مش باقي مني

[The Caesar]

مش باقي مني غير شوية ضي ف عينيا

أنا هاديهوملك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت

مش باقي مني غير شوية نبض ف عروقي

خُدي.. وعيشي..

وافتحي لي تابوت

أفرح بريحة ورد فرعوني

وربنا ف عوني

إذا دخلت الجنة ولاّ النار

هاشتاق إلي ضحكتك

وقعدتي ف الدار

والقهوة متحوجة

من طيبة العطار..

ف كل يوم الصبح

باشرب حليب قبطي

وف النهار والمسا

بامسك ستار الكعبة لو سبتي

واثبت إذا هربتي

أهديكي عمري وحسي وجوارحي

أهديكي جرحي

هو اللي باقي ف دنيتي لما خلص فرحي

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

ألم الجراح يتلم

مش باقي مني غير شوية دم

متلوثين بالهم

مُرين وفيهم سم

كانوا زمان شربات

والنكتة سكرهم

شربتهم الخفافيش

في قلب أوكارهم

مش باقي مني غير شوية دم.. ماأقدرشي

أسقيكي.. مواجعهم

وبرضه ما أقدرشي

أرميكي..

وأبيعهم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

مش باقي مني

غير شوية ضي ف عينيا

أنا مش عايزهم

لو كنت يوم هالمحك

وانتي بتوطي

في معركة مافيهاش

ولاطيارات ولاجيش

وانتي ف طابور العيش

بتبوسي إيد الزمن

ينولك لقمة

من حقك المشروع

مش باقي مني.. غير

شهقة ف نفس مقطوع..

بافتح لها سكة

ما بين رئة.. وضلوع..

ما بين غبار.. ودموع..

وأنا تحت حجر «المقطم»

ف الدويقة باموت

أنا.. والعطش.. والجوع..

يئن تحتي التراب

وانا صوتي مش مسموع..

ياحلمنا الموجوع..

من المرور ممنوع..

مستني لما يمر

موكب سلاطينك..

مش باقي مني

غير شوية رحمة من طينك..

علي شوية صبر من دينك..

مش باقي مني غير حبة غُنا تايهين

ف الضلمة مش لاقيين

حس الفواعلية..

ولا صوت مراكبي عَفي

فوق المعدية..

ولا صوت بناتي العذاري

في كل صبحية..

والغنوة.. أمنية

«ياما نفسي أقابل حبيبي..

وانا ع الزراعية»..

صوتك وصوتهم غاب..

وانا تحت حجر المقطم.. باموت لوحديّا..

الليلة راحت عيوني

تطل ع البستان..

وجناين الرمان..

رجعت لي توصف عناد الغل والدخان

وسحابة سودا تضلل

علي الغُنا الغلبان..

رجعت لي توصف هبوب الموت

علي الألوان..

رجعت لي توصف..

.. خيال الذل..

ف موائد الرحمن..

مش باقي مني غير شوية كُفر بشروقك

وأنا..

منبع الايمان..

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

...

السجن عشش ف قلبي

وماشي ف شوارعك..

نفس اللي باعني وخدعني

بالرخيص بايعك..

هاشيل حمولي انا

ولا هاشيل حملك ؟!

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضي ف عينيا

شعر : جمال بخيت

[سكر زياده]

قريتها اكتر من مره لكن مقدرتش افهم حاجه
انت بتتكلم عن ايه بالضبط
عن اللى حاصل فى البلد و لا ايه

[عتاب]

جمال بخيت .. بحب عاميته جدا
بيحكي حال البلد بطريقة جميلة
نزعل على نفسنا ونعجب بكلماته !
تسلم ايدك يا سيزر

[The Caesar]

المشاركة الأصلية بواسطة سكر زياده

قريتها اكتر من مره لكن مقدرتش افهم حاجه
انت بتتكلم عن ايه بالضبط
عن اللى حاصل فى البلد و لا ايه

سكر زياده
القصيده بتتكلم عن مصر
وانتقاد واضح لاحداث جرت ..وحاليه
قول كده صرخه شاعر يعترض عن حال بلد ..المفروض انه اكبر من كل هذا
لكن نقول ايه..

تحياتي لك

[The Caesar]

المشاركة الأصلية بواسطة عتاب

جمال بخيت .. بحب عاميته جدا
بيحكي حال البلد بطريقة جميلة
نزعل على نفسنا ونعجب بكلماته !
تسلم ايدك يا سيزر

عتاب
بصراحه انا مكنتش اعرف جمال بخيت
ودي اول مره اسمع عنه
عجبني كلام الاغنيه لاحمد سعد ..من فيلم دكان شحاته
وجيبت السوند تراكبتاع الفيلم وفيه الاغنيه
وبعد الاغنيه دورت علي الشاعر
لاقيت القصيده دي
قصيده مش عارف اوصفها ازاي
غير ربنا يسامحه ..
جاب للواحد اكتئاب و حزن...
جمال بخيت شكلي هاقراء ليه كتير اليومين الجايين
بشكرك عتاب علي اهتمامك ومتابعتك

[LENS]

في منتهي الروعه
بتعبر عن الهم اللي عايش فيه المصرين
شكرا يا سيزر انك وريتهالنا تحياتي
لينس

[The Caesar]

المشاركة الأصلية بواسطة LENS

في منتهي الروعه
بتعبر عن الهم اللي عايش فيه المصرين
شكرا يا سيزر انك وريتهالنا تحياتي
لينس

LENS
اينعم ..فعلا بتعبر عن اللي بيحصل في البلد
طبعا لو شفت فيلم دكان شحاته لخالد يوسف ..القصيده مع الفيلم ..اكتئاب فوري
وانا جيبت القصيده ..اي خدمه

[زهرة الحياة]

شكرا ياسيزر
انا حسيت انى عايشة هم وانا بقراه
فعلا دا حال مصر
ورغم انه كلامه عامى بس جميل وبيخلينا نعيش مع كلامه

بشكرك مرة تانية ياسيزر

[N O D Y]

المشاركة الأصلية بواسطة The Caesar

سكر زياده
القصيده بتتكلم عن مصر
وانتقاد واضح لاحداث جرت ..وحاليه
قول كده صرخه شاعر يعترض عن حال بلد ..المفروض انه اكبر من كل هذا
لكن نقول ايه..

تحياتي لك

شكراا على التوضيح
حلو اوى

[amr_miza]

قيصر ...

بعتبرها من أجمل القصائد اللي قرأتها باللهجة العامية
القصيدة للشاعر جمال بخيت، كنت ناوي أدرج القصيدة دي بس انت سبقتني

اسمحلي بالعودة مرة تانية للقصيدة علشان "افتت" كلماتها
تحس ان كلها حب وعشق وطيبة ورجاء وكل حاجة ....

مجرد تسجيل دخول ..

[روح العقل]

السلام عليكم ورحمة الله وبركاته

طبعا لو شفت فيلم دكان شحاته لخالد يوسف
..القصيده مع الفيلم ..اكتئاب فوري

قرأت القصيدة من شهرين كده

وشعرت بحزن

رأيت الفيلم قريبا
وسمعتها في الفيلم اغنيه

جاء الاكتئاب

بجد قاسيه جدا

هي مصر هتبقي اسوأ من كده ؟!
هو فيه اسوأ من كده
ربنا يسترها بجد

[The Caesar]

المشاركة الأصلية بواسطة زهرة الحياة

شكرا ياسيزر
انا حسيت انى عايشة هم وانا بقراه
فعلا دا حال مصر
ورغم انه كلامه عامى بس جميل وبيخلينا نعيش مع كلامه

بشكرك مرة تانية ياسيزر

زهرة الحياة
مش قصدي اوصلك الاحساس ده....
هوه مش ده حال كل مصر
مصر فيها خير كتر وناس مبسوطه كتير
بس الفساد والفقر اكتر.....

تحياتي لكي زهرة الحياة
وشكرا علي مرورك الكريم

[The Caesar]

المشاركة الأصلية بواسطة amr_miza

قيصر ...

بعتبرها من أجمل القصائد اللي قرأتها باللهجة العامية
القصيدة للشاعر جمال بخيت، كنت ناوي أدرج القصيدة دي بس انت سبقتني

اسمحلي بالعودة مرة تانية للقصيدة علشان "افتت" كلماتها
تحس ان كلها حب وعشق وطيبة ورجاء وكل حاجة ....

مجرد تسجيل دخول ..

عمرو
شاعرنا الجميل
اخبارك ايه؟
لو اعرف ان هاتيجي بسبب القصيده دي كنت الفتها من زمان

***
منتظر عودتك ..تفتت كل كلمه ..فتت يا عم ..وانا معاك
منتظر عودتك

[The Caesar]

المشاركة الأصلية بواسطة روح العقل

السلام عليكم ورحمة الله وبركاته


قرأت القصيدة من شهرين كده

وشعرت بحزن

رأيت الفيلم قريبا
وسمعتها في الفيلم اغنيه

جاء الاكتئاب

بجد قاسيه جدا

هي مصر هتبقي اسوأ من كده ؟!
هو فيه اسوأ من كده
ربنا يسترها بجد

روح العقل
مرحبا بكي

هوه فيلم بجد يجيب اكتئاب ..مش عايز اقلك الناس اللي كانوا معايا في الفيلم كانوا عاملين ازاي..بجد فيلم غبي
هيه مصر مش سيئه قوي
بس محتاجه تغيير بقي..علشان زهقنا و اتخنقنا من الفساد و البوظان في كل حاجه
مصر جميله وكلها خير
بس كفايه بقي......
لازم دم جديد وورح جديده
لازم يكون فيه امل في بكره
اتمني اني اشوف اليوم ده

تحياتي لكي ولمرورك العطر

[RoOoKa]

انا ادرجتها النهاردة فى الروائع ,,
قبل ما اشوفها هنا

قرأتها النهاردة مرة و سمعتها مرتين
وفى كل مرة ببقى هتجنن
غريبــة .. ملهاش حل
من اجمل ما سمعت وهسمع
دفا و برد حنان وقسوة ذل وعفة
كان قدير جدا فيها ...

شكرا قيصر اختيارك فوق الرائع طبعا كالعادة

عمرو عمرو ,, منتظرين التفتيت