيش ..ومفيش....


عايزين نتكلم في حاجتين


أولا اللي حصل في مصر ده بين يوم وليلة؟؟


ثانيا اللي بيحصل برة بردة حصل بين يوم وليلة؟



كل واحد اليومين دول ماشى عمال بيتمنى يغمض عين ويفتح عين يلاقى الدنيا بقت وردى.نفسه يقوم الصبح من النوم يلاقى كل مشاكلنا إتحلت وبقينا من دول العالم الأول..طب ازاى؟؟هي اللي إحنا فيه ده الوقتي ومشاكلنا الكبيرة ماهى إلا تراكمات لمشاكل صغيرة كتيييرة بدأت من زمااان.وكبرت وتمادينا فيها ومبصيناش ليها لما وصلنا للمشكلة اللي كبرت لما خنقت علينا الدنيا..ورجعين عاوزين نغمض ونفتح نلاقينا متحضرين..مينفعش .ومش هينفع




لأننا لا نملك العصا السحرية


ولكننا نملك الأقوى من العصا السحرية...إرادة شعب وأيدى عاملة وكمااان أيدي مش عاملة أى حاجه..
لازم نبوص على المشاكل اللي حوالينا ونبدأ نعالجها..لازم يكون لكل واحد مننا دور ولو صغيرفى حل مشكلتنا الكبيرة لان مفيش حد هيحلها لينا..واديكوا شوفتوا حتى (الزبالة) لما جابوا شركة اجنبية ولا اهتمت غير بنفسها ومكسبها والدنيا بقت فوضى وبهدلة.. وبردة رجعنا تانى نحلها لنفسنا بنفسنا.

كل واحد لازم يفكر ويجتهد فى التفكير..يقدر يعمل ايه عشان ننهض بالبلد دى.. فعلا الحكومة مش هتعمل كل حاجه دا إذا كان عندها نيه تعمل حاجه اصلا.. يبقى بيدى لا بيدى عمرو..يعنى بايدينا احنا نعمرها ونبنيها من جديد زى ما بردوا بايدينا وايد غيرنا بوظناها..مش معقول بقى بقالنا يجى 10 سنين عمالين نشتكى وهنفضل كدا كمان 100 سنة بردة زى ماحنا لو قعدنا نشتكى وبس



متفكروا شويه...وايه بعد الشكوى؟؟ بفيش حاجه بتحصل..لو يعنى اهتم المسئولين شويه هيدينا شوية مسكنات لكن حلول جزرية لأ..


عارفين ليه؟؟ عشان مش شايفين فينا حد مهتم ولا حاسس بان البلد دى بلده.. وممتلكاتها بتاعته..كله ماشى اللى يلحق حاجه يخطفها ويجرى..للاسف بعض الاشخاص غير المسئولين وعديمى الاهلية ومش عندهم وعى سرقوا الصناديق البلاستيك بتاعة القمامة..طب ليه وازاى..ومتقولش فقر..ده تخلف..ودى مشكلة يبقى حط من ضمن اهتماماتك لحل مشكلتنا الكبيرة انك توعى اللى حواليك وتخلق جواهم نيه بانهم يحلوا مش يخربوها اكتر..


صدقونى..المشكلة مش فى الازمة اللى احنا فيها نفسها لكن المشكلة الاكبر ان مفيش حد بيحاول يحلها..نبدأ نحلها هنلاقيها اتحلت


فى احد المقالات بدون الدخول فى تفاصيل كان احد الصحفيين(مجدى الجلاد) فى اسبانيا احد الدول اللى بنصدرلها الغاز المصرى بسعر التراب.. المهم.. وقف الصحفى جنب عمود نور وطلع قلم وحب يكتب عبارة'هذا العمود يضاء بغاز الجلاد' اسم الصحفى(الجلاد)


تتصوروا كتب على العمود؟؟ قبل ما يكتب حرف واحد فوجئ بايد واحد اسبانى تقبض على ايده بشدة ويقولة'ممنوع الكتابه على الاعمدة' قالة الصحفى 'وانت مالك' رد عليه المواطن الاسبانى بعنف وحدة 'الاعمدة ملك الشعب الاسبانى وليس الحكومة...ونحن هنا نحافظ على املاكنا باى ثمن'
عشان كده اوروبا بقت اوروبا وبقت من دول العالم الاول...مفيش بلد بتتقدم بحكومتها..ولكن البلد بتتقدم بشعبها ومدى تقدمهم ووعيهم.... المانيا بقت من دول الفيتو بعد اقل من 40 سنة بعد دمار الحرب العالمية الثانيه عشان شعبها عايز كده ..وشعوب الدول المتقدمة دى همه اللى بحافظوا على ثرواتهم..واحنا هنا بنعمل احتفالات الثورة اللى بقالها56 سنة....طب من 56 سنة ايه اللى انجزناه؟؟؟؟؟


هتسألونى....طب نعمل ايه عشان نتقدم.؟؟؟ اعمل اللى تشوفه..عندنا مشكلة كبيرة فى مرضى الفشل الكلوى..ده جاى من ان المياة غير نقيه تماما..وده راجع لان المصدر اتلوث بايدنا..واحد واقف مع خطيبته او حبيبته وجايبلها كوز درة..ليه بعد ما ياكلوا هوباااااا يحدفوا الكوزين فى النيل؟؟ليه بعد ما ياكلوا الترمس ولا اللب يرموا القشر فى الارض؟واحد يكنس الشارع ويقولك عشان نساعد البلد فى القمامة وبعدين يلمها ويولع فيها...؟؟؟؟؟؟؟؟ ؟؟؟؟واحد نازل سلالم المترو جرى عشان يلحق قبل الباب ما يقفل يقوم راكب تانى الطيبه مالية قلبة مااااااسك الباب عشان اخينا يلحق يركب..مهو هيبوظ الباب؟؟؟واخينا مش هيفوتة اجتماع مجلس الادارة لو ركب المترو اللى بعدة بعد 3 دقايق...؟؟؟كلت شيكولاته او لبان او شيبسى..هيحصل ايه لو حطيت الكيس فى جيبك او شنطتك لما تروح ترميها فى الزبالة؟؟ وكمان خليك ايجابى ووعى اللى حواليك قولهم الكلام ده..مش هتنهض البلد دى الا بايدنا..ومتتكسف ش من اللى هيستهزأ بيك.. متفتكرش ان واحد واخد على اللامبالاه هيقف وينحنى ليك ويديلك التحية..ابدا..ب العكس هيقولك'يعنى هو الكيس بتاعى اللى هيصلح البلد..يعنى هو كوز الدرة ده اللى هيلوث النيل'


حاجه اخيرة


لازم يكون الوعى نابع من جواك ولازم يكون لاقرب الناس اليك ابنك واخوك وابن اخوك وابن الجيران..لان دول اللى لازم نزرع فيهم الانتماء والقيم الصحيحة اللى خلاص مبقاش حد يهتم انه يعلمها لأولادة..الطفل من يوم ما يدخل(K G) الروضة وهم اهله ازاى يذاكر ويحفظ عشان يجيب مجموع يدخل الطب او الهندسة..لكن مفكروش لما يبقى دكتور او مهندس هل هيتهنى بعيشتة فى البلد دى


عود ابنك الصح وقوله عيب ميعملش الغلط..بعد 15 سنة مش هنلاقى حد بيرمى ورقه فى الارض وهنلاقى الدنيا ماشيه صح


قول لإبنك عيب..مصر هتخلى من العيب


بوص للامام وبلاش نفضل نبوص تحت رجلينا..مصر هتبقى افضل بس نحسبها صح ونشوف ازاى هنحل مشكلتنا اللى مظهرتش بين يوم وليله واللى بردة مش هتتحل بين يوم وليله


ابدأ .. خد خطوة..صلح..على أد ما تقدر..صدقني نظرتك للمشكلة تتغير ونتلاقى ان فى حل..وانه مش صعب..لان المشكلة الاكبر ان مشاكلنا مش لاقيه حد يحلها ولا احنا ذات نفسنا


حلوها....هتبنوها




اعمل ده كله وقول انا بعمل كده عشان خاطر مصر


لو بتحبوا البلد دى خلى عيونكم عليها



دي رساله جتلي علي الميل وعجبتني جدااا وحبيت انكم تشركوني ارائكم فيها

[hassan omran]

الى الأخت المحترمه / هند

أولا أشكرك على نشر الرساله وأرجوكى

ترديهاله وتقليله قول للحكومه عيب اللى بيحصل ده
قول للريس عيب اللى بيحصل ده
مصر ماشية فى الغلط من أعلى وليس من أسفل
وسوء الأخلاق من سوء الحكومه والأعلام الهابط
وسوء الحالة الأقتصادية نتيجه التخبط
والرشاوى والسرقه والتسيب والمحسوبيه هى اللى خلت كل أب
ما يقولش لآبنه عيب
نحن نعيب على الشعب فى القضايا الشاذه
وبنصبر أنفسنا فى أمل فى بكره
لكن الواضح إن ما يجعل مصر تتقدم الى الوراء هو أبواق الحكومه اللى
عايزه تحمل الشعب الفقر
لا يا أخت هند كل الفشل وما يحدث فى مصر الآن من جراء ريس فاقد
الأهليه فاكرها عزبه ورثها وحكومه جهله بأمر الأقتصاد

بالمناسبه / أثبات جهل رئيسنا اللى دايما بيحمل مشاكله للشعب
هل تصدقوا أن الهند والصين أكبر دولتين من حيث عدد السكان هم
أكبر دولتين فى النمو الأقتصادى والصناعى
خسارة إن الناس لا تتطلع على ما حولها
تقبلى تحياتى وأحترامى
وتذكرى / إذا كان رب البيت بالدف ضاربا فشيمت أهل البيت الرقصى
لنا الله ولمصر الصبر على ما أبتلاها
حسن عمران متابع لآحوال الناس لوجه الله

لى طلب صغير عندك يوجد أخطاء أملائيه فى الأميل يا ريت
تصححيها لآنها واضحه قوى
وهذا مثل بوص مش بالواو بص / ب ص على طول

[yousef_alsharef]

وعليكم السلام ورحمة الله

اختى الغالية هند

موضوعك غاية فى الروعة

ولكن سيدتى الدولة او المؤسسة او الشركة

النجاح متوقف فيها على الادارة الواعية الصالحة

فدائما إذا اردنا اصلاحا لابد ان يأتى من الاعلى .

ولا نلوم المرؤوس الذى يطبق علية وحده القانون

شكرا لك اختى نشر الرسالة بدافعك السامى نحو الوطن

لك تحياتى


you

[وائل المصري]

هند

كنت قد كتبت موضوع بعنوان

(ماذا يقصد وائل المصري)

وكانت الحلقه الاولي

عن زوج وزوجه وشيطان

وكان موضوع يتحدث عن ما يحث بالجمهوريه من مخالفات ومن المسؤال عنها لكن بطريقه مستتره

وهنااتيتي انتي بالخلاصه

نعم لو قام كل فرد بتغيير ذاته لتحولت الدنيا الي جنه

او لاصبحنا كنانه الله في ارضه كما اطلق علبنا

الله عز وجل

سيدتي

كم من المشاكل التي انتشرت داخل مجتماعاتنا اليوم من

انتشار العادات والتقاليد الغير نافعه الضاره

من سؤ استخدام انظمه الدوله التعلميه الفنيه الاعلاميه

وايضا

لسؤ حالات التعليم والتربيه او التربيه والتعليم

سيدتي

تقبلي تحياتي

واعتزاري علي الاطاله

وائل المصري