المنافقون ....الذين يرتدون ....مسوح الملائكة الشرفاء

[Aboura]

أحبائي أعضاء عيلة منتدى ابن مصر


سامحوني مرة تانية أيها الرجال ....موضوعي للأسف عن فئة تمثل شريحة كبيرة في المجتمع


وهذه الفئة ببساطة شديدة هي ...........المنافقون من الرجال ....عفوا من أشباه الرجال


دول يا جماعه ليهم أشكال كتيرة جدا ....متلونين ....تتغير شخصية كل شبه رجل منهم حسب شخصية الضحية


وطبعا الضحية هي : الفتاة أو المرأة بشكل عام


والمرأة لمن لا يعلم تركيبها السيكولوجي كائن هش جدا يتأثر بالرومانسية والمشاعر


لأن المرأة تتنفس الحب مع الأكسجين - بينما الرجال دائما يأتي الحب في المرتبة الثانية ليهم بعد العمل


نعود مرة أخرى للمنافقين وأنواعهم - المنافق يبحث بمنتهى الذكاء عن نقطة الضعف عند المرأة ويقتحمها من خلالها

يدرسها ليعرف اي الرجال يستهويها ويتشكل في هيئته


النوع الأول : المنافق المنتدين : يتحدث دائما معها في الدين - كل كلامه قال الله وقال الرسول - يسبغ على نفسه

أعمال عظيمه يقوم بها تقربا الى الله - تنبهر المسكينه وتشعر بالأمان فمن يخاف ربه لا تخاف منه - وهكذا حتى

يصل لغايته


النوع الثاني: المنافق الثري: يتعامل مع الفتاة رقيقة الحال - مستخدما عنصر الابهار - يجعلها تشعر انها الملكة

المتوجة على عرش قلبه يغرقها بالهدايا الثمينة ويمنيها باللحظة التي ستحظى بها بشرف حمل اسمه والاقتران به

وفجأة لا تجده


النوع الثالث : المنافق المغامر : النوع ده بقى مشكلته كبيرة لأنه بيخللي البنت تحس انها لقت الفارس صاحب الحصان الابيض - كلماته رنانة جدا - بيتكلم على انه قادر على تغيير خارطة الكون - جريء ومتفاخر بقوته الجسمانية - النوعية دي قريت لهم كتير في عدة منتديات بيتكلموا عن اسامة بن لادن وغيره وبيقولوا حانجاهد حانجاهد - وهما طبعا اضعف من انهم يعملوا اي حاجه - ممكن يكون منهم ناس كويسة لكن انا هنا باتكلم عن العموم ( على فكرة لو كان اسامه بن لادن مسئول عن تفجيرات 11 سبتمبر يبقى مش مجاهد - ده يبقى مجرم - يعني فوقوا شوية من عمليات غسيل المخ دي )

البنت بتنبهر بالرجل اللي من النوع ده - صاحب مبدأ وهدف في الحياة - شجاع لا يهاب الموت لكن وقت الجد حاتكتشف انه انسان عادي جدا فيه الصعف وفيه القوة الطبيعية العادية


المشكلة ان المرأة بتكون شايفه النوعية دي وحواليها هالة من النور القوي لكن لما بتقرب بتكتشف انها قدام نيجاتيف باهت


طبعا فيه نوعيات كتيرة تانية بس بصراحة انا حاسيب ليكم مساحة لتفنيد هذه النوعيات بنفسكم وعرضها

حبيباتي كل بنت من بنات حوا : انتبهوا لشراك المنافقين حتى لا تندموا - لا تجعلوهم يروا ضعفكم فيستغلوه

الى المنافقين في الأرض .....اتقوا الله .....ورفقا بالقوارير


ومن كل ماسبق عايزه طبعا رأيكم وعايزه اعرف منكم حاجه مهمة جدا


انا هنا اتكلمت عن اشباه الرجال ........أمال الرجال بقى مواصفاتهم ايه ؟


تحياتي

[ghareeb]

عبير
حمالله على السلامة
انا لن استطيع الرد على كل الذي طرحتيه في موضوعك الجرئ كعادتك ولكني سأكتفي بطرح سؤالين.
ماهو مفهوم الضحية؟
يعني ايه المرأة كائن هش؟
عبير
الرجل ايضا من الناحية النفسية كائن هش ويتنفس الحب مع الكسجين ولم تثبت عليه اطلاقاً على مدار التاريخ انه قطع زوجته 50 حتة مثلاً وعبأها في اكياس وألقى بكل كيس في خرابة.
الرجل كائن قد يبدو قوياً لكنه تحت حكم امرأة منذ ان يولد والى ان يموت فتتحكم فيه امه ثم زوجته ثم ابنته وهو مابين هؤلاء كائن لايلفظ الا كلمة حاضر طيب نعم.
الرجل قد يبدو قويا لكن دائما مايكون هو الضحية الاولى وليست المرأة لأنه هو الذي يقع في الحب ابتداء ثم يتحدث عن الحب أما المرأة فهي تتحدث ابتداءً ثم تحب.
ليس من المنطق ان نحكم على حالات خاصة بالعموم انها حسابات غير دقيقة لسلوكيات عموم الرجال يأباها المنطق والحق.
الحب ايمان وحالات وصور ويجب وضع كل حالة في مكانها الصحيح لتستقيم الحياة بين نصفي المجتمع الرجل .. والمرأة
ولنا تكملة
وشكراً عبير
محييي الدين اسماعيل

[ward]

اهلا بيكى يا عبير
طب نعمل فيكى ايه يعنى همل الرجاله ناقصين
عموما شوفى يا عبوره
لا يستطيع رجل مهما ان كانت براعته ان يخدع اى امراه فى العالم والا لو كان هى عندها استعداد لذلك
يا ريت تفهمى معنى الجمله دى كويس وتردى على اسئلة الغريب وبعد كده هنحكى للصبح
بس هتكون على فترات متابعده بسبب ظروف الشغل

[مايــاااا]

عبير لو كل انواع المنافقين اللى ذكرتيهم دوول موجودين يبقى نقول على الدنياا السلام
يبقى مافيش اماان حتى الدين بقى بيستخدم وسيله للوصول الى غايه
صعب كده الواحده مش هاتثق فى اى رجل وكل ماهتشوف واحد هاتقول ياترى هو اى نوع من الانواع بتوع موضوع عبوورى
لا عذر لاى بنت بيضحك عليهاا تحت مسمى الحب من احد ى انوااع المنافقين من الملائكه الشرفااء ولابد من استخداام العقل مع الحب ومع ذلك الانواع اللى انتى بتتكلمى عنهم موجوده بس النسبه الاكبر هى الحلوه اكيييد والا نبقى عايشين فى غابه
عبير مش تنسى ان الرجل ده موجود فيناا وجوانا ومعاناا ومش غريب عليناا هو الاب والزوج والاخ والابن
صعب اوى اننا لا نثق فى كل دوول اومال نثق فى مين وهما دوول كل اللى حواليناا فى المجتمع
تسلمى عبير على الموضوع الجميل ده اللى سود الحيااه فى وش بنات حوااء وخوفناا من كل الجنس الاخر وربنا يستر بقى واحناا بنختاار زوج المستقبل لازم نطبق عليه الانواع دى كلهاا

[الكتكوت المتوحش]

السلام عليكم


معلش يا عبوره انا هأبدى رأيى فى كلمات قليله


اذا المرأه لم تستخدم عقلها قبل قلبها يبقى ذنبها على جنبها


ثم الحب ده عباره عن شويه هواجس فى المخ البنى ادم يقدر يتحكم فيه


انا عارف ان كلامى مش هيعجب بعض الناس

بس دا رأيى بصراحه


تحياتىddd:

[يوسف المصرى]

عبورة انتى فين بقالك يومين

محى و ورد جاوا الخلاصة بس عايز اضيف حاجة على كلامهم

انه زى ما فى رجالة منافقة بنات منافقات ... تعرف تخلى الراجل الأهبل ده زى الخاتم فى صباعها .... طيب و ماليكى عليا حلفان ... انا عرفت واحدة فى الكلية فى ظرف 3 سنين دوبت مالا يقل عن نص دستة وفى الأخر اتجوزت جوازه مستريحة جداً

ده فى بنات ما يعلم بيهم إلا ربنا .... الشيطان جنبهم تلميذ فى كى جى وان .... اللهم ما احفظنا

[Lonely Doc]

انا داخل اقول لك حمدا لله على السلامة

نورتى المنتدى من تانى

سارد ان شاء الله غدا( الحق اتسحر)

لفت نظرى رد الكتكوت المتوحش رغم غرابته

تحياتى ياعبورة

[ward]

ابو حجاج
دوبت 1/2 دسته افترى

[maysam]

up

كنت اتمنى عبورة تكون معنا:(

[lonely_heart]

والله يا عبير انتى سالتى سؤال مهم جدا بس محدش فكر يرد عليه

مواصفات الرجال ايه؟

سؤال صعب جدا و كل سيدة اكيد ح بكون ليها وجهة نظر مختلفة لكن انا ح اتكلم عن نفسى


الراجل بمعنى الكلمة لما بيقول كلمة مش بيرجع فيها
الراجل بمعنى الكلمة يعرف امتى و ازاى يمارس معايا سلطاته
بمعنى انه يعرف امتى يسيبنى اعمل اللى انا عايزاه و امتى يتدخل و يقول للى لا كدا كفاية
الراجل بمعنى الكلمة هو اللى يعرف يخلينى احس بمعنى الامان معاه
احس انه بيحمينى و ح يحمينى من كل حاجة فى الكون
يقدر يحتوينى بكل متناقضاتى و تمردى و عندى

الراجل ...............................ياااااااااااااااااا ااااااااااااااااااه يا عبير
انا ممكن اكتب لك صفحات عن مواصفات الرجل الحقيقى

بس للاسف فيه نسبة كبيرة حاليا من اشباه الرجال اللى انتى بتتكلمى عنهم