الورد الجورى
منورة كعادتك دائما ياورد
السلام عليكم
ازيك يا دكتورنا طبعا و الله منورنا و بنستفيد
جدا جدا بكلامك معانا
دور اسئلتي الـ 29
نبدأ باسم الله
29 بس ياورد ؟؟
وجاية على نفسك كده ليه ؟؟
(1
)
لديك اخ و اخت - ربنا يخليكم لبعض -
اذكر :
صفتان معنويتان لكل منهما كنت تتمناهما في شخصك ؟
فى اختى : العفوية ,, الذاكرة الضعيفة
فى أخى : التدين الشديد ,, الصبر
اقربهما اليك من حيث التحدث و الافضاء بالاسرار ؟
اختى رغاية كبيرة وانا مستودع اسرارها
الاقرب اليك ملامحا ؟
أخى وهو يكبرنى بعام واحد فقط
واحنا صغيرين فى ابتدائى كان الشبه مذهلا لدرجة ان البعض كان بيفتكرنا توأم !!
(2)
ترتيبك في بين اخوتك الصغير
ما مدى سلبيه و ايجابيه هذا الترتيب
سلبيته اننى كنت احيانا باسكت واكتم فى نفسى رغم علمى اننى صح لانى الصغير
وايجابيته ان والدى ووالدتى جربوا التربية فى اخواتى وتلافوا العيوب معايا انا
(3)
لكل فرد منا مخاوفه التي يحملها معه في
مراحل حياته . فما هي اكبر مخاوفك
ممممممممم
وبعدين معاكى ياورد؟؟
اكبر مخاوفى هى ان أمضى الى خالقى وعلى ّ دين لأحد سواء كان ماديا او معنويا
وأيضا اخاف ان أمرض مرضا طويلا عضالا ليس خوفا من المرض نفسه ولكن لانى لا احب ان اكون عبئا على أحد.
(4)
تجبرنا الحياه على مواقف عديدة فكيف تتصرف فيما يلي :
- دعيت الى الطعام في احد البيوت لا المطاعم و فوجئت بطعم الاكل
غير مستحب او وجد فيه ما يمنعك من اكله و ذلك في كل الاصناف
كيف تتصرف ؟؟
موقف محرج فعلا,, تقصدى مثلا الاكل كله لاقط جاز ولا حاجة؟؟
ساذهب الى سيدة المنزل واخبرها اننى قليل الذوق فعلا لانى كنت جائع جدا قبل الحضور اليهم واضطريت آكل ساندوتيشات
فحاسس فعلا بشبع شديد واخاف لو اكلت ثانية ان تتعبنى معدتى
- امامك في المنزل جار لك تعلم اشد العلم انه مسيء لك و لنفسه
و للجميع و مع ذلك يصبح عليك بابتسامه عريضه لا تشوبها شائبه
كيف تتعامل معه ؟؟
الابتسامة دى يخليها لنفسه
أول ما يورينى سنانه حاقابل الابتسامة دى بامتعاض (وانا باعرف اكشر كويس )
احتمال بقى يسال نفسه انا عملت معاه كده ليه ويرجع عن اسائته لنفسه وللغير
- رئيسك في العمل يريد منك تقريرا طبيا عن احدى الحالات
ذلك لمنفعه شخصيه له و للشخص المدعي انه مريض
ولكنه قد يؤذي الغير
كيف ترد عليه ؟؟
بمنتهى الهدوء ساخبره ان هذا التقرير مغرض وغير صحيح وقد يضر بالاخرين
واننى لن اكتبه مهما كانت النتائج
واننا أقسمنا قسما يوم صرنا أطباء ,, فان اراد الحنث به هذا شأنه ام انا فلا
وبالمناسبة حدث هذا فعلا وكان هذا موقفى تحديدا
- جلست في احد الافراح بجوار مجموعه يتحدثون و لفت انتباهك
انهم يتحدثون عن شخص بنقد لاذع و فوجئت في وسط او نهايه الكلام
ان الشخص هذا هو احد اقرابك و تحبه
كيف ستتصرف ؟؟
أفهم من السؤال انهم يجهلون قرابتى او معرفتى باللى بيقطعوا فى فروته ده
ساسمع كل ما يقولونه فى صمت ودون اى تعبير على وجهى
وبعد ذلك سانصحهم انهم لما يكونوا ناويين يسلخوا واحد تانى المرة القادمة عليهم التأكد ان مجلس السلخ لا يضم احد اقربائه او من يعرفه معرفه وثيقة
واختم حديثى معهم بسؤال ياترى لما فلان يعرف الدرر اللى بتقولها عليه دى حيكون رأيه ايه؟؟
واسيبهم يضربوا اخماس فى اسداس لكن مش حاقول لقريبى ما حدث بطريقة مباشرة وانما عندما يحين توقيتا مناسبا سأنصحه بتوخى الحذر بعض الشىء فى معرفته وعلاقته بالناس
ولو سالنى عن السبب فى قولى هذا ساخبره لانى عرفت ان هناك من ينتقدنى ويتظاهر امامى بانى ما حصلتش (حالزقها فى نفسى يعنى)
(5)
تحمل دائما طفولتنا و مراهقتنا و نضجنا مواقف محرجه مضحكة
اذكر موقف لكل مرحله من هذه المراحل يتسم بالاحراج المضحك
" يعني 3 مواااقف موقف في الطفوله و موقف في سنوات المدرسه و اخر في الجامعه طمع بقى "
موقف فى الطفولة :
حاستأذنك ياورد اخلى موقف الطفولة موقف فى المدرسة الابتدائى لانى مش فاكر مواقف الطفولة اوى ( كانت مُعذبة بعيد عنك )
موقف فى المدرسة الابتدائى :
انا قلت لكم انى انا واخويا كنا كاننا توأم
واحنا فى المدرسة الابتدائى كنت فى سنة تالتة واخويا فى سنة رابعة
مدرسة الفصل بتاعه كانت طيبة اوى زيادة عن اللزوم وكان اسمها ابلة فاطمة.
اخر يوم فى الامتحان بتاعى كان اخويا لسه ما بدأش امتحان
والدى كان عدى عليا ياخدنى ودخل سلم على الناظرة فطلبت منه طلب غريب اوى
قالت له انا عايزه محمود يدخل الامتحان بدل محمد اخوه !!!!
بابا استغرب اوى وسالها عن السبب,, قالت له اصل ابلة فاطمة طيبة زيادة عن اللزوم وانا عايزاها تصحصح شوية,, فعايزة اشوفها حتعرف ان ده مش محمد ولا لأ
طب ومحمود حيعرف يجاوب على امتحان محمد؟؟ ده بابا اللى بيسألها ,, قالت له انا عارفة من المدام ان محمود بيقرا كتب محمد وكتب منى كمان
المهم ما تعرفيش بابا جرا له ايه وافق على الطلب الغريب ده
ورحت وامتحنت بدل محمد وابلة فاطمة دى كانت بتحب محمد جدا,, وخدتنى بالحضن بحرارة
طلعت النتيجة بقى وابلتكم فاطمة جرى على الناظرة وهى فرحانه اوى
شفتى ياأبلة محمد طلع الاول عليهم انا مش مصدقة (دى ابلة فاطمة طبعا)
عندك حق ما تصدقيش يافاطمة (دى الناظرة طبعا) لانه ما كانش محمد فعلا ده كان محمود اخوه,, حتفضلى لحد امتى طيبة زيادة عن اللزوم كده يافاطمة ويضحّك عليكى
اللى حضروا الواقعة دى وحكوها لنا بيقولوا ان ابلة فاطمة كانت حتقع من طولها
لما دخلنا السنة الجديدة لقيت ابله فاطمة جاية عندنا فى الفصل وشكلها كده متضايق,, انا شلت الهم طبعا لانها كانت طيبة فعلا وما كنتش بحب ازعلها او اضايقها
كده يامحمود تعمل فيا كده وتمتحن بدل محمد وما تقوليش وتكمل عادى خالص ولا كأن فيه حاجة؟؟ انا وشى كان احمر وما عرفتش ارد اقول ايه لقيتها بتضحك اوى وتقول لى خلاص حصل خير ما هو الواحد ما بيتعلمش بالساهل
ضحكت لما لقيتها بتضحك,, وفضلت بعدها فترة كل ما تقابل محمد تتفرس فيه اوى ليكون محمود.
موقف فى المدرسة الاعدادى :
كان على ايامنا فيه مسابقة مشهورة فى التليفزيون اسمها الكاس لمين وكانت بتقدمها ماما سميحة اشهر من قدم برامج الاطفال ومسابقاتهم
كان بيختاروا 3 من كل مدرسة ويعملوا مسابقة مع مدرسة تانية,, والمسابقة كانت بنظام زى مسابقة كاس كرة القدم كده
يعنى فيه تمهيدى ودور ال16 ودور ربع النهائى ونصف النهائى والنهائى
المدرسة بتاعتنا عملت لنا امتحان وأخدوا ال3 الاوائل والحمد لله طلعت منهم
رحنا المسابقة وابتدت الاسئلة
انا بقى كنت فى وادى تانى,, كنت قاعد ابص على الحاجات اللى نازلة من السقف واللى طالعة من الارض والكشافات والراجل اللى قاعد على كرسى متحرك بكاميرا وزمايلنا اللى جايين يشجعوا
سامع السؤال وعارف الاجابة وكله لكن فعلا زى ما اكون فى مكان تانى وانا فى وسطهم
قاعد ابص شوية تحت وشوية لفوق وشوية على الجمهور
ال2 اللى معايا كانوا فراودة وقاموا بالواجب وكانوا بيردوا هما
جينا لاخر سؤال بقى وعصلج معاهم
لقيت كوع فى جنبى وزميلى بيقول لى رد الله يخرب بيتك انت ما قلتش حاجة ابدا حنخرج من المسابقة
فقت وبهدوء كده قلت اجابة السؤال وكانت صح الحمد لله
ما انساش يومها نظرة ماما سميحة ليا,,نظرة ذهول (الظاهر كانت فاكرانى أخرس)
لما روحت واتفرجت على الحلقة فى التليفزيون كانت فضيحة فعلا
2 قاعدين مركزين وبيجاوبوا وواحد قاعد يبص يمين وشمال وفوق وتحت وساكت
بابا يومها زعل منى وفضلوا اخواتى ماسكينها ليا فترة
المهم انا كنت فعلا زعلان من نفسى على التوهان اللى كنت فيه ده
واستمرت الحلقات ووصلنا للدور النهائى احنا ومدرسة بنات
وللاسف خسرنا الكاس يومها بسبب تحيز ماما سميحة الشديد للبنات
موقف فى الجامعة :
هو موقف "مقرف" شوية معلش
فى اعداى طب كان علينا تشريح الضفدعة والتعابين!!!
وكان لازم نشترى ضفادع وتعابين عشان نتمرن عليهم فى البيت.
رحت للراجل اللى بيبعهم كان معاه شوالين بمنتهى البساطة كده مد ايده فى اول شوال وطلع كبشة ضفادع وحطهم فى كيس وراح مطلع كبشة تعابين وحطهم فى كيس تانى.
انا شفت كده ارتعبت,, قعد يضحك وقال لى ما تخافش منهم دول مش سامين وما بيعضوش كمان,, والتعابين كانت رفيعة وصغيرة.
رحت البيت ودخلت وانا باتسحب بالراحة.
انت جبت لنا ايه معاك يامحمود (دى ماما وهى مبتسمة كده ان ابنها كبر وبيجيب حاجات معاه للبيت )
فتحت الكيسين اوريها اللى فيهم,, ماما شافت التعابين من هنا وكان حيغمى عليها
وحلفت ياهى ياالتعابين فى البيت,, وطبعا انا ما كنتش احب ازعل ماما ابدا,, فى على طول دراعى كده طوحت كيس التعابين من البلكونة.
وشرحت الضفادع وفضلت ادعى انه ما يجيش ليا تعبان فى العملى.
يوم العملى بقى كانوا بيندهوا علينا بارقام الجلوس,,ندهوا على رقمى,, دخلت لقيت على لوحة التشريح تعبان مشرف ومخدرينه ليا .
يانهار مش فايت,,انا عمرى ما شرحته ويادوب اعرف ان له جلد .
كان فيه معيد موجود بيلف فى المعمل وشوية فنيين واقفين ,, ندهت اقرب واحد فيهم وقلت له انا عندى حساسية حتى من منظر التعبان
وانا باكلمه دبيت فى ايده 5 جنيه بحالهم (مبلغ كبير اوى ايامها),, والظاهر بقى وشى كان لون الطماطم ( من خضتى انه جه ليا تعبان فى التشريح) فالراجل صدقنى ان عندى حساسية والفلوس برده لها مفعول
الراجل زى الحاوى كده بدل التعبان بضفدعة وانا قاعد باغطى عليه عشان المعيد ما يشوفوش
وشرحت ونجحت وكملت وبقيت دكتور الحمد لله,, وكل ما افتكر انى كان ممكن اسقط بسبب تعبان اضحك.
(6)
بالتاكيد انت ممن يمارسون القياده
و اعتقد في اول عهدك بالقياده قد سببت الضرر لسيارتك
اذكر :
نوع السياره التي كنت تقودها
طبيعه الحادث الذي حصل
تداعيات الموقف في المنزل
نسبة خطأك في هذا الحادث
تخيلى بقى ياورد ان اول حادثة لاول عربية سقتها مش انا اللى عملتها !!
اول عربية جبتها فى حياتى كانت لادا
وكنت ايامها نائب صغنون فى المستشفى بعد ما اتخرجت
وكنت فرحان بالعربية اوى وناقص انيمها جنبى على السرير
يوم من الايام رئيسة الممرضات شافتنى وانا رايح اركبها
مبروك يادكتور محمود على العربية,, الله يخليكى ياست سنية
الست سنية بقى كان عندها 128 وبتسوقها بس سواقتها على قدها
وايامها اللادا كانت لسه نازلة مصر جديد
ممكن اجرب عربيتك يادكتور محمود؟؟ ممكن بس افضل نخلينا هنا فى حوش المستشفى
الست سنية تمركزت على كرسى السواق وانا جنبها
وراحت وجت بالعربية مرتين فى الحوش وانا باقول فى سرى الحمد لله جت على خير
وهى خلاص حتبتدى تركنها بدل ما تدوس فرامل داست بنزين اكتر
والاقى لك العربية هوب نطت ولا بتوع العاب القوى وبقينا فى الشارع
واتلطشنا من كل العربيات اللى جاية فى الاتجاهين
وانا باحاول باستماتة اشيل رجلها من على البنزين ودى اتخشبت خلاص,, بالعافية لما عرفت اشيل المفاتيح من الكونتاكت.
نزلنا من العربية واحنا دايخين,, والاقى عربيتى الجديدة اختفت ملامحها خلاص,, لدرجة ان سقف العربية كشكش زى الورقة كده
تداعيات الموقف فى المنزل انهم ما صدقوش انى مش انا اللى عملت كده وخليت الست سنية تكلمهم بنفسها
وزى ما انتى شايفة نسبة خطئى فى الحادث انى اشتريت العربية.
(
7)
عاده الاب و الام يورثان في الابناء طبائع مماثله لهم
ماذا ورثت من طباع والدك رحمه الله ؟؟
وماذا ورثت من طباع والدتك رحمها الله ؟؟
ورثت من طباع والدى رحمه الله الحزم عند اللزوم,, قوة الشخصية,,الإباء.
وورثت من طباع والدتى رحمها الله الطيبة,, الحنان,, إيثار الاخرين على النفس
(8)
علمنا من اجاباتك السابقه انك لو لم تكن طبيبا
لوددت ان تكون موسيقيا
فأي من آلات الموسيقى مقربه اليه
و على ماذا تستطيع العزف ؟؟
انا اهوى البيانو وأعشق الكمان والهارب
وللاسف لا استطيع العزف,, وقد حاولت مرة ان اتعلم لشدة ولعى بالموسيقى لكن ما كانش عندى خُلق.
(9)
اعتقد انك مارست الطب لمده تقارب 20 عام او اكثر
اذكر :
على اي اساس و باي دوافع اخترت التخصص الذي انت طبيب فيه
اخترت تخصص الامراض الباطنية لانها هى الطب الحقيقى وتتفرع منها كل فروع الطب تقريبا ,, والماهر فيها يعد مرجعا طبيا بذاته.
افضل الصفات التي استقيتها من مهنه الطب
استقيت الكثير من مهنة الطب : الدقة,, التأنى ,, الشك فيما لا يقبله العقل,,سرعة اتخاذ القرار فى المواقف التى تتطلب ذلك,, رباطة الجأش وثبات الاعصاب
ضريبه دفعتها نتيجه امتهانك لتلك المهنه
إن كان على الضرايب فهى كتير
: هى مهنة الراحة فيها غير مضمونة وكلما كبرت فيها كلما زادت اعبائك المهنية,, لابد ان تكون طالبا وتدرس حتى اعتزالك لها فالطب يتغير ويتبدل باستمرار,, اندمجت فيها بشدة بعض الاحيان فنسيت نفسى وحقها علىّ.
موقف طبي جعلك تتمنى الا تكون طبيبا لكي لا تراه
حادثة عربية لعائلة ونقلوها عندنا فى المستشفى
رجل وزوجته واولادهما ولد وبنت اعمارهم لم تكن تزيد عن 12 او 13 سنة
الرجل توفى بعد نقله عندنا مباشرة
وتم وضع زوجته واولاده فى غرفة بها 3 اسرة يفصل بين كل منها ستارة.
وكنت انا النائب النوبتجى يومها
كانت حالة الزوجة حرجة للغاية وتوفيت بالفعل بعد ساعات من دخولها
اما الولد والبنت فكانت مجرد كسور بسيطة
مكثت معهم فى الغرفة
وفتح الولد الستارة اللى بينه وبين اخته,, وبدأ الحديث بينهم
هما بابا وماما فين؟؟
انا فهمت من الدكتور اللى قاعد معانا هنا ان بابا حالته تعبانه موجود فى الرعاية المركزة انما الحمد لله ماما معانا هنا
سمعت كده ابتدت دموعى تنساب منى غصبن عنى (انا كنت قاعد بعيد عنهم فى اخر الغرفة)
طب عايزين نطمن على ماما افتح الستارة عشان نكلمها
انا سمعت كده نطيت عندهم فى ثانية وانا باقولهم ماما كانت متألمة اوعى واديناها منوم وما صدقنا انها نامت
وجبت الكرسى بتاعى خليت ضهره فى السرير الفاضى بتاع الام.
فضل الولد والبنت يتكلموا ,, وانا كأتم دموعى بالعافية. واخيرا ناموا
انا ما جاش ليا نوم لحد الصبح وساعتها اتمنين فعلا انى ما اكونش دكتور عشان ما اشوفش اللى حصل قدامى ده
(10)
لكل منا حدسه الصادق عن نفسه او احبته
ما مدى صدق حدسك و توقعك لحدوث امر ما سواء لك او لمن
تهتم بامرهم و سواء كان الشعور بحدوث منفعه او ضرر .
عارفة ياورد انا حدسى عالى لدرجة ان اللى حواليا ساعات يقولوا مكشوف عنك الحجاب وساعات يقولوا مخاوى
انا بافسرها انها فراسة من عند ربنا + تجارب كثيرة جدا هى من كونت هذا الحدس
(
11)
اكمل كل مما يلي
- بالنظر الى دولاب ملابسك سنلاحظ ان اللون .........+........ متواجد بكثر
الازرق + الرمادى
و لن نلاحظ اللون ....................... مطلقا
ههههههههه,, جميع الالوان موجودة عندى حتى الموف والتركواز
- تحتوي ميداليه مفاتيحك على ....... مفتاح و الميداليه على شكل .........
هما 3 ميداليات واحدة للعمل( فيها 5 مفاتيح) واخرى للمنزل (فيها ايضا 5 مفاتيح) وثالثة للعربية( فيها مفتاح واحد غلبان) وباغير فى الشكل كتير ما عنديش شكل محدد
- احب في المرأه .............. + ...............+ ...............
الشخصية + الذكاء + الحنان
و اكره فيها .................. + .............. +..............
الحماقة + الغرور + القسوة
و امل منها عندما تكون ............+ ................+ ..................
متكبرة + عنيدة+ طماعة
- كنت احلم في صغري بـ .................... و لم يتحقق لان ...................
بان اكون طيارا ولم يتحقق لانى بالبس نضارة من صغرى
فقررت التنازل عن حلمي هذا و استبدلته بـــ .........................
واستبدلته بالطب
- من هواياتي ............... بسبب .....................
السفر بسبب قراءاتى الكثير جدا من الكتب
+ .............................. بسبب .......................
الموسيقى بسبب انها تفعل بروحى ما تعجز عنه الاشياء الاخرى
+ ............................... بسبب ........................
النت بسبب وجودكم ووجود ابن مصر
- اضعف كثيرا امام ............... + ................. + .............
دموع طفل + انكسار أنثى+ بنت اختى (هدى)
- اخجل من نفسي ان قمت بـ ............... + ................. + ...............
بلوم احد بسرعة + بمداعبة احد واكتشف انه لم يتقبل هذا + بأن ابدا أنا الاكل ونحن فى عزومة.
- من عيوبي التي اواجه بها اني ...................... + ........................
شديد الحساسية + كسول فى الاشياء التى تتعلق بى
- من مزايا شخصيتي التي لا يختلف عليها اثنان ............. + ............... +........
هذه اتركها لكم ( ولو انى اشك انكم حتلاقوا مزايا )
(12)
ما رايك في كل من الامثال او المقولات التاليه
" الطبع يغلب التطبع "
مثل صائب جدا ويذكرنى بالمثل الشعبى " لقيتك ما التقيتك والطبع فيك غالب وديل الكلب لم ينعدل ولو علقوا فيه قالب "
" خنفسه شافت ولادها ع الحيط قالت ده لولي ملضوم في خيط "
هههههههههه,, ايضا يذكرنى بالقرد فى عين امه غزال
" اذا كانت لك ذاكره قويه و ذكريات مريره فانت اشقى اهل الارض "
فعلا ياورد مثل اصابنى فى الصميم وصدقينى ان النسيان نعمة كبيرة.
" اصدق الحزن ابتسامه في عيون دامعه "
لا اشعر به مثل الامثال السابقة,, وفى رايى ان أصدق الحزن وأعظمه عيون باسمة وقلب يبكى.
" لا تنهى عن خلق و تاتي بمثله :. عار عليك ان فعلت عظيم "
هذا من احد مبادئى وهو مثل عظيم ليت الكثيرين يتمعنوا فيه
" اذا كل كلب القمته حجرا : لاصبح الصخر مثقالا بدينار "
مثل بليغ ويدل على كثرة من يعوون فى زماننا هذا
" اللي بيحضر ولاده معزته بتجيب تلاته و اللي بيغيب بتجيب واحد و بيموت "
ههههههههه,, الاهتمام باى شىء يثمره وقلة الاهتمام تجعل الشىء يذبل ويموت
" ان كنت كذوبا فكن ذكورا "
يعنى كداب وكمان بتنسى ؟؟
تستاهل اللى يجرى لك بقى,, اكيد اللى قال المثل ده كداب كبير.
(13)
هل تؤمن بالابراج و ما تتناقله عن توقعات مستقبليه او حتى وصوف
لطبائع الاشخاص ؟؟
لا أؤمن بالابراج بصراحة هى فى رايى من ابواب التنجيم وكذب المنجمون ولو صدقوا
(
14)
اذكر 10 مساوئ للشعب المصري لو تعدلت لتغيرت امور عده
1- الطيبة فى غير محلها.
2- الافتقار الى الموقف الموحد.
3- تقديس الحاكم ايا كان.
4- البرمجة ( ليست برمجة الكمبيوتر ) وانما الثقة فى القدرة على عمل شىء لا تدرى عنه شيئا.
5- الفهلوة ,, محاولة ايهام من امامك انك علامة زمانك وانت تعرف عدد صوابعك بالعافية.
6- التراخى,, شوفى اى احد يعمل فى عمل جديد وشوفيه بعد 6 شهور.
7- الفتاوى ( ليست الفتاوى الدينية ) ,, عندنا 70 مليون مفتى ما شاء الله,, اسال اى حد على شارع او مكان وعمرك ما حتسمع كلمة لا اعرف وابقى قابلنى لو وصلت المكان ده.
8- البكاء على اللبن المسكوب,, ما تقعدش تقول احنا كنا وكنا انت عملت ايه وحتعمل ايه بعد ما تخلص استعراض امجاد الماضى؟؟
9- الروتين ,, دخلنا عصر النت من زمان واغلبيه المصالح والوزارات ما زالت تبحث عن طابع الدمغة وختم النسر,, واذا اردت تنبيهم لذلك ابتسموا ابتسامة استخفاف ولسان حالهم بيقول مسكين ده مش عارف ان اروتين ده من 7 الاف سنة وحيفضل 7 الاف سنة كمان.
10- معلش,, ويُقال انها اختراع مصرى بحت وليس لها اى مرادف فى كل لغات العالم,,, وهى السبب وراء الكثير مما يحدث لنا الان.
****
كفايه 14 دلوقتي
لان ايدي وجعتني من الكتابه
هكمل الـ 29 المره الجايه
و يارب متكونش الاسئله طويله عليك
لك تحيتي
تمت بحمد الله موقعة الورد الجورى
شرفتى ونورتى ياورد ومرحبا بك باى اسئلة اخرى
تحياتى
__________________
