التــوك تـــــــوك

[midomod]

التوك توك

إختراع جهنمى عجيب يأخذك إلى عالم غريب

جلوسك بالتوك توك أشبة بجلوسك فى غرزة شعبية

عندما تدخن فيها الجوزة وتختلط بكائنات تشبة البنى أدميين

وتستمع فيها إلى ألون غريبة من الفنون الشعبية الضفدعية

عندما تستمع الى عماد بعرووور .. إبتسم فأنت فى توك توك
وعندما تجد كائنا يصدر صوته من مكان خفى

!!الست لما .. يا عينى لما.. الست لما .. دى الست لما

فابتسم فأنت فى توك توك

عندما تجد نفسك ترزع واحد ماشى فى الشارع بالشلوت بدون قصد بقدميك المطلة خارج التوك توك

إبتسم فأنت فى توك توك
==============
سؤالى دلوقتى

هل سبق لك وان ركبت التوك توك؟

هل انت مع ولا ضد ظاهرة التوك توك

[SpIdEr.KiLlEr]

اقولك ايه يا ميدوو تسلم ايدك موضوع جميل جداً ويستحق النقاش

بص يا سيدي

هل سبق لك وان ركبت التوك توك؟

يــاه مراراً وتكرار
هحكيلك على موقفين اتعرضت فيهم غصب عني لركوب التو توك

بركب التوك توك في الايام الي ميكنش عندي فيها كليه
على شان اروح اوصل اختي ( ربنا يخليها يارب )
وهيه في اولى اعدادي وانا بسهر طوول الليل فأكيد طبعاً بنام طول النهار
بس لما تيجي الساعه 12 ونصف الاقي موبيلي رن مين والدي يعقد بقى يتخانق معايه
ليه اخرت اختك فعلى طوول ألبس في ثواني واوديها في توك توك بس برجع على رجلي والله
وبالرغم ان بينا وبين المدرسه خمس دقائق مشي
انما هقول ايه بقى حكم القوي على الضعيف
بس انا الي بدفع ثمن التوك توك كل مره مش عارف ليه ولا شكلهم بيضحكوا عليه


وفيه مره كمان لما كنت في الثانويه فنزلت متأخر على الدرس
قولت خلاص بقى اركب توك توك وامري الي الله
وقولت للسواق من فضلك بسرعه على شان اتأخرت ويارتني ما قلتها
التوك توك كان على وشك الانقلاب اربع مرات بسبب السرعه الزائده اثناء عبور اربع مطبات
ودخلنا مرتين في تاكس بس السواق فضل الهروب على طووووووووووووووووول
بس سمع كلام زي العسل ربنا يباركله يارب

--------------------------------

هل انت مع ولا ضد ظاهرة التوك توك

والله برغم الحوادث الي تسببت التكاتيك في حودثها الا وان لهم دور كبير وفعلاً ريحونا شويه
دا غير ان التوك توك هوه وسيلة المواصلات الاولى في بلدان الغرب
==========
تحياتي ليك حبيب قلبي ميدوو ودمت بخير

[abc]

ههههههههه

وصفك عن ركوب التوك توك حلو قوي يا ميدو ..

فعلا الواحد بياخد باله أحسن رجله تخبط في حد و لا حاجة

و طبعا أن اركبت توك توك كتيييييييير ..

إلا إني مش بركبه غير علشان الضرورة ..

المشاوير اللي ممكن أمشي فيها بمشي أحسن .. هو أن اهوفر صحتي لإيه

اما بقى هل أنا مع أو ضد ؟؟

هم عندنا عاملين مصايب الدنيا لأنهم مش مترخصين !!

و تحس إن السواق راكب " عجَلة" مش عربية !! و تلاقي عيال صغيرة راكباه و حوادث كتيرة بتحصل ..
ده بالإضافة لجرائم السرقة و الخطف اللي بتتم بيه !!


لكن هو بصراحة سد فراغ كبير للشباب اللي كان واقف على النواصي طول اليوم .. بقى يقف على الناصية بعد الوردية بس

و بدل ما كان الشاب من دول يضرب أبوه و أمه علشان ياخد فلوش يشتري بيها بانجو .. بقى يعتمد على نفسه لما اشتغل على التوك توك

يعني ليه مزايا و عيوب ..

[فارس اصيل]

اصل العيب فينا احنا
احنا لو ركبنا دراجات لقضاء حاجياتنا لانتهت ازمه المرور
وازمه العربيات المتهالكه فى مصر كالسرفيس وما شابه ذلك
ده وبخلاف انها صحيه جدا جدا تحافظ على جسم رشيق
بس احنا اللى بنتكسف
البرستيج لا يتفق مع الدراجه


في سبعينات القرن الماضي، أثار المذيع التليفزيوني الشهير شفيع شلبي، ضجة صحفية، وانتقده كثيرون لأنه كان يتوجه إلى مبنى التليفزيون في ماسبيرو على دراجته.
يركن الدراجة أسفل المبنى ثم يصعد ويضع قميصا وربطة عنق بدلا من الـ "تي شيرت"، لقراءة نشرة الأخبار. ما الخطأ في ذلك؟ وما العيب في أن يخرج شاب ذكي عن المألوف طالما أنه يؤدي عمله؟ كان شفيع في ذلك الوقت شابا طموحا ومذيعا متميزا استطاع أن يفرض نفسه على الشاشة بذكائه وموهبته وقدراته الإعلامية، لكنه لم يقدر آنذاك على شراء سيارة، فجاءته فكرة استخدام الدراجة.

البعض يرى أنه يملك مساحة خاصة به وهو يقود دراجته ويشعر بحرية في الحركة. وعندما تصل إلى عملك تكون نشطا لأنك أديت بالفعل قسطا من الرياضة

حد قال موافق؟؟؟؟؟؟

[Beauty brensis]

أنا بقى من سابع المستحيلات إني أركب التوك توك لدرجة إنه مرة كنت راجعة من عند تيتى هلكانه مع مامتي و أخويا و اشترينا حاجات تقيلة و كتيرة و احنا مروحين, فماما و أخويا ركبوا التوك توك , و قعدوا يتحايلوا عليا عشان أركب و برده مركبتش رغم إني كنت هلكانه و فضلت أمشي على رجلي .
طبعاً التوك توك عامل عمايل دلوقتي صحيح إنه خدم الناس كتير بس برده في مشاكل كتيرة بتحصل من وراه .

تقبلوا مروري

[Beauty brensis]

شكراً ليك يا ميدو على طرحك الموضوع ده
لإن بجد التوك توك ظاهرة انتشرت كتير أوي
و تعبيراتك جميلة
و الحاجات اللي إنت قولتها ده فعلاً بتحصل

[RoOoKa]

انا بسمع اشكال والوان الاغانى دى فى المكروبازز
مش بس التكتك ..

انا ركبته مرة وانا فى المنيا .. كانت للترفيه غالبا
كنا بنمشى الحتة دى زمان ما بين بيت خالتو وبيت العيلة بتاع زوجها بس رحنا وجينا كذا مرة فركبناه

ومرة تانية وانا فى المنوفية
كان فرح معرفش مين كدا
ومامتى مكنتش قادرة تمشى عشان نروح نركب ونسافر


هو اختراع ممتاز جدا
اكيد حل مشاكل كتيرة
عايزين يلغوه لازم يوجدوا وسيلة غيره

الف شكر ميدو عالطرح والقسمة و و

[omarr]

سؤالى دلوقتى

هل سبق لك وان ركبت التوك توك؟

طبعا .. ولى الشرف .. ركبته مره واحده فى طنطا .. حسيت أنى فى فيلم أبيض

و اسود أنتاج مصرى .. هندى مشترك , و إن ريحه الدنيا كلها " كمون " ..



هل انت مع ولا ضد ظاهرة التوك توك


مش عارف بجد . حاجه تحير .. ماعنديش معلومات كافيه أنا ركبته مره واحده .

ومش بشوفه هنا فى البحر الأحمر و لا فى اجازاتى فى القاهره ..

[مغرم بيها]

بركب التوكـ توكـ كتـــــــــــــير اوووووووووووووووى
وكمان بابا مش بيمشى على رجله اصلا لو رايح المحل بتوك توكـ جاى البيت بتوك توكـ وانا اوقات ابقى معاه والتوك سلاح ذو حدين اولا نافع فى انه بيوصلك بسرعه للمكان اللى انت عايزة وثانيا اضرارة .. اضرارة اكتر من نفعه بكتير ودى تاخذ مواضيع يعنى مثلا ممكن تبقى ماشى والتوك توك معدى من قدامك ممكن يخبطك ويطلعك الغلطان وتلاقى عيال اللى راكبينه وشباب بيمشى يعاكسوا البنات يعنى التوك توك دة اختراع زباااااااااله

[اينال]

ركبت التوك توك بس
دا اخد من الواحد راقات
لا والظريف والطريف بالاضافه للانت كاتبه
ان التوك توك بيتأمر عليا
مفكر نفسه تاكسى يقولى اه اروح المكان دا
او لا ويحرجنى ويقولى اتفضلى انزلى
بس مضطره اركبه مفيش غيره والله

[نيهال]

راجعه
ده التوك توك ده لى نوادر معايا

استنونى

[مجرد شعووور]

انا بقى لو قلتلك ان ماحدش قدي مكسب التوك توك ابقى مش مبالغة
بصراحة من يوم مانزل المنصورة وانا مابقيتش امشي
شكلي هكسح من قلة المشي

بروح بيه في كل مكان لدرجة اني بنزل من المكروباص
يادوب اتنين سنتي والاقي توك توك مستني اركبه فورا

بصراحة انا شايفة انه كويس
يعني بيوصلني لغاية المكان الي انا عاوزاه
حتى لو كان في شارع ضيق
يعني مش زي التاكسي غالبا بيوقف على ناصية الشارع
التوك توك لغاية الباب

وبالنسبة للاغاني انا اول مابركب بقوله لوسمحت بلاش الكاسيت
بيطفيه على طول او علاقل بيوطيه على قده

انا شايفة له ضرر انه في الشتا بيبقى برد قوي
ودايما كنت لما اركبه في الشتا باخد برد وافضل عيانة طول الشتا ....

وكمان انه منظر مش حضاري
يعني الناس غالبا بتتطور مش بترجع لورا
ومعروف ان التوك توك وسيلة نقل البلدان الي الفقيرة مش المتحضرة ابدا ....

الحاجة التالتة انه ساهم في زحمة الشوارع اكتر ماهي
زحمة يعني الشارع دلوقتي بقى اخر ربكة عربيات ملاكي وتاكسي

وميكروباص وموتوسيكل وعجل وتوك توك دا غير البني ادمين الي زي الرز
يعني بقينا عايشين في بانوراما نقل مش بتنتهي

لكنه بصراحة مريح وامن
ومابقاش زي الاول فيه حوادث وكدا
لانه بقى وسيلة للكل
وبقى غالبية الي بيسوقوه شباب متعلمين
مش الصيع بس يعني

شكرا ليك ميدو
بس ياترى انت بقى رايك ايه فيه ؟

[إبتسامة]

يا جماعه الاختراع نفسه كويس

لكن العيب في مستخدمين الاختراع ده

يعني انا مثلا بحكم شغلي ما اقدرش استغنى عنه ابدااااااااا

لان المدرسة اللي انا فيها في قريه بعيده جدا عن الشارع يعني عايزة نص ساعه مشي على

بال ماتوصل للشارع وتقدر تاخد عربية

ده غير انه بيمشي في طريق زراعي وضيق يعني العربيات ما تقدرش تمشي فيها

هو عيوبه كلها في السواقين اللي بتسوقه يعني لو ممكن يكون في رقابة من الشرطة على

السواقين من ناحية الرخص ومن ناحية السن بتاع اللي بيسوقه يعني يتعامل زيه زي اي عربيه

تاكسي

وبالنسبة للحوادث وجرايم الاختطاف والاغاني فده شيء شايع في كل وسايل المواصلات

مش ال توك توك بس

[نيهال]

جيت تانى


بصو بقى حاحكى لكم على مغامراتى مع هذا الاختراع العجيب اللى اسمه التوك توك



بصوا اول ما اشتغلت روحت بلد كانت وسيله المواصلات بتاعتها هى التوك توك....مش التاكسى
كنت مسمياه الصرصار

لان لونه اسمر عاده الا من رحم ربى واخيرا شوفت البينك عليه
بجد حاجه مقرفه


المهم
كنت بقولهم مستحيل اركب البتاع ده ابدا.....ده ممكن يقع بينا او يتزحلق او يتكعبل فى مطب

بعدين كنت رايحه عزاء بالبلد دى واضطريت اسفه انى اسمع كلامهم واركبه لانها كانت الوسيله الوحيده اللى حتوصلنى
يا دوبك ركبته من هنا والى نزل عليا بضحك من هنا...........يحاولوا يسكتونى ابدا
ازاى اخدنا احنا التلاته مش عارفه
حسيت انه اعجاز يا ناس




ده غير نظام الصوت فيه........عبقرى والا كميه القلوب والدباديب .......تحس انها لعبه بيبى


ونظام السواقه فيها....عبقرى بمعنى الكلمه........يعنى ممكن يكون يريح رجليه على التابلوه وبيسوق
مش بقولكم اعجاز



وكلمات توته بتحب زغلول
ومش عارفه عيون ايه واسهم فين


بس والله فعلا مشكله لعده اسباب منها:
اللى بيتولى امور القياده عاده طفل لا يتجاوز 15 من عمره
فجاه تلاقيه طلعلك من حيث لا تدرى ولا تتخيل اصلا........فبيكون سبب لحوادث كتيره



وكانت امنيه عمرى قبل خروجى من هذا البلد انى اجيب مبيد حشرى باللى قدامى واللى ورايا
وانسفهم من على الطريق

[midomod]

تعليقاتكم جميلة على التوك توك

بالنسبة ليا

التوك توك تقريبا مش بركبه الا فى الشديد القوى

لو جاى من سفر وتعبان فبكسل اشيل الشنطة

واركب توك توك

بالنسبة لاهلى بردو فمش بيركبو توك توك غير لما يكونو صايمين ومش قادرين يمشو


طبعا انا مع وجود التوك توك لانه بيشغل ناس ...واهو يقضى شوية ع البطالة

وكمان وسيلة تقدر توصلك لاى مكان انت عايزه

لكن انا معترض على السواقين فى سنهم وتصرفاتهم والاغانى والسماعات الكبيرة

لو فى نظام ةرخص للتوك توك فيهكون ايجابى اكتر