ياقهلا ياقهلا
دكتور محمود نوّر الموضوع
ياخوفى منك يابدران
- ايه اكتر الاماكن اللي بتحب تزوها جوه مصر و بره مصر
جوه مصر : فى القاهرة احب الاماكن القديمة فيها,, القلعة,,الازهر,, الحلمية وفيه مكان على النيل فى المنيل بأحس انه واحتى الخاصة بس امتدت اليه الزحمة خلاص
وبحب اسكندرية وذكرياتها,, واسوان,, والسويس
بره مصر : انا الحمد لله لفيت العالم كله لحد الصين كمان بس عندى عشق خاص لاسنطبول وبرشلونة وباروحهم كل ما تتاح الفرصة ,, ايضا بحب دبى
على حد علمي انت شرقاوي الاصل (من الشرقية ) ... ياترى فيه صفة معينة حاسس انك ورثتها من البلد دي ؟ وياترى فكرت تزورها ؟
مش باقولك ياخوفى منك يابدران ؟؟
ممكن تقولى ورثت منهم الكرم (ولو انه غلط الواحد يقول على نفسه كده) وورثت منهم الطيبة (بيقولوا عليا طيب فعلا) ,, فعلا فكرت ازورها بس للاسف لم يحدث.
كلمنا عن والدك ووالدتك وعلاقتك بكل واحد منهم
عارفة ياعتاب لو اخدت صفحات المنتدى كلها اتكلم عنهم فلن تكفى ولن اوفيهم حقهم.
والدى رحمه الله كان وكيل وزارة التربية والتعليم وتدرج طبعا فى المناصب,,ايام ما كان ناظر لمدرسة الاورمان الثانوية كان مشهور جدا بحزمه وقوته وكانوا المدرسين يخافوا منه قبل الطلبة,,هذا الرجل الحازم القوى كان فى البيت يذوب رقة وحنانا علينا.
تعلمت منه الكثير وادين له بعد الله سبحانه وتعالى الى ما وصلت اليه.
لم أره يوما يسعى للمال ابدا مع انه كان فى استطاعته جمع الكثير جدا منه,, هو ابتدى مدرس رياضيات والف مع اخرين كتاب خاص مشهور للرياضيات ورفض تقاضى اى مقابل او عائد لذلك,, عندما كان يجد احد الطلبة مستواه متأخر يعيطيه درسا خاصا بالمجان والله زى ما باقولك كده.
كان يؤمن دائما ان الاستثمار الحقيقى هو فى اولاده وليس فى عقارات او اراضى او خلافه.
علاقتى به كانت علاقة صداقة مع الاحترام المفروض.
والدتى رحمها الله كانت أستاذة فى معهد الاقتصاد المنزلى ومن مؤلفى كتاب الطبخ الشهير مع أبلة نظيرة.
لم أر فى حياتى أنسان يحب بيته واسرته مثلها.
رغم عملها لم تجعلنا فى يوم نحتاج لاى شىء أو نشعر بأن هناك تقصيرا فى أى ناحية.
كانت تؤدى عملها كاستاذة فى المعهد وكربة بيت على أكمل وجه مع صعوبة ذلك.
لا اذكر اننا تناولنا طعاما من الخارج الا لو رغبنا نحن فى ذلك.
كانت تتمتع برصيد كبير جدا من التضحية وإيثار الغير. لم أرها يوما تفكر فى نفسها.
كان حبها الفريد لاسرتها حديث الناس فى عائلتنا الكبيرة.
كانت تجمعنى بها علاقة من نوع خاص بصفتى اصغر الابناء,, ولم تكن تدليلا بالعكس كانت تلقى علىّ بمسؤليات كثيرة,, ويوما ما سالتها مازحا الست انا الصغير ؟؟ فاجابتنى انت الصغير سنا والكبير عقلا .
رحمهما الله واسكنهما فسيح جناته.
الطب كمهنة محتاجة مشاعر والا الطبيب لازم يكون بلا مشاعر مع المرضى
اى مهنة وليس الطب فقط اذا لم تدخلها المشاعر ستصير جامدة ,, ولكن لا بد من حدود لهذه المشاعر تتوقف عندها وخاصة فى حالات الطوارىء.
كم من مرة تفاعلت مع المريض واهله وقد اشعر بالاسى عليه مثل أهله تماما.
وكم من مريض استمر مع فترة ثم سافر او انقطعت اخباره فاستوحشته.
احيانا مع بعض مرضى تليف الكبد ودوالى المرىء تبذل قصارى جهدك لكن طبيعة المرض لا ترحم ويأتى الأجل المحتوم,, كثيرا ما وجدت اقارب هؤلاء المرضى يحرصون على شكرى والثناء علىّ رغم وفاة مريضهم,, هذا يعنى عندى الكثير والكثير واهم من اى اموال او مكاسب أخرى.
هل الطب اختيارك والا التنسيق والا اختيار حد غيرك
وبعدين بقى فى الفضايح دى؟؟
شوفى ياستى
خالى رحمه الله كان طبيا مشهورا جدا فى الجهاز الهضمى ورئيس الاقسام فى كلية طب القصر العينى,,خالى ده بقى رصد 50 جنيه بحالهم مكافأة لكل واحد من ابناء العائلة يدخل كلية الطب
ال50 جنيه ايامها كانت تجيب 70 كيلو لحمة
(كان الكيلو ب 70 قرش ) وطبعا كانت تجيب حاجات كتير كمان
وانا فى ثانوية عامة كنت فكرت ادخل هندسة (ايامها كان علمى وادبى فقط) لانى كنت احب افك واركب اى حاجة وكنت فاكر الهندسة كده
الحمد لله المجموع كان يدخل اى حاجة انا عايزها,,بابا وماما قالوا لى انت حر اختار اللى انت عايزه وبابا قال لى ساعتها حتى لو ما دخلتش الطب انا حاديك ال50 جنيه (شكله كده كان متغاظ من خالى
)
لقيت فصلنا كله دخل كلية الطب ما عدا واحد دخل هندسة
توكلت على الله ودخلت كلية الطب وحبيت الطب فعلا ولم اشعر فى اى يوم انه كدراسة او عمل مفروض عليا
معلش حارغى تانى واقول واقعه ظريفة حدثت ايامها :
اول الثانوية العامة على الجمهورية كان من الفصل عندنا,, دخل معانا الطب,,فى سنة اعداى طب كنا عندنا 4 مواد فقط الاول ده جاب 4 ملاحق فى ال 4 مواد !!
ما رضيش يخش الملحق وحول فورا لكلية الهندسة,, وطلع عليهم الاول فى اول سنة يروحها........ مهم جدا جدا ميولك ايه ونبوغك يكون فى ايه,,انا مؤمن ان ليس هناك ما يسمى بالنبوغ المطلق.
لو لم أكن طبيبا لوددت ان اكون ......... (اكمل العبارة السابقة )
لو لم أكن طبيبا لوددت ان اكون موسيقيا !!!
هل انت انسان اجتماعي ؟ كم عدد الاصدقاء لديك ؟ وعرفتهم من امتى وازاي وفين وليه
اجتماعى فوق الوصف,, عددهم يمكن فوق الالف لكن الانتيم حوالى 20,, فيه اللى عرفتهم منذ نعومة اظافرى واللى عرفتهم وانا فى السعودية واللى عرفتهم خلال عملى,,, والغريب بقى انه من ضمن هؤلاء الاصدقاء البعض ما بيطقيوش البعض الاخر لكن كلهم يعلمون انى صديق للطرفين.
اي اقسام المنتدى تشعر بنفسك فيه ؟ بعيدا عن الاشراف العام طبعا
بحب اسرح واتوه فى حبر وورقة
ودهاليز المجتمع له عندى مكانه خاصة فهو اول قسم توليت الاشراف عليه
طبيبك اون لاين هو وليدى فى ابن مصر
عارفه ياعتاب انا اشعر بنفسى عند وجود الاعضاء وتجاوبهم وردودهم ونقاشهم وهزارهم ونقارهم كمان,,باحس بنفسى بجد ساعتها
اختار 5 اعضاء غايبين عن المنتدى (من قدامى الاعضاء ) واتكلم عنهم
مايا
عند الاختيار لا بد أن تاتى مايا على رأس القائمة
مايا النسخة الفريدة التى لا تقلد ولا تتكرر.
وهبها الله "الكاريزما" فكانت منتدى داخل ابن مصر
ربنا يمسيها بالخير ويوفقها فى حياتها
نبض القلب
الشاعرة.. الحالمة.. المحلقة
أثرت ابن مصر وحبر وورقة بروائعها وعزفها
تشعر بالالفة معها حتى وان كان اول لقاء لكما فى المنتدى
لعلها تكون بخير
عبورة
الكثير منكم لم يحضرها ولا يعلم عنها شيئا
خفة دم متناهية وسرعة بديهة رهيبة
رغم فترتها القصيرة فى المنتدى الا ان الكثيرين افتقدوا وجودها لفترة طويلة
يارب تكون بخير وموفقة فى حياتها
حامد محمود
ايضا لا أظن ان الكثير يعرفه
لكن من ينقب فى حبر وورقة سيجد الكثير من كنوزه
كانت موضوعاته وردوده منمقة ويفوح منها عطر أناقة الكلمات
لعله يكون بخير
حنين
يوما ما كان ابن مصر عمودين احدهما مايا والاخر حنين
رغم صغر سنها حينها الا انك تشعر انها ند لك
كانت تعطى لابن مصر مذاقا خاصا باسلوبها المتميز
غابت وعادت فجأة وغابت مرة اخرى لعلها تكون بخير
اختار 10 اعضاء حاليين واتكلم عنهم
أمرأة العزيز
خير خلف لخير سلف
انتابتنى الحيرة عندما وقعت عيناى على هذا الاسم
من يختار هذا الاسم لا بد انه يتمتع بقوة وشخصية مميزة
اشعر ان ما تكتبه يكون عزفا على اوتار وليس بكلمات وتعبر احيانا كثيرة عما بداخلى
abc
أيضا لفت نظرى هذا الاسم
من يختاره لا بد انه يتسم بنزعة التحدى ويغلب عليه المزاح
له اسلوب مميز فى طرح مواضيعه وفى ردوده
لكنى اشعر كثيرا انه فى مفترق طرق
ضحى
لا اعرف لماذا عندما تقع عينى على الاسم اتذكر جدول مياه ينساب بين ضفتين
تتسم ردودها بالهدوء والرزانة لكنك تشعر فى نفس الوقت ان هناك الكثير بين السطور
أعتقد ان المود (الحالة المزاجية) عندها لها تأثير كبير عليها,, واتخيل انها لا تستطيع الكتابة ومزاجها سيىء
من الناس الذين احرص على متابعة ما يكتبون حتى وان لم ارد عليهم.
جناب العمدة
قلم راق وذو حنكة
تشعر دوما انه يحترم الاخرين
قلة مشاركاته هل هى كسلا ام لظروف خاصة به
اتخيله عمدة فعلا بما تعنيه الكلمة من وقار وهيبة
قلب الكنارى
محيرة هى
تجدها تارة هادئة كصفحة ماء وتارة عاصفة كاعصار
كلماتها مميزه وتنفذ الى القلب مباشرة
اشعر ان لديها الكثير ولم تبح به بعد
عمرو ميزا
جنتلمان اخر (مع هاف ماجيك) فى ابن مصر
اتخليه مرتديا بدلة طوال الوقت من أناقة ردوده
تشعر فيها بالاتزان والحياد فى المواقف التى تتطلب ذلك
اعتقد ان امكانياته اكبر بكثير مما نراه الان
ابن شحطوطة
قلم بليغ
ولسان حريص دوما على دينه
قد اختلف معه فى بعض ارآئه لكنى لا املك الا احترامه وتقديره
اتمنى ان ارى ردوده فى موضوعات المنتدى المختلفة
نرجسية
عندما رايت الاسم لأول مرة اتنرفزت
وعندما تعاملت معها عرفت لماذا زهرة النرجس رائعة
تشعر انها تعشق المثالية,, وتسعى اليها فى مجتمع ليس مثاليا
لو سقطت صريع المرض فساضع نفسى بين يديها وأنا مطمئن
عمر
لم اتعامل معه كثيرا
لكنى اشعر فيه بالطيبة الشديدة والتلقائية
يعجبنى فيه حرصه على الصداقة وتقديرها
واشعر ان اعماقه لم تتلفها المدنية الحديثة
وردة النيل
واخيرا وليس اخرا مضيفتنا العزيزة
هذا اول تعاملى معها
لكن ما اراه ينبىء ببزوع نجم سيسطع فى سماء ابن مصر
ما هي مكاسبك من وجودك على النت ؟؟ وما هي اوجه خسارتك بسببه
المكسب الحقيقى من النت هو معرفة اشخاص مثلكم وانا اعنى هذا,, كل من عرفتة منكم أثر فى بطريقة او اخرى ,,اليس هذا مكسبا وكبيرا ايضا؟؟
اما الخسارة فتتمثل فى ضياع وقت كبير على النت وزعل بعض الاصدقاء والاقارب منى لتفضيل النت عليهم.
ايه هي العيوب اللي لو موجودة فيالشخص اللي قدامك تخليك تتجنبه
الكذب...الكذب....الكذب
الكبر
ضيق الافق
خسرت صديق قبل كده ؟؟ ولو ممكن احب اعرف السبب - ولو في رسالة خاصة
نعم خسرت واحدا من اعز الاصدقاء ,, والسبب هو السبب الأزلى (مش معقولة ما تعرفيش السبب الأزلى ياعتاب
)
ياترى ممكن ترجع في كلامك ؟ ممكن تتخلى عن قناعاتك عشان تحافظ على شخص ما
سؤال صعب,, يعتمد على مكانة هذا الشخص عندى,,
هناك فارق بين الرجوع فى الكلام والتخلى عن القناعات
الرجوع فى الكلام يحدث وقد يكون كثيرا حفاظا على شخص ما او لادراكى انه لم يقصد ما فعله
لكن التخلى عن القناعات صعب بعض الشىء اذ يجب ان اقنع نفسى اولا بالتخلى وهى لا ترضى بذلك بسهولة.
اعلم انك شخصية متسامحة جدا .. ياترى تعرضت لموقف خلاك تقول لا مش هاسامح
تعرضت بالفعل لموقف جعلنى ارفض التسامح
وفوجئت بنفسى اتسامح بعد عدة ايام
ويعلم الله انه لم يكن عن ضعف ابدا بل كان موقفى فى منتهى القوة
واغضب تسامحى هذا العديد منى
لكن كنت ادرك فى اعماق نفسى انى فعلا لا اعرف الكره,, حاولت من قبل وفشلت واجدنى سعيدا بهذا الفشل.
ايه الصفة اللي لو انتشرت في المنتدى (لا قدر الله ) ممكن ينهار
الانانية,,, فهى تتفتح الباب لتصرفات وافعال تجعل بلدا تنهار وليس منتدى فقط
اختار من الاعضاء ما يناسب النقط
عضوين توأم بتحس انهم شبه بعض ......
عضو عصبي.......
عضو غامض........
عضو محبوب .......
عضو لفت نظرك من بداياته.......
عضو غائب تنتظر عودته بلهفة...........
عضو عايز تسأله سؤال .... (مع ذكر السؤال طبعا )
عضوين توأم بتحس انهم شبه بعض ... ايشو وتيتو 14
عضو عصبي.......لونلى دوك
عضو غامض.......يوسف الشريف
عضو محبوب .....ميسم
عضو لفت نظرك من بداياته...أمراة العزيز
عضو غائب تنتظر عودته بلهفة.....مستكة
عضو عايز تسأله سؤال :
دونت بلاى ويز مى ,, والسؤال هو اليس الدنيا ابسط من ذلك بكثير؟؟!!
لو فيه سؤال مش عايز تجاوب عليه .. هاتعتذر عن الاجابة والا هاتجاوب اجابه مبهمة
ممكن الاتنين يتوقف ده على طبيعة السؤال
انا مؤمن ان لكل منا منطقة خاصة به لا يجوز اقتحامها لو السؤال ده مس هذه المنطقة ساعتذر عن الاجابة عنه على الفور
ولو كان السؤال محرج مثلا,, فساجيب اجابة تحتمل اكثر من معنى ويأخذ السائل ما يعجبه من هذه المعانى.
لو ضايقتك قولي عشان ارجع اسألك تاني ولو ماضايقتكش برده هاسألك
هو انتى سألتى حاجة ياعتاب ؟؟ انا فاكرك لسه بتسخنى
ماشى يا بدران... ماشى
تحياتى
بريء يا بيه
