موضوع بسيط وعايزين نقلبه جد

[بقايا انسانة]

الموضوع حلوو اوى يا بشمهندس فؤاد بجد والاجمل فية زى ما الاعضاء قالو هوة الحرية
فى الكتابة و عدم التقيد باى شىء و كاننا بنفكر بصوت عالى او بنلحن حواديت الدنيا فى على وتر اغنية حزينة وبالنسبالى لو حاولت ادور على اغنية تشبهنى هلاقى كتير اووى والمشكلة اصلها مش الاغانى المشكلة فى المواقف االلى بتخلينا نتأثر بيها و اكتر شىء مأثر علية هوة مفهوم الصراحة والاستمرارية من ناحية الصراحة فشيفاها انها بقت شىء الايام دى صعب اووى وكل ما اكون صريحة مع اى حد من البداية تبدء المتاعب من الطرف الاخر لانى مش بلاقى غير كدب او نفاق
طب لية بتكدبوا ونا بطلب بنفسى انكو تصارحونى باى شىء مهما كان صعب او قاسى او مؤلم او حتى بينتقدنى انا هقدر اتحمل كل دة لكن اللى مش اسامح علية هوة الكدب اللى بعتبرة فى نظرى جزء لا يتجزء من الغدر واللى يغدر دة اكيد ميستاهلش اننا نضعة فى حسابات حياتنا عشان كدة ببعد واكتشفت مع كل نهاية ان حتى الصادقين اللى فى حياتى بتقابلنى معاهم عقبة عدم الاستمرارية يعنى علاقى بيهم بتيجى عند نقطة معينة و تنفصل لية عشان شىء واحد عملوا يمكن اغضبنى وقد بعضهم اسثقطهم من نظرى فبحس انو خلاص القدر شاء ان دول كمان يرحلو لغاية ما حسيت ان العالم فاااضى فاااااااضى اوى والوحدة هى المأوى الوحيد والمنُجى منها هوة الكتابة...

كتبت على طول من غير ما افكر
كلام ملخبط لكنة جزء من الأنا

احيك على هذا الموضوع الجميل

بقايا انسانة

[فؤاد عادل]

أولا حاجة بجد نورتى الموضوع يا أستاذة (بقايا أنسانة)

ويارب ميكونش حظك فى الدنيا ليه علاقة با أسمك

فى نقطة انا عايز اكلمك فيها ليها علاقة بكلامك

مش عارف بقيت حاسس أنى معنديش أى نوع من الاحساس (هاقولك ليه)

دا كلامك(ان حتى الصادقين اللى فى حياتى بتقابلنى معاهم عقبة عدم الاستمرارية يعنى علاقى بيهم بتيجى عند نقطة معينة و تنفصل لية عشان شىء واحد عملوا يمكن اغضبنى وقد بعضهم اسثقطهم من نظرى فبحس انو خلاص القدر شاء ان دول كمان يرحلو )

دلوقتى مفروض انى قابلت حد وارتحت معاه لفتره معينه وبعدين أكتشفت انه مش صادق معايا

ليه بقى أتعب نفسى هاأقول دا نصيب والموضوع ينتهى بالنسبة ليا

ليه بقى بنتعب نفسنا وبنتصرف على أساس أننا أحنا اللى غلطين وان احنا السبب

يعنى احنا بنقدم اهم حاجة الصدق فى التعامل

أما نلاقى المقابل اى حاجة احنا مش عايزينها أو مش قابلين بيها يبقى ننسحب من العلاقة على طول ومنندمش على اى حاجة

وانتى بتقولى ان حتى الصدقين فى حياتك تيجى عليهم مرحلة وبتنفصلو علشان بتحصل منهم مواقف بتضيقك اللى بيحب حد او بيقرب أوى من حد مبيحبش يضيقو او يسبب ليه اى نوع من المشاكل

أتمنى انك متضيقيش نفسك من أى حاجة بتحصل معاكى

وأتمنى انك تيجى هنا على طول فى الموضوع وتتكلمى هنا بمنتهى الصراحة

مستنى اسمع افكارك تانى

تحياتى ليكى

[my story]

ليه بقيت اشوف الناس مكتئبه بالشكل ده .. كأن مفيش بحايتهم ما يدعوهم للحظه من التفاؤل

ليه بنوقف حياتنا عند مرحله من الفشل ونظن انها النهايه.. الحياه بتحتاج مرونه.. للاسف بدل ما نتقبل الهزيمه اصبحنا نتعايش معها

بصراحه هذا كل ما اردده بنفسي ويجول بخاطري الان.. اعذرني ان كانت افكاري مبعثره

[لحن الحياه]

بجد انا عايزه اشكرك على فكرتك الاكثر من رائعه
وبجد طريقه كلامك فيها فعلا كانت قريبه مننا وتشجيعك فيها ان احنا نتكلم عننا
ونعرف نفسنا
المهم ان شاء الله انا موجوده معاكم فى الموضوع ده على طول

[بقايا انسانة]

المشاركة الأصلية بواسطة my story

ليه بقيت اشوف الناس مكتئبه بالشكل ده .. كأن مفيش بحايتهم ما يدعوهم للحظه من التفاؤل

ليه بنوقف حياتنا عند مرحله من الفشل ونظن انها النهايه.. الحياه بتحتاج مرونه.. للاسف بدل ما نتقبل الهزيمه اصبحنا نتعايش معها

بصراحه هذا كل ما اردده بنفسي ويجول بخاطري الان.. اعذرني ان كانت افكاري مبعثره

انا هاخد من الاقتباس دة نقطة تانى
هوة لية الناس مبتقدرش الشخصيات اللى قدامها صح
لية لو الواحد مثلا بيكتب حزن وكلماتة قاسية شوية يبقى معنى كدة انه كئيب
ويائس ومبيعرفش يضحك والحياة سودة عندة لا طبعا الموضوع مش كدة خالص
ومش شرط ان انسان طول النهار بيضحك يكون فرحان مش يمكن تكون دموع الفرح دى الم
وضحكاتة ما هى الا كبرياء والعكس
وبالنسبة يا لحن الحياة لكلماتك
فبصى التفاؤل موجود اكيد ولحظات الفرح احنا بنعيشها و انسان كاذب اللى يقول ان حياتة كلها مأساوية مفيهاش ولا لحظة فرح واحدة او ضحكة صافية بتطلع من القلب
بس موضوع الجزن دة مش بادينا لية لانة بيفرض نفسة والحزن العاطفة الاقوى فى وصفها هى كما الحب ايضا لماذا؟؟ لانهم اكثر احساسين اشكلهم فى كل مرة مختلفة وفى كل مرة يرتدون اثوابا جديدة فتكثر الكلمات وتتعدد الاحساسيس وتختلط المشاعر
الفرحة احساس بنلمسة لكن بيهرب بسرعة كلمح البصر فلا نستطيع سوى القول بانها لحظة فرحة ومضت
اما الحزن فهو عذاب صارخ يشتعل بالعقل و يحدث ضجيجا بالقلب ولا ينتهى بسرعة كما نتمنى
لذلك يظل فى الذهن ولكى نحاول ان نتناساه نبوح به اكثر واكثر لعنا نتعود ع الوضع

ولهذا يستغرب الناس حالنا ولكن بحق لا ذنب لنا فمرارة الحزن تجعلنا بعالم تانى كل معالمة ما هى الا نتاج لظلام والياس

لكن فى كل الاحيان
لا الفرحة بطول ولا الحزن بيدوم
وهية كدة الحياة

تحياتى
بقايا انسانة

[بقايا انسانة]

المشاركة الأصلية بواسطة فؤاد عادل

أولا حاجة بجد نورتى الموضوع يا أستاذة (بقايا أنسانة)

ويارب ميكونش حظك فى الدنيا ليه علاقة با أسمك

فى نقطة انا عايز اكلمك فيها ليها علاقة بكلامك

مش عارف بقيت حاسس أنى معنديش أى نوع من الاحساس (هاقولك ليه)

دا كلامك(ان حتى الصادقين اللى فى حياتى بتقابلنى معاهم عقبة عدم الاستمرارية يعنى علاقى بيهم بتيجى عند نقطة معينة و تنفصل لية عشان شىء واحد عملوا يمكن اغضبنى وقد بعضهم اسثقطهم من نظرى فبحس انو خلاص القدر شاء ان دول كمان يرحلو )

دلوقتى مفروض انى قابلت حد وارتحت معاه لفتره معينه وبعدين أكتشفت انه مش صادق معايا

ليه بقى أتعب نفسى هاأقول دا نصيب والموضوع ينتهى بالنسبة ليا

ليه بقى بنتعب نفسنا وبنتصرف على أساس أننا أحنا اللى غلطين وان احنا السبب

يعنى احنا بنقدم اهم حاجة الصدق فى التعامل

أما نلاقى المقابل اى حاجة احنا مش عايزينها أو مش قابلين بيها يبقى ننسحب من العلاقة على طول ومنندمش على اى حاجة

وانتى بتقولى ان حتى الصدقين فى حياتك تيجى عليهم مرحلة وبتنفصلو علشان بتحصل منهم مواقف بتضيقك اللى بيحب حد او بيقرب أوى من حد مبيحبش يضيقو او يسبب ليه اى نوع من المشاكل

أتمنى انك متضيقيش نفسك من أى حاجة بتحصل معاكى

وأتمنى انك تيجى هنا على طول فى الموضوع وتتكلمى هنا بمنتهى الصراحة

مستنى اسمع افكارك تانى

تحياتى ليكى

شكرا ليك يا استاذ فؤاد
مع انى لسة مش بقيت استاذة ولا حاجة لسة بنقول يا هاادى
ثانيا ان اسم اى عضو لازم يكون بيعبر عنة و لانة داخل المنتدى اصلا ليعبر عن نفسة
اللى شايفها بعينة هو ومش بعين الناس وبالنسبة لاسمى فهو يعبر عنى وانا ارى نفسى
بقايا من كل شىء
كلامك منطقى جدا على فكرة بس لو دورت فى حياتك مش هتلاقى نفسك بتعمل كدة
لاننا بشر مجرد بشر ضعفاء مش نقدر نسيطر على مشاعرنا منقدرش نتحكم فيها
نقولها يلا اديتك امر دلوقتى انك تفرحى ودلوقتى لازم تحزنى وقدام الشخص دة كبرى
احنا منقدرش نكون كدة ابدا ايوة معاك اننا المفروض منندمش على اللى بايعنا او مش محترمنا
بعدم صدقة معانا ولكن
هل هتقدر لو حد وضعت فى ثقة وهوة تخلف عنها وانتة معملتش شىء غلط اتجاهة
وتاخد قرار انك تبتعد عنة
وفى الاخر تقدر تمنع نفسك انها متحزنش على اللى حصل دة تقدر تمنع نفسك انها متندمش على كل لحظة ضاعت كدة ع الفاضى فى اعتقادى لاءة طبعا
فى رئى الانسان ميقدرش يتخلى عن احساسة ابدا
والحالة الوحيدة اللى يتخلى فيها عن احساسة هيبقى شرير ومخيف

هذا اما اقتنع به وانا ديما بتكلم بصراحة وباللى مقتنعة ية

شكرا لك على ردك وتعليقك

تحياتى

[فؤاد عادل]

المشاركة الأصلية بواسطة لحن الحياه

بجد انا عايزه اشكرك على فكرتك الاكثر من رائعه
وبجد طريقه كلامك فيها فعلا كانت قريبه مننا وتشجيعك فيها ان احنا نتكلم عننا
ونعرف نفسنا
المهم ان شاء الله انا موجوده معاكم فى الموضوع ده على طول

الاخت الفاضلة لحن الحياة

مبسوط ان الموضوع عاجبك

ومبسوط أكتر أن كلامى قريب منكم

ونفسى فعلا انحنا نعرف نفسنا كويس وكمان نعرف الباقى بينا وبتفكيرنا

وانا مستنى مشاركتك معانا فى الموضوع دا على طول

تحياتى ليكى

[فؤاد عادل]

المشاركة الأصلية بواسطة بقايا انسانة

شكرا ليك يا استاذ فؤاد

مع انى لسة مش بقيت استاذة ولا حاجة لسة بنقول يا هاادى
ثانيا ان اسم اى عضو لازم يكون بيعبر عنة و لانة داخل المنتدى اصلا ليعبر عن نفسة
اللى شايفها بعينة هو ومش بعين الناس وبالنسبة لاسمى فهو يعبر عنى وانا ارى نفسى
بقايا من كل شىء
جميل اوى التعبير ده (لانة داخل المنتدى اصلا ليعبر عن نفسة اللى شايفها بعينة هو ومش بعين الناس)
كلامك منطقى جدا على فكرة بس لو دورت فى حياتك مش هتلاقى نفسك بتعمل كدة
لاننا بشر مجرد بشر ضعفاء مش نقدر نسيطر على مشاعرنا منقدرش نتحكم فيها
نقولها يلا اديتك امر دلوقتى انك تفرحى ودلوقتى لازم تحزنى وقدام الشخص دة كبرى
احنا منقدرش نكون كدة ابدا ايوة معاك اننا المفروض منندمش على اللى بايعنا او مش محترمنا
بعدم صدقة معانا ولكن
هل هتقدر لو حد وضعت فى ثقة وهوة تخلف عنها وانتة معملتش شىء غلط اتجاهة
وتاخد قرار انك تبتعد عنة
عايزه الصراحة هو الموضوع صاعب أوى بس صدقينى المسئلة بقت تعود
مش قصدى أنى أتجرحت كتير بس قصدى
أشمعنى الظروف والمشاكل بتخلينا نفترق عن ناس كتير بنحبهم
خلاص على الاقل أحنا بقى نقدر نبعد عن الناس اللى بيسببو لينا الالم
وعشان كده كنت بقولك فىالمشاركة الاولنية أنى بقيت حاسس أنى مبقاش عندى مشاعر
ومابصبرش على حد هتعذبنى هحاول معاك مره واتنين هتيجى عليا أكتر يبقى مع السلامة
مش يبقى هو والظروف عليا
وفى الاخر تقدر تمنع نفسك انها متحزنش على اللى حصل دة تقدر تمنع نفسك انها متندمش على كل لحظة ضاعت كدة ع الفاضى

الندم هيفضل غصب عنا موجود وكمان الحزن
يبقى على الاقل نلحقه فى الاول

فى اعتقادى لاءة طبعا
فى رئى الانسان ميقدرش يتخلى عن احساسة ابدا
والحالة الوحيدة اللى يتخلى فيها عن احساسة هيبقى شرير ومخيف

أه هو مش هيبقى شرير بس صدقينى هيبقى مخيف
مخيف لنفسه وللى حواليه

هذا اما اقتنع به وانا ديما بتكلم بصراحة وباللى مقتنعة ية
عجبانى جدا صرحتك وبطلبك على طول تفضلى بيها
وعجبنى اكتر نقشنا وبتمنى يفضل على طول
هطرح قريب فكرة جديد هوطبعا عايز رأيك فيه

شكرا لك على ردك وتعليقك

شكراً ليكى انتى على المناقشة دى وأتمنى انك تكونى مزعلتيش من رأىء

تحياتى

تحياتى ليكى

[Moataz Subry]

المشاركة الأصلية بواسطة بقايا انسانة

كلامك منطقى جدا على فكرة بس لو دورت فى حياتك مش هتلاقى نفسك بتعمل كدة
لاننا بشر مجرد بشر ضعفاء مش نقدر نسيطر على مشاعرنا منقدرش نتحكم فيها
نقولها يلا اديتك امر دلوقتى انك تفرحى ودلوقتى لازم تحزنى وقدام الشخص دة كبرى
احنا منقدرش نكون كدة ابدا ايوة معاك اننا المفروض منندمش على اللى بايعنا او مش محترمنا
بعدم صدقة معانا ولكن
هل هتقدر لو حد وضعت فى ثقة وهوة تخلف عنها وانتة معملتش شىء غلط اتجاهة
وتاخد قرار انك تبتعد عنة
وفى الاخر تقدر تمنع نفسك انها متحزنش على اللى حصل دة تقدر تمنع نفسك انها متندمش على كل لحظة ضاعت كدة ع الفاضى فى اعتقادى لاءة طبعا
فى رئى الانسان ميقدرش يتخلى عن احساسة ابدا
والحالة الوحيدة اللى يتخلى فيها عن احساسة هيبقى شرير ومخيف

هذا اما اقتنع به وانا ديما بتكلم بصراحة وباللى مقتنعة ية

شكرا لك على ردك وتعليقك

تحياتى

متفق مع حضرتك ان الانسان لا يمكن يتخلى عن احساسه,بس طبعا يقدر يوجهه بشكل معين.

زى التفكير مثلا اكيد ما اقدرش امنع نفسى انى افكر فى حاجة معينة بس اقدر اخلى نفسى افكر فيها بصورة تانية وبشكل ايجابى اكتر,زى المثال اللى حضرتك قلتيه لو حد اديته ثقة كبيرة وبعدين ما طلعش قدها او عمل حاجة غلط فى حقى بدون سبب,الحل الاسهل انى ازعل على انه عمل كده معايا وممكن اخاصمه كمان لكن لو فكرت شوية باقول لنفسى وانا ايه مشكلتى انه غلط؟؟ دى مشكلته هوه مش مشكلتى انا يعنى المفروض هوه اللى يزعل مش انا, لانى عملت اللى عليا ووثقت فيه كونه ما طلعش قد ثقتى فده شىء يعيبه هوه مش يعيبنى انا وساعتها باعطف عليه واحاول اصلحله عيبه واديله ثقة اكتر فيه لان ده ممكن يفيده ولو ما افادهوش ورجع يغلط تانى فكده هوه شخص احمق مش هازعل على وقت ضيعته لانى استفدت حاجة انى عرفته كويس واتعلمت انى اصبر عالناس اكتر وهاعرف بعدها ازاى اتعامل معاه كويس فى المستقبل ده بخلاف ان فيه احتمال انى اغيره فعلا...وحصلت معايا قبل كده فعلا مع شخص معين واتغير بالفعل ودلوقتى بقينا قريبين جدا من بعض.

معلش طولت شوية.بس اللى عايز اقوله ان احنا ممكن نطور احساسنا عشان يبقى ارقى من الاول ويفيدنا ويفيد اللى حوالينا,حتى الزعل ممكن نوظفه صح فى اننا نستفيد حكمة اكتر فى الحياة وده شىء هيسعدنا اكتر يعنى ممكن نخلى زعلنا سبب فى فرحنا.

[فؤاد عادل]

عايز أحكيلكم على فكرة جديدة شغلة تفكيرى ويارب مروحش فى داهية

من حوالى سنة أو اتنين كنت قاعد بتفرج للاسف على قناة من قنوات الاغانى اللى مغرقه الدنيا

وكانت فى أغنية شغالة للمغنية العظيمة (مروى) حسبى الله ونعم الوكيل

يعنى حاجة منتهى ................ ومش لازم أكمل

أخر كلمة فى الاغنية كانت( أنت مبتعرفش)

المهم الاغنية دى خلصت وبعدين جيه وراها أعلان عن منتج جديد فى الاسواق خاص بالصحة الجنسية عند الازواج

المهم الاعلان دا ليه علاقة بموضعنا اللى بتكلم فيه المهم بعديها بحوالى يومين قريت مقال فى جرنان مش فاكر اسمه دلوقت وكان المقال كله بيتكلم على الاعلان دا
وعن أن الشركة صاحبة المنتج المعلن عنه قامت بعمل نسختين من الاعلان دا نسخة خليجية الشريحة المستهدفة فى الاعلان دا الاخوة الخليجين
ونسخة تانية مصرية موجه لحضرتنا
وكان كاتب الموضوع عمال يوصف الاعلانين والفرق بينهم وأسمحولى أوصف أنا بأسلوبى الاعلانين

بصو يا أسيدنا فى الاعلان الاولنى اللى هو الاعلان المصرى

الست قلبا بوظها شبرين وقعدا عماله تنفخ
وعفاريتها طلعا ولبسه لبس أقل مايوصف بيه أنه مش لبس
ومره واحده يخش جوزها المحترم اللى يجى عنده 175 سنة بالميت وهو مدلدل دماغه فى الارض
تقوله انت مجيتش أمبارح ليه يقولها كان عندى شغل طيب ماتصلتش ليه يقولها الموبيل كان فاصل شحن
وتقعد هى تعايره طول الاعلان أن على طول موبيله فاصل شحن
وخلاص الاعلان بيخلص على كده وهو بيديك تحذير أنك لو مش عايز الموبيل بتاعك يخلص شحن
يبقى أشترى المنتج دا من الصيدلية
أه دا غير أن فى أخر الاعلان بيحسسك ان الست اللى فى الاعلان
هتعمل حاجة من الاتنين ياما هتطلق من الراجل دا أو هتقتله وتستريح منه
حلو كده نخش بقى على الاعلان الخليجى لى نفس الشركة
واحدة ست أقل ماتوصف بيه أنها مثال للزوجة المحترمة قاعده عمالة تلعب مع أولدها ولد وبنت
بيجى جوزها شاب يعنى سبحان الله لو عطس فى حيطة ممكن توقع صحته تساوى 10 زى حلاتى
بس يعينى الراجل مجهد حبيتين من متاعب الشغل فاتيجى الست حرمه بكل أدب وتتكلم معاه
كلام فى مامعناه أن مكنش النهارده يبقى بكره وعادى جدا وأحنا قدمنا العمر كله
والراجل بيقول لا أنا طول مانا معايا المنتج دا مفيش اى مشاكل والاعلان بينتهى
ولو كنت حضرتك وأنت بتتفرج على الاعلان سرحت شوية يمكن مكنتش خدت بالك من قصد الاعلان
ووالله العظيم أنا شوفت الاعلان دا حوالى أربع مرات وانا فكره أعلان عن جبنة مثلثات
وبعد كده أفتكرته
أعلان بانادول بتاع الصداع
طبعاً أنتو كده أحترتم معايا وبتقولو فين الفكرة اللى جت ليك من الاعلانين دول
هاقولكم أنا خدت الاعلانين دول مثال لحجات تانية كتير وقعدت أتابع مواقف تانية من النوعية دى
سواء على مستوى الاعلامى أو السياسى
(مصر أم الدنيا) فاكرين الكلمة دى بنسمعها دايما من وأحنا صغيرين
دا غير كلام تانى منه الريادة المصرية على المحافل العربية
مصر الاخ الاكبر لكل العرب والباب المفتوح لكل العرب
تفتكروه بقى ومن غير تحمس أو مزايدة كذابة أحنا فقدنا الكلام دا كله أمتى
يعنى امتى بطلنا نكون الاخ الاكبر لكل العرب
وأمتى فقدنا أحترامنا فى نظر اخواتنا العرب
أنا مقولتش طبعا بكل حال من الاحوال ان مصر غلط أو فى موضع الاتهام أو أنها السبب فى تغيير نظرة العرب فيها

بس طيب أيه اللى حصل


تخيلو معايا أن كل واحد فيكم عنده أربع أخوات أصغر منه
بيحترموه وبيقدروه ومره واحدة بيحس أن الاحترام دا بيروح واحدة واحدة
أيه هيبقى شعورك تخيلو بقى كمان لو الاسرة دى دخلت خناقة مع حد تانى هيبقى شكلهم هيبقى عامل ايه
كل واحد منهم مش واثق فى التانى وخايف منهم وبيعتبره غير قادر على القيادة

فى حاجة غلط حصلت عن طريق الاجيال اللى فاتت وفى أتهامات كتير متبادله من الطرفين
الحمد لله عندنا فى مصر زى الشطار بيقولو كلمة واحدة العرب جرب دا على أساس أننا مش عرب و اننا جايين من بلاد تركب الافيال
والعرب بيقولو اننا نصابين وبنلعب بالبيضة والحجر
وبقت الوحدة العربية بالنسبة لينا أى ماتش كورة بيننا وبين أى فرقة عربية وبتنتهى الوحدة معا أول طوبة بتحدف فى الماتش وأول جون بيجى فى أى فرقة من الاتنين

يعنى من الاخر احنا فقدنا احترامنا لبعض

دا اللى انا شايفه بس ياترى بقى فى حاجة نقدر نعملها علشان نرجع تانى نحترم بعد ونقدر بعض

ولا أحنا مبنعرفش

[بقايا انسانة]

المشاركة الأصلية بواسطة Moataz Subry

متفق مع حضرتك ان الانسان لا يمكن يتخلى عن احساسه,بس طبعا يقدر يوجهه بشكل معين.

زى التفكير مثلا اكيد ما اقدرش امنع نفسى انى افكر فى حاجة معينة بس اقدر اخلى نفسى افكر فيها بصورة تانية وبشكل ايجابى اكتر,زى المثال اللى حضرتك قلتيه لو حد اديته ثقة كبيرة وبعدين ما طلعش قدها او عمل حاجة غلط فى حقى بدون سبب,الحل الاسهل انى ازعل على انه عمل كده معايا وممكن اخاصمه كمان لكن لو فكرت شوية باقول لنفسى وانا ايه مشكلتى انه غلط؟؟ دى مشكلته هوه مش مشكلتى انا يعنى المفروض هوه اللى يزعل مش انا, لانى عملت اللى عليا ووثقت فيه كونه ما طلعش قد ثقتى فده شىء يعيبه هوه مش يعيبنى انا وساعتها باعطف عليه واحاول اصلحله عيبه واديله ثقة اكتر فيه لان ده ممكن يفيده ولو ما افادهوش ورجع يغلط تانى فكده هوه شخص احمق مش هازعل على وقت ضيعته لانى استفدت حاجة انى عرفته كويس واتعلمت انى اصبر عالناس اكتر وهاعرف بعدها ازاى اتعامل معاه كويس فى المستقبل ده بخلاف ان فيه احتمال انى اغيره فعلا...وحصلت معايا قبل كده فعلا مع شخص معين واتغير بالفعل ودلوقتى بقينا قريبين جدا من بعض.

معلش طولت شوية.بس اللى عايز اقوله ان احنا ممكن نطور احساسنا عشان يبقى ارقى من الاول ويفيدنا ويفيد اللى حوالينا,حتى الزعل ممكن نوظفه صح فى اننا نستفيد حكمة اكتر فى الحياة وده شىء هيسعدنا اكتر يعنى ممكن نخلى زعلنا سبب فى فرحنا.

عندك حق فى كلامك للكن نسيت احساس فظيع هوة اساس المشكلة يا استاذ معتز
وهو ((النـــــدم)) على كلامك هتقولى وتندمى لية مدام انتى مغلطتيش والغلط من الطرف الاخر ونا ماليش ذنب ممكن يكون كلامك منطقى بس اسفا فى شخصيتى انا بشوف انى مقدرش مندمش
عارف لية؟؟ عشان على حسب المثال يعنى انا مدام اديت ثقة لحد معنى كدة عندى انى بحب الحد دة وفى ارتياح بنا ما بالك بقى لو اكتشفت بالخداع من الطرف دة اكيد هندم انى حطيت ثقتى فى حد كدة ومن الاساس ارتحت له وحبيتة يعنى انا اسئت الاختيار ودى حاجةفى حد ذاتها كفيلة انها تضايقنى جدا..لانى ديما احب اخد قرارتى بنفسى واحب ان ميتحملش قرارتى دى غير نفسى
ومعنى كدة انى بقع فى بركة من الدمار النفسى ان صح التعبير
ومن ناحية انى ممكن اغير الانسان دة للاحسن فدة شىء صحيح بس عن نفسى مش فى كل الاحيان بقدر اقوم الانسان اللى قدامى للاحسن مع انى بصراحة بحب اوى اقوم بالدور دة مع اصحابى واسعادتهم انهم يتعايشو مع حياتهم لكن اما يكون الموضوع خاص فية انا الدنيا كلها بتقف
وبتشل وبعجز وبيحصلى حاجات غريبة ومعرفش انفع نفسى زى ما بنفع غيرى زى ما بيقولو بالبلدى باب النجار مخلع ونا كدة كل اللى فالحة فية انى اخد قرارات حاسة بعرف يعنى اقطع عرق واسيح دم وبعد كدة افضل انا فى الم وتعب والطرف التانى ع حالة مبقدرش اساعدة لانة جة علية انايمكن يكون دة عيب بس دى الحقيقة للى شيفاها فى نفسى

[بقايا انسانة]

المشاركة الأصلية بواسطة فؤاد عادل

عايز أحكيلكم على فكرة جديدة شغلة تفكيرى ويارب مروحش فى داهية

من حوالى سنة أو اتنين كنت قاعد بتفرج للاسف على قناة من قنوات الاغانى اللى مغرقه الدنيا

وكانت فى أغنية شغالة للمغنية العظيمة (مروى) حسبى الله ونعم الوكيل

يعنى حاجة منتهى ................ ومش لازم أكمل

أخر كلمة فى الاغنية كانت( أنت مبتعرفش)

المهم الاغنية دى خلصت وبعدين جيه وراها أعلان عن منتج جديد فى الاسواق خاص بالصحة الجنسية عند الازواج

المهم الاعلان دا ليه علاقة بموضعنا اللى بتكلم فيه المهم بعديها بحوالى يومين قريت مقال فى جرنان مش فاكر اسمه دلوقت وكان المقال كله بيتكلم على الاعلان دا
وعن أن الشركة صاحبة المنتج المعلن عنه قامت بعمل نسختين من الاعلان دا نسخة خليجية الشريحة المستهدفة فى الاعلان دا الاخوة الخليجين
ونسخة تانية مصرية موجه لحضرتنا
وكان كاتب الموضوع عمال يوصف الاعلانين والفرق بينهم وأسمحولى أوصف أنا بأسلوبى الاعلانين

بصو يا أسيدنا فى الاعلان الاولنى اللى هو الاعلان المصرى

الست قلبا بوظها شبرين وقعدا عماله تنفخ
وعفاريتها طلعا ولبسه لبس أقل مايوصف بيه أنه مش لبس
ومره واحده يخش جوزها المحترم اللى يجى عنده 175 سنة بالميت وهو مدلدل دماغه فى الارض
تقوله انت مجيتش أمبارح ليه يقولها كان عندى شغل طيب ماتصلتش ليه يقولها الموبيل كان فاصل شحن
وتقعد هى تعايره طول الاعلان أن على طول موبيله فاصل شحن
وخلاص الاعلان بيخلص على كده وهو بيديك تحذير أنك لو مش عايز الموبيل بتاعك يخلص شحن
يبقى أشترى المنتج دا من الصيدلية
أه دا غير أن فى أخر الاعلان بيحسسك ان الست اللى فى الاعلان
هتعمل حاجة من الاتنين ياما هتطلق من الراجل دا أو هتقتله وتستريح منه
حلو كده نخش بقى على الاعلان الخليجى لى نفس الشركة
واحدة ست أقل ماتوصف بيه أنها مثال للزوجة المحترمة قاعده عمالة تلعب مع أولدها ولد وبنت
بيجى جوزها شاب يعنى سبحان الله لو عطس فى حيطة ممكن توقع صحته تساوى 10 زى حلاتى
بس يعينى الراجل مجهد حبيتين من متاعب الشغل فاتيجى الست حرمه بكل أدب وتتكلم معاه
كلام فى مامعناه أن مكنش النهارده يبقى بكره وعادى جدا وأحنا قدمنا العمر كله
والراجل بيقول لا أنا طول مانا معايا المنتج دا مفيش اى مشاكل والاعلان بينتهى
ولو كنت حضرتك وأنت بتتفرج على الاعلان سرحت شوية يمكن مكنتش خدت بالك من قصد الاعلان
ووالله العظيم أنا شوفت الاعلان دا حوالى أربع مرات وانا فكره أعلان عن جبنة مثلثات
وبعد كده أفتكرته
أعلان بانادول بتاع الصداع
طبعاً أنتو كده أحترتم معايا وبتقولو فين الفكرة اللى جت ليك من الاعلانين دول
هاقولكم أنا خدت الاعلانين دول مثال لحجات تانية كتير وقعدت أتابع مواقف تانية من النوعية دى
سواء على مستوى الاعلامى أو السياسى
(مصر أم الدنيا) فاكرين الكلمة دى بنسمعها دايما من وأحنا صغيرين
دا غير كلام تانى منه الريادة المصرية على المحافل العربية
مصر الاخ الاكبر لكل العرب والباب المفتوح لكل العرب
تفتكروه بقى ومن غير تحمس أو مزايدة كذابة أحنا فقدنا الكلام دا كله أمتى
يعنى امتى بطلنا نكون الاخ الاكبر لكل العرب
وأمتى فقدنا أحترامنا فى نظر اخواتنا العرب
أنا مقولتش طبعا بكل حال من الاحوال ان مصر غلط أو فى موضع الاتهام أو أنها السبب فى تغيير نظرة العرب فيها

بس طيب أيه اللى حصل


تخيلو معايا أن كل واحد فيكم عنده أربع أخوات أصغر منه
بيحترموه وبيقدروه ومره واحدة بيحس أن الاحترام دا بيروح واحدة واحدة
أيه هيبقى شعورك تخيلو بقى كمان لو الاسرة دى دخلت خناقة مع حد تانى هيبقى شكلهم هيبقى عامل ايه
كل واحد منهم مش واثق فى التانى وخايف منهم وبيعتبره غير قادر على القيادة

فى حاجة غلط حصلت عن طريق الاجيال اللى فاتت وفى أتهامات كتير متبادله من الطرفين
الحمد لله عندنا فى مصر زى الشطار بيقولو كلمة واحدة العرب جرب دا على أساس أننا مش عرب و اننا جايين من بلاد تركب الافيال
والعرب بيقولو اننا نصابين وبنلعب بالبيضة والحجر
وبقت الوحدة العربية بالنسبة لينا أى ماتش كورة بيننا وبين أى فرقة عربية وبتنتهى الوحدة معا أول طوبة بتحدف فى الماتش وأول جون بيجى فى أى فرقة من الاتنين

يعنى من الاخر احنا فقدنا احترامنا لبعض

دا اللى انا شايفه بس ياترى بقى فى حاجة نقدر نعملها علشان نرجع تانى نحترم بعد ونقدر بعض

ولا أحنا مبنعرفش

ههههههههههههههههههههههههه

اية الحاجات اللى بتشغل حضرتك دى بس

اللى فهمتة من كلامك ان مضمون عن القيم والاخلاق اللى اتبترت بمرور الزمن بين الشعوب وبعضها والافراد كمان الموضوع دة اساسة هوة حسن المعاملة اللى بقت معدومة وبقى كل انسان بيلاقى اللى يتقاوى علية ويقسو بالمعاملة معاه محدش معصوم من الخطاء هنا فى نظرى جميع الشعوب العربية مخطئة مدام دخل بينها ((الشيطان الازرق)) اللى مولت لمعارك وصنعت فعال خسيسة ونشرتها دة غير انها ايدت لافلام شوهت صورتنا وبوظت سمعتنا وبصراحة دة كان دورها الاولى واحنا اللى كملنا باقى المهمة على اكمل وجة ومشينا فى طرق كتيرة نستنا عاداتنا وتقاليدنا واخلاقنا وتوهتنا فى حكايات وقصص احنا فى غنى عنها واما نفكر نرجع الاحترام ما بينا من تانى هنبص هنلاقى دمار حوالينا من كل ناحية عايز كلنا نبقى ايد واحدة عشان نعمر اساسنا واخلاقنا من تانى والتكاتف دة بقى حلم كبير اوى نتمنى كل يوم اننا نحققة وبرضة معنديش اجابة بل بالعكس هنهى كلامى بنفس سؤالك
دا اللى انا شايفه بس ياترى بقى فى حاجة نقدر نعملها علشان نرجع تانى نحترم بعد ونقدر بعض

[فؤاد عادل]

بقايا انسانة

عجبنى ردك جدا

واكتر حاجة عجبتنى انك فهمتى الفكرة

أنتى ربطى صح اوى بين ضياع الاخلاق اللى احنا وصلنا ليه وبين فقدان الثقة مابين الدول العربية

أنا أما قولت الفكرة يمكن مكنتش مستنى حل بالمعنى المفهوم

لان الحل فى ايد ناس غيرنا خالص ويمكن هما اللى مش عايزينا نحلها علشان على طول يبقو

مستفدين من فرقتنا

بس كان نفسى اسمع حد يقول أزاى احنا كاعرب أفراد ومش قيادات اننا نقرب من بعض

يعنى هقولك مثل انا شفته (أمثالى كترت اوى)

يعنى أى واحد شغال فى فندق فى مصر او دبى او اى دولة عربية فيها سياحة

بيعامل الضيف الاجنبى مهما كانت جنسيته احسن من الضيف العربى

ودا بيدفع ودا بيدفع

بس خلاص فكرة ان الاجنبى اهم من العربى( اللى هو الاخ وابن العم ) بقت ثابتة فى اذهان الكل

واتمنى الفكرة دى تتغير لانها اساس البلاوى وعدم الثقة المتبدلة

وانا وانتى ومتهيألى ناس كتير قعدين مستنين اليوم اللى العرب هتكون فيه ايد واحدة

تحياتى ليكى

[عذبة الاحساس]

انا هبدأ كلامي من حيث انتهيت يا فؤاد

طبعا الوحده العربيه حلم يداعب كل عربي مسلم

وأنا أخص بها المسلمين في حديثي

لأن مقومات هذه الوحدة أقوى وأبقى

خصوصا إذا ما علمنا أن تلك المقومات ترتكز على كتاب الله وسنة نبيه،

ولذلك فإن الوحدة الإسلامية ليست مجرد حلم صعب المنال

بل هي حقيقة نستطيع أن نحققها

إذا تمسكنا بديننا الإسلامي الحنيف

وسنة نبينا وجعلنا العدل أساس مجتمعنا.

ويمكن حالة الفرقه الي احنا فيها بسبب عدم التزامنا طبعا

مش الكل ولكن المعظم هناك حاله من الفوضي لم يعد هناك قواعد ثابته

لأي شىء لم تعد هناك قدوه نقتدي بها النفاق أصبح ثمه من ثمات العصر

ولم يعدج هناك صدق في اي شىء الزيف اصبح متفشى

بطريقه مستفذه كل واحد لا يهتم الا بنفسه

ولا يفكر في من حوله اقتناعهالشخصي برأيه يجعله لا يعير اهتمام

لآراء من حوله مش عارفه ممكن اكون كتبت حاجات ملهاش دعوه ببعض

بس عبرت عن الي بيجول في خاطري بطريقه عشوائيه بدون ترتيب

لاي شىء وبدون التفكير قبل الكتابه

[رؤيه]

صباح الخير
عمالين ترغوا ترغوا وصوتكم جايب لاخر المنتدى مش عارفه انام
شوفوا بقي
عايزه اقول حاجه هبله بس غايظانى
كل واحد عنده مشاكل فى حياته
طبعا
وكل واحد اهتماماته مختلفه عن الباقيين
اكيد
واللى يزعلنى انا مش لازم يزعلك انت ولا انتى والعكس
اللهم طولك ياروح
الخلاصه
ان فى ناس بتفترض انك لازم تشكى وتنوح ولما تقعد معاهم لازم تقول ايه مضايقك ايه تاعبك وخانقك ومسود عيشتك والا
فانت واحد من اتنين
اما معندكش مشاكل ومتهنى ومبسوط 24 قيراط
او انك لئيم وعدوانى وكتوووووم ومبتحبش تطلع اسرارك بره وبتحب تتطقس على اخبار الناس وانت متقولش حاجه
طب وهو انا لو مبحكيش معناها انى معنديش مشاكل
ولا معنديش احساس ومش فارق معايا سينا من سونيا
ولا كتومه وغامضه وخبييثه وبحب اعرف اخبار الناس
اصلا انا مطلبتش من حد يحكيلى ولا عمر حد سمع اخباره من ناس تانيه نقلا عنى
طااااااايب خلينا معاكو للنهاية
جربت احكى وياجماعه كذا وكذا وكذا ومتضايقه ومخنوقه
الرد كان تحفه بقي عبارة عن
يااااه هى دى مشاكلك اومال احنا نعمل ايه ده احنا كذا وكذا وكذا
لا والله
مهو انا كمان شايفه مشاكلكم دى هبله
وبعدين اصلا حياتكم مختلفه عن حياتى وطبيعى تكون مشاكلنا مختلفه
نهايته
يا اما نتعلم نسمع بعض بادب واحترام ونحس بالكلام قبل ما نرد عليه ونبين للناس شوية تعاطف واحساس بوجعهم يا منسمعش اصلا
ومن البدايه انا واحد مبحبش النكد ومبحبش اسمع قصص النكد والمشاكل
انما اللى هو لاكده عاجب ولا كده عاجب
قرفتونى