فكره جديده ياريت الكل يدخل ويقول رأيه فيها>>

[hamada112]

يا جماعه امبارح الاخت تامير وضعت موضوع جديد اسمه بنى ملال
وانا اخدت من موضوعها فكره جديده ومفيده لكل الاعضاء من الوطن العربى
الفكره ان كل واحد يقول هوه من اى مدينه فى بلده ويكتب نبذه عنها
وعن موقعها وعن اهم الاحداث اللى حدثت فيها
وده هيساعد معلومات كتيره لكل الاعضاء عن مدن كتيره فى وطننا العربى
ياريت الكل يقول رأيه بصراحه
واللى موافق يبدأ ويقول معلومات عن مدينته
ولكم ارق تحياتى

فلا تأسفن على غدر الزمان لطالما ............. رقصت على جثث الأسود كلابا
لاتحسبن برقصها تعلو على أسيادها........ تبق الأسود أسودا و الكلاب كلابا
تبق الأسود مخيفة في أسرها ..........حتى ولو نبحت عليها كلابا

[hamada112]

هكون اول واحد اشترك فى الموضوع واحكى عن مدينتى
انا عايش حاليا فى الاسكندريه
بس انا اساس من مدينة طنطا
ولذلك هتكون حكيتى عن مدينة طنطا
طنطا عاصمة محافظة الغربية بمصر، وتقع على بعد حوالي 92 كم شمال القاهرة.
وهيه فى وسط الدلتا بالظبط وعشان كده بتسمى بعاصمه وسط الدلتا
هيه تالت مدينه من حيث المساحه فى وسط الدلتا المحله الكبرى والمنصورة
جامعه طنطا اكثر المدن جامعات بعد القاهره والاسكندريه والتي تشمل عدد كبير من الكليات المختلفه
اصل جامعه طنطا هوه فرع من جامعه الاسكندرية وفى سنة 1972تم فصلها واصبحت جامعه بحالها تحت اسم جامعه وسط الدلتا وتغير اسمها لجامعه طنطا عام 1973
طبعا ومنساش اهم معالمها الاسلاميه -الجامع الكبير وهوه جامع السيد البدوى--اللى له اثر كبير فى قلوب كل المسلمين واللى بيجى له الناس من كل منطقه فى مصر
احلى حاجه فيها وانا بحب كشرى مديح مشهور اوى على مستوى مصر كلها
وطبعا حلوانى مصر اللى ياما شفنا معاه ايام حلوه ايام الجامعه وهوه موجود فى ميدان الساعه
واللى هوه من اشهر مادين طنطا
ونجى بقى لأهم الشخصيات مدينة طنطا وهمه كتير جدا بس هقول الاشهر منهم
شاعر النيل حافظ إبراهيم
الرئيس السابق اللواء / محمد نجيب(اول رئيس لمصر بعد الاستقلال)
الشيخ السيد النقشبندي-الشيخ محمود خليل الحصري -بطل كمال الأجسام أنور العماوي
الفنان محمد فوزى -الفنانة هدى سلطان-سميحة أيوب-الفنان محمد ثروت-الفنانه امينه رزق
المغنيه الشابه مي الكساب-الكابتن احمد شوبير-الكابتن طارق السعيد-
وطبعا ما ننساش امين جامعه الدول العربيه عمرو موسي
يارب اكون قربت لكم شويه معلومات عن طنطا
لكم ارق تحياتى

[محمد كمال على]

فكرة رائعه
أسجل حضورى
ولى عوده

[مستر كاراتيه]

فكره جميله جدا

وبما إننا جيران انا هاكتب عن ...


كفر الزيات

المساحه 1230 كيلو متر مربع
التعداد حسب 2007 500,000
نسبه الاميه فوق 15 سنه 19 % ( انا مش منهم )

كفر الزيات تقع بين القاهرة والاسكندرية في منتصف الطريق وتقع على ضفاف النيل الذي يزيدها جمالا حيث يعتبر كورنيش النيل بكفر الزيات هو أجمل مكان يمكن ان تراه بمحافظة الغربية. وتقع ايضا علي طريق القاهرة الاسكندرية الزراعي وعلى خط السكة الحديد بين القاهرة والاسكندرية ونظرا لاهمية مدينة كفر الزيات فان هناك عدد من القطارات التي تقف بمحطة كفر الزيات وتكون باقي المحطات التي تقف بها هي عواصم المحافظات ، فهي بالفعل أجمل واهم المدن التي تقع على طريق القاهرة الاسكندرية بعد عواصم المحافظات.

حصلت على المركزالرابع على العالم من حيث التلوث الصناعي في اواخر القرن الماضي وذلك لكثرة الصناعات الكيماوية .

وهى غنية بالمصانع والشركات مثل مصانع الكيماويات والمبيدات والاسمدة والمبيدات الحشرية والورق واللزيوت والصابون.

وكانت في منتصف القرن الماضي من أشهر مدن مصر ومن أهم المدن الصناعية في الشرق الاوسط.

سكنها العديد من اليونانيين في القرن الماضي عندما كانت من أجمل مدن مصر.

ولد بها الرئيس محمد نجيب وهو اول رئيس لمصر. وولد بها ايضا محمد البرادعي مدير الوكالة الدولية للطاقة الذرية. و عدد من أكبر المشايخ والقراء في الدول الاسلامية.


من شوارعها: شارع الكورنيش وشارع الجلاء وشارع الجيش.

من أهم الاحياء بها: حي محمد نجيب ( عند بيتنا ) وحي عرابي وحي المنشية الجديدة وحي الفراعنة.

اهم الاندية الرياضية: نادي المالية ، نادي البلدية ( بشتغل فيه مدرب كاراتيه).

اهم اماكن الترفيه: شارع الكورنيش ،( جامده التمشيه عليه ) النادي اليوناني.( بلعب فيه بلياردو )

اهم المطاعم : كشري صفصف ، فول أبو شارب ، بيتزا حسونة(

أهم المحلات عتريس , مكتبه رحمه الله , ستديو أوسكار , سنترال شقليط .. وده المحل بتاعى ( دعايه )

وده الرابط بتاع كوبرى كفر الزيات الجديد
شايفين اللا نش اللى هناك ده .. انا بقى ساعه ما بياخدوا الصوره دى ..مكنتش فى اللانش ده

http://wikimapia.org/2176597/ar/%D9%...8A%D8%A7%D8%AA


شكرا ليك

[hamada112]

هههههههههههههههههه والله شكل الموضوع
هيعرفنا اشياء كتيره عن بلادنا فى الوطن العربى
وانا اشايف انه هينفع دعايه لكتير من الناس هنا
يلا شغلو الدعايه واهى حاجه ببلاش كده
وشكرا على اراءكم الجميله