مش باقي مني

[Honey1900]

روعه القصيدة دي

جمال بخيت ابدع فيها هرجع بعد شوية بالحاجات اللي تشيب فيها


سمعتها انهاردة كام مرة بعد ما سمعتها ف دكان شحاتة


تسلم ايدك يا باشا

[Honey1900]

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

مش باقي مني غير شوية دم

متلوثين بالهم

مُرين وفيهم سم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

وانتي ف طابور العيش

بتبوسي إيد الزمن

ينولك لقمة

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضي ف عينيا

روعة روعة روعه

[The Caesar]

المشاركة الأصلية بواسطة bo7or

انا ادرجتها النهاردة فى الروائع ,,
قبل ما اشوفها هنا

قرأتها النهاردة مرة و سمعتها مرتين
وفى كل مرة ببقى هتجنن
غريبــة .. ملهاش حل
من اجمل ما سمعت وهسمع
دفا و برد حنان وقسوة ذل وعفة
كان قدير جدا فيها ...

شكرا قيصر اختيارك فوق الرائع طبعا كالعادة

عمرو عمرو ,, منتظرين التفتيت

بحور ..يا مرحبا
هوه فيه موضوع عن الروائع وانا معرفوش...يا خبر ابيض
واضح اني منفصل بقالي فتره ....
ما علينا
القصيده تجنن فعلا
بس بيني وبينك ..قصيده نحس
كل ما اسمعها يبقي اليوم دمه تقيل...علي ايه؟
ماله عمرو دياب الجديد
يا بنتي الاكتئاب اللي بتجيبه القصيده فوري ....
الحياه مش مستحمله اصلا حد يعكنن علينا ..احنا بنتلكك علشان نضايق
بحور مش تسمعي القصيده دي تاني
ماشي

[The Caesar]

المشاركة الأصلية بواسطة Honey1900

روعه القصيدة دي

جمال بخيت ابدع فيها هرجع بعد شوية بالحاجات اللي تشيب فيها


سمعتها انهاردة كام مرة بعد ما سمعتها ف دكان شحاتة


تسلم ايدك يا باشا

هاني
ازيك يا هندسه ؟
يبقي اكيد يومك بقي جميل..اسمعها تاني ..كام مره
وصدقني..هاتكره نفسك
ما تشيلنيش ذنبك..وما تسمعهاش تاني اوكيز....
اسمع حاجه مبهجه
مشربتش من نيلها
طالعه السلالم يا مشاله عليها ...
اي حاجه مفرحه

[molan abdelgany]

مش باقى منى غير شوية ضى فى عينيا ، انا حاديهوملك و امشى بصبرى فى الملكوت

*********
و انتى فى طابور العيش

بتبوسى ايد الزمن ينولك لقمة ، من حقك المشروع






مش باقى منى غير شرقة فى نفس مقطوع



و انا صوتى مش مسموع



يا حلمنا الموجوع

من المرور ممنوع



مستنى لم يمر موكب سلاطينك





و مش باقى منى غير شوية كفر بشروقك




على شوية رحمة من طينك

[duha]

قيصر
قريت القصيدة مرات ومرات
وفي كل مرة يزيد الاحساس بالحزن والاكتئاب على حال البلد الذي لايختلف كثيرا عما هنا
لكن
بين تلك السطور الحزينه
وجدت مصدر لطاقه كامنه لو تحركت يمكن تهد جبال
الحب والرحمه والصبر والاستعانة بالله يمكن يغيرو حاجات كتير



مش باقي مني

غير شوية رحمة من طينك..

علي شوية صبر من دينك..

قيصر
اختيار رائع
شكرا لك

[The Caesar]

مولان ليه كده بس ..هيه كانت ناقصه
اثريتي الموضوع


ضحي
اكيد اختيار رائع

[dr_e]

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

وذكريات سيئة عن ابشع حوادث راح ضحيتها العشرات

وانتي ف طابور العيش

بتبوسي إيد الزمن

ينولك لقمة

من حقك المشروع

منتهى الذل
لشعب بسيط
واه يابلد

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

هو دا حالنا: بقت كل حاجة ف بلدنا تخوف

القصيدة رائعة وتجيب اكتئاب فوري
بس فعلا بتعبر عن الحال
والصور اللي جابتها مولان زودتها
قريتها اكتر من مرة

شكرا ليك سيزر

[الورد الجوري]

السلام عليكم ..
اهلا قيصر
صراحة جمال بخيت ابدع في الكتابه
و كمان سمعتها في التلفزيون
و بجد مؤثرة

شكرا قيصر لجهودك

**
شكرا مولان للتعبير المصور

[عذبة الاحساس]

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

تسلم قيصر علي اختيارك

كان في حوار مع مني الشاذلي

في برنامجها العاشره مساء

وألقي هذه القصيده طبعا دي مش أول مره

أعرفه لكن دي أول مره أشوفه بيبكي

من شدة تأثره بالكلمات

وأبكانا جميعا ونحن نشاهده يوميها

ويمكن أنا دلوقتي وأنا بأتصفحها

عشت في نفس الحاله الي كنت فيها وكأني أسمعه يرددها الآن

بجد تسلم علي اختيارك يمكن أنا من عشاق العاميه

وأول ما تقراها تحس انك بتقرأ لصلاح جاهين

لكن القضايا المعاصره الي هو تناولها

هي الي بتخلينا نفرق بينهم هما التنين

أكيد هو اتأثر بيه في قراءاته

أنا آسفه علي الاطاله قيصر أنا عارفه انك مش بتحب الكلام الكتير

[عذبة الاحساس]

مولان بجد تسلمي

الصور الي جبتيها فعلا أثرت الموضوع

وزودته روعه وعبرت عن المعاني

الي بين السطور بمنتهي الدقه

بس ياريت فيه صور لقطر الصعيد

أو للعباره وضحياها

او لصخرة المقطم علشان تبقي شاهد علي العصر

ولا يلا كفايه علي الناس كدا

ربنا يرحمنا ويقوينا