بالذمة مش مكسوفين من نفسكم يامصريين؟؟؟

[abnmoussa]

اعرف ان العنوان صعب ولكن انا رأسى اتفلقت من كل من يكتب عن السيارات من اول اصغر كاتب فى المنتدى لأكبر صحفى فى مصر لأكبر جريدة او مجلة فى مصر ..الكل مغيب مش دارى بالخبية التقيلة اللى اصبحنا فيها..فجميع المجلات المتخصصة فى مصر تكذب وجميعهم خونة لبلدهم وما عندهمش ريحة الدم..ولاحول ولاقوة إلا بالله.
طبعا حيطلع لى واحد يتفلسف ويقوللى مالك داخل فينا شمال كده ليه ياأخ..هو فيه ايه؟؟
الحقيقة انا نسيت اعرفكم بنفسى او بجزء من نفسى ..فأنا القائد الفاشل لحملة عربتى مصرية 100%..انا ابن موسى صاحب عمود "ابن موسى وسيارة المحروسة" سابقا بأشهر مجلة سيارات فى مصر ..ولأنى فقرى لم اتحمل ان ارى معظم البلاد العربية تصنع سيارتها الوطنية واسكت فرحت من فقر اهلى اهاجم الجميع من اول رئيس مجلس الإدارة لحد اصغر صحفى واتهمهم بالخيانة وانهم اشبه بالقوادين ..وطبعا تركت عمودى بالمجلة وحرقته وبطلت اكتب حتى لااشترك فى تلك المهزلة والآن اخوتى الفالحين اللى فرحانين بشوية العربيات الأجنبية واخر اخبارها ..هل سألتوا نفسكم متى ستصنع مصر سيارتها الوطنية واقول تصنع والتصنيع غير التجميع الذى يحدث الآن لموديلات كثيرة فى مصر.. انا فاكر انى فى اخر مقالة لى فى المجلة وبعد مادماغى ماضربت تحديت المصريين ان يقولوا مامعنى الأغنية العبيطة الغبية "المصريين اهم" وطلبت من اى حد يقوللى المصريين اهم فى إيه او بقوا اهم فى إيه؟؟ ممكن نقول بقوا "اهم" فى الهيافة بقوا "اهم" فى عدم الضمير بقوا "اهم" فى الرقص وتعرية البطون وكشف صرر الخليعات واردفاهن وتعليم بناتنا كل ماهو خليع وفاجر..ولا المصريين بقوا اخيرا "اهم" فى تسريب الأمتحانات والغش والسرقة..والله الواحد مكسوف وخجلان ان يفتح عينه فى عيون اشقائنا العرب.
نفسى واحدفالح يقول لى ماذا يعرف عن..شام 1600وشام 1800ولا عن الصاروخ 2000و3000و4000ولا عن مهيرة 1600ولا ولا..
اشوفكم تانى علشان اكمل كشف الخيبة التقيلة بتاعت "المصريين اهم" وبعد مااشيع جنازة امنا ريادة اللى فطست كمدا من ولاد مصر وراحت لغيرنا بروحها تنشر عندهم الخير وتكبر تانى وتكبرهم معاها..امنا ريادة اللى كان اسمها يعنى مصر..واللى لما كنا بنقول الريادة كان العالم كله عارف اننا بتكلم عن مصر..ولكنها ماتت وفسطت ولاعزاء للمصريين.
ابن موسى ابو لسان زالف

[BATISTA]

السلام عليكم ورحمة الله

ابن موسى مساء الخير

طبعا حيطلع لى واحد يتفلسف ويقوللى مالك داخل فينا شمال كده ليه ياأخ..هو فيه ايه؟؟

انت أخدت السؤال من على لسانى أهو
بص هو طبعا كلنا عارفين ان معظم السيارات بتكون من الخارج لعدة اسباب ان الناس دول اتقنو الحرفة والصنعة بالعامية واصبحت لهم اليد العليا فى مجال السيارات مثلها زى غيرها
يعنى لو سالت واحد اية الدولة رقم 1 فى العطور .. فرنسا """"" الدولة رقم 1 فى الزهور ..هولندا

الدولة رقم 1 فى الملابس .. ايطاليا ...............وهكذا يعنى كون ان مصر ليس لها دور فى تصنيع السيارات انا لست خبيرا فى السيارات لكن الحجج معروفة ان تكلفة غالية لان تكون بالمواصفات القياسية

يقوللى المصريين اهم فى إيه او بقوا اهم فى إيه؟؟ ممكن نقول بقوا "اهم" فى الهيافة بقوا "اهم" فى عدم الضمير بقوا "اهم" فى الرقص وتعرية البطون وكشف صرر الخليعات واردفاهن وتعليم بناتنا كل ماهو خليع وفاجر..ولا المصريين بقوا اخيرا "اهم" فى تسريب الأمتحانات والغش والسرقة..والله الواحد مكسوف وخجلان ان يفتح عينه فى عيون اشقائنا العرب.

والله مش المصريين بس المشكلة دى فى كل البلاد العربية والدليل القنوات الفضائية الكل بيتجهة للعولمة يعنى مش مصر لوحدها ..

[فارس اصيل]

من عير اى نقاش
احنا مش حاتعرف نعمل او نصنع اى حاجه
لاننا لا نتقى الله فى اعمالنا

[abnmoussa]

اهلا باتيستا اهلا فارس ..يانهار ابيض هى جت فيك ياباتيستا فى الأول..المهم شوف باتيستا انت سألتنى سؤال ولم تجاوب على سؤالى..ماذا تعرف عن الموزز مهيرة وشام والواد الغجرى صاروخ..سوف اغمكم على الصبح يعنى اشمعنى انا حأطق من جنابى.
شوف باتيستا "شام 1600" و"شام 1800" موزتين سوريتان آخر جمال وخفة وللأسف تصنيع سورى إيرانى مشترك ونزلت الأسواق اول هذه السنه وهى من عائلة بيجو الفرنسية بمذاق شامى سيكون خالصا 100% اى سورى 100% بعد 5 سنوات من الآن زى ماوعد بشار الأسد..اما مهيرة فهى بت يابانية بنهكة سودانية إيرانية ستظهر قريبا جدا ..اما الصاروخ فهى السيارة الليبية الوطنية من تصميم القذافى ؟؟؟؟؟؟؟ وسوف تنطلق فى 2010 ومنها اربع موديلات..الجزائر ستتعاقد مع رينو على تصنيع سيارتها الوطنية ومعها المغرب فى رجليها..السعودية فى الطريق ومعها الإمارت..اما مصر فكفاية عليها ان تجمع موديلات السيارات واخرها تجميع سيارة "باريس" من عائلة بيجو وبمساعدة إيران وتحت رعاية شركة وجيه اباظه وبتمن حاجة كده 90000 جنيه مبدئيا..عرفت سر فرستى وسبب قلة ادبى على شوية العيال اللى ماسكين صحافة السيارات بمصر..تعرف باتيستا لم تستحملوا منى إلا نشر ثلاثة مقالات من مجموع عشرة وبعدين خافوا من بطش اباطرة رجال الأعمال اللى اشتروا ذمم كل صحف ومجلات السيارات بمصر بشوية إعلانات وكام موزتين وتكتموا الأخبار التى اعلنت عنها وكل سنه وانت طيب فالسبوبه حلوة قوى من المجمع الفرنساوى ولا اليابانى والكورى والصينى ده غير الألمانى والتركى والأيطالى وسك على التصنيع وملعون ابو الوطنية عندهم ..فكل السيارات فيكى يامصر إلا بنت بلد من مصر .. هؤلاء هم قادة رجال الأعمال الفاسدين والذين كل همهم ان يلتصقوا بالسلطة ويجمعوا اكبر قدر من الأموال وزى ماقال اخونا فارس لن نصنع سيارتنا الوطنية لأننا لانتقى الله فى عملنا ولافى وطنيتنا بحيث الدول اللى كانت نونو خالص كبرت وسبقت مصر ام حضارة 5000 سنه وام الهرم والنيل والأهم بتاعت النشيد القومى "المصريين اهم" وكل الكلام الخايب ده اللى جابنا لورا سنين فنحن اصبحنا الاحفاد الفاسدين المعاقين لأعظم اجداد اذهلوا العالم ولازالوا زى ماواحد خواجة قالها لى وهو يتحسر على مارآه فى الأقصر وبين حالنا الآن..واشوفكم تانى علشان نغمكم بالتجربة الماليزى وكيف تحول شعب كان شحات حافى واغناهم كان بشبشب زنوبة الى نمرا من نمور اسيا الآن.
بس مش بالذمة فعلا انتم مش مكسوفين على نفسكم بعد معرفتم الخيبة التقيلة دى.

[جناب العمدة]

احييك اخى ابن موسى ...

طيب الصناعة دى محتاجة ايه ؟؟

العقول والعمالة ..
المال ..
القرار السياسى ..

نشوف احنا ناقصنا ايه ....

العقول ؟؟
ازاى ومصر بلد العلماء فى شتى المجالات ويشهد لهم العالم بأسره
العمالة .. حدث ولاحرج ولا كلام فى هذا .
المال ؟؟
هو ده السبب اللى كتير من الناس بتعزوه لعدم تحقيق هذا الحلم وغيره
من الانشطة الهامة ..
طب ازاى مفيش فلوس والتقارير تقول أن حجم الاموال المهربة
من مصر ومن خزينة الدولة المصرية فى 30 سنة 10 تريليون جنيه ..
والتريليون يا سادة كما تعلمون مليون مليون مليون ... تخيلوا حجم المبلغ وممكن يعما أيه .
وأكد هذا الكلام برنامج الطبعة الاولى لأحمد المسلمانى اول أمس .
يبقى القرار السياسى اذا ً ؟؟؟؟
نعم والف نعم لا نملك حكومة ترعى هكذا مشروع لانه
وببساطة ليست لدينا حكومة تهمها البلد لا من قريب أو بعيد وحال حكوماتنا لا يخفى على أحد .
لا نقول غير حسبنا الله ونعم الوكيل .. مصر أكبر بكثير من أن يحكمها أمثال هؤلاء .

[abnmoussa]

المشاركة الأصلية بواسطة جناب العمدة

احييك اخى ابن موسى ...طيب الصناعة دى محتاجة ايه ؟؟
العقول والعمالة ..المال ..القرار السياسى ..نشوف احنا ناقصنا ايه ....
العقول ؟؟
ازاى ومصر بلد العلماء فى شتى المجالات ويشهد لهم العالم بأسره
العمالة .. حدث ولاحرج ولا كلام فى هذا .
المال ؟؟ هو ده السبب اللى كتير من الناس بتعزوه لعدم تحقيق هذا الحلم وغيره ..من الانشطة الهامة ..
طب ازاى مفيش فلوس والتقارير تقول أن حجم الاموال المهربة من مصر ومن خزينة الدولة المصرية فى 30 سنة 10 تريليون جنيه ..والتريليون يا سادة كما تعلمون مليون مليون مليون ... تخيلوا حجم المبلغ وممكن يعمل أيه ..وأكد هذا الكلام برنامج الطبعة الاولى لأحمد المسلمانى اول أمس .
يبقى القرار السياسى اذا ً ؟؟؟؟
نعم والف نعم لا نملك حكومة ترعى هكذا مشروع لانه وببساطة ليست لدينا حكومة تهمها البلد لا من قريب أو بعيد وحال حكوماتنا لا يخفى على أحد .
لا نقول غير حسبنا الله ونعم الوكيل .. مصر أكبر بكثير من أن يحكمها أمثال هؤلاء .

الله عليك ياعمده..كتبت فشخصت ولخصت كل جوانب المشكلة ولم تترك لى ماأقوله سوى انك نسيت جانب الوطنية والمرحومة المصرية..زمان ايام عبد الناصر كان هناك م/عزيز صدقى ابو الصناعة فى مصر واللى معظم الصناعات القائمة الآن نتيجة مجهودات تلك الحقبة..ايام عبد الناصر حاولوا تصنيع سيارة وطنية وسموها رمسيس..صحيح طلعت كوميدية جدا والعجلة اسرع منها ولكن لو كانوا استمروا فى تطويرها لكانت وصلت الآن الى حد رائع ومثال ذلك السيارة التشكية "سكودا" كانت تعبانه جدا فى السبعيان واوائل الثمانينات وبعد كده دخلت شركة فولكس فاجن فى شراكة مع الشركة الأم ..والآن اخر روعة ودلع..المهم الوطنية وزى ماقلت عن ماليزيا وتجربتها وبطلها الأسطورى "مهاتير محمد" الذى قفل على بلده كام سنه وبعدها حول شبعه من شوية جعانين حفاه متخلفين الى شعب متحضر واعد اصبح من النمور الآسيوية الآن التى يحسب لها الف حساب وشاهدوا السيارة البروتون علشان تعرفوا عماأتكلم عنه..المهم فى الموضوع الوطنية وان القائد يكون عايز يعمل حاجة لشعبه ويضرب بأيد من حديد على كل عابث لاه طامع مرتشى راشى لايهمه إلا مصلحته الشخصية وللإسف هذا هو حال وزارة البيزينس ونظيف..يعنى كيف يااخى نصنع سيارة مصرية 100% وهناك وزير للنقل يملك مصنع تجميع شيفروليه يعنى نخرب بيت الراجل ؟؟؟؟؟؟ ..الأسهل نخرب بيت مصر وحدث ولاحرج..شركة وجيه اباظه التى ستجمع السيارة باريس ب90000 جنية بالتعاون مع شركة إيران خوردو كانت ممكن ان تبدأ فى اخذ هذا الموديل وتجعله مصريا مثلما فعلت سوريا والسودان مع نفس الشركة للأسف..تبدأ بنسبة مكون وطنى 40% على ان تصل بعد 5 سنوات الى نسبة 90% او 100% حسب الأمكانيات المتاحة والشطارة المصرية ولكنهم فضلوا مايزعلوش الكبار!!!!!!!!!..اذن الموضوع مش صعب ولاحاجة واسهل من كده مافيش ولكن المهم التوجه السياسى.. من اجل هذا لم استمر فى حملتى التى نوهت عنها من خلال كتاباتى فى مجلة سيارات متخصصة فقد عرفوا فى المجلة اللعبة وباعوا القضية وقضبوا الثمن والرشوة على حساب مصر.. فهموا الفولة وتعايشوا معها بينما انا لا ..فكما قلت انى غاوى فقر وإخيييييييييه عليه عايز حاجة لبلدى..سأحاول نشر تلك المقالات التى نشرت فى المجلة مرة اخرى على هذا الموقع بدون ماحد يزعل سوى على حالنا الذى صرنا عليه من الهوان والضعف والتخلى على الريادة المصرية اللهم إلا فى المسخرة والكلام..مجرد الكلام.

[BATISTA]

ابن موسى لاياباشا انا كنت باهزر بحكاية الدخول شمال دى
بس والله العظيم انا نسيت اعلق على حكاية شام 1600.1800 لانى ببساطة ماليش فى سوق العربيات غير حاجات بسيطة وهى الانواع المتعارف عليها فى الأسوق

وبخصوص مقالتك وحكاية عائلة اباظة اباطرة المقطورات والعربات الثقيلة أول مرة أعرف الحاجات دى

متابع ليك وياريت تنشر لى مقالاتك فى القسم هنا

وبخصوص الكسوف من نفسنا والله هاقولك كلمة يعنى هى جت على سوق السيارات

ماهى خاربة فى التعليم والسياسة وكل حاجة

فارس اصيل

لن نصنع سيارتنا الوطنية لأننا لانتقى الله فى عملنا ولافى وطنيتنا بحيث الدول اللى كانت نونو خالص كبرت وسبقت مصر ام حضارة 5000 سنه وام الهرم والنيل والأهم بتاعت النشيد القومى "المصريين اهم" وكل الكلام الخايب ده اللى جابنا لورا سنين فنحن اصبحنا الاحفاد الفاسدين المعاقين لأعظم اجداد اذهلوا العالم

كلام سليم وموافق لك فى رايك

[abnmoussa]

المشاركة الأصلية بواسطة BATISTA

ابن موسى لاياباشا انا كنت باهزر بحكاية الدخول شمال دى
بس والله العظيم انا نسيت اعلق على حكاية شام 1600.1800 لانى ببساطة ماليش فى سوق العربيات غير حاجات بسيطة وهى الانواع المتعارف عليها فى الأسوق
وبخصوص مقالتك وحكاية عائلة اباظة اباطرة المقطورات والعربات الثقيلة أول مرة أعرف الحاجات دى
متابع ليك وياريت تنشر لى مقالاتك فى القسم هنا
وبخصوص الكسوف من نفسنا والله هاقولك كلمة يعنى هى جت على سوق السيارات

ماهى خاربة فى التعليم والسياسة وكل حاجة

اخى باتيستا..حبيب قلبى..اشكرك على متابعتك الدائمة وعايزك تعيد قراءة رد مشاركة العمدة تانى لأنك ارسلت مشاركتك اثناء تعديلى لتلك المشاركة ..وبناء على طلبك سوف اعيد انشر اول مقالاتى غدابأذن الله و التى نشرت فى المجلة واستعد لصدمة قوية..لك تحياتى

[BATISTA]

السلام عليكم

ابن موسى

تابعت ردك السابق الذى اشرت علية بعد تعديلك

واقتبست ملخص لكلامك وهو

المهم فى الموضوع الوطنية وان القائد يكون عايز يعمل حاجة لشعبه ويضرب بأيد من حديد على كل عابث لاه طامع مرتشى راشى لايهمه إلا مصلحته الشخصية وللإسف هذا هو حال وزارة البيزينس ونظيف..يعنى كيف يااخى نصنع سيارة مصرية 100% وهناك وزير للنقل يملك مصنع تجميع شيفروليه يعنى نخرب بيت الراجل ؟؟؟؟؟؟ ..الأسهل نخرب بيت مصر وحدث ولاحرج..شركة وجيه اباظه التى ستجمع السيارة باريس ب90000 جنية بالتعاون مع شركة إيران خوردو كانت ممكن ان تبدأ فى اخذ هذا الموديل وتجعله مصريا مثلما فعلت سوريا والسودان مع نفس الشركة للأسف..تبدأ بنسبة مكون وطنى 40% على ان تصل بعد 5 سنوات الى نسبة 90% او 100% حسب الأمكانيات المتاحة والشطارة المصرية ولكنهم فضلوا مايزعلوش الكبار!!!!!!!!!..اذن الموضوع مش صعب ولاحاجة واسهل من كده مافيش ولكن المهم التوجه السياسى..

وطبعا الناحية السياسية فاشلة فى مصر بكل المقايسس والحكم كذلك لان كل مايهم الجميع هو المصلحة الشخصية السياراة مستوردة موجودة والأهم هى الأرقام المميزة فقط لكن الصناعة وحال البلد مافيش وعلى رايك خلى منصور واباظة يسترزقو

ودمتم بخير


فى انتظار جديدك فى القسم وفى موضوع قاموس الجاسوسية

[justme]

احنا دلوقتي معملناش حاجة غير مجرد سرد وقائع موجودة حوالينا

وموصلناش لاي شيء

السؤال اللي بسأله....انت عايزنا نعمل ايه ؟؟؟

ده احنا حتى طوابير العيش مش عارفين نقف فيها بنظام....ده احنا مش بنعرف نركب مواصلات بنظام عشان نصنع عربيات

عشان نوصل لحاجة زي دي...محتاج تغير حاجات كتير

محتاج تغير قانون نفسي نفسي اللي ماشي في المجتمع ده

محتاج راس مال

محتاج واحد قلبه جامد يقتحم السوق ده

محتاج سياسات تتغير

محتاج قوانين تنظم.....باختصار محتاج حاجات مش موجودة هنا

[mostafa10]

والله كلامك منطقي وجميل

بس انا ليا سؤال صغنون

هل ياترى يا هل ترى مصر أو اي دولة عربية -مش سيارة - عندها القدرة انهاتصنع عربية بجد؟
ولو استطاعت هلهتبقى منافس يعتمد عليه ؟

عايز الاجابة بدون تفاؤل زائد أو تشاؤوم محبط الله يخليك - خلينا ناس عمليين بقى

وبعدها لكل حادث - ونش وعسكري مرور

[abnmoussa]

المشاركة الأصلية بواسطة BATISTA

السلام عليكم ابن موسى ..تابعت ردك السابق الذى اشرت علية بعد تعديلك واقتبست ملخص لكلامك وهو :

وطبعا الناحية السياسية فاشلة فى مصر بكل المقايسس والحكم كذلك لان كل مايهم الجميع هو المصلحة الشخصية السياراة مستوردة موجودة والأهم هى الأرقام المميزة فقط لكن الصناعة وحال البلد مافيش وعلى رايك خلى منصور واباظة يسترزقو ودمتم بخير.
فى انتظار جديدك فى القسم وفى موضوع قاموس الجاسوسية

صباح الخير صديقى العزيز..ارجو ان اكون قد وضحت لك المسألة وقلبك اتوجع زى قلبى تماما بهموم الوطن فنحن اصحاب الأقلام علينا عبء كبير امام من يقرأون لنا والمهم امام الله..فنحن نشرح ونوضح ورزقنا على الله المهم ان نعرف الناس بالحقائق ودائما اى تغيرات فى اى مجتمع تبدأ بفكرة او بكلمة او بموقف فهم دائما الشرارة لأى حركة تغيير..انا مثلا اجبرت المجلة التى كنت اكتب فيها بأسلوب واحتراف قلمى على ان ينشروا مقالاتى وهم لم يرونى ابدا ولم اراهم واحسن انهم لم يرونى وإلا كنت فى خبر كان الآن بعد ان شبهتهم بشوية قوادين لاأخلاق لهم يبيعون الأوهام المخدرة للناس ويعرضون على صفحاتهم اعلانات لمن يدفع اكثر كما تبيع الساقطات اجسادهن الرخيصة لمن يدفع اكثر مع الفرق الكبير فالساقطات لايضرن إلا انفسهن ومن يضاجعهن اما هم فمجلتهم تؤذى امة بأكملها وتضاجع الجميع بلا حياء !!!!!!! عرفت بعدها ان مدير التحرير ضغط دمه ارتفع عنده واصيب بأرتفاع حاد فى منحنى اكتئابه فيبدو اننى ضغطت عل رأس الدمل عنده ..المضحك انه مسك المدير العام للمجلة العيل ابن البهوات الكبار وهات ياردح وسماه باليهودى الصهيونى وكاد ان يستقيل بسبب احساسه بالمهانة كمصرى يرى البلاد العربية حوله تتقدم وهم يكممون فمه ويقيدون يده فى اتخاذ موقف وطنى ولكن اكل العيش مر والحياة صعبة وفرص العمل يعنى مافيش لذا فقد قبل حظر مقالاتى وعدم نشرها ..طبعا انا لم اهتم لأننى لاأتقاضى اجرا على ذلك بس الحقيقة انا لما بأتحمس لسانى بيطول شوتين بسبب موقف مجلس إدارة المجلة المتخاذل تجاه اتخاذ مبادرة تصنيع سيارة مصرية 100% رغم انه ده عملهم وتخصصهم ولست نادما على موقفى إلا على مقاطعة صديقى الحبيب مدير التحرير ا/عمرو مجدى الرجل ذو الأخلاق العالية جدا فهو اللى راح فى الرجلين وهو رجل وطنى بلاشك وله طموح كبير ولكن ولاد الكلب اللى معاه اقوى منه وكسروه ..لذا لم اجد بد من ان اعلن عليهم الحرب فى كل مكان لعلهم فى يوم يراجعوا ضمائرهم ويعرفوا غلطتهم ويتقوا الله فى مصر وشباب مصر..كما وعدتك سوف انشر عصر اليوم بأذن الله اول مقالة نشرت فى المجلة.
اما بالنسبة للكتابة فى مجال المخابرات والتجسس فسلتى مليئة بقصص جديدة ودروس غاية فى الأهمية فى هذا المجال ولكننى لاارى إدارة المنتدى تهتم بذلك القسم بل هناك تضارب وتكرار فى القصص مثل قصة امينة المفتى !!!!!!!!! وطبعا انت ملاحظ اننى لم اشارك فيها حتى تضعوا حدا لذلك فمش معقول اكرر كلامى هنا وهناك ولولا معرفتى بهند واخلاقها العالية لقلت كلام تانى وفعلا لازم يتم ضم الموضوعين سويا والتثبيت.
اخى الحبيب انا فعلا عايز اخدم هذا المنتدى لأنه اقدم منتدى مصرى وبعدين محترم جدا ماشاء الله وانا شخصيا بحبه ولكن لابد من تطويره فمنتدى اخر جديد نوعا بلغ ضعف هذا المنتدى فى الأقسام والتنوع..وبينى وبينك انا فى اجازة دماغ من المنتدى الأصلى بتاعى والذى اشغل فيه المستشار العسكرى لشئون تطوير النظم والتحفيز فقد اعطيتهم التصور الشامل لتطوير المنتدى هناك وسايبهم على راحتهم من اجل التنفيذ فأنت عارف طبيعة العرب والحساسية تجاه المصريين بالنسبة لهم..طبعا المنتدى هناك شكل والمنتدى هنا شكل تانى ..فحياة العسكريين جافة جدا ياباتيستا وساعات الواحد بيحن للحياة المدنية وبيحتاج اجازة دماغ مثلى تماما ولذا عايز اتمتع فعلا بالمنتدى هنا الشويتين اللى قاعدهم وبعدين انا عارف انى حأنشغل تانى فى المنتدى العسكرى يعنى حتكون مشاركاتى هنا ساعتها على خفيف وجايز دماغى تضرب من هناك واستقر عندكم..المهم الفائدة..وتقبل تحياتى.

[abnmoussa]

المشاركة الأصلية بواسطة justme

احنا دلوقتي معملناش حاجة غير مجرد سرد وقائع موجودة حوالينا
وموصلناش لاي شيء ..السؤال اللي بسأله....انت عايزنا نعمل ايه ؟؟؟
ده احنا حتى طوابير العيش مش عارفين نقف فيها بنظام....ده احنا مش بنعرف نركب مواصلات بنظام عشان نصنع عربيات ..عشان نوصل لحاجة زي دي...محتاج تغير حاجات كتير محتاج تغير قانون نفسي نفسي اللي ماشي في المجتمع ده محتاج راس مال..محتاج واحد قلبه جامد يقتحم السوق ده ..محتاج سياسات تتغير ..محتاج قوانين تنظم.....باختصار محتاج حاجات مش موجودة هنا

اخى العزيز اشكرك على وطنيك ومصريتك..طبعا احنا لانملك فى ايدنا إلا الكلمة والتحريض على ان نرفع اصواتنا حتى تصل لمن يستطيع ان يحققها وهم لو اتحدوا كثيرون ..سأنشر سرا مش كتير يعرفوه.. فيه راجل هو كان الوحيد اللى كان قادر يعمل سيارة مصرية 100% بأمكانياته وامكانيات المصانع التى يملكها والمصانع اللى كان يأمل فى شرائها من اجل ان يستطيع استكمال منظومة تصنيع السيارة المصرية..هذا الرجل كان يستطيع ان يخلد اسمه فى سجل التاريخ كرجل وطنى مثل طلعت حرب ولكن طموحه السياسى والمالى الزائلين قضوا على ذلك الحلم وسيضعوا اسمه فى مزبلة التاريخ كمصاص دماء للشعب..هذا الرجل هو م/احمد عز..فهو يملك مصنع للصلب المسطح بالسويس والذى يستخدم فى تصنيع هياكل السيارات..وكان يحاول ولازال شراء قاعدة الصلب المخصوص الوحيدة فى الشرق الأوسط وهى شركة الصلب المخصوص بالسادات وهذا الصلب يستخدم فى تصنيع جميع الاجزاء الميكانيكية للسيارات والسفن والطائرات والصناعات الحربية عموما وقد اشترى 5 آلآف فدان بجانب هذا المصنع لإنشاء اكبر مصنع فى الشرق الأوسط لتصنيع قطع الغيارعموما يعنى طن حديد التسليح الآن بسته سبع الآف جنية اما طن الصلب المخصوص فأضرب فى اتنين تلاته وساعات اضرب فى عشرة وبعد كمان التصنيع ممكن يصل الى ضعفى ثمنه..شوف كام الف عامل كان سيجدون لهم شغل..شوف كم المكاسب التى كانت ستجنيها مصر كلها مش شباب المنوفية فقط ..شوف .......وشوف ........وشوف ........

الآن فهمت قصدى وان الحلم بتاعى مش للرفاهية ولكنه لفتح ابواب رزق كتيرة لشباب بلادنا ولخير بلادنا..على العموم تابع مقالتى عصر اليوم ..ستجد فيها الإجابات على اسئلتك ولكنها فى النهاية هى مجرد كلامات تحتاج لمن يترجمها عمليا..اشكرك

[abnmoussa]

المشاركة الأصلية بواسطة mostafa10

والله كلامك منطقي وجميل بس انا ليا سؤال صغنون
هل ياترى يا هل ترى مصر أو اي دولة عربية -مش سيارة - عندها القدرة انهاتصنع عربية بجد؟
ولو استطاعت هلهتبقى منافس يعتمد عليه ؟
عايز الاجابة بدون تفاؤل زائد أو تشاؤوم محبط الله يخليك - خلينا ناس عمليين بقى
وبعدها لكل حادث - ونش وعسكري مرور

ياعم مصطفى صباح الخير ..هل قرأت رأس الموضوع؟؟؟ بدون تفاؤل او تشاؤم وبدون لطم الخدود.
يأستاذ سوريا انتجت خلاص سيارتها وطرحتها فى السوق بنسبة مكون وطنى حوالى 40% وستزيد بعد 5 سنين الى نسبة 100% حسب كلام بشار الأسد..فهل سوريا سحبت البساط الصناعى التكنولوجى من مصر زى ماسحبته فى الفن!!!!!!!!!!!!.
ليبيا ستطرح فى السوق سيارتها الوطنية واسمها الصاروخ فى 2010 وهى فعلا زى الصاروخ وزى افلام جيمس بوند ودى نتاج وعصارة فكر القذافى..فهل ليبيا بقت اشطر من مصر..وهل القذافى اشطر من مبارك؟؟؟؟؟؟؟؟؟؟؟؟؟؟؟
السودان ستطرح سيارتها الوطنية "مهيرة" قريبا ..فهل السودان اقدم من مصر صناعيا؟
الجزائر ستعلن قريبا عن تصنيع سيارتها الوطنية بالتعاون مع فرنسا او اوروبا او شرق آسيا ومن ورائها المغرب وورائهم السعودية ودبى.
ياخبر اسود ومنيل وهو احنا وصلنا لهذا الحد من التدنى والإنحدار بعد ماكانت مصر هى بلد الريادة اصبحت مصر بلد الريالة وطبعا الفرق كبير جدا بين الريادة والريالة..بالطبع مبروك لأخوتنا العرب واولادهم الشطار للتقدم على ام الحضارات وصاحبة الإنجازات الغنائية والرقصية والحاضنه لساقطات لبنان تحت مسمى الفن وحرية الإبداع الجسدى الموظوظ..وسلم لى على نانسى عجرم

[BATISTA]

ابن موسى


صباح الفل


لى عودة للرد على تعليقك