7- رايك اية فى مقولة اصبر على جار السوء يا يرحل ياتيجى لة مصيبة تريحك منه
وهل ياترى حصل الموقف دة معاكى قبل كدة ؟
انا مش مع المثل ده ابدا يا محمد
هو اوله سليم انه نصبر
بس المشكله اني من الناس اللي لو حد آذيني قوي مش بقدر ادعي
بردو عليه و لا اتمناله الشر بالعكس انا بتعب جدا و بزعل عليه لو
عرفت انه حصله شيء
و عموما انا في تعاملاتي بحب دايما اطبق الايه الكريمه
" ادفع بالتي هي احسن فاذا الذي بينك و بينه عداوة كانه ولي حميم "
بالنسبه للموقف بصراحه مفيش 
انا اصلا تعاملاتي مع جيراني قليله جدا و تكاد تكون منعدمه
يمكن بيشوفوني في المناسبات و الاعياد الوطنيه و القوميه بس 
بس لما بيشوفوني بشعر فعلا بمحبتهم ليا و ده في اعتقادي الشخصي
راجع لطيب التعامل الصادر من ابي - حفظه الله من النار -
و امي - الله يخليها يارب -
8- ايام الدراسة ولا أيام الامتحانات كانت افضل
(انا عارف ان الاتنين حاجة خنيقة) بس فى ناس بتفضل ايام الدراسة وناس بتفضل ايام الامتحانات وهل حصل معاكى موقف فى الامتحانات لسة عالق فى ذاكرتك ؟
انا عن نفسي بفضل ايام الدراسه على ايام الامتحانات
عاده الواحد بيكره الروتين و الرتابه و بالتالي الدراسه افضل
لان فيها اختلافات يوميه مثلا بنقرا اللي هناخده و بعدين بناخد الماده العلميه و بعدين
بنقراها و بعدين بنذاكر و ده كله بيتخلله لعب و كده
لكن الامتحانات بتكون كلها قلق و خوف من حاجات كتير
زي نسيان نقاط معينه او خوف على جهد مبذول ممكن يضيع
و انا في الخوف ما شاء الله متوصاش
موقف من الدراسه :
المواقف كتير قوي يا محمد
عموما في موقف كنت قلته قبل كده بس هقوله بتفصيل اكتر
اهو ورده مستضيفانا و الواحد حاسس بجد البيت بيته
في احد الامتحانات العمليه للكيميا
جه توزيعي جنب حوض الميه و لهب التسخين
و المكان ده نقمه ما شاء الله مش نعمه 
ربنا رزقني بقى ببنت معانا الله يكرمها يارب
تقريبا و العلم عند الله مش عارفه اننا في امتحان من الاساس
و باينها متعرفش اصلا ده كيميا و لا نبات 
جت تعمل تجربه باستخدام انبوبه اختبار و الطبيعي و المنطقي
انها تسخن و فوهة الانبوبه بعيد عنها و عن اللي حواليها
دي بقى بارك الله فيها بتسخن في وشي و ريحة الامونيا " نشادر "
شغاله ايه ممتازه يعني الواحد دماغه لفت من اولها
المهم انا بعدت عنها سنة بسيطه و متكلمتش و قلت اهي هتخلص
و تروح لحال لسبيلها .. و بعد شويه جت تغسل ادواتها ع الحوض
و غرقتني بالميه و انا يادوب لحقت بس ورقه الامتحان عشان متتبلش
بصيتلها و بردو سكت بس بصراحه قلت اكيد هتعتذر لكن
طبعا ولا عبرتني 
و بعد ربع ساعه جت بقى معاها بليت للتسخين و حطتلي بيكر في حمام مائي
و البيكر ده شيء زجاجي شبه الكوبايه كده و فيه بنزين و شيء جميل بجد
المفروض و الطبيعي انها تقف قدامه انما هي ذهبت في مهب الريح و سابتلي القنبله دي جنبي 
و اللي زاد حده الموقف اني ببص على البيكر الداخلي
لقيته مشقوق و ممكن يتكسر فقلت لا بقى انا مش هسكت
و يادوب لفيت عشان اناديها 
لقيت السكشن كله بيقولي ابعدي بسرعه و المعيد جاي يجري
يقفل الانبوبه 
طبعا انا الصوت العالي لوحده منفرد كده
بيفزعني جدا و مع الموقف الرائع ده الفزع تضاعف بقى
وانا لما اتفزع ما شاء الله بفقد حاسه النطق نهائيا
المعيد زعق للبنت بقى على اهمالها و انا بصراحه صعبت عليا
و حتى لو مكنش زعقلها انا بردو مكنتش هكلمها
اصل الله العالم بحالها ايه و احنا في امتحان فممكن اوترها لو خانقتها
فطبعا سكت و كملت امتحاني .. و لما سلمنا الورق خلاص و بنظبط امورنا عشان
نمشي من المعمل جت البنت دي و غسلت ادواتها في الحوض جنبي
و كان معاها انابيب فيها سائل اسود و مش راضي يروح لونه بالميه فجابت حمض مركز و شغاله غسيل بيه و نترت عليا شويه .. قلت بس اكلمها بقى لانه كده كتير بجد
بس جالي تلفون و مكلمتهاش .. لما طلعت بقى و رحت اغير البالطو و البس الجاكت بتاعي
لاننا كنا في الشتا شفت في الحمام شيء غريب لقيت انه برغم ان البالطو بتاعي
كان سليم الا ان هدومي بطبقات الشتا الكتيره حصل فيها حرق من الحمض ده
وسبحان الله انه البالطو محصلوش شيء و سبحان الله ان الجاكت لما هلبسه
بردو هيداري المشكله و مفيش شيء هيبان
ساعتها عرفت كويس معنى مقوله ان القضاء بيكون شديد بس ربنا بيلطف
بعباده و انه اللي ربنا ساتره العباد متفضحوش
و دي نعمه من الله و صحباتي اللي كانوا بيغلطوني انه ليه مزعقتلهاش
لقيتهم بيقولوا " ان الله يدافع عن الذي امنوا "
فعلا كان ممكن ازعقلها بس كان ممكن بردو الحرق ده يؤذيني
او انه يكون مش بيتغطى بالجاكت
طبعا بعدها رجعت البيت عيطلي شويتين تلاته اربعه خمسه
بس من كل قلبي الحمد لله يارب على سترك ليا
9- 5 عادات بتحبيهم فى الشعب المصرى و 5 عادات مش بتحبيهم فى الشعب المصرى ؟
5 بس يا محمد ؟؟
دحنا مليانين عادات كويسه و الله
طيب نجرب
1- طيبه القلب و العاطفه في التعامل
2- خفه الدم المعهوده عننا و حتى و احنا في المحن
3- كرامتنا اللي فوق كل شيء و مهما كانت العواقب بنصونها
4- اصرارنا الشديد على التحدي و اننا كشعب لما بنحط شيء في دماغنا
و نحسن التخطيط له بنفذه على اكمل وجه
5- عشقنا لتراب مصر مهما الناس قالت و مهما الاحوال ازدادت سوء
المساوئ بقى اللي اتمنى بجد زوالها
1- الدروس الخصوصيه لانها مبوظه التعليم عندنا جدا جدا
و مطلعه اجيال ينفعوا يشتغلو في السكرتاريا فقط
2- العاطفه الزائده الممزوجه بميول شخصيه اللي بتدفع الناس للتهور و العنف
3- الفئه الحرفيه اللي عندنا لا يؤمنون بالتخصصيه في العمل
مفيش فني غسالات و فني تلاجات و فني مكيفات
في واحد بتاع كله و مفيش حرفي بيعترف و يقولك .. لأ انا معرفش في الشيء ده
دائما عارف و فاهم و عبقري و بيقول باللفظ و عذرا لنقل الجمله و لكنها دارجه
" انا اصلحه واصلح ابوه كمان بعون الله "
4- اهمال موارد طبيعيه في ادينا انها تحسن مستوياتنا
و مش اهمالها بس لا ده فوق الاهمال تلويثها ايضا
زي مثلا مياه النيل اللي بنشرب منها و اللي بتتلوث بـ 900
طريقه دون النظر الى انها امراض بتدخل اجسامنا
5- التقليد الاعمى و سوء التخطيط الاقتصادي
بمعنى انه لو فلان ده فتح في المكان ده بقاله لبيع المواد الغذائيه
تلاقي حواليه 90 واحد مقلدينه فيخسر و يخسروا هم
و بردو لما بنزل البلد عندنا و اشوف ارضنا الزراعيه
بلاقي سوء التخطيط الاقتصادي واضح
فلان زع ارضه مثلا رز تلاقي الكل تاني يوم زارعين رز ييجوا يبيعوا يلاقوا السعر
مضروب في الارض و كساد في السوق و يلاقوا مثلا البطاطس مرتفعه في السما
تاني سنه تلاقي الكل زارع بطاطس فبردو نفس الفكره و بردو نازل سعرها
لكن لو حصل تبادل و جدول زراعي منظم يخدم المنطقه و يخدم كمان التربه
هتكون الحياه احلى و متنظمه اكتر
10- بم انك مشرفة عامة ياترى حاسة ان المنتدى ناقص تعديلات ؟؟ وفين ؟
الله يكرمك يا محمد
انا اشراف عام ضغنتت
اشراف عام تخصصي فقط
بس بردو هقول رايي
المنتدى ناقصه تعديلات ايوة بس مش ماديه
و انما معنوية .. اصل الاشياء الماديه مقدور عليها زي اننا نغير استايل
و نفتح قسم او قسم فرعي ده كله زخارف و هوامش
انما المهم المضامين اللي هو احنا كاعضاء
المنتدى فيه شيئين نفسي يتغيروا
1- الحاجز العالي اللي بانيينه الاعضاء بينهم و بين المشرفين
مع انه برغم علوه هو حاجز وهمي جدا جدا
لان انا و باقي افراد الطاقم الاشرافي كلنا بنحب الاعضاء جدا جدا
و كلنا مش بنفرق .. اصل المشرف عضو في الاول و الاخر بس بصلاحيات و العضو بردو مشرف .. مهو بيظبط مواضيعه و بينصح اصحابه لو حد منهم غلطان و بيطبق القانون يعني العضو بردو مشرف ضمنيا اهو و بيقوم باعباء المشرف
بجد و من قلبي نفسي الكل يعرف انه احنا هنا للفائده و انه المحبه هي بساطنا
اللي قاعدين عليه و هي مظلتنا اللي فوقنا فياريت محبتنا دي تدوب الحواجز الوهميه
و ياريت الكل يعرف انه اي مشرف فعلا بيحب الاعضاء جدا و انه مفيش شيء اسمه مشرف بيكره عضو او حاطه في دماغه .. انا مثلا لما باجي اقفل موضوع او اطبق قانون و احذر حد او احذف جهد مبذول بجد و الله العالم اني بكون مستاءه جدا جدا
و زعلانه على زعل العضو ده و بلوم نفسي مليون مره مع علمي اني اللي بعمله صح
2- الشلليه الواضحه في المنتدى بشكل مش لطيف
كل مجموعه قافلين عليهم حته معينه و مفيش مرونه في التعامل و لا احتكاك
و ممكن بدون قصد يؤذوا بكلامهم الشخص الجديد المنضم اليهم و يحسسوه فعلا بالغربه
او بنوع من الكراهيه لتواجده .. لانهم هم منغلقين على انفسهم و مش بيطلعوا من مكانهم الا لمجاملات بعضهم البعض او عذرا في اللفظ اوقات الامور بتصل للتهليل الوهمي
لموضوعات لا تستحق .. ياريت نحاول نتعاون اكتر من كده و نتحاب اكتر من كده
و نراعي الفرد الجديد و منحسسوش انه منبوذ او انه ذنبه انه اتاخر في الدخول
و ياريت كمان اشوف حبايبي مرتادوا ضحك و لعب و جد معانا في الساحات النقاشيه
و الموضوعات الجاده ايضا
11- بم ان احنا فى مصر هل الدراسة لها نطاق بمجال العمل يعنى بنشوف ناس معاها شهادات كتيرة بس للأسف بيعملو فى مجالات غير تخصصهم ؟
احنا للاسف معندناش في مصر تخصصيه
مثلا من سنتين او تلاته على الاكثر جمعتنا الصدفه انا و ابي
- حفظه الله من النار - بشاب يبيع انابيب على دراجه ..انبوبتين بانبوبتين
و صدم ابي و صدمت معه عندما صارحه الشاب انه خريج هندسه المنصوره
فعلا كدت ابكي لحاله
احنا للاسف يا محمد الشهادات عندنا للفخر بس مش اكتر و لا اقل
و ده خلل في القاعده التعليميه عندنا
مهو لما اسمع ميكانيكي بالكاد بيعرف يبصم بيتقاله دكتور عفشجي
لازم اعرف ان في خلل
و لما اقرا انه اشهر زبال في مصر و اغناهم هو من خريجي كليه علوم
لازم احزن على حالنا و شهاداتنا اللي ملهاش الا انها
تتبل و تتشرب ميتها جايز تفيد
12- رايك فى كل من :
أ- موقف الحكام العرب فى التعامل مع القضايا المعاصرة ؟
بالرغم اني مش بحب الكلام في السياسه
الا اني باختصار اقدر اقولك
موقفهم و موقفنا معاهم مخزي
اللهم اعزنا بدينك
ب- تعدد قنوات الشات على النايل سات ؟؟
شيء مستفز جدا جدا
و الواحد بيخجل من نفسه و بيخجل سلفا للشباب اللي باعتين
لو قرات رساله من رسائلهم
للاسف ناس فاضيه او مش حاسه بقيمتها في الحياه
بتعبث مع اهدار اموال و كله كذب في كذب
ج- انتشار الفتاوى والمشايخ على القنوات الفضائية ؟
الوعي الديني حلو و انتشاره قد يؤدي لصحوة
ولكن ياريت المستمع يعرف هو بيسمع لمين و يعرف انه
اصل كل فتوى صحيحة هو القران و السنه فبلاش نستمع و نتبع
تشدد المتشددين و المتطرفين و لا خزعبلات المتساهلين
دينا واضح و كامل و لا يحتاج الى اضافات او حذف
فقط يجب علينا ان نعقل ما نسمعه و ان نحسن الاختيار لمصادر استقاء الفتوى
د- الحكم الذى أصدرته محكمة جنح سفاجا بالبراءة فى قضية العبارة "السلام 98" ؟
الحكم ده متوقع من اول محدثت حادثه الغرق
بلاش انا اتكلم في السياسه لانه لو فتحت سياسه مش هقفل
13- هل انتى مع أم ضد :
أ- انتشار المحمول فى متناول ايدى الشعب المصرى بمختلف أعماره ؟
ضد .. لان المفروض ان الموبايلات لاغراض الحديث فقط
مش للتباهي و ما الى ذلك فمش طبيعي ابدا ان بنت في اعدادي مثلا تشيلي موبايل
و تكلم الاستاذ بتاع الدرس و تكلم صديقها في الدرس و مسدات بقى
بجد ده غلط جدا و يفتح ابواب سيئه كتير
ب- تدخين النساء والحرية المفرطة
؟
بصراحه ده ملوش الا وصف واحد
انحلال خلقي و بعد عن الدين
فطبعا انا ضده
14- أكتر أكلات بتتفنى فى صنعها ياورد
؟
الحمد لله اكلي مشهودله بالطيب
و عاده انا بهوى اتفنن في كل اكلي شكلا و موضوعا
حتى اللي بياكل بيكون عارف انه ده انا اللي متدخله فيه
بس عموما الفن كله بيبان في الحلويات
لان مجالها الفني اكبر
15- اختارى 15 عضو واتكلمى عنهم فيما لايقل عن 10 سطور لكل عضو مع مراعاة عدم تكبير الخط
(سؤال اجبارى)
ياترى دة وراثة ولا حب للنادى على اقتناع
