هام الي ادم وحواء

[call_of_duty]

انا مفروسه من حكايات الطلاق عشان مسلسل "نور" وبصراحه انا عاوزة اتكلم في الموضوع ده:-

اولا:
انا هدي قرصه ودن لحواء ايوه انتي يالي بتستني المسلسل وتعدي الدقايق علي ميعاده,وتفضلي سرحانه في "مهند" وتحلمي معاه, ماتستني جوزك التعبان الشقيان ,الي بيجري علي لقمه عيشه, ومستني حد يخفف عنه, بدل مايجي ويلاقيكي لسه بتعملي الاكل ومبحلقه في المسلسل وماتزعليش لو قالك كلمه جامده بصراحه تستهليا. ادي الاهتمام لجوزك اهتمي بيه وراعيه فكري فيه بدل ماتفكري ايه اللي هيحصل في الحلقه ,فكري في جوزك وبتقولي ليه جوزي مش بيسمعني كلمه حلوه ؟؟ ماهو من اللي شايفه راجع من الشغل لقي ريحتك بصل وطبيخ ومتنحه ادام المسلسل عاوزاه يعملك ايه ؟؟يعملك كوبايه شاي لزوم الاندماج مع مهند؟ يا حوا حسي بقي اهتمي بنفسك .حاولي تخلي جوزك مايفكرش الا فيكي, انتي مفتاح الابواب المغلقه,البسي احلي الملابس واتعطري مش كل مايجي يلاقيكي بنفس الهدوم والريحه ؟؟ غيري لبسك ,شعرك,ريحتك,مكياجك, خليه وهو راجع بيفكر انتي هتفجأيه بايه؟ حضريله مره اكله بيحبها وحطيها علي السفره او التربيزه او حتي الطبليه وحطي شمعتين انشالله شمعه اللي بنولعها لما النور يفصلاعملي جو رومانسي بلاش دي ...........لينيه بالكلام يعني لما يقولك"هاتي الشاي "ماتقوليش "حاضر" قولي" من عنيا" "طلباتك اوامر يا روحي" استخدمي كلمات والله الكلام ببلاش قوليله "ياروحي" "يا حبيبي" "يا عمري" اهي كلمات تلين الحجر. هتلاقيه يعاملك بلطف. واذا رجع البيت طهقان احتويه, ضميه ليكي خليه يفضفضلك ويرمي حمله عليكي والله الرجاله بتتعب راعي دي اهتمي بكل حاجه خاصه بيه عاتبيه براحه برقه وبصي بقي يا ست انتي المسلسل ده تمثيل في تمثيل اخلقي انتي رومانسيه باسمك

تعالي بقي يا ادم وهقولك كلمتين حطهم حلقه في ودانك المشكله اكيد مش في الحلقه المشكله في ودانك, اهتم بمراتك عاملها كويس اكدب عليها قولها"بحبك" قولها "ايه الحلاوه دي" مش يوم ماتقولك :"قولي حاجه حلوه" تقولها "بسبوسه" صحح اخطائها برفق يعني ماتقولهاش "مالك شبه البومه كده" لو لقيتها عاملالك نيولوك قولها "انتي جميله بس امبارح كنتي احلي" هي من نفسها هتعدل من نفسها وانت راجع البيت خد معاك ورده بنص جنيه بوسها واديهالها حسسها انها علي بالك ..رن عليها وانت في الشغل كأنك بتقولها انا فاكرك ياحبيبتي اكدب عليها قولها كلام حلو والله العظيم مش حرام الكلام ببلاااااااااااااااااااااش خرجها مرة مشيها علي الكورنيش مش هتخسر جاحه
يارب ماكونش انا نسيت حاجه ويارب يهدي سر الجميع وفي النهايه بقول المسلسل تمثييييييييييييييييييييييييييييييييل والله تمثيييلللللللللللللللللللللللللللللل حب مراتك وحبي جوزك
تحياتي وتمنياتي بحياه سعييييييده

[omarr]

ماندى

الف شكر على النصائح المفيده جدا ..


تحياتى لك و لقلمك

[cham]

شكرا على النصائح ياريت كل زوجين يطبقوهم كانت حالات الطلاق تقلصت وخفت الخلافات الزوجية.....

[call_of_duty]

ميرسي شام وميرسي لعمر علي المرور الكريم واتمني ان اكون قلت حاجه مفيده ومضيعتش وقتكم علي الفاضي

[abc]

إن شاء الله نبقى نعمل كده ..


بس لما نتجوز الأول

ألف شكر على النصائح ..

تحيتي ..

[امل حياتى]

شكرا ماندى على النصايح
فعلا انا شايفه ان موضوع نور ومنهد اخد زياده شويه فى وقته
ربنا يهدى نقول ايه بس.....
وشكرا ماندى نصايحك جميله جدا
تسلمى يا جميل

[call_of_duty]

abc شكرا يا برنس علي مرورك تحياتي

[call_of_duty]

امل حياتي شكرا اختي الغاليه علي مرورك الكريم وشكرا علي مجاملتك الرقيقه