بالذمة مش مكسوفين من نفسكم يامصريين؟؟؟

[abnmoussa]

اخى باتيستا ..مساء الفل ياسيدى ..عقبال لما تحضر ردك على تعليقى السابق خد اول مقالة نشرت لى فى المجلة يوم 25/12/2007 فى بداية الحملة القومية لإنتاج سيارة مصرية 100% والتى كنت اقودها من خلال المجلة آياها.

المقالة:
" كل شعب بيصنع حلمه على قد سنه وعينه على سلم المجد لأجل يسطر لبلاده تاريخ حضارة بين الخلايق .. ولكل شعب حلم شكل ..فيه ناس حلمها تكفى نفسها أكل.. وفيه ناس حلمها تطول السما وتقعد فوق القمر و الشمس .. وفيه ناس لاكده ولاكده اهم عايشين وبس..يضرب له حجرين وعليهم برشمتين بكوبيتين ويحبس المسائل بقرعتين ويمز بكام رقصتين من موزتين آخر لهط..بعدها يتسطل ويتهطل ويروح نااااااااااااااايم ومشخر زى الجحش .
المصرى زمان نحت الصخور والجبال نحت ، وفى قلبها عملوا للملوك قبرها وخبوا معاهم سرهم تحت .. صنعوا مجدهم وسابوا لخلفهم حضارة تفكرهم باللى عملوه جدودهم لأجل يرفعوا روسهم دايما بين الخلايق فى كل عصر وعلشان يكملوا مشوارهم فى العلا والمجد.. ولو كانوا يعرفوا ان خلفهم حيركنوا ويجرجوا ويبلطوا فى الخط ..ويحبسوا نفسيهم فى حارة سد فيها ساكن الفقر والجهل ..وآل إيه بيفرجوا للخلايق حضارة اهاليهم وهم مدين ايدهم للرايح واللى جى من غير خشى ولا دم حى.. وفرحانين قوى بالفهلوه والشطارة ونظام تشترى ياخواجة كلب وناسيين انهم هم اللى باعولهم زمان نفس الكلب ابن الكلب .. وإيه.. متواكلين على ذكراهم فى اغانيهم وهز بطن نسوانهم وبس .. لو يعرفوا كده.. لو يعرفوا كل ده لكانوا حرقوها ونسفوها نسف .. لأجل ما يخلوهم يحترموا نفسيهم ويبدأوا من تانى وعينيهم على صنع إيدهم مش على صنع ايد حد.. المصرى زمان كان سيد الأرض ولحد دلوقتى بتتحنى الخواجات لحضارته ..بس ياخسارة عينيهم بتسأل إيه العبارة ياخلق.. ويشاوروا عليهم ويقولوا معقول ياناس الخلق ده خلفهم ؟؟ ده خلفة عار وندم وشؤم.
وانا ياناس من بقية الخلق وواحد من خلفة اصحاب الحضارة والمجد .. ونفسى اعمل حاجة بجد .. نفسى نعمل حاجة بجد..تعالوا نحلم بحلم على قدنا لينا ولولادنا من بعدنا .. يعنى مثلا نكفى نفسنا أكل ونزرع أرضنا ونعمرها بالخير وبلاش يأس وهم .. وفى الصناعة نعيد ايام الريادة والمجد ونطور نفسنا وناخد بعلم الغرب اللى نقلوه منا زمان بالتهليب والسلب.. بلاد كتيرة بعدنا قامت من نومها قبلنا وتصوروا .. بيصدرولنا دلوقتى أكلنا وحاجات كتير ملهاش حد.. مش حاجة بذمتكم تكسف وتوكس.. كده ولا لأ.. اللى عملوه الأفنديه لافيه سحر ولادجل ولاملاغية ..ولا فيهم كلب ابن كلب عايش على المهلبية..اللى عملوه الأفنديه نتيجة العرق والأمل والسهر والدم.. حلمهم حققوه بأيدهم وحفروا الصخور وطلعوا بنفسهم سلمهم للمجد مش سلم أى حد.. ليه كل واحد فينا مايحلمشى حلم ع القد.. ويمسك جرس فى إيديه وينادى به على الخلق.. لأجل مايساعدوه فى تحقيق حلمه وحلمهم ونرجع به مع بعضهم إيام الريادة والمجد.. ماأحنا عملناها قبل كده فى السد.. ولا خلاص نسيناااااااااااااا وراااااااااااااااحت علينا ..صدينا ومابقاش لينا حل ؟؟؟؟؟ .. وعشان كده انا اخترت حلمى.. واخترت له أسمه ورسمه.. وبعد الحلم اخترت الجرس اللى حأنادى به ع الخلق وجرسى هو قلمى وعمودى فى مجلة شقية مصرية.. طموحة وبنت أصل.. لقطوا شبابها طموحى ودعونى أكتب على صدرها حلمى وأدق على جرسى وإيديه فى إيدهم وسوا حنروح نصحى الخلق .. العملية مش عملية نصنع عربية ياخفيف وفيه ناس مش لاقيه الرغيف والعربيات ملية الشوراع والحوارى والرصيف.. العملية اننا نفتح باب أمل جديد وأبواب رزق ملهاش حد وبكده حنجيب الرغيف وع الرغيف مليون رغيف مش حاف ياسيدنا بظلط ورمل ولكن بشهد وعسل لذيذ.. عايزين نعمل كده لأجل نشغل الشباب العاطلين اللى مالين الشوارع و القهاوى و الرصيف ..يضربوا براشيم بأسماء مالهاش عدد ويطيروا على سحاب البانجو والحشيش.
عايزين نورى الناس صنع بلادنا فى صناعة جد مافيهاش هجص.. فيها التخطيط لازم يكون على اصوله مش بس فى الصناعة ولكن فى جذور جذور جذوره .. تخطيط بفن من تعليم لسياسية لإعلام لأقتصاد لفن .. حتى السلوك ،حتى القوانين ويتلغى من قاموسنا أنا أبن مين ياخفيف.. دقة ونظام زى عقارب الساعة مافيش الاثنين تيجى قبل الواحد.. كلنا حنبقى فى طابور واحد عشان نعمر،عشان نكبر،عشان نعيد لبلدنا الريادة والمجد ونبعد بقى عن الريالة والزبالة ياعم.. ونشوفكم الأسبوع الجاى.
ابن موسى

[™BATISTA]

ابن موسى
مساء الخير

صباح الخير صديقى العزيز..ارجو ان اكون قد وضحت لك المسألة وقلبك اتوجع زى قلبى تماما بهموم الوطن

والله هموم الوطن دى خلاص اتعودنا عليها اذا كان المسئولين على البلد مكبرين دماغهم والكل بيرتشى والعملية ماشية زى الفل احنا هنوجع قلبنا على اية كفاية الهموم الشخصية

وبصراحة انا اول مرة اسمع الكلام دة الى انت قلتة بخصوص عالم السيارات واعلاناتها يمكن لان متابعتى لقسم السيارات بيكون عن جريدة الاهرام يوم الجمعة فى الملحق فقط لاغير


وبخصوص موضوع قسم الجاسوسية زى ماقلتك يابن موسى ان شاء الله التوبك بمشاركتنا فية والمتابعة عليه الموضوع هيفضل فى الصدارة سواء تم التثبيت أو غير ذلك وبمناسبة القسم الفرعى يمكن لغياب المشرف الفنى عن المنتدى قد يطول الأمر

فى انتظار مشاركتك فى القسم وايضا فى المنتدى بشكل عام

تحياتى لك
وعذرا على التأخير فى الرد لوجود بعض المشاكل فى النت .

سهرة سعيدة ان شاء الله

[mostafa10]

يأستاذ سوريا انتجت خلاص سيارتها وطرحتها فى السوق بنسبة مكون وطنى حوالى 40% وستزيد بعد 5 سنين الى نسبة 100% حسب كلام بشار الأسد..فهل سوريا سحبت البساط الصناعى التكنولوجى من مصر زى ماسحبته فى الفن!!!!!!!!!!!!.
ليبيا ستطرح فى السوق سيارتها الوطنية واسمها الصاروخ فى 2010 وهى فعلا زى الصاروخ وزى افلام جيمس بوند ودى نتاج وعصارة فكر القذافى..فهل ليبيا بقت اشطر من مصر..وهل القذافى اشطر من مبارك؟؟؟؟؟؟؟؟؟؟؟؟؟؟؟
السودان ستطرح سيارتها الوطنية "مهيرة" قريبا ..فهل السودان اقدم من مصر صناعيا؟
الجزائر ستعلن قريبا عن تصنيع سيارتها الوطنية بالتعاون مع فرنسا او اوروبا او شرق آسيا ومن ورائها المغرب وورائهم السعودية ودبى.
ياخبر اسود ومنيل وهو احنا وصلنا لهذا الحد من التدنى والإنحدار بعد ماكانت مصر هى بلد الريادة اصبحت مصر بلد الريالة وطبعا الفرق كبير جدا بين الريادة والريالة..بالطبع مبروك لأخوتنا العرب واولادهم الشطار للتقدم على ام الحضارات وصاحبة الإنجازات الغنائية والرقصية والحاضنه لساقطات لبنان تحت مسمى الفن وحرية الإبداع الجسدى الموظوظ..وسلم لى على نانسى عجرم

انا رايح اسلم عليها اهو وجاي على ما افوق من الصدمة
بجد ,,,
يعني الدول دي صنعت بجد ؟!
انا مكنتش متوقع بس الظاهر اني عندي نقص حاااااد في المعلومات
هكملها وارجع ان شاء الله

[اسطورة]

اخى ابنموسى


بالطبع لا بد ان نتتج سيارة وطنية وانا اذكر انه عندى بداية دخولى المنتدى كان هناك الاخ محمود وهو مهندس ايضا وقد وافق بحماس على الفكرة ولكنه اختفى بعدها من المنتدى
وبالنسبه لتصنيع السيارة
اعتقد انه لدينا المقومات الازمة بل يمكننا اننستفيد باحدث الابحاث الموجودة فى التقنية واختراع سيارة مثلا اقل استهلاك للوقود من زيادة فى كفاءة المحركات وهذة التجارب ممكن ان تجري على نماذج ويشارك مثلا دفعةمن المهندسين فى ايجاد افكار كمشروع تخرج

[abnmoussa]

المشاركة الأصلية بواسطة mostafa10

انا رايح اسلم عليها اهو وجاي على ما افوق من الصدمة بجد ,,, يعني الدول دي صنعت بجد ؟! انا مكنتش متوقع بس الظاهر اني عندي نقص حاااااد في المعلومات..هكملها وارجع ان شاء الله

اخونا مصطفى..ثق فيما اكتب ومن المعلومات التى انشرها وهى حقيقية وللأسف توضح لكى مدى عدم الضمير لكتاب السيارات فى مصر لتعمدهم إخفاء تلك الحقائق عن الشعب المصرى لكى يفسحوا المجال لطبقة رجال الأعمال الفاسدة لتربح ملايين الجنيهات نتيجة استيراد سيارات جديدة او تجميع موديلات عالمية وطظ فى الريادة المصرية التى تمرغ اسمها فى التراب..المسألة مش مسألة تصنيع سيارة ولكن اذا استطعت ان تصنع سيارتك فيمكن ان تصنع طيارتك وسلاحك..مصر يامصطفى صنعت فى الستينات طائرة حربية مصرية اسمها حلوان 300 لم ينتج منها إلا 3 نسخ فقط وبعد ذلك توقف الإنتاج بسبب عدم وجود تمويل..اشكرك.

[abnmoussa]

المشاركة الأصلية بواسطة BATISTA

ابن موسى مساء الخير
والله هموم الوطن دى خلاص اتعودنا عليها اذا كان المسئولين على البلد مكبرين دماغهم والكل بيرتشى والعملية ماشية زى الفل احنا هنوجع قلبنا على اية كفاية الهموم الشخصية
وبصراحة انا اول مرة اسمع الكلام دة الى انت قلتة بخصوص عالم السيارات واعلاناتها يمكن لان متابعتى لقسم السيارات بيكون عن جريدة الاهرام يوم الجمعة فى الملحق فقط لاغير

وبخصوص موضوع قسم الجاسوسية زى ماقلتك يابن موسى ان شاء الله التوبك بمشاركتنا فية والمتابعة عليه الموضوع هيفضل فى الصدارة سواء تم التثبيت أو غير ذلك وبمناسبة القسم الفرعى يمكن لغياب المشرف الفنى عن المنتدى قد يطول الأمر
فى انتظار مشاركتك فى القسم وايضا فى المنتدى بشكل عام
تحياتى لك
وعذرا على التأخير فى الرد لوجود بعض المشاكل فى النت ..سهرة سعيدة ان شاء الله

اخى باتيستا..انت قولتها ..العملية بيزنس خالص واللى يفتح فمه يجروا يسكتوه بشوية حلويات ومشهيات ولو تربس دماغه مافيش إلا الجزمة..الإعلانات سلاح خطير ياباتيستا ممكن يخلى الكاتب يقول اى حاجة فهو فى النهاية عايز يقبض مرتبه ليعيش كويس..وبعدين اقسام السيارات مش بس فى الأهرام دى كمان فى الأخبار والجمهورية وهناك مجلات متخصصة مثل التى كنت اكتب فيها.
فى النهاية انت لم تقل لى اكمل ولا اسك على باقى المقالات..فى انتظارك وشكرا.

[abnmoussa]

المشاركة الأصلية بواسطة اسطورة

اخى ابن موسى .. بالطبع لا بد ان نتتج سيارة وطنية وانا اذكر انه عندى بداية دخولى المنتدى كان هناك الاخ محمود وهو مهندس ايضا وقد وافق بحماس على الفكرة ولكنه اختفى بعدها من المنتدى وبالنسبه لتصنيع السيارة اعتقد انه لدينا المقومات الازمة بل يمكننا اننستفيد باحدث الابحاث الموجودة فى التقنية واختراع سيارة مثلا اقل استهلاك للوقود من زيادة فى كفاءة المحركات وهذة التجارب ممكن ان تجري على نماذج ويشارك مثلا دفعةمن المهندسين فى ايجاد افكار كمشروع تخرج

اختنا اسطورة انا بأتكلم عن شئ ابسط من كده عملته قبلنا سوريا وليبيا والسودان والبقية تأتى..انا بأقول نأخد حق تصنيع موديل معين من شركة عالمية ونصنعه فى مصر بمكون وطنى تدريجى حتى تصل الى 90% او 100% مكون وطنى..ماليزيا عملت كده فى سيارتها الرائعة البروتون وغيرها وغيرها..اما الأختراع فيجب الأول تعرفى تحبى ثم تتعلمى المشى ثم تتعلمى الجرى..مش كده ولإيه..الأختراعات فى مجال السيارات صعبة جيدا وتحتاج لأمكانيات خرافية.

[mostafa10]

المشاركة الأصلية بواسطة abnmoussa

اخونا مصطفى..ثق فيما اكتب ومن المعلومات التى انشرها وهى حقيقية وللأسف توضح لكى مدى عدم الضمير لكتاب السيارات فى مصر لتعمدهم إخفاء تلك الحقائق عن الشعب المصرى لكى يفسحوا المجال لطبقة رجال الأعمال الفاسدة لتربح ملايين الجنيهات نتيجة استيراد سيارات جديدة او تجميع موديلات عالمية وطظ فى الريادة المصرية التى تمرغ اسمها فى التراب..المسألة مش مسألة تصنيع سيارة ولكن اذا استطعت ان تصنع سيارتك فيمكن ان تصنع طيارتك وسلاحك..مصر يامصطفى صنعت فى الستينات طائرة حربية مصرية اسمها حلوان 300 لم ينتج منها إلا 3 نسخ فقط وبعد ذلك توقف الإنتاج بسبب عدم وجود تمويل..اشكرك.

صادق يا ابن موسى

الحقيقة انا مصدوم
بس مش مستغرب لأن دا حالنا من سنين


ربنا يحميك يا مصر من ايدي العابثين

[abnmoussa]

المشاركة الأصلية بواسطة mostafa10

صادق يا ابن موسى ..الحقيقة انا مصدوم ..بس مش مستغرب لأن دا حالنا من سنين
ربنا يحميك يا مصر من ايدي العابثين

اخى مصطفى وماذا بعد الصدمة؟؟؟؟؟؟؟؟؟؟ انا على الأقل احاول ان انبه الناس اللى نايمه بتشخر ولا تعرف الحقيقة..هدفى مش بس اصدم الناس ولكن لكى اجعلهم يحاولون معى لنحث من بيدهم الأمر ونفضح تلك المؤامرات للتكتيم والتعتيم وانا متأكد ان فى النهاية سيضطروا ان يتبنوا موقف يعيد الكرامة الجريحة لمصر ..ارجو ان اجد تفاعلك فى مقالاتى التى اعيد نشرها فى المنتدى والتى نشرتها اكبر مجلة سيارات فى مصر..فالى تفاعلك بارك الله فيك.

[mostafa10]

المشاركة الأصلية بواسطة abnmoussa

اخى مصطفى وماذا بعد الصدمة؟؟؟؟؟؟؟؟؟؟ انا على الأقل احاول ان انبه الناس اللى نايمه بتشخر ولا تعرف الحقيقة..هدفى مش بس اصدم الناس ولكن لكى اجعلهم يحاولون معى لنحث من بيدهم الأمر ونفضح تلك المؤامرات للتكتيم والتعتيم وانا متأكد ان فى النهاية سيضطروا ان يتبنوا موقف يعيد الكرامة الجريحة لمصر ..ارجو ان اجد تفاعلك فى مقالاتى التى اعيد نشرها فى المنتدى والتى نشرتها اكبر مجلة سيارات فى مصر..فالى تفاعلك بارك الله فيك.

وبارك فيك

بجد انا بحييك على شغلك الجميل

ربنا يعينك وأنا ان شاء الله متابع مقالاتك

ربنا يكتر من أمثالك لمصر

[abnmoussa]

المشاركة الأصلية بواسطة mostafa10

وبارك فيك
بجد انا بحييك على شغلك الجميل ..ربنا يعينك وأنا ان شاء الله متابع مقالاتك ..ربنا يكتر من أمثالك لمصر

قال الله تعالى "إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ" صدق الله العظيم..فيجب اخى الفاضل ان نحاول ان نغير مابأنفسنا اولا ونعود الى الله حتى يعيننا الله على الرفعة بين الأمم وحث رسولنا الكريم صلى الله عليه وسلم ان نحاول ولو بكلمة ولاتستهتر بقيمة الكلمة فقد تكون امضى من اى سلاح.
اخى الفاضل سوف انشر اليوم عصرا بأذن الله ثانى مقالاتى التى نشرتها كبرى مجلات السيارات فى مصر وستعجبك لأننى وضعت بها كيفية تحقيق الأمم لأمجادها عمليا وليس بالشعارات الجوفاء والأغنيات المخدرة والتباكى على الأطلال..تابعنى اخى الفاضل وبارك الله فيك.
ابن موسى

[mostafa10]

بانتظارك ان شاء الله

[abnmoussa]

المشاركة الأصلية بواسطة mostafa10

بانتظارك ان شاء الله

اخى مصطفى اليك المقالة الثانية اهديك إياها فلك حبى.

أحلام تحققت – الجزء الأول 6/12/2007

لوبطلنا نحلم نموت .. لو بطلت الشعوب المتقدمه ان تحلم لما وصلت لما وصلت إليه الآن .. حلمى فى تلك المجلة المتخصصة والتى خصصت إدارتها لى عمودا فيها ان أدق ناقوس الخطر بقوة لكى تبدأ على الفور خطوات تصنيع سيارة مصرية عصرية كمدخل لتطويرانفسنا فى كل مجالات حياتنا وحتى لايفوتنا القطار وتتفرم ريادتنا تحت عجلاته وهى تلهث ورائه.. ولكى نطور أنفسنا لابد أن ننظر حولنا جيدا ونسعى لنغير كل شئ لصالح تحقيق حلمنا .. لابد ان يكون للجميع خطا واضحا.. لامجال للتهريج ولامكان للهواة المنتفعين فى عالمنا الآن .. القفزات الحضارية للشعوب تبدأ بحلم وحالم ومن ورائهما إرادة شعب وحكام لتحقيق هذا الحلم من اجل المجد والرفعة والريادة الحقيقية ..لذا إننى اطلب من المجلة ان تغير اسمها من الآن وصاعدا ويصبح عنوانها دليلا للتحدى اليومى واستفزازا لطاقات العاملين بها ولكل قرائها ولكل المصريين لنحقق احلامنا ومجدنا فى كل المجالات.. فليصبح اسمها "مجلة عربيتى .. التحدى لإنتاج سيارة مصرية 100%" .. التحدى لكل من له صلة بالسيارات او له صلة بالكرامة المصرية .. من غير ذلك فلنكسر كل أقلامنا ونسكت عن الكلام المباح ونستمر فى احلام اليقظة والريادة المزعومة ونكتفى بالرقص والغناء على المرحومة ريادة.. ليس مطلوبا منا ان نقفز السلالم لكى نحقق أحلمنا دفعة واحدة وإلا تحولت أحلمنا الى أسوء كوابيس فى حياتنا ودفعتنا الى الإنتحار يأسا.. الأشقاء السوريون الأسبوع الماضى كشروا عن انيابهم وكشفوا عن باكورة إنتاجهم لسيارتهم الوطنية "شام 1600" و"شام 1800" .. لاأدرى ماذا ننتظر بعد ذلك .. اننى أرى ان كل مايكتب حتى الآن مجرد كتابات على إستحياء لسد الخانات وتخليص الضمائر وأرى انه لن تنجح معنا إلا سياسة الصدمات لكى نفوق من نومنا بسرعة ونبدأ التخطيط والتمهيد الفعلى..إن أردنا ان يكون لنا مكان فى عصر الديناصورات ولاندهس ونسحق تحت أقدامهم.. ونعود لأحلام الغرب والحالمين ..لعلنا نتعلم الدرس والعبر.. فالمبدعون فى القرن التاسع عشر حلموا .. والعلماء فى القرن العشرين استلهموا تلك الأحلام وحولوها الى حقيقة .. لذا سوف نتعرف على واحد من الحالمين الملهمين العظام وكيف تحققت احلامه بعد قرنا من الزمان .
فى 1828 ولد فى فرنسا فتى ذهبى حالم اسمه جول فيرن ..احس فى سن مبكرة بشوق كبيرللرحيل والرحالات بعيدا عن الوطن وقيل انه ذات مرة ذهب لبلاد الهند للأكتشاف والمغامرة وأعاده أبوه المحام الصارم من هناك وحدد إقامته .. لم يستطع الشاب الحالم مقاومة الإعصار الرهيب الذى بداخله للمغامرات والترحال كما أنه لم يستطع ان يفلت من قبضة أبيه الحديدية.. كان الحل للهروب من واقعه الكئيب اليائس ان يذهب ويحلق كما يريد بعيدا بعيدا عن أرض الوطن .. يصعد الجبال الشاهقة فى بلاد الله الواسعة وينزل لأعمق أعماق الأرض والبحارويطير لأبعد سما وبعد السما كمان ولكن كل ذلك فى خياله الشخصى وبدون ان يركب دخان سيجارة محشية حشيش ويعمل احلى دماغ.. بدأ يسطر هذا الحالم الصغير كل أحلامه على اوراقه ويخرج للعالم مغامراته الشيقة وكان لايدرى أنه يقود الإنسانية بكتاباته الى عالم جديد تماما و يلهم العلماء من بعده ليحققوا ماكان يحلم به .. فى سنه 1864 صدرت روايته الممتعة "رحلة إلى مركز الأرض" المقررة على الصف الثالث الإعداى وهى بالطبع غير الرحلة الذى قام بها أجدادنا وآباؤنا بدون إرادتهم إلى أعماق الأرض حيث دفنوا .. او الرحلة الصاروخية الى أسفل السافلين التى قام بها قارون واتباعه بتذكرة ذهاب بلا عودة عندما غضب الله عليهم فى عهد سيدنا موسى عليه السلام ..وفى سنه 1865 شطح شطحته الكبرى وصدرت رواية "من الأرض للقمر" تخيل فيها ان الأنسان استطاع ان يصعد فوق القمر ونظرا لإمكانيات عصره البسيطة تخيل أن اعضاء فى نادى المدفع الأمريكى بعد الحرب التى كانت هناك اصابهم الملل من الركنه فقرروا ان يتفسحوا فى القمر واستعملوا مدفع كبيرجباركان لديهم فى قذف كبسولة معدنية على شكل دانة المدفع بداخلها ثلاثة اشخاص..وفعلا وضع الرواد فى كبسولة مجهزة بالأكسجين والطعام والذى منه والبسهم ملابس كانت جديدة على عصره تماما وانطلق المدفع الجبار ودفع بالرواد فى اول رحلة فضائية الى القمر وبعد ان انهوا مهمتهم أرجعهم الى الأرض وأنزل مركبتهم فى المحيط..
ونتابع الأسبوع القادم رحلات جول فيرن فى استكشاف المستقبل وكيف تحقق حلمه وحلم أمته.
ابن موسى

[™BATISTA]

المشاركة الأصلية بواسطة abnmoussa

اخى باتيستا..انت قولتها ..العملية بيزنس خالص واللى يفتح فمه يجروا يسكتوه بشوية حلويات ومشهيات ولو تربس دماغه مافيش إلا الجزمة..الإعلانات سلاح خطير ياباتيستا ممكن يخلى الكاتب يقول اى حاجة فهو فى النهاية عايز يقبض مرتبه ليعيش كويس..وبعدين اقسام السيارات مش بس فى الأهرام دى كمان فى الأخبار والجمهورية وهناك مجلات متخصصة مثل التى كنت اكتب فيها.
فى النهاية انت لم تقل لى اكمل ولا اسك على باقى المقالات..فى انتظارك وشكرا.

ابن موسى مساء الخير

لا أكيد تكمل باقى مقالاتك فى انتظارها وسيتم التعقيب عليها ....... عند الانتهاء من اصلاح الجهاز بسبب وجود بعض المشاكل فى الجهاز

[™BATISTA]

ابن موسى


السلام عليكم تابعت المقالة الخاصة بحضرتك بعد ردى عليكى

وعجبنى الجزء دة

وعشان كده انا اخترت حلمى.. واخترت له أسمه ورسمه.. وبعد الحلم اخترت الجرس اللى حأنادى به ع الخلق وجرسى هو قلمى وعمودى فى مجلة شقية مصرية.. طموحة وبنت أصل.. لقطوا شبابها طموحى ودعونى أكتب على صدرها حلمى وأدق على جرسى وإيديه فى إيدهم وسوا حنروح نصحى الخلق .. العملية مش عملية نصنع عربية ياخفيف وفيه ناس مش لاقيه الرغيف والعربيات ملية الشوراع والحوارى والرصيف.. العملية اننا نفتح باب أمل جديد وأبواب رزق ملهاش حد وبكده حنجيب الرغيف وع الرغيف مليون رغيف مش حاف ياسيدنا بظلط ورمل ولكن بشهد وعسل لذيذ.. عايزين نعمل كده لأجل نشغل الشباب العاطلين اللى مالين الشوارع و القهاوى و الرصيف ..يضربوا براشيم بأسماء مالهاش عدد ويطيروا على سحاب البانجو والحشيش.

كلام معقول ان العملية مش عملية صنع سيارة والسلام لان فى غرض تانى وهو فتح أبواب رزق وتعليم صنعة جديدة لشباب عاطل فى البلد ....... بس حضرتك تفتكر ان الى واكلين البلد والنهيبة دول ممكن يفكرو بنفس طريقتك دى اعتقد الاجابة لا لان كل تفكيرهم فى المنفعة الشخصية فقط



تحياتى لك ولموضوعك أو مقالك وفى انتظار سردك القادم