محتاجة رايكم ضرويييييييييي

[nourlhoudaaa]

السلام عليكم انا ضيفة جديدة في المنتدى اتمنى تعتبروني اختكم زي ما انا هعتبركم انشالله.
انا عندي 26 سنة متدينة الحمدلله و محجبة.اتقدملي واحد عن طريق معارف لينا.هو اكبر مني ب 10 و نص تقريبا.هو طبيب مشهور و لسة جاي مالحج السنة اللي فاتت و بيقولو انو بيصلي الفروض كلهاو صلاة الفجر كمان.
قلولي انو هو عرف ستات كتير قبل كدة و عمل معاهم الحراك طبعا لكن هو راح للحج عشان يتوب و يدعي ربنا يديلو زوجة صالحة.
المهم في الاول اتكلمن في التلفون بعلم الاهل عشان نتعرف على بعض قبل ما ييجي البيت قالي انو لازم يشوف صورتيفي المسنجر .
لما شافها بقة بقى بيتغزل فيا ويقلي متلا شفايفك حلوين.اسفة على الكلام بس عشان اشرحلكو كويس.بالزمة دي مظاهر واحد تاب.
المهم جي عشان نتقابل في مكان عام عشان هو من مدينة تانية رحت بعلم الاهل طبعا تصورو اللي عامل نفسو متدين حاول يمسك ايدي و كمان بعتلي قبلة في الهوا!!!
و قالي انو عايز ييجي البيت بعد اسبوع بالكتير عشان نقرا الفاتحة و نلبس الدبل و اديلو الاوراق الخاصة بيا,عشان هو طبيب ظابط فلازم يدفع طلب عشان يوفقولو عالجواز.
تصورو اول مره يشفوه اهلي عايز نقرا الفاتحة و الدبل و كل حاجة!!!!
و كمان قلي انالعقدو الجواز هيبقى بعد ما تيجي الموافقة على طول من 3 شهور ل 6 شهوربالكتير!! و كمان هو من مدينة تانية مش هنلحق نقابلو كتير عشان نتعرف عليه.و المشكلة انو مخدش رايي يعني بيقلييا يا اما اجي بعد اسبوع و نعمل الخطوبة يا اما بلاش !!
انا عارفة انو مش و لا بد لكن بقة في ناس بيقلولي الرجالة كلهم كدة و اكيد انتاي عجبتيه قوي عشان كدة حاول يمسك ايدك و كدة و انك هتندمي عليه لو ما وفقتيش.
انا صليت استخارة كتير و كنت بحس اني قلقانة مش عارفة القلق طبيعي و للا لا
المهم هو قلي ردي علي بعد 6 ايم رديت عليه عن طريق المسنجر قلتلو ان اسبوع انو اسبوع مش كفاية و حتى اهلي قالو كدة و كمان دا راي الواسطة اللي عرفتني بيك و اختك (عشان الواسطة دي تبقى صحبة اختو) قام قلي انتي ليه تحكي للواسطة عالحاجات دي قلتلو اولا هي اللي سالتني و تانيا دي مش اسرار عادي يعني قالي انتي مش ناضجة و وداعا و قفل في و شي المسنجر!!!!!!
بالله عليكو ايه رايكو في الشخص دا و هل كان لازم اوافق على خطوبة متسرعة كدة.
ردو عليا محتاجة لرايكو.

[ابن الصحراء]

السلام عليكم ورحمة الله بعد التحيه اختى العزيزه

حبيت اقولك ان كلامك عن الشخص ده مش مطمنى ومش مرتاح لكلامك عنه
بس الرسول عليه الصلاة والسلام بيقول(استفتو قلوبكم)فانتى استفتى قلبك وبعدين لازم تسالى عليه كويس اوى

اطلبى منه فرصه تسالى عليه وتسالو على اهله التسرع ده مايجيب غير الندم والعياذ بالله

لازم تسالى عنه وعن اهله كويس اوى وادعى ربنا اولا واخيرا

الاستشاره يا اختى ثم الاستخاره

وبعدين توكلى على الله واتخذى قرار وربنا مش هيتخلى عنك ولا هيضيعك انشاء الله

بس تانى تروى وتاءنى فى اتخاذ قرار مصيرك وحياتك والله المستعان وربنا يسعدك


محمد

[فارس اصيل]

الاخت الفاضله

الاستخاره اولا واخيرا

وانما انا لى راى اخر هذا الرجل لا ينطبق عليه الحديث الشريف
(ان جائكم من ترضون دينه وخلقه فزوجوه)
هذا الرجل لا اعتقد انه سافر الى الحج برغبته او بماله الخاص احتمال يكون حج عمل او من الجهه اللتى يعمل بها
انما واحد راح الحج وراجع يعطى قبلات على الهواء ويمس النساء وهذا اصلا غير واجب شرعا بخلاف سيرته اللتى سبقته واللتى تعرفيها انت كويس جدا
وكل ده قبل الدبل وقراءه الفاتحه

امال بعد الدبل حايعمل ايه

ومن اللى قال لك الرجاله كده
لا طبعا الرجاله عمرهم ما كنوا كده
دى حركات شباب طايش لا تمت للرجوله باى صفه
ارجو ان اكون قد قسيت عليكى فى كلامى انما
لو انتى اختى
طبعا ماكنش ممكن اوافق على التليفونات والماسينجر ومن ثم المقابلات

هو ناقص ايه تانى

اذا كانوا دبلتين يجعلون الشباب بهذا الوسيله
اكيد ارخص من البحث عن بنات الهوى

كما يا اختى سامحينى


اعتب على الاهل اللذين وافقوا على اللقاء بينكما دون حضور احدهم

هذا الشاب لا يناسب اختى ( ان اردتى ان تعتبرى نفسك اخت لنا )

[abc]

السلام عليكم ..

معلش أختي أنا هكلمك من وجهة نظر راجل .. و يمكن يكون الكلام ده قاسي شوية ..

بصراحة الحج مش دايما الإنسان بيرجع متغير منه .. ممكن أيوة يكون اتأثر و تاب و راح حج بس ممكن يرجع تاني لو ماكانش صادق التوبة من الأول و كان معتبر الحج ده كأنه "صك للغفران" ..

بصراحة أنا لا اؤيد تلك الزيجة .. و الراجل ليه تاريخ غير مشرف و واضح إنه لم يتعافى منه .. ده حتى من أول لقاء كده بيحاول يرتكب حاجات غلط .. و إنه يمسك إيدك أو كده دي مش حاجة طبيعية و لا حاجة ؟؟ لا خالص .. ما فيش حد بيعمل كده من أول لقاء إلا إذا كان إنسان غير محترم .. -و لا من آخر لقاء برضه لأنه حرام أصلا -

و حكاية إنه ياخ واحدة مش من بلده دي فيها "إنه" لأن يمكن أهل بلده عارفين اللي فيه و مافيش واحدة راضية بيه فقال ياخد واحدة ما تعرفوش و خلاص ..
كمان عاوز الموضوع يتم بسرعة قبل ما تلحقوا تسألوا عنه !!

ده غير إنه بادئها تسلط و أوامر و ماعندوش غير رأيه .. ده ما عاوز عروسة غير علشان الشكل الاجتماعي و للخدمة و خلاص ..


و أنا رأيي -و الرأي رأيك في الآخر- إن بلاش الراجل ده .. و لا تأبهي بتقدم سنك فكتير بيتزوجوا متأخر .. و ما ترخصيش نفسك لواحد زي ده ..

ده غير إنك بعد الاستخارة مش مستريحة ليه لكن إني حاسة بالضغط عليكي من اللي حواليكي .. فماتخليش الضغط ده يأثر عليكي
و من ترك شيئا لله عوضه الله خيرا منه ..

و ربنا يهيأ ليكي الخير ..

[وائل المصري]

اعلم انها المرة الاولي لكي معنا لذلك حاولي ان تتقبلي كلامي وان شاء الله تتعدوي علي اسلوب قاضي المنتدي
اعلمي انني ما ساقوله نابع من خوفي وخشيتي عليكي مثلكي مثل اختي
من قال ان الضابط ان كان شرطه او حربيه لابد ان يحصل علي تصريح امني
سيدتي
هذا يحدث في حاله ما كانت الزوجه من خارج البلاد فقط لاغير
سيدتي
الرجل كلمه مهما كانت الظروف يجب ان يفي بها !!!!
*خرجتي معاه بعلم اهلكي
* اتكلمتوا في التليفون بعلم اهلكي
* شات ونت ومسجر وغيره بعلم اهلكي
* مسك ايد وقبل في الهواء بعلم اهلكي
ليه لان انتي متدينه ؟ والله العظيم
*عمل حجات كتير مع البنات حرام وراح يحج من شان يتوب.
* مسك ايديك وبعتليك قبله في الهوي ليه اصله تايب وحاجج بيت ربنا
وبعدين هو موسم الحج جيه لسه؟
لا والمصيبه انه بيقول كل شيء هو الي بيقول
هو في ايه هو باب موجود ولا لا وحتي لو مش موجود مفيش عم مفيش خال
سيدتي
تخلصي من هذا الكابوس حتي لا تندمي علي ما فات بل وما سيأتي
هما كلمتين
تحديد موقف وموعد مع الاهل للارتباط ويكون رسمي اي كتب كتاب مش دبل وخروج ودخول وكده
والله مش فاهم هو في ايه!!!!!!!!!!!!!!!!
سيدتي
حافظي علي شرفكي وكرامتكي وحدد معه موعد رسمي لاعلان الزواج علي سنه الله ورسوله وبعدها قبله في الهوي قبله في الاكل هو حر
واقطعي اي مقابلات او اتصالات حتي يأتي بشكل رسمي
اعتزر علي الاسلوب
تحياتي

[nourlhoudaaa]

انا متشكرة جدا اخواني على ردكم و كلامكم منطقي مية في المية و على فكرة انا قبلته في مكان عام مليان ناس و وافقت اقابلة عشان هو كان عايز لمنا ييجي البيت لاول مرة نقرا الفاتحة و نعمل الخطوبة!!! فكان لازم يعني نشوف بعض في الحقيقة .انا وافقت اقابله لما سمعت انو متدين و حاج مكنتش متصورة انو هيصدر منو اللي صدر.انا حسيت انو عنيه زايغة جدا .على فكرة انا عرفت بعدين انو سبق و خطب مرتين و فسخ الخطوبة و كنت قد سالته قبل كدة انت ليه متجوزتش قبل كدة فقال لي لاني كنت مشغول بالدراسة و العمل.يعني شخص كداب كمان.
انا بالعكس مش زعلانة انا مبسوطة من ردكم لاني كنت محتاجة اسمع الكلام دا .
و انا فرحانة انو بقم عندي اخوان زيكم جزاكم الله كل خير.

[عسل قليل الدسم]

أشين ( أسوأ) صفة في الرجل هي الكذب ..

بيجيك اللي أفضل منه إن شاء الله.

[nourlhoudaaa]

شكرا لردك اخي

[انوووووش]

واضح جدا انو انسان مش محترم
وانا شايفة انك لازم ترفضيه
و غير كده اصلا في بينك و بينه فرق في السن كبير
يعني انا من رايي انه باي حال من الاحوال لازم ترفضيه
و ان شاء الله ربنا يخليكي تلاقي الانسان المناسب ليكي
و تعيشو مع بعض في سعادة

[nourlhoudaaa]

شكرا لردك يا انوووووووش جزاك الله كل خيررر

[mano_subzero]

god who is given can do it again

[ام مايا]

ماخاب من استخار ونتيجة الخيرة جات في وقتها وانتي قولتي انه بطل فليش بتسالي الموضوع انتهى صحيح

[لما]

السلام عليكم ورحمة الله

اختي نور الهدى

جميل انني اتكلم لبنت من جيلي

نور

عتبي عليكِ وعلى اهلكِ كبير يا اختي

اولا .. ان اتى شاب لخطبة البنت .. فان اهلها لا يتركونهم لوحدهم وهم في بيت والدها

ولا تخرج معه حتى بعد الخطبة لوحدهما

هذه عادات المجتمع العربي ومنطق الاسلام فهل نسيناها ام ما الذي جرى؟

ثانيا .. هل وافقتِ عليه حتى تقومي باضافته على المسنجر؟؟ هل درستِ اخلاقه ؟

وتعطيه صورتكِ ايضا؟؟ لا حول ولا قوة الا بالله

اما ثالثا واعذروني جميعا على هذه النقطة

اختي الكريمة كان هو معه حق بنقطة معينة

ان ما يحصل بينك وبين شخص ما .. لا يجب ان يخرج لآخر

وخاصة من يتقدم لخطبتك .. فماذا لو اصبح خطيبك ثم زوجك .. ووصله الكلام بعد ان تتزوجا

سيعتبرك افشيتِ اسرارا زوجية

تعودي على ضبط لسانك .. بأن ان انتهيتِ من حديث ما مع شخص .. امسحيه من ذاكرتك مؤقتا الى حين عودة الشخص نفسه .. اما لغيره فلا .. لان الرسول عليه الصلاة والسلام يكره القيل والقال .. اليس كذلك؟

وكم نسمع عن بيوت دمرت بسبب هذا الموضوع..

ان كان قد فعل او قال امرا سيئا وضر بمشاعرك .. فلكِ اهل تفتحي لهم قلبك هذا لانه ليس بينكما اي عقد رسمي

لكن في حال زواجك منه عليك ان تحتفظي بكل مشكلة ومصيبة وسيء في بيتك وبينكِ وبينه

ولا تخرج خارج اسوار بيتك




اعلم انني خرجتُ عن الموضوع ولكنه امر منتشر بين البنات وهذا غير جيد ولا يرضى عنه الرب


بالنسبة لموافقتك عليه

انا ان اتاني واحد مثله ارفضه عن عتبة باب البيت

اختي

ما زلتِ صغيرة .. ولستِ مضطرة على الموافقة عليه لمجرد شهادته كطبيب

طبيب على نفسه وليس عليكِ

من الممكن ان تتزوجي سائق تاكسي يخاف الله افضل بمليون مرة من طبيب مشهور (بوقاحته)

كوني بخير غاليتي

[nourlhoudaaa]

شكرا على ردودكم mano subzeroو ام مايا و لما.اختي لما انا ذهبت لمقابلته لانه اراد ان نلبس الدبل عندما ياتي لزيارتنا لاول مرة فكان يجب ان نرى بعض مباشرة لنتاكد اننا موافقين و كان ذلك في مكان عام مليء بالناس .انا اعرف انه غلط لكنه اصر على ذلك.اما في ما يخص انني افشيت الاسرار فهو لم يكن سرا الواسطة سالتني ماذا حصل بيننا اثناء اللقاء فقلت لها انه يريد ان نعمل الخوبة بعد اسبوع .هل هذا سرا????!!!!!!!!

[قمر الليل_]

ياريت الاهل يراعو ربنا في بناتهم كيف يمكن لاب ان يسلم بنته لانسان بالمواصفات دي (كفايه القبلات الي في الهوا )ده انسان مش محترم و الوضع ده مش مظبوط وليه التسرع ده ايه يجبرك علي كده؟