بالذمة مش مكسوفين من نفسكم يامصريين؟؟؟

[abnmoussa]

احلام تحققت - الجزء الثانى

ذكرنا الأسبوع الماضى ان القفزات الحضارية للشعوب تبدأ دائما بحلم وحالم ثم إرادة أمة لتحقيق ذلك الحلم كما تكلمنا عن احلام جول فيرن فى استشفاف المستقبل فى الفضاء وكيف ألهم علماء القرن العشرين بخياله العلمى الجامح فى تحقيق ذلك ومات قبل أن يتحقق ولو جزء صغير منه ، ولكنه رغم موته استطاع ان يخلد اسمه للأبد فى سجل التاريخ ليس فقط كؤلف موهوب ولكن كملهم سبق عصره وقاد امته على طريق مجدها وعزتها بين الأمم الآخرى.. رأينا كيف ألف رواية من الأرض للقمر سنه 1865 وكيف شرح وابدع بطرق غير تقليدية لحل المعضلات التى واجهت ابطاله فى رحلتهم من الأرض للقمر وكيف اعتبرت امته روايته ساعاتها شطحة كبرى فى عالم الخيال واللامعقول مما دعاه فى 1869 ان يؤلف روايه اخرى وكأنه يقول للعالم بلاش من السما وخلينا فى البحر وراح نزل بيهم فى رحلة عمقها 20 الف فرسخ تحت الماء ( حوالى 6000 متر) فى مغامرة جميلة جدا لحلم الأنسان فى الحياة داخل مستعمرات تحت اعماق المحيطات كحل بديل للحياة على اليابسة.. برضه الناس ماسبتهوش فى حاله والعيال فى الحارة كانوا بيجروا وراه ويقولوا المجنون آهو المجنون اهو .. الراجل رجع وقال فى باله بلاش ياواد السما والفضاء وبلاش أعماق الأرض ولا اعماق البحار خلينا فى المضمون أحسن وألف رائعته "حول العالم فى 80 يوم" المقررة على اولى إعدادى.. عمنا الجميل أنيس منصور ألف رواية مشابهه وسماها "حول العالم فى 200 يوم" كأروع ماقدم للمكتبة العربية فى أدب الرحلات .. واحد حيتفلسف ويشاغب زيى ويقول لى.. يعنى معقول فى 1869 البطل يلف حول العالم فى 80 يوم وفى الستينات عمنا أنيس منصور يلفها فى 200 يوم ؟؟؟ .. الموضوع بسيط خالص ياأخ .. البطل فى قصة جول فيرن كان فى رهان زمن مع أصدقائه فى النادى وكان خايف يخسر تحويشة عمره ويقف على باب النادى يشحت ويقول عشانا عليك يارابونا ولكن عمنا انيس منصور كان ماورهوش حاجة غير المشاهدة والكتابة ثم ان جريدته هى اللى كانت بتدفع وهو يعنى خسران حاجة !!!!! المهم أن كل من قرأوا رواية عمنا أنيس تمنوا لو قراؤها مئات المرات لمتعتها وروعة اسلوبه الفريد الشيق والذى يشركك معه ويشعرك بكل خطوة فى رحلته وكأنك تعيش معه كل نفس يتنفسه..منتهى الإقتدار.
نعود لجول فيرن وهل تحققت احلامه؟؟؟ .. فى القرن العشرين أستطاع الأنسان بالطائرة الكونكورد الإنجلوفرنسية –الأسرع من الصوت - ان يلف العالم فى ساعات وليس فى ايام وان ينزل الى اعماق سحيقة فى المحيطات بالغواصات وبدأ يدرس وينفذ فكرة بناء مستعمرات مستقبلية تحت سطح المحيطات وفوق القمر او حتى فى الفضاء السحيق .. أما الشطحة الكبرى للصعود على القمر فبعد قرن كامل من الزمان وبعد مشاغبات كثيرة بين امريكا وروسيا فى الفضاء وضعت أمريكا فى يوليو1969رواد فضائها فى كابسولة ايضا مجهزة بالأكسجين والطعام والذى منه وقذفتها الى القمر بصاروخ من طراز ابوللو، بعدها هبط آرمسترونج ورفاقه على القمر ورفع علم بلاده بفخر لأول مرة فى تاريخ الإنسانية بينما عيون العالم كله معلقة نحو السماء وامام شاشات التليفزيون، وسمعه العالم وهو يملى التاريخ بثقة وفخر قائلا سطر ايها التاريخ لبلادى الريادة وسجل كلمات أول انسان يمتطى ظهر القمر " فهى خطوة صغيرة بالنسبة للأنسان ولكنها كبيرة للإنسانية" وطلع لسانه لروسيا ولكن لظروف الخوذة الثقيلة اللى كان لابسها لم يراه احد غيرى!!!
الغريبة فى الموضوع ان الأمريكان إعترفوا وهم فى ذهول بأن ماسطره جول فيرن من تفاصيل الرحلة كانت غاية فى الدقة وقد الهم ماسطره منذ قرن من الزمان علماء الفضاء فى القرن العشرين بحلول رائعة مؤثرة للمعضلات التى وقفت امامهم فى بدايات البرنامج الفضائى .. ماأحدثه هذا الحالم جعل البعض يشك أن يكون جول فيرن هذا قد عثر على آلة الزمن فى الحارة اللى جنبه فركبها من وراء عالمه وقفز بها قرنا كاملا الى المستقبل فرأى كل ماتحقق فى القرن العشرين ثم عاد الى زمنه هربا من اهوال القرن العشرين وضوضائه المميته .. عاد الى قرن الرومانسية والهدوء والجمال بعد ان سطر مارآه بكل دقة لكى نعتقد طوال قرن من الزمان إنه عبقرى زمانه وملهم الشعوب الحديثة وفى الآخر طلع لاعبقرى ولاحاجة وكان واد نطاط آلات زمن من ع الشمال .. ونشوفكم المرة الجاية وموضوع ريادة الأمم وحكاية المصريين مع النشيد الوطنى الموسمى "المصريين أهم " ولحد الأسبوع الجاى حد يحاول يجاوب على سؤال محيرنى كلما أسمع هذا النشيد .. وسؤالى البرئ هو "هم المصريين بقوا أهم فى إيه؟؟؟؟".

ابن موسى

[™BATISTA]

أهلا ابن موسى

متابع الموضوع التانى

بخصوص قصة جول فيرن دى رحلة حول العالم انا سمعتها سينما من مدة أكتر من 4 ايام

بخصوص انيس منصور لا بصراحة

.. ماأحدثه هذا الحالم جعل البعض يشك أن يكون جول فيرن هذا قد عثر على آلة الزمن فى الحارة اللى جنبه فركبها من وراء عالمه وقفز بها قرنا كاملا الى المستقبل فرأى كل ماتحقق فى القرن العشرين ثم عاد الى زمنه هربا من اهوال القرن العشرين وضوضائه المميته .. عاد الى قرن الرومانسية والهدوء والجمال بعد ان سطر مارآه بكل دقة لكى نعتقد طوال قرن من الزمان إنه عبقرى زمانه

ياعم الناس دى عندها ضمير فى شغلها وفى عملها حتى فى العبادة بتاعتها

لكن أحنا ماعندناش ضمير علشان كدة مش هنتقدم ولا خطوة

تحياتى

[abnmoussa]

المشاركة الأصلية بواسطة BATISTA

أهلا ابن موسى ..متابع الموضوع التانى ..بخصوص قصة جول فيرن دى رحلة حول العالم انا سمعتها سينما من مدة أكتر من 4 ايام..بخصوص انيس منصور لا بصراحة
ياعم الناس دى عندها ضمير فى شغلها وفى عملها حتى فى العبادة بتاعتها لكن أحنا ماعندناش ضمير علشان كدة مش هنتقدم ولا خطوة .
تحياتى

انت فين ياباتيستا والله وحشنى جدا ووحشنى تعليقاتك.
طبعا فيلم "حول العالم فى 80 يوم" ده من الأفلام الكلاسيكة العظيمة ولااشبع من رؤيته ابدا اما قصة انيس منصور فمعقول ياراجل انك لم تقرأها للآن ادخل وحملها من النت وسوف تشكرنى على تلك الهدية فهى رررررررررررررروعة ررررررررررررررررروعة.
انت لم ترد على سؤالى اللى طرحته فى اخر مقالى وهو "هم المصريين بقوا اهم فى إيه؟" زيى ماالنشيد القومى الجديد بيقول عقب الفوز فى اى ماتش دولى..انتظر تفاعلاتك معى ليس هنا فقط ولكن فى الحوار الإسلامى ايضا ويالا حط بصمتك الأخيرة قبل مااختم الموضوع علشان ابدأ بقى فى موضوع فكرى آخر صعب جدا..فأنت مع ابن موسى دائما تجد الجديد والمثير..اشكرك وبارك الله فيك.
ابن موسى

[™BATISTA]

ابن موسى

أعتذر على التقصير

بسبب

1- هناك خليط من الفيروسات أحتل الجهاز بس الحمد الله الكاسبر بيحاول معايا أهو نستنشق هواء نقى شوية فى الجهاز

2- ان أحيانا الموقع مش بيرضى يدخلنى افضل اسجل والاقى الشاشة كلها قلبت شمال والموقع رافض يدخلنى

.. بس انا والله دخلت رديت على الموضوع أول مالقيتة لان كان فى نقاش ومحاورة بين وبين ولد الامارات

. على فكرة تم اضافة جزء من قصة امينة المفتى فى توبك .. قاموس الجاسوسية
.
.
.

بخصوص سؤالك البرىء

النشيد .. وسؤالى البرئ هو "هم المصريين بقوا أهم فى إيه؟؟؟؟".

المصريين أهما .. مش عزمة ولا عهد

المصريين اصبحو يعيشون فى حالة لامبالاة بالواقع نظرا لظروف غلاء المعيشة وارتفاع الأسعار
وعدم القدرة على القيام بمظاهرات أو اعتصامات خوفا من الاعتقالات وفرض قانون الطوارىء

المصريين أصبحو لايبالون بما يحدث حولهم كل واحد بيقولك يعنى انا الى هاعدل الكون على مزاجى والبعض الاخر يقول يعنى هى جت على انا لوحدى

المصريين على الرغم من حالة الركود وحالة تكبير الدماغ الى تميز بها الشعب المصرى

الا انة دوام الحال من المحال وربما ينقلب الشعب المصرى فى يوم من الايام

بس اليوم دة ياترى هيكون امتى

دة سؤالى انا البرىء طبعا


ومساء الفل عليك ياريس

[abnmoussa]

لا ياعم باتيستا انت صحيح جاوبت صح الصح بس فى النهاية حتجيب رجلى معاك مع حبابينا الحلوين وانا سؤالى كان برئ وربنا يعلم!!!!!!!!!!! وبعدين انت كاتب عنوانك على مدريد يعنى عامل حسابك ياحويط..اما انا فساكن من اول حلاليب لحد اسكندرية وبجيب العيش من العريش والفول من السلوم ..يعنى منتشر فى انحاء مصر .
انتظرك فى الحوار الإسلامى حيث طرحت من دقائق سؤالى الثانى واتشوق لتفاعلك الجميل معى..وشكرا ياريس على اهتمامك الدائم..
ابن موسى

[™BATISTA]

ابن موسى

مساء الخير عليك

معلش انا لسة حالا منزل نسخة ويندز جديدة وجارى التعامل معاها بحرص


لا ياعم ماتقلقش هما عارفين انى كاتب محل الاقامة مدريد بس الاى طبعا مش أسبانى


الابى بتاعى يوديك جبال تورا تورا يعنى مافيش قلق من الناحية دى



ان شاء الله هاشوف الموضوع الى فى القسم الاسلامى (الجن والانس ) و(زوجات الانبياء)



.

.
.

.

وبم ان حضرتك ستنشر مقالاتك هنا فى التوبك دة

لذا

تم التثبيت لمدة 15 يوم

[abnmoussa]

المشاركة الأصلية بواسطة BATISTA

ابن موسى
مساء الخير عليك ..معلش انا لسة حالا منزل نسخة ويندز جديدة وجارى التعامل معاها بحرص
لا ياعم ماتقلقش هما عارفين انى كاتب محل الاقامة مدريد بس الاى طبعا مش أسبانى
الابى بتاعى يوديك جبال تورا تورا يعنى مافيش قلق من الناحية دى
ان شاء الله هاشوف الموضوع الى فى القسم الاسلامى (الجن والانس ) و(زوجات الانبياء)
وبم ان حضرتك ستنشر مقالاتك هنا فى التوبك دة لذا تم التثبيت لمدة 15 يوم

التثبيت 15 يوم بس..ماشى ياباتيستا وخد عندك منى مقالات من العيار الثقيل والنبى لو روحت تورا تورا ولا الهمالايا حتى ..شكلى وشكلك حنتعرف على بعض عند الداى لاما فى التبت وحنتلج للصبح وحنبقى ايس ابن موسى وايس باتيستا.
المقالة القادمة لازالت افكر كثيرا قبل ان انشرها فهى من جرت على المشاكل مع اعضاء مجلس إدارة المجلة ومنعتها من النشر رغم اننى لاارى فيها شئ خارج عن النص والمقالة عنوانها "موت ريادة المصرية" فيها حاجة دى؟؟؟؟ موعدنا غدا بإذن الله مع ابن موسى ومقالة جديدة وحضر العيش والحلاوة ياباتيستا..آل 15 يوم آل.

[™BATISTA]

المشاركة الأصلية بواسطة abnmoussa

التثبيت 15 يوم بس..ماشى ياباتيستا وخد عندك منى مقالات من العيار الثقيل والنبى لو روحت تورا تورا ولا الهمالايا حتى ..شكلى وشكلك حنتعرف على بعض عند الداى لاما فى التبت وحنتلج للصبح وحنبقى ايس ابن موسى وايس باتيستا.
المقالة القادمة لازالت افكر كثيرا قبل ان انشرها فهى من جرت على المشاكل مع اعضاء مجلس إدارة المجلة ومنعتها من النشر رغم اننى لاارى فيها شئ خارج عن النص والمقالة عنوانها "موت ريادة المصرية" فيها حاجة دى؟؟؟؟ موعدنا غدا بإذن الله مع ابن موسى ومقالة جديدة وحضر العيش والحلاوة ياباتيستا..آل 15 يوم آل.

هههههههههههههههههه ياعم لا توارا تورا كويس جدا ممكن أفكر بعد كدة فى جبال الإنديز مش عارف حسب السيولة المادية

بخصوص التثبيت ل 15 يوم دى اقصى مدة تثبيت بعد كدة يتم التثبيت مرة أخرى

انشرها وماتخفش المقالة القادمة

"موت ريادة المصرية" فيها حاجة دى؟؟؟؟

لا مافيهاش حاجة ماهى كل حاجة ماتت هى جت على الريادة يعنى

انشرها هنا واناوانت فى الهوى سوا

وبلاش الحلاوة علشان الاسنان

[abnmoussa]

رودى تحتضر-1

سألت المرة الماضية القراء بسؤال صعب جدا وهو فى الحقيقة مش سؤالى انا ده سؤال سألتنى به خالتى ريادة او رودى زى مابحب ادلعها وهى على فراش الموت تصارع الفطسان ..قالت لى نفسى قبل ماأموت ياواد اعرف إجابة سؤال محيرنى ومنغص عيشتى كمان..نفسى اعرف المصريين آهما فى إيه ياحسرة؟؟ وهم لسه بيغنوها ولاخلاص بطلوها؟؟ ..طبعا هى تقصد النشيد الوطنى بتاع ماتشات زمان اللى كان فالق دماغنا بعد كل فوز للواد كوره وصحابه فى المباريات الدولية قبل مايتكسح ويجيله لين عظام ويهزمه اللى كان مالوش فى الكورة زمان..قلت لها ياحاجة صلى بس كده على النبى وروقى ..قاطعتنى وهى فى قمة غضبها وقالت :اروق.. آل اروق آل..اسكت اسكت لأحسن انا شربه من كيعانى منك ومن اخواتك.. بص ياواد كده ومد ايدك تحت مخدتى وهات كل جواباتى بس اوعى تخنصر حاجة ماأنا عارفاك تموت فى صور النسوان..وفتحت رودى لى اول جواب وطلعت منه صورة وقالت بص شوف صور ولاد شامية توأمين ماشاء الله عليهم زى القمر..الواد الصغيرده اسمه شام 1600 والتانى عفى شوية واسمه شام 1800..والله البت دى طول عمرها جنان وولادها طالعين حلويين زيها ..شوام.. ولا بص اختها ليبية أهى حامل وبطنها قدامها وفاضل لها سنتين تلاته وتيجب تلت توائم ماهى النبى حارسها سميتهم خلاص..ماشاء الله ده صاروخ 2000 وده صاروخ 3000 وده صاروخ 4000..اصل البت دى وجوزها من زمان غاويين صواريخ والحاجات اللى بتفرقع كده.. ولا شوف جواب البت سودانية مش حتيجب مهيرة عقبال أمك !!! ..بس تعرف ياواد بيقولوا عليها بت حتكون عفيه وقوية وشكلها زى اليابانى وآآآآآآآآآآآآه يانى .. إإإإإإإإإإإإإإإيه يالا.. العوض ع الله فيكم ياولاد بهية وخيبتكم القوية..يعنى امك ياواد خلاص اتنيلت مش عارفة تجيبلها حتة عيلة تفرح قلبها ..هى امك ياواد عجزت وبقت زى الأرض البور ولاإيه.. بالحق ..هى دلوقتى بقى عندها قد إيه ياواد؟؟ قلت لها يعنى ..سبع ..تمن آلآف سنه او اكترياخالة ما أنتى عارفة اكتر منى.. مش بتقولى دايما ان عمرك من عمرها ومن زمان وانتى قاعده عندها.. قالت :آه والله نسيت .. بس تعرف ياواد امك لسه تعرف تخلف ..آمال العقم ده جالها منين؟؟؟ ..آه .. انت عارف التعب اللى انا فيه ده من إيه؟..ماهو من عمايلكم المنيلة ..قلت لها ليه بس ياخاله.. ردت بسرعة وقالت: يعنى عايزنى بعد الجوابات دى ماتجليش نقطة .. قلت لها روقى ياخالة رودى ..دى صورك دى صورعربيات مش بنى آدمين انت نظرك ضعف ولا بقى شيش بيش .. وبعدين هى امنا فاضية..عايزانا نخلف تانى واحنا مش لاقيين الرغيف ولا الهدمة ولا السكنه ولا حتى عارفين نمشى فى الشوارع من عيال الخواجات التانيين .. إشى المانية وإشى يابانية وإشى تركية.. قالت وهى بتشوح وبتلطم خدها وتنوح:كل اجناس الدنيا فيك يامصر إلا بنت من بطن مصر.. قلت لها ياستى كده عسل خالص.. نتعب نفسنا ليه ونفكر ونخطط ليه وهو احنا لسه حنربى ونكبر، ده شراء العبد ولا تربيته ياخالة.. نظرت لى الخالة رودى ونزلت من عينها الدموع وقالت وهى بتنهنه تعرف ياواد انا مش خايفه من الموت ..فيوم ما أموت هنا بتولد لحظتها هناك فى حته تانيه آمان .. اللى صعبانة عليه امك ..كان اسمها واسمى واحد زى ماكان عمرها وعمرى واحد..وهو انت ياواد ماسمعتش قبل كده عن مصر الريادة.. ولا اطرشيت واتهبلت وبقيت نيلة خالص..ياواد هو شرب البانجو بيلحس الدماغ كده ويخليك مش حاسس بأى حاجة حواليك..بأقولك إيه ..قوم ياواد فذ وامشى بره بعيد عنى ..غور جتك داهية فى خلفكم خلف عار رفعتلى ضغطى ونفسى اتكرشت ومش عارفة آخد نفسى .. قلت لها بعد الشر ياخالة..شوحت لى وقالت بصوت ضعيف ربنا يخدنى جايز تحسوا بعدى وتفهموا وتعملوا حاجة لأمكم ..واسمع ياواد لو مت آمانه عليك أوعى تمشى ورايا فرقة المصريين آهما وهو يعنى غيظ فى الدنيا وغيط فى الآخرة.. وراحت الخالة رودى مغمضة عينها وتاهت.
ونسيب ريادة مغمضة عينها كده وتايهه ..واشوفكم الأسبوع الجى لاطمنكم على ريادة ..ياهل ترى فطست ؟؟؟ ولا لسه فيها الروح وحتقوم؟؟ ..حنشوف.
ابن موسى..كتبت فى 12/2007

[™BATISTA]

نفسى اعرف المصريين آهما فى إيه ياحسرة؟؟ وهم لسه بيغنوها ولاخلاص بطلوها؟؟ ..طبعا هى تقصد النشيد الوطنى بتاع ماتشات زمان اللى كان فالق دماغنا بعد كل فوز للواد كوره وصحابه فى المباريات الدولية قبل مايتكسح ويجيله لين عظام ويهزمه اللى كان مالوش فى الكورة زمان..قلت لها ياحاجة صلى بس كده على النبى

هههههههههههههههه انا كنت جاوبت السؤال دة قبل كدة المصريين اهما حيوية وعزم وهمة

واخد بالى ان شام دى صناعة سورية
فعلا دلوقتى سوريا وليبيا تفوقو على خالتك ريادة فى الصناعة بس نعمل لها الله يرحمها كل خلفتها بيدور على المصلحة الشخصية

ده شراء العبد ولا تربيته ياخالة.. نظرت لى الخالة رودى ونزلت من عينها الدموع وقالت وهى بتنهنه تعرف ياواد انا مش خايفه من الموت ..فيوم ما أموت هنا بتولد لحظتها هناك فى حته تانيه آمان

فعلا هو الاستيراد الى احنا فالحين دة حتى القمح بنستوردة
وعجبى

ياريت الاسبوع الجاى تطمنيا على خالتك شفاعة يووووة قصدى ريادة

تحياتى لك ومتابع

[مودى2008]

مشكووووووووووووورين عالموضوع

[abnmoussa]

المشاركة الأصلية بواسطة BATISTA

هههههههههههههههه انا كنت جاوبت السؤال دة قبل كدة المصريين اهما حيوية وعزم وهمة
واخد بالى ان شام دى صناعة سورية فعلا دلوقتى سوريا وليبيا تفوقو على خالتك ريادة فى الصناعة بس نعمل لها الله يرحمها كل خلفتها بيدور على المصلحة الشخصية فعلا هو الاستيراد الى احنا فالحين دة حتى القمح بنستوردة وعجبى ياريت الاسبوع الجاى تطمنيا على خالتك شفاعة يووووة قصدى ريادة
تحياتى لك ومتابع

شوف باتيستا خالتى وخالتك رودى الآن فى غرفة الإنعاش وليس لها رغبة فى الحياة على ارض اختها بهية والأسبوع الجاى شكلها حتفطس منا بس هى سايبة امانة للمصريين سوف تعرفها الأسبوع الجاى بإذن الله وبعد كده سننشر النعى الرسمى ولاعزاء للمصريين.

اختى مودى..شكرا على مرورك وارجو ان تعيد قراءة الموضوع من الأول وتتدرج معنا لتعرف ماذا اقصد ولما اقصد وبارك الله فيك.
ابن موسى

[™BATISTA]

المشاركة الأصلية بواسطة abnmoussa

شوف باتيستا خالتى وخالتك رودى الآن فى غرفة الإنعاش وليس لها رغبة فى الحياة على ارض اختها بهية والأسبوع الجاى شكلها حتفطس منا بس هى سايبة امانة للمصريين سوف تعرفها الأسبوع الجاى بإذن الله وبعد كده سننشر النعى الرسمى ولاعزاء للمصريين.

غرفة الانعاش أعتقد ان النهاية معروفة مسبقا

اتمنى ان تكون الامانة قد وجدت من يرعاها وان كنت اشك فى ذلك

منتظرك يابن موسى

[abnmoussa]

المشاركة الأصلية بواسطة BATISTA

غرفة الانعاش أعتقد ان النهاية معروفة مسبقا اتمنى ان تكون الامانة قد وجدت من يرعاها وان كنت اشك فى ذلك منتظرك يابن موسى

فعلا باتيستا حضر البدلة السوداء من الآن ..اما الآمانة فهى ان رودى عايزه تعرف مؤلف وملحن النشيد الوطنى "المصريين اهما" علشان تقتص منهم ولسه انا بأدور عليهم علشان اريح روحها التى على وشك الفطسان او فطست بس لسه ماحدش قال لى.
المهم مش تقول لى ياراجل إيه رأيك فى المقالة يعنى حلوة او زفت يعنى ارفع كده من معنوياتى شوية..والحقيقة ان ا/عمرو مجدى مدير التحرير والمشرف العام كان معجب جدا بالأسلوب واتصل بى مهنئا فكرة استخدام الأسلوب الرمزى فى المقالة ولكن بقى الظروف جت زفت ومنعت المقالة من النشر لأسباب انا مش عارفها لحد دلوقتى فهناك ازفت من كده وبتتنشر والظاهر ان دمى كان تقيل قوى على قلب مجلس إدارة المجلة لطولة لسانى معاهم..المهم اشكرك على التثبيت وبارك الله فيك وارجو ان اجد ردك فى موضوع التقويمات فهناك قصة تنبين لنا مدى خيبتنا وتفريطنا فى ثرواتنا البشرية والموضوع على القاعة.
ابن موسى

[™BATISTA]

ابن موسى مساء الخير

بس كدة من بكرة الصبح هاعمل بدلة سودة بس ماقلتش ماتنية ولا سوارية

بخصوص المقالة انا مش عارف سبب واحد لعدم النشر ؟؟ المقالة هى توضيح بسيط للحالة الى وصلنا لها فى عالم السيارات ودة واقع فعلى وملموس بس مش عارف سبب واحد لعدم النشر

يمكن لانك أخدت الموضوع فى قالب فكاهى ومجلس الادارة الموقر (عالم عقد) ومش عايزين يضحكو ولا الموضوع جاى على الوتيرة يعنى جاى على الجرح فقلك الغاء مقالة ولا دوشة من الناس متابعة المقالة والمحاورة فية وبالتالى هتدخل المجلس الموقر فى حواديت لاغنى عنها

المقالة والله توضيح للواقع الى عايشين فية من تدهور فى صناعة السيارات والاعتماد على الإستيرد فقط

بخصوص الموضوع الأخر
ان شاء الله لى رؤية لة وتعليق علية بس حاليا ظروف النت تحت الصفر المئوى